কোছিভৰ চিত্ৰিত মৃৎশিল্প

কোছিভৰ চিত্ৰিত মৃৎশিল্প হুতছুলসকলৰ পৰম্পৰাগত লোকশিল্প আৰু ইউক্ৰেইনীয় মৃৎশিল্পৰ এটা প্ৰকাৰ। ইয়াত বিভিন্ন ধৰণৰ বাচন-বৰ্তন, শিশুৰ খেলনা, স্মাৰক সামগ্ৰী, চৌকাৰ টাইল আৰু সজ্জাগত টাইল নিৰ্মাণ কৰা হয়। এই মৃৎশিল্প জটিল নিৰ্মাণ পদ্ধতি আৰু বিশেষ চিত্ৰশৈলীৰ বাবে পৰিচিত। পৰম্পৰাগতভাৱে পিষ্টিন^১ গাঁৱৰ মৃৎশিল্পকো কোছিভৰ মৃৎশিল্পৰ অন্তৰ্ভুক্ত কৰা হয়।^২

২০১৯ চনৰ ১৩ ডিচেম্বৰত কোছিভৰ চিত্ৰিত মৃৎশিল্পক ইউনেস্কোৰ অমূৰ্ত সাংস্কৃতিক ঐতিহ্যৰ তালিকাত অন্তৰ্ভুক্ত কৰা হয়।^৩

ইতিহাস

ইভানো-ফ্ৰাংকিভস্ক অঞ্চলৰ কোছিভৰ আশে-পাশে থকা অঞ্চল মৃৎশিল্পৰ মাটিৰে সমৃদ্ধ। ^৪ সেয়েহে ইয়াত প্ৰাচীন কালৰপৰাই মৃৎশিল্পৰ বিকাশ ঘটিছে। হুতছুল মৃৎশিল্পৰ গঠন ১৫শ শতিকাৰপৰা আৰম্ভ হৈছিল। পিছলৈ ইয়াৰ ভিতৰত কোছিভৰ মৃৎশিল্প আটাইতকৈ বিখ্যাত হৈ পৰে। ইয়াৰ নাম ইয়াৰ উৎপত্তিস্থল কোছিভৰপৰা আহিছে। হুতছুল অঞ্চলৰ বহু গাঁৱত মৃৎশিল্প আছিল প্ৰধান শিল্প। ইয়াৰ ফলত স্থানীয় শিল্পীসকলে এই শিল্পৰ কৌশল দ্ৰুতগতিত উন্নত কৰাৰ লগতে নিজা আৰু অনন্য শৈলী গঢ়ি তুলিবলৈ সক্ষম হৈছিল। এই শৈলীৰ বিকাশৰ লগে লগে নিৰ্মাণ আৰু চিত্ৰাংকনৰ নতুন নতুন কৌশলৰ সৃষ্টি হৈছিল।

হুতছুল শিল্পীসকলে কলহ, জগ, বাটি, কাপ আদি দৈনন্দিন ব্যৱহাৰৰ প্ৰয়োজনীয় সামগ্ৰী নিৰ্মাণ কৰিছিল। কিন্তু বৰ্তমান পৰিচিত ব্যাৱহাৰিক আৰু সজ্জাগত মৃৎশিল্পৰ বিকাশ ১৮শ শতিকাৰ শেষভাগ আৰু ১৯শ শতিকাৰ আৰম্ভণিতে হৈছিল। সেই সময়ত মূলতঃ চাকিৰ আধাৰ আৰু টাইল নিৰ্মাণ কৰা হৈছিল। কোছিভত নিৰ্মাণ কৰা টাইলৰ চৌকা কেৱল হুতছুল অঞ্চলতেই নহয়, ৰোমানিয়া আৰু হাংগেৰীতো সহজে বিক্ৰী হৈছিল। কোছিভৰ আটাইতকৈ পুৰণি টাইলসমূহ বুখাৰেষ্ট আৰু ভিয়েনাৰ সংগ্ৰহালয়ত সংৰক্ষিত হৈ আছে।

মৃৎপাত্ৰত বিভিন্ন ধৰণৰ পানীৰ ৰঙেৰে চিত্ৰ অংকন কৰা হৈছিল। ইয়াত ফুল, গছ, জীৱ-জন্তু যেনে ঘোঁৰা, হৰিণ, ভালুক আৰু চৰাইৰ শৈলীকৃত ৰূপ অংকন কৰা হৈছিল। বিভিন্ন ধৰণৰ মানুহৰ চৰিত্ৰ যেনে চিকাৰী, যোদ্ধা, ডাকঘৰৰ কৰ্মচাৰী আৰু সংগীতজ্ঞৰ ছবিও অংকন কৰা হৈছিল। সাধু-সন্তৰ ভিতৰত সাধাৰণতে সন্ত জৰ্জ আৰু সন্ত নিকোলাছৰ ছবি অংকন কৰা হৈছিল। বহু সময়ত টাইলৰ ওপৰত সম্পূৰ্ণ ঘৰুৱা জীৱনৰ দৃশ্যও অংকন কৰা হৈছিল।

১৯৫৯ চনত কোছিভৰ প্ৰয়োগমূলক কলা বিদ্যালয়ত শিল্পমৃৎশিল্প বিভাগ মুকলি কৰা হয়। বৰ্তমান এই প্ৰতিষ্ঠানটো লভিভ ৰাষ্ট্ৰীয় কলা একাডেমীৰ কোছিভ শাখাৰ অংশ। এই বিভাগৰ শিক্ষা কোছিভ, পিষ্টিন আৰু কুটিৰ মৃৎশিল্পৰ ঐতিহ্যৰ উৎকৃষ্ট নিদৰ্শনৰ ওপৰত আধাৰিত।^৫

১৯৬০ চনত ইউক্ৰেইনীয় ছোভিয়েট সমাজতান্ত্ৰিক গণৰাজ্যৰ শিল্পী সংঘৰ অধীনত কোছিভত শিল্প পুঁজি গঠন কৰা হয়। ১৯৬৮ চনত ইউক্ৰেইনীয় ছোভিয়েট সমাজতান্ত্ৰিক গণৰাজ্যৰ শিল্প পুঁজিৰ অধীনত শিল্প উৎপাদন প্ৰতিষ্ঠান স্থাপন কৰা হয়। ১৯৮১ চনত ইভানো-ফ্ৰাংকিভস্ক শিল্পী সংঘৰ অধীনত কোছিভ শাখা গঠন কৰা হয়। ইয়াৰ ফলত শিল্পীসকলে পৃথকভাৱে কাম কৰাৰ লগতে নিজা শাখা লাভ কৰে।^৬