এমি হেৰিছ-উইলক

এমি মেলিনা হেৰিছ-উইলক (ইংৰাজী ভাষা: Amy Melissa Harris-Willock; জন্ম: ১৪ ছেপ্টেম্বৰ ১৯৮৭) এগৰাকী ব্ৰিটিছ দীঘল জাঁপবিদ। তেওঁ এণ্টিগুৱান মূলৰ খেলুৱৈ আৰু বৰ্তমান এমি হেৰিছ নামেৰে প্ৰতিযোগিতাত অংশগ্ৰহণ কৰে।^১ ইয়াৰ উপৰি তেওঁ সৌন্দৰ্য প্ৰতিযোগিতা মিছ কেৰিবিয়ান ইউকেৰ প্ৰাক্তন খিতাপধাৰী।^২

এথলেটিকছ কেৰিয়াৰ

এমি হেৰিছ নামৰ জন্ম-সূত্ৰে লাভ কৰা নামেৰে প্ৰতিযোগিতাত অংশগ্ৰহণ কৰা এমি ইউকে এথলেটিকছৰ এগৰাকী সদস্য। তেওঁ ২০০৪ চনত ভিক্টোৰিয়াৰ বেণ্ডিগোত অনুষ্ঠিত কমনৱেলথ যুৱ ক্ৰীড়াত ৬.১৯ মিটাৰ জাঁপ মাৰি দীঘল জাঁপত সোণৰ পদক জয় কৰিছিল।^৩ ইয়াৰ পিছত ২০০৫ চনত লিথুৱানিয়াৰ কাউনাছত অনুষ্ঠিত ইউৰোপীয় এথলেটিকছ জুনিয়ৰ চেম্পিয়নশ্বিপত তেওঁ ৬.৩৫ মিটাৰ জাঁপ দি ব্যক্তিগত শ্ৰেষ্ঠ প্ৰদৰ্শনেৰে ৰূপৰ পদক লাভ কৰে।^৪৫

২০০৬ চনৰপৰা ২০১২ চনলৈ তেওঁ ইংলেণ্ড এথলেটিকছ চেম্পিয়নশ্বিপৰ ২০ বছৰৰ অনুৰ্ধৰ মহিলাৰ ইনডৰ দীঘল জাঁপৰ ৰেকৰ্ডৰ অধিকাৰী আছিল। বাৰ্চফিল্ড হেৰিয়াৰ্ছ এথলেটিক ক্লাবৰ হৈ প্ৰতিযোগিতাত অংশগ্ৰহণ কৰি তেওঁ ৬.৪০ মিটাৰ জাঁপ দি এই অভিলেখ গঢ়িছিল।^৬

হেৰিছে ২০০৮ চনৰপৰা ২০১২ চনলৈ ফ্লৰিডা ষ্টেট ইউনিভাৰ্চিটিত অধ্যয়ন কৰিছিল। এই সময়ছোৱাত তেওঁ ফ্লৰিডা ষ্টেট চেমিনলছ^৭৮ আৰু বাৰ্চফিল্ড হেৰিয়াৰ্ছৰ হৈ খেলিছিল।^৯ ২০১০ চনত তেওঁ বাৰ্মিংহামত অনুষ্ঠিত ইউকে চেম্পিয়নশ্বিপত ৰূপৰ পদক আৰু গেটছহেড ইণ্টাৰনেশ্যনেল ষ্টেডিয়ামত অনুষ্ঠিত ইংলেণ্ড ট্ৰেক এণ্ড ফিল্ড চেম্পিয়নশ্বিপত সোণৰ পদক লাভ কৰে।^৯

২০১২ চনত তেওঁ আউটডৰ আৰু ইনডৰ দীঘল জাঁপ উভয়তে আটলাণ্টিক ক’ষ্ট কনফাৰেন্স চেম্পিয়ন আছিল।^৮ তেওঁ ফ্লৰিডা ষ্টেটৰ ইতিহাসত ২১ ফুট ১.২৫ ইঞ্চি জাঁপ দি চতুৰ্থ শ্ৰেষ্ঠ স্থান দখল কৰে।^৮

২০১৪ চনত হেৰিছে তেওঁৰ পূৰ্বপুৰুষৰ ঐতিহ্যৰ প্ৰতি সন্মান জনাই এণ্টিগুৱা আৰু বাৰ্বুডাৰ হৈ খেলিবলৈ আৰম্ভ কৰে। তেওঁ এণ্টিগুৱা এণ্ড বাৰ্বুডা এথলেটিক এছোচিয়েচনৰ সদস্য আৰু বৰ্তমান দীঘল জাঁপৰ ৰাষ্ট্ৰীয় অভিলেখধাৰী। তেওঁ ২০১৪ চনৰ কমনৱেলথ গেমছৰ দীঘল জাঁপ প্ৰতিযোগিতাত অংশগ্ৰহণ কৰিছিল।^১০

মিছ কেৰিবিয়ান ইউকে ২০১৫

এমি হেৰিছ-উইলকে ২০১৫ চনৰ মিছ কেৰিবিয়ান ইউকে প্ৰতিযোগিতাত অংশ লয় আৰু জয়লাভ কৰে। ২০১৫ চনৰ ২৫ জুলাইত বাৰ্মিংহামত অনুষ্ঠিত এই প্ৰতিযোগিতাৰ প্ৰাৰম্ভিক পৰ্যায়ত চাৰিজন চূড়ান্ত প্ৰতিযোগীৰ মাজৰপৰা তেওঁ নিৰ্বাচিত হৈছিল। ইয়াৰ পিছত তেওঁ সমগ্ৰ যুক্তৰাজ্যৰপৰা অহা অন্য ১৬ গৰাকী প্ৰতিযোগীৰ সৈতে ৫ ডিচেম্বৰত শ্ব' থিয়েটাৰত অনুষ্ঠিত গ্ৰেণ্ড ফিনালত অংশ লয় আৰু শীৰ্ষ সাতগৰাকীৰ মাজত স্থান লাভ কৰে।^১১

প্ৰতিযোগিতাখনত তেওঁ ফ্ৰাঞ্চিস আগ্যপঙৰদ্বাৰা ডিজাইন কৰা ৰঙা ৰঙৰ পোছাক পিন্ধি শ্ৰেষ্ঠ 'ইভিনিং গাউন'ৰ বঁটা লাভ কৰে।^১২ শেষত তেওঁক সমগ্ৰ প্ৰতিযোগিতাখনৰ বিজয়ী হিচাপে ঘোষণা কৰা হয়।^১৩