কেণ্ডিচ পিন্টো

কেণ্ডিচ পিণ্টো (Candice Pinto; জন্ম: ১২ মাৰ্চ ১৯৮১) এগৰাকী ভাৰতীয় সৌন্দৰ্য প্ৰতিযোগিতাৰ খিতাপ বিজয়ী যিয়ে মিছ ট্যুৰিজম ইণ্টাৰনেশ্যনেল ২০০১ খিতাপ জয় কৰিছিল।^১ তেওঁ লেকমী ফেশ্বন উইক আৰু ইণ্ডিয়া ফেশ্বন উইকৰ দৰে প্ৰিমিয়াৰ ফেশ্বন অনুষ্ঠানসমূহৰ এগৰাকী নিয়মীয়া অংশগ্ৰহণকাৰী আৰু বহুতো ভাৰতীয় ফেশ্বন আলোচনীৰ বেটুপাতত তেওঁক দেখা যায়।^২

প্ৰাৰম্ভিক জীৱন আৰু শিক্ষা

পিণ্টোৰ জন্ম ভাৰতৰ মুম্বাইৰ এটা কেথলিক পৰিয়ালত হৈছিল। তেওঁৰ পিতৃ-মাতৃৰ এজন গোৱাৰ আৰু আনজন মংগালোৰৰ আছিল^২ আৰু তেওঁৰ তিনিজন ভাই-ভনী আছে। তেওঁ মুম্বাইৰ উপনগৰ কুৰ্লাৰ হলী ক্ৰছ হাইস্কুলত পঢ়া-শুনা কৰিছিল; আৰু পিছলৈ ছাইনৰ চাউথ ইণ্ডিয়ান এডুকেশ্যন ছচাইটি কলেজৰপৰা স্নাতক ডিগ্ৰী লাভ কৰে, য'ত তেওঁক অৰ্থনীতি বিষয়ত স্নাতকোত্তৰ ডিগ্ৰী প্ৰদান কৰা হৈছিল।^১

তেওঁ কলেজীয়া দিনত ককায়েকৰ সৈতে মডেলিং কৰিছিল। যদিও তেওঁৰ পৰিয়ালে প্ৰথম অৱস্থাত তেওঁ মডেলিং কেৰিয়াৰ গঢ়াটো বিচৰা নাছিল, তথাপি তেওঁলোকে গ্লেডৰাগছ প্ৰতিযোগিতাত অংশগ্ৰহণ কৰাত সহায় কৰিছিল।^৩ স্নাতক ডিগ্ৰী লাভ কৰাৰ পাছত তেওঁ এগৰাকী এনিমেটৰ হিচাপে কেৰিয়াৰ গঢ়াৰ ইচ্ছা কৰিছিল আৰু ভৱিষ্যতে কেতিয়াবা ইয়াক আঁকোৱালি লোৱাৰ পৰিকল্পনাও কৰি থৈছে।^৪

কেৰিয়াৰ

১৯ বছৰ বয়সত পিণ্টোৱে ২০০০ চনৰ মাৰ্চ মাহত অনুষ্ঠিত সপ্তম গ্লেডৰাগছ মেগা মডেল প্ৰতিযোগিতাত বিজয়ী হৈ তেওঁৰ প্ৰথমটো সৌন্দৰ্য খিতাপ অৰ্জন কৰে। ইয়াৰ পিছত তেওঁ আন্তঃৰাষ্ট্ৰীয় মেগা মডেল প্ৰতিযোগিতা আৰু জাৰ্মানীত অনুষ্ঠিত মিছ ইণ্টাৰকণ্টিনেণ্টেল প্ৰতিযোগিতাৰ দৰে আন্তঃৰাষ্ট্ৰীয় মঞ্চত ভাৰতক প্ৰতিনিধিত্ব কৰে।

তেতিয়াৰেপৰা পিণ্টো লেকমী ফেশ্বন উইক আৰু ইণ্ডিয়া ফেশ্বন উইকৰ দৰে ফেশ্বন অনুষ্ঠানসমূহৰ এগৰাকী নিয়মীয়া মুখ হৈ পৰিছে; আৰু তেওঁক নিয়মীয়াকৈ ভাৰতীয় ফেশ্বন আলোচনীৰ বেটুপাতত দেখা যায়।^২

২০০১ চনত জাৰ্মানীৰ মিউনিকত অনুষ্ঠিত টপ মডেল অৱ দা ৱৰ্ল্ড প্ৰতিযোগিতাত পিণ্টোৱে শীৰ্ষ দহজনৰ ভিতৰত স্থান লাভ কৰাৰ লগতে 'বেষ্ট বডী' খিতাপ জয় কৰে। পিছৰ বছৰত তেওঁ মালয়েছিয়াত অনুষ্ঠিত মিছ ট্যুৰিজম ইণ্টাৰনেশ্যনেলৰ মুকুট পিন্ধা প্ৰথমগৰাকী ভাৰতীয় হিচাপে পৰিগণিত হয়।^১ ইয়াৰ লগতে তেওঁ 'মিছ ফ্ৰেছ ফেচ ২০০২' খিতাপো লাভ কৰিছিল। ২০২০ চনত ইণ্ডিয়ান ফেশ্বন এৱাৰ্ডছৰদ্বাৰা তেওঁক 'লেজেণ্ডৰী ৰোল মডেল' হিচাপে স্বীকৃতি দিয়া হয়।^৫