গাণ্ডীকোটা সৰ্ব লক্ষ্মী

গাণ্ডীকোটা সৰ্ব লক্ষ্মী: Gandikota Sarva Lakshmi ভাৰতীয় ক্ৰিকেট মেচৰ ৰেফাৰী আৰু প্ৰাক্তন ঘৰুৱা ক্ৰিকেটাৰ আৰু প্ৰশিক্ষক।^১ তেওঁ আছিল এগৰাকী সোঁহাতৰ বেটছৱমেন আৰু সোঁহাতৰ দ্ৰুত-মধ্যম আউটছুইং বলাৰ।^২

লক্ষ্মী ২০১৯ চনৰ ১৪ মে'ত আন্তঃৰাষ্ট্ৰীয় ক্ৰিকেট পৰিষদৰ আন্তঃৰাষ্ট্ৰীয় মেচ ৰেফাৰীৰ পেনেলত নিযুক্তি পোৱা প্ৰথমগৰাকী মহিলা হিচাপে পৰিগণিত হয়।^৩৪ ৰেফাৰী হিচাপে কাম কৰা প্ৰথমখন মেচ আছিল ইংলেণ্ড আৰু অষ্ট্ৰেলিয়াৰ মাজত।

প্ৰাৰম্ভিক জীৱন

১৯৬৮ চনৰ ২৩ মে'ত অন্ধ্ৰপ্ৰদেশৰ ৰাজহমুন্দ্ৰিত ব্ৰাহ্মণ পৰিয়ালত জন্মগ্ৰহণ কৰা লক্ষ্মীয়ে ডাঙৰ-দীঘল হৈছিল জামছেদপুৰত য'ত তেওঁৰ পিতৃ টাটা ইঞ্জিনিয়াৰিং এণ্ড ইঞ্জিনিয়াৰ কোম্পানী (বৰ্তমান টাটা মটৰছ)ত কাম কৰিছিল। লক্ষ্মীয়ে টাটা নগৰত ক্ৰিকেট খেলিবলৈ আৰম্ভ কৰে। দশম বৰ্ডৰ পৰীক্ষাত "ভয়ংকৰভাৱে দুৰ্বল নম্বৰ" পোৱাৰ বাবে ১৯৮৬ চনত জামছেদপুৰ মহিলা মহাবিদ্যালয়ত নামভৰ্তিৰ পৰা বঞ্চিত হৈছিল যদিও কলেজৰ ক্ৰীড়া কোটাৰ জৰিয়তে জামছেদপুৰ মহিলা মহাবিদ্যালয়ত নামভৰ্তি কৰিবলৈ সক্ষম হৈছিল আৰু অনুভৱ কৰিছিল যে তেওঁ তেওঁলোকৰ ফ্ৰণ্টলাইন ফাষ্ট বলাৰ হ’ব পাৰে। ১৯৮৯ চনত দক্ষিণ কেন্দ্ৰীয় ৰেলৱেৰ চাকৰি লাভ কৰি হায়দৰাবাদলৈ গুচি যায় আৰু তাৰ পিছত দক্ষিণ কেন্দ্ৰীয় ৰেলৱেৰ ক্ৰিকেট দলৰ হৈ খেলিবলৈ আৰম্ভ কৰে।^৫৬

কৰ্মজীৱন

লক্ষ্মীয়ে ১৯৮৯ চনৰ পৰা ২০০৪ চনৰ ভিতৰত অন্ধ্ৰ মহিলা, বিহাৰ মহিলা, ৰেলৱে মহিলা, ইষ্ট জ’ন মহিলা আৰু দক্ষিণ মণ্ডল মহিলাকে ধৰি কেইবাটাও ঘৰুৱা দলৰ হৈ খেলিছিল।১৯৯১ চনত লক্ষ্মীৰ বিবাহ হয়। দক্ষিণ চেণ্ট্ৰেল ৰেলৱে দলৰ সৈতে ক্ৰিকেটলৈ ঘূৰি আহি ১৯৯৫ চনত প্ৰথমবাৰৰ বাবে আন্তঃৰেলৱেৰ খিতাপ দখল কৰাত সহায় কৰিছিল।১৯৯৯ চনত ভাৰত মহিলা ৰাষ্ট্ৰীয় ক্ৰিকেট দলৰ ইংলেণ্ড ভ্ৰমণৰ বাবে দলত নিৰ্বাচিত হৈছিল যদিও এখনো মেচ খেলা নাছিল। ২০০৪ চনত লক্ষ্মীয়ে ক্ৰিকেটৰ পৰা অৱসৰ গ্ৰহণ কৰে।^৫৬

লক্ষ্মীয়ে অৱসৰ গ্ৰহণৰ পিছত ২০১৪ চনলৈকে দক্ষিণ মধ্য ৰেলৱে ক্ৰিকেট দলৰ প্ৰশিক্ষক হিচাপে কাম কৰিছিল। ২০০৮–০৯ ৰ ঘৰুৱা মহিলা ক্ৰিকেটৰ বৰ্ষত তেওঁ প্ৰথমবাৰৰ বাবে মেচ ৰেফাৰী হিচাপে দায়িত্ব গ্ৰহণ কৰিছিল।^৫৭ ভাৰতীয় ক্ৰিকেট নিয়ন্ত্ৰণ ব’ৰ্ডে ঘৰুৱা ক্ৰিকেটত প্ৰথমবাৰৰ বাবে মহিলা ৰেফাৰীৰ অনুমতি দিয়াৰ পিছত ছিজনটোত অভিষেক ঘটোৱা পাঁচজনীয়া মহিলা ৰেফাৰীৰ এটা গোটৰ ভিতৰত আছিল। গ্ৰুপটোৰ ভিতৰত লক্ষ্মীহে ভাৰতীয় জাতীয় দলৰ হৈ খেলা নাছিল। ২০১৪ চনত বিচিচিআইৰ মেচ ৰেফাৰীৰ বাবে অৰ্হতা পৰীক্ষাৰ জৰিয়তে চৰ্টলিষ্ট কৰা পাঁচগৰাকী মহিলা প্ৰাৰ্থীৰ ভিতৰত তেওঁ আছিল।পৰৱৰ্তী সময়ত তেওঁক ল’ৰা আৰু পুৰুষৰ ঘৰুৱা খেলৰ অফিচিয়েট কৰাৰ অনুমতি দিয়া হৈছিল। লক্ষ্মীয়ে ১৯ বছৰ অনুৰ্ধৰ কুচ বিহাৰ ট্ৰফীত ইউ পি আৰু বংগৰ মাজত হোৱা খেলত প্ৰথমবাৰৰ বাবে আচৰণ বিধিৰ পেনাল্টি জাৰি কৰে।^৫ বিচিচিআইয়ে ২০১৮ চনত আইচিচিৰ আন্তঃৰাষ্ট্ৰীয় মেচ ৰেফাৰী পেনেলত নিযুক্তিৰ বাবে পৰামৰ্শ দিছিল।^৮

লক্ষ্মী ২০১৯ চনৰ মহিলা টি-২০ চেলেঞ্জৰ চাৰিওখন মেচৰ মেচ ৰেফাৰী আছিল।^৫ ২০১৯ চনৰ ১৪ মে'ত আইচিচিৰ আন্তঃৰাষ্ট্ৰীয় মেচ ৰেফাৰী পেনেলত নিযুক্তি পোৱা প্ৰথমগৰাকী মহিলা।^৯১০ ২০১৯ চনত সংযুক্ত আৰব আমিৰশ্বাহীত অনুষ্ঠিত হোৱা আইচিচি টি-২০ বিশ্বকাপ কোৱালিফায়াৰ প্ৰতিযোগিতাৰ তিনিগৰাকী মেচ ৰেফাৰীৰ ভিতৰত অন্যতম আছিল আৰু আইচিচিৰ ইভেণ্টত ৰেফাৰী হিচাপে নিৰ্বাচিত হোৱা প্ৰথমগৰাকী মহিলা আছিল।^১১ ২০১৯ চনৰ ডিচেম্বৰ মাহত ২০১৯ চনৰ ইউনাইটেড আৰব আমিৰশ্বাহী ট্ৰাই-নেচন ছিৰিজৰ উদ্বোধনী মেচৰ মেচ ৰেফাৰী হিচাপে নিৰ্বাচিত হয় আৰু পুৰুষৰ এদিনীয়া মেচ চোৱাচিতা কৰা প্ৰথমগৰাকী মহিলা হিচাপে নিৰ্বাচিত হয়।^১২

২০২৪ চনৰ ছেপ্টেম্বৰ মাহত, গাণ্ডিকোটা সৰ্বা লক্ষ্মীক ২০২৪ আইচিচি মহিলা টি২০ বিশ্বকাপৰ বাবে গঠিত সম্পূৰ্ণ মহিলা পৰ্যবেক্ষক দলৰ সদস্য হিচাপে মনোনীত কৰা হয়।^১৩