ক্ৰিষ্টিন ক্ৰুক

ক্ৰিষ্টিন ল’ৰা ক্ৰুক (জন্ম ৩০ ডিচেম্বৰ ১৯৮২) এগৰাকী কানাডিয়ান অভিনেত্ৰী। কিশোৰ ড্ৰামা ধাৰাবাহিক এজমেণ্টৰ জৰিয়তে অভিনয় জীৱনৰ পাতনি মেলা ক্ৰুক মূলতঃ চুপাৰহিৰো টেলিভিছন ধাৰাবাহিক স্মলভিলত (২০০১–২০০৯) লানা লেং, দ্য চি-ডব্লিউৰ কল্পবিজ্ঞান ধাৰাবাহিক বিউটি এণ্ড দ্য বিষ্টত (২০১২–২০১৬) কেথেৰিন চেণ্ডলাৰ আৰু চিবিচিৰ আইনী ড্ৰামা ধাৰাবাহিক বাৰ্ডেন অৱ ট্ৰুথত (২০১৮–২০২১) জ’য়ানা হানলেৰ চৰিত্ৰত কৰা অভিনয়ৰ বাবে সৰ্বাধিক পৰিচিত। ২০০৯ চনত তেওঁ আমেৰিকান সমৰ কলাভিত্তিক চলচ্চিত্ৰ ষ্ট্ৰীট ফাইটাৰ: দ্য লেজেণ্ড অৱ চুন-লীত চুন-লীৰ চৰিত্ৰত অভিনয় কৰিছিল।^১

প্ৰাৰম্ভিক জীৱন

ক্ৰুকৰ জন্ম ব্ৰিটিছ কলম্বিয়াৰ ভ্যানকুভাৰত হৈছিল।^২ তেওঁৰ পিতৃ-মাতৃ ডিগানা চে আৰু পিটাৰ ক্ৰুক দুয়ো লেণ্ডস্কেপ আৰ্কিটেক্ট আছিল।^৩ তেওঁৰ পিতৃ ডাচ বংশোদ্ভৱ। তেওঁৰ মাতৃ ইণ্ডোনেছিয়াত জন্মগ্ৰহণ কৰা এগৰাকী চীনা বংশোদ্ভৱ মহিলা আছিল। তেওঁৰ আইতাক চীনা জামাইকান আছিল।^৪ ভ্যানকুভাৰত থিতাপি লোৱাৰ আগতে তেওঁৰ মাতৃ আৰু আইতাকে ছিংগাপুৰ আৰু চলোমন দ্বীপপুঞ্জত বাস কৰিছিল।^৫ জাষ্টিন ক্ৰুক নামেৰে তেওঁৰ এগৰাকী সৰু ভনী আছে।^৬৭

ক্ৰুকে হাইস্কুলীয়া দিনলৈকে ৰাষ্ট্ৰীয় পৰ্যায়ত কাৰাটে^৩৮ আৰু জিমনাষ্টিকছৰ প্ৰশিক্ষণ লৈছিল যদিও মেৰুদণ্ডৰ বেঁকা হোৱা সমস্যাৰ (scoliosis) বাবে ১১ নং শ্ৰেণীত ইয়াৰপৰা অব্যাহতি লয়।^৮ ক্ৰুকে চাইমন ফ্ৰেজাৰ বিশ্ববিদ্যালয়ত ফৰেনচিক বিজ্ঞান বা মনোবিজ্ঞান অধ্যয়ন কৰাৰ পৰিকল্পনা কৰিছিল। কিন্তু তেওঁ তেতিয়া আচৰিত হৈছিল যেতিয়া চিবিচি টেলিভিছন ধাৰাবাহিক এজমেণ্টৰ এজন কাষ্টিং ডাইৰেক্টৰে তেওঁৰ হাইস্কুলত যোগাযোগ কৰিছিল।^৩

কেৰিয়াৰ

টেলিভিছন

ভ্যানকুভাৰ এলেকাৰ এখন হাইস্কুলৰ পটভূমিত নিৰ্মিত কিশোৰ ধাৰাবাহিক এজমেণ্টৰ প্ৰথম ছিজনৰ চিত্ৰগ্ৰহণ সমাপ্ত কৰি এজন এজেণ্ট নিয়োগ কৰাৰ পাছত ক্ৰুকে স্ৰ' হোৱাইট: দ্য ফেয়াৰেষ্ট অফ দেম অল নামৰ এখন টিভি ছবিত স্ৰ' হোৱাইটৰ মুখ্য চৰিত্ৰত অভিনয়ৰ সুযোগ পায়। এই ছবিখন ২০০২ চনত এচিবি-ত সম্প্ৰচাৰিত হৈছিল আৰু পিছলৈ ডিভিডি যোগে মুক্তি দিয়া হৈছিল। ২০০৪ চনৰ মাজভাগত ক্ৰুকে চাই-ফাই চেনেলৰ দুই খণ্ডৰ মিনি-চিৰিজ আৰ্থচীত টেনাৰৰ চৰিত্ৰত অভিনয় কৰে। ৰবাৰ্ট লিবাৰমেনৰ পৰিচালনাত ভ্যানকুভাৰত নিৰ্মিত এই ধাৰাবাহিকখন ২০০৪ চনৰ ১৩ ডিচেম্বৰত সম্প্ৰচাৰিত হৈছিল।

স্ৰ' হোৱাইটৰ পিছত ক্ৰুকৰ এজেণ্টে চিত্ৰনাট্যকাৰ আলফ্ৰেড গফ আৰু মাইলছ মিলাৰলৈ এটা অডিচন টেপ পঠিয়াইছিল। তেওঁলোকে সেই সময়ত ডব্লিউ-বি নেটৱৰ্কৰ (বৰ্তমানৰ দ্য চি-ডব্লিউ) বাবে স্মলভিল নামৰ এখন ধাৰাবাহিকৰ চৰিত্ৰ নিৰ্বাচন কৰি আছিল। ভ্যানকুভাৰত চিত্ৰগ্ৰহণ হ’বলগীয়া এই ধাৰাবাহিকখন কিশোৰ ক্লাৰ্ক কেণ্ট ছুপাৰমেন হোৱাৰ আগৰ জীৱনৰ ওপৰত আধাৰিত আছিল। গফ আৰু মিলাৰে ক্ৰুকক বাৰবেংকৰ ষ্টুডিঅ'লৈ ক্লাৰ্ক কেণ্টৰ প্ৰথম প্ৰেম লানা লেঙৰ চৰিত্ৰটোৰ বাবে অডিচন দিবলৈ মাতিছিল আৰু পিছলৈ তেওঁক সেই চৰিত্ৰটোৰ বাবে নিৰ্বাচিত কৰা হয়। কিছুসময়ৰ বাবে ক্ৰুকে একেলগে স্মলভিল আৰু এজমেণ্টত অভিনয় কৰিছিল। ২০০৫ চনত এজমেণ্টৰ সম্প্ৰচাৰ শেষ হয়। সাতটা ছিজনত অভিনয় কৰাৰ পাছত ২০০৮ চনৰ আৰম্ভণিতে কুপাৰে স্মলভিল ত্যাগ কৰে। অৱশ্যে আঠ নম্বৰ ছিজনত তেওঁৰ চৰিত্ৰটোৰ কাহিনীভাগ সমাপ্ত কৰিবলৈ অতিথি শিল্পী হিচাপে তেওঁ পুনৰ পাঁচটা খণ্ডত অভিনয় কৰিছিল।

২০০৯ চনত ক্ৰুকে চাক ধাৰাবাহিকৰ তৃতীয় ছিজনৰ কেইবাটাও খণ্ডৰ বাবে চুক্তিবদ্ধ হয়।^৯ ইয়াত তেওঁ হান্না নামৰ এজন কম্পিউটাৰ বিশেষজ্ঞৰ চৰিত্ৰত অভিনয় কৰিছিল।

২০১০ চনত তেওঁ টিভি চিনেমা বেন হুৰত জুডাহ বেন-হুৰৰ ভগ্নী তিৰ্জাহৰ চৰিত্ৰত অভিনয় কৰে। ক্ৰুকৰ দুটা পাইলট প্ৰকল্প (Hitched আৰু 17th Precinct) অৱশ্যে পূৰ্ণাংগ ধাৰাবাহিকলৈ ৰূপান্তৰিত নহ’ল।

২০১২ চনৰ ফেব্ৰুৱাৰীত ক্ৰুকক দ্য চি-ডব্লিউৰ বিউটি এণ্ড দ্য বিষ্টৰ পুনৰ নিৰ্মাণত মুখ্য চৰিত্ৰৰ বাবে ঘোষণা কৰা হয়।^১০ ধাৰাবাহিকখন ২০১২ চনৰ শেষৰফালে সম্প্ৰচাৰ আৰম্ভ হয় আৰু ইয়াৰ চতুৰ্থ ছিজনৰ পিছত ২০১৬ চনৰ ২৫ আগষ্টত শেষ হয়।

২০১৮ চনত ক্ৰুকে চিবিচি টেলিভিছনৰ ধাৰাবাহিক বাৰ্ডেন অৱ ট্ৰুথত জ’য়ানা হানলে নামৰ এগৰাকী অধিবক্তাৰ মুখ্য চৰিত্ৰত অভিনয় কৰে।^১১ এই ধাৰাবাহিকখন চাৰিটা ছিজন চলাৰ পিছত ২০২১ চনত শেষ হয়।

২০২৪ চনত ক্ৰুকক মাৰ্ডাৰ ইন এ স্মল টাউন নামৰ এখন ক্ৰাইম ড্ৰামা ধাৰাবাহিকত মুখ্য মহিলা চৰিত্ৰত অভিনয়ৰ বাবে নিৰ্বাচিত কৰা হয়, যিখন কানাডাৰ গ্লোবেল টেলিভিছন নেটৱৰ্ক আৰু আমেৰিকাৰ ফক্সত সম্প্ৰচাৰিত হয়।^১২ ২০২৫ চনত এই ধাৰাবাহিকখন দ্বিতীয়টো ছিজনৰ বাবে নবীকৰণ কৰা হয়।

চলচ্চিত্ৰ

ক্ৰুকে ২০০৪ চনৰ কমেডী ছবি ইউৰোট্ৰিপত অভিনয় কৰিছিল। ইয়াত তেওঁ নায়কৰ প্ৰেমিকাৰ চৰিত্ৰত অভিনয় কৰিছিল যিয়ে এজন সংগীতজ্ঞৰ (মেট ডেমনে অভিনয় কৰিছিল) সৈতে নায়কক প্ৰতাৰণা কৰে।

২০০৫ চনৰ আৰম্ভণিতে ক্ৰুকে কানাডিয়ান স্বতন্ত্ৰ চলচ্চিত্ৰ পাৰ্টিচনত (২০০৭) অভিনয় কৰিবলৈ চুক্তিবদ্ধ হয়। ইয়াত তেওঁ নাচিম নামৰ এগৰাকী ১৭বছৰীয়া কিশোৰীৰ চৰিত্ৰত অভিনয় কৰিছিল, যাৰ পৃথিৱীখন ১৯৪৭ চনৰ ভাৰত বিভাজনৰ আঘাতত চূৰ্ণ-বিচূৰ্ণ হৈ পৰিছিল। এই চৰিত্ৰটো এজন প্ৰাক্তন ব্ৰিটিছ ভাৰতীয় সেনা বিষয়াৰ প্ৰেমত পৰে। ২০০৬ চনৰ গ্ৰীষ্মকালত তেওঁ কমিক বুক লেখক তথা শিল্পী কাৰে এণ্ড্ৰিউজৰ চুটি ছবি ড্ৰিম প্ৰিন্সেছত অভিনয় কৰিছিল। এই ছবিখন আছিল শ্লিপিং বিউটি কাহিনীৰ এক আধুনিক বৈজ্ঞানিক সংস্কৰণ। অৱশ্যে এই ছবিখন কেতিয়াও সম্প্ৰচাৰিত নহ’ল।^১৩ ক্ৰুকে ২০০৯ চনৰ ছবি ষ্ট্ৰীট ফাইটাৰ: দ্য লেজেণ্ড অৱ চুন-লীত অভিনয় কৰিছিল, য’ত তেওঁ চুন-লীৰ নাম ভূমিকাত অভিনয় কৰিছিল।^১৪ তেওঁ ২০১১ চনৰ ছবি মিছন: ইম্পচিবল – ঘোষ্ট প্ৰট’কলৰ বাবেও পৰীক্ষা দিছিল, কিন্তু সেই চৰিত্ৰটো পাউলা পেটনে লাভ কৰে।

২০১০ চনৰ আৰম্ভণিতে ক্ৰুকে জাপানী হৰৰ চিনেমা ভেম্পায়াৰত (২০১১) অভিনয়ৰ বাবে চুক্তিবদ্ধ হয়।^১৫ ২০১০ চনতে তেওঁ সংগীতজ্ঞ হিল জাইনীৰ "আই হাৰ্ড" নামৰ সংগীত ভিডিঅ’টোত অভিনয় কৰিছিল।^১৬

ক্ৰুকে আৰভাইন ৱেলছৰ উপন্যাসৰ আধাৰত নিৰ্মিত ছবি আৰভাইন ৱেলছৰ এক্সট্ৰাচিত (২০১১) হিদাৰৰ চৰিত্ৰত অভিনয় কৰিছিল। ইয়াৰ উপৰি তেওঁ কল্পবিজ্ঞান কমেডী ছবি স্পেচ মিল্কশ্বেকত (২০১২) টিল্ডাৰ চৰিত্ৰত অভিনয় কৰিছিল।

চলচ্চিত্ৰ নিৰ্মাণ

পাৰ্টিচনৰ ছেটত লগ পোৱা ৰোজেনা ভূৰাৰ সৈতে মিলি ক্ৰুকে 'পাৰ্বতী ক্ৰিয়েটিভ ইনক' (Parvati Creative Inc) নামৰ এটা প্ৰডাকচন কোম্পানী আৰম্ভ কৰিছিল। এই কোম্পানীটোৱে মূলতঃ মহিলাৰ দৃষ্টিভংগীৰে মানৱ-কেন্দ্ৰিক চলচ্চিত্ৰ নিৰ্মাণৰ ওপৰত গুৰুত্ব দিয়ে।^১৭১৮ পাৰ্বতীৰ প্ৰথমটো নিৰ্মাণ আছিল ৰিক ৰোজেণ্টালৰদ্বাৰা পৰিচালিত এটা চুটি ছবি 'ব্লিংক' (Blink), য’ত ক্ৰুকৰ নাম এজনী কাৰ্যবাহী প্ৰযোজক হিচাপে তালিকাভুক্ত আছিল।^১৯২০ তেওঁলোকৰ দ্বিতীয়টো প্ৰকল্প আছিল 'কুইনী' নামৰ এখন কমেডী ৱেব ধাৰাবাহিক য'ত ক্ৰুকৰ বান্ধৱী অলিভিয়া চেঙে অভিনয় কৰিছিল।

বিজ্ঞাপনৰ কাম

২০০৩ চনত নিউট্ৰ'জিনা (Neutrogena)-ই তেওঁক তেওঁলোকৰ বিশ্বব্যাপী বিজ্ঞাপন অভিযানৰ বাবে মুখপাত্ৰ (spokesmodel) হিচাপে নিযুক্ত কৰে। এই ভূমিকাৰ জৰিয়তে ক্ৰুকে জেনিফাৰ লাভ হিউইট আৰু মেণ্ডী মূৰৰ দৰে কিশোৰ তাৰকাসকলৰ পদাংক অনুসৰণ কৰিছিল। ২০০৫ চনত তেওঁ নিউট্ৰ'জিনাৰ সৈতে আন দুবছৰৰ বাবে তেওঁৰ চুক্তি নৱীকৰণ কৰে আৰু ইয়াৰ লগে লগে তেওঁ কোম্পানীটোৰ আটাইতকৈ দীৰ্ঘদিন ধৰি কাম কৰা মডেল মুখপাত্ৰ হিচাপে পৰিগণিত হয়।^২১

কণ্ঠ অভিনয়

২০১৭ চনৰ আগষ্ট মাহত ক্ৰুকে প্ৰাচীন চীনা সমৰ কলাৰ এক কাল্পনিক জগতৰ পটভূমিত নিৰ্মিত গ্ৰাফিক নভেল ধাৰাবাহিক ছুয়ান ছাগাত ৰাজকুমাৰী ছুয়ানৰ চৰিত্ৰত কণ্ঠদান কৰিছিল।^২২২৩ তেওঁ ৰবট চিকেন নামৰ অনুষ্ঠানটোত বিউটি এণ্ড দ্য বিষ্টৰ তেওঁৰ কেথেৰিন চেণ্ডলাৰ চৰিত্ৰটোৰ বাবেও পুনৰ কণ্ঠদান কৰিছিল।^২৪

ব্যক্তিগত জীৱন

ক্ৰুকে শ্বটোকান কাৰাটীত পাৰ্পল বেল্ট লাভ কৰিছে আৰু তেওঁ এক্ৰবেটিক্স তথা চীনা সমৰ কলা বা উশ্বুত পাৰ্গত।^২৫২৬

স্নাতক ডিগ্ৰী অধ্যয়ন আৰু প্ৰডাকচনৰ কামৰ বাবে কেইবছৰমান টৰণ্টোত থকাৰ পিছত ২০২২ চনৰ ছেপ্টেম্বৰ মাহত ক্ৰুক পুনৰ ভ্যানকুভাৰলৈ ঘূৰি আহে।^২৭২৮ ২০১২ চনৰ অক্টোবৰ মাহত 'লাইভ উইথ কেলি এণ্ড মাইকেল' অনুষ্ঠানত তেওঁ উল্লেখ কৰিছিল যে তেওঁ এগৰাকী পেস্কেটেৰিয়ান (মাছ খোৱা নিৰামিষভোজী)।^{২৯৩০৩১}

২০১৭ চনৰ নৱেম্বৰ মাহত ক্ৰুক আৰু তেওঁৰ 'স্মলভিল'ৰ সহ-অভিনেত্ৰী এলিসন ম্যকক কীথ ৰেণিয়েৰদ্বাৰা প্ৰতিষ্ঠিত 'এনক্সিয়াম' (NXIVM) নামৰ এটা মাল্টি-লেভেল মাৰ্কেটিং সংস্থা তথা ধৰ্মীয় গোটৰ সৈতে জড়িত থকাৰ অভিযোগ উঠিছিল। ২০১৮ চনৰ মাৰ্চ মাহত ৰেণিয়েৰক গ্ৰেপ্তাৰ কৰাৰ পাছত ক্ৰুকে তেওঁৰ টুইটাৰ একাউণ্টৰ জৰিয়তে সদৰি কৰিছিল যে তেওঁ এনক্সিয়ামক এটা "আত্ম-সহায়" গোট বুলি ভাবিহে যোগদান কৰিছিল, কিন্তু ২০১৩ চনতে তেওঁ এই গোট ত্যাগ কৰিছিল। তেওঁ লগতে উল্লেখ কৰে যে সেই গোটত থকাৰ সময়ত তেওঁ কোনো ধৰণৰ অবৈধ বা ক্ষতিকাৰক কাৰ্যকলাপ প্ৰত্যক্ষ কৰা নাছিল। ক্ৰুকৰ এই বক্তব্যক অভিনেত্ৰী ছাৰা এডমণ্ডচনেও সমৰ্থন কৰিছিল।^৩২ পৰৱৰ্তী সময়ত ম্যাকে উল্লেখ কৰিছিল যে ক্ৰুকেহে তেওঁক এনক্সিয়ামৰ সৈতে চিনাকি কৰাই দিছিল।^৩৩