এলা

নৰ জিলা হাজি আমিনুদ্দিন (জন্ম ৩১ জুলাই ১৯৬৬; এলা নামে অধিক পৰিচিত) মালয়েছিয়াৰ এগৰাকী গায়িকা, সংগীতজ্ঞ আৰু অভিনেত্ৰী।^১২৩

তেওঁ পুলাউ পিনাংৰ গেলুগৰত জন্মগ্ৰহণ কৰিছিল। তেওঁৰ সংগীত জীৱন ১৯৮৩ চনত আৰম্ভ হয়, যেতিয়া তেওঁ ১৭ বছৰ বয়সত মুনৰেকাৰ নামৰ এটা সংগীত দলত যোগদান কৰিছিল। পিছত তেওঁ সেই দল এৰি নাইট ক্লাবত গায়িকা হিচাপে কাম আৰম্ভ কৰে। নাইট ক্লাব গায়িকা হিচাপে সফলতা লাভ কৰাৰ পিছত, তেওঁৰ প্ৰতিভা দ্য বয়চ নামৰ ৰক দলৰ দৃষ্টিগোচৰ হয় আৰু পিছত দলটো এলা এণ্ড দ্য বয়চ নামেৰে জনপ্ৰিয় হয়। এই দলটোৱে ডুৱা ইনচান বাৰচিন্তা গীতৰ জৰিয়তে বিশেষ জনপ্ৰিয়তা লাভ কৰে।^৪৫

১৯৮৭ চনত এলাই এলা এণ্ড দ্য বয়চ এৰি দিয়াৰ পিছত একক গায়িকা হিচাপে নিজৰ কেৰিয়াৰ আৰম্ভ কৰে আৰু ৱাৰ্ণাৰ মিউজিক মালয়েছিয়াৰ সৈতে চুক্তিবদ্ধ হয়। তেওঁৰ প্ৰথম একক এলবাম পেংগেমিছ চিন্তা (১৯৮৯) মুক্তি পায় আৰু ১,০০,০০০তকৈ অধিক কপি বিক্ৰী হয়।^৬৭ এই এলবামটোৰ জনপ্ৰিয় গীতসমূহৰ ভিতৰত "পেংগেমিছ চিন্তা" আৰু "পাৰমাটা বিৰু" অন্তৰ্ভুক্ত। তাৰ পিছত তেওঁ পুতেৰী কোটা (১৯৯০), ৩০১১০ (১৯৯২) আৰু এলা ইউএছএ (১৯৯৪) আদি বহুতো সফল এলবাম মুক্তি দিয়ে।

সংগীতৰ উপৰিও তেওঁ অভিনয় জগততো কাম কৰে আৰু বায়াংগান মাউত (১৯৯১), পেমবুৰু বায়াং (১৯৯৩) আৰু হান্যা কাৱান (১৯৯৭) চলচ্চিত্ৰত অভিনয় কৰে।^৮ তেওঁ L.A. Gear, Levi's আৰু Canon আদি আন্তঃৰাষ্ট্ৰীয় ব্ৰেণ্ডৰ দূত হিচাপেও কাম কৰিছে।

তেওঁৰ কেৰিয়াৰৰ উল্লেখযোগ্য সাফল্যসমূহৰ ভিতৰত আছে মালয়েছিয়াৰ প্ৰথম মহিলা শিল্পী হিচাপে ভিডিঅ' এলবাম ৰেকৰ্ড কৰা, যুক্তৰাষ্ট্ৰত সম্পূৰ্ণ এলবাম ৰেকৰ্ড কৰা আৰু দ্য মালয়েছিয়া বুক অৱ ৰেকৰ্ডছত "সৰ্বাধিক এলবাম বিক্ৰী কৰা মহিলা শিল্পী" হিচাপে অন্তৰ্ভুক্ত হোৱা। তেওঁ কমনৱেলথ গেমছৰ থিম গীত গোৱা একমাত্ৰ মালয়েছিয়ান শিল্পী।

মাধ্যমসমূহে তেওঁক মালয়েছিয়াৰ ৰক ৰাণী বুলি অভিহিত কৰিছে। তেওঁ মালয়েছিয়াৰ ৰক সংগীতত সফলভাৱে আধিপত্য বিস্তাৰ কৰা অন্যতম মহিলা গায়িকা হিচাপে পৰিচিত। ইয়াৰ উপৰিও, তেওঁ লাইভ সংগীত অনুষ্ঠানৰ বাবে সৰ্বাধিক পাৰিশ্ৰমিক লাভ কৰা শিল্পীসকলৰ ভিতৰত অন্যতম।