এনী ৱাৰ্শ্বিং

এনী ৱাৰ্শ্বিং^১ (২৮ মাৰ্চ, ১৯৭৭ – ২৯ জানুৱাৰী, ২০২৩) এগৰাকী আমেৰিকান অভিনেত্ৰী আছিল। তেওঁ টেলিভিছনৰ বিভিন্ন চৰিত্ৰৰ বাবে পৰিচিত আছিল, যেনে ২৪-ত ৰেনী ৱাকাৰ, বছ-ত জুলিয়া ব্ৰেচাৰ, টাইমলেছ-ত এমা হুইটম’ৰ, কেচেল-ত ড° কেলী নেইমেন, ৰাণৱেজ-ত লেছলী ডিন, দ্য ভেম্পায়াৰ ডায়েৰীজ-ত লিলি ছালভাট’ৰ আৰু দ্য ৰুকী-ত ৰোজালিণ্ড ডায়াৰ। ইয়াৰ উপৰি তেওঁ দ্য লাষ্ট অফ আছ ভিডিঅ' গেমত টেছ চৰিত্ৰটোৰ কণ্ঠদান আৰু পাৰ্ফৰমেন্স-কেপচাৰৰ বাবে জনাজাত আছিল।

প্ৰাৰম্ভিক জীৱন

১৯৭৭ চনৰ ২৮ মাৰ্চত মিছৌৰীৰ ছেইণ্ট লুইছত ৱাৰ্শ্বিঙৰ জন্ম হৈছিল।^২ তেওঁ ছেইণ্ট লুইছৰ ক্ৰছৰোডছ কলেজ প্ৰিপাৰেটৰী স্কুলত অধ্যয়ন কৰিছিল আৰু ১৯৯৫ চনত স্নাতক ডিগ্ৰী লাভ কৰিছিল।^৩ সৰু কালত তেওঁ আইৰিছ নৃত্যৰ প্ৰতিযোগিতাত অংশগ্ৰহণ কৰিছিল আৰু ছেইণ্ট লুইছ চেল্টিক ষ্টেপডান্সাৰ্ছ গোটৰ সদস্য আছিল।^৩ তেওঁ মিলিকিন ইউনিভাৰ্ছিটিৰপৰা সংগীত থিয়েটাৰত স্নাতক (বি এফ এ) ডিগ্ৰী লাভ কৰিছিল আৰু ১৯৯৯ চনত তাৰপৰা উত্তীৰ্ণ হৈছিল।^৩৪

কৰ্মজীৱন

ৱাৰ্শ্বিঙে ষ্টাৰ ট্ৰেক: এণ্টাৰপ্ৰাইজ ধাৰাবাহিকত অতিথি শিল্পী হিচাপে অভিনয় কৰি নিজৰ অভিনয় জীৱন আৰম্ভ কৰিছিল। ইয়াৰ পিছত তেওঁ এঞ্জেল, চাৰ্মড, ক’ল্ড কেচ, কিলাৰ ইনষ্টিংক্ট আৰু ছুপাৰনেচাৰেল-ৰ দৰে ধাৰাবাহিকত অতিথি চৰিত্ৰত অভিনয় কৰে। ২০০৭ চনৰ মাৰ্চৰপৰা নৱেম্বৰলৈকে তেওঁ এবিচিৰ ছোপ অপাৰেটৰ ধাৰাবাহিক জেনেৰেল হাস্পতাল-ত আমেলিয়া জফে নামৰ এটা চৰিত্ৰত অভিনয় কৰিছিল। ইয়াৰ উপৰি তেওঁ ভিক্টৰী গাৰ্ডেন থিয়েটাৰ, মেৰিয়ট থিয়েটাৰ লিংকনশ্বায়াৰ আৰু উটাহ শ্বেইকছপীয়েৰিয়ান ফেষ্টিভেলৰ দৰে থিয়েটাৰতো কাম কৰিছিল।^৩

ৱাৰ্শ্বিঙে ২৪ ধাৰাবাহিকৰ সপ্তম আৰু অষ্টম ছিজনত এফবিআইৰ বিশেষ এজেণ্ট ৰেনী ৱাকাৰৰ চৰিত্ৰত অভিনয় কৰিছিল।^৫

২৪ ধাৰাবাহিকত দুটা ছিজন কাম কৰাৰ পাছত ৱাৰ্শ্বিঙে বিভিন্ন ধাৰাবাহিকত অতিথি শিল্পী হিচাপে অভিনয় কৰে, যাৰ ভিতৰত আছে চিএছআই, এনচিআইএছ, ৰিজ’লি এণ্ড আইলছ, হাৱাই ফাইভ-০, বডী অফ প্ৰুফ, ডালাছ, ৰিভলিউশ্যন, কেচেল, ব্লু ব্লাডছ, দ্য ভেম্পায়াৰ ডায়েৰীজ আৰু টাচ।

ৱাৰ্শ্বিঙে ২০০৯ চনৰ টাকো বেল অল-ষ্টাৰ লেজেণ্ডছ এণ্ড চেলিব্ৰিটি ছফ্টবল গেমত অংশগ্ৰহণ কৰিছিল।^৬

২০১২ চনৰ ডিচেম্বৰত প্ৰকাশ পায় যে প্লেষ্টেচন ৩-ৰ ভিডিঅ' গেম দ্য লাষ্ট অফ আছ-ত ৱাৰ্শ্বিঙে টেছ নামৰ চৰিত্ৰটোৰ বাবে কণ্ঠদান আৰু মোচন-কেপচাৰ কৰিছিল। ২০১২ চনৰ ৭ ডিচেম্বৰত স্পাইক ভিডিঅ' গেম এৱাৰ্ডছত প্ৰদৰ্শিত ট্ৰেইলাৰত তেওঁৰ চৰিত্ৰটো আনুষ্ঠানিকভাৱে উন্মোচন কৰা হৈছিল।

২০১৪ চনত তেওঁ আমাজন প্ৰাইমৰ ক্ৰাইম শ্ব’ বছ-ৰ প্ৰথম ছিজনৰ এগৰাকী নিয়মীয়া শিল্পী আছিল।^৭ ২০২২ চনত তেওঁ পুনৰ ষ্টাৰ ট্ৰেক ফ্ৰেঞ্চাইজিলৈ উভতি আহে আৰু ষ্টাৰ ট্ৰেক: পিকাৰ্ড-ৰ দ্বিতীয় ছিজনত বৰ্গ কুইনৰ চৰিত্ৰত অভিনয় কৰে।^৮ ২০১৭ চনৰপৰা ২০১৯ চনলৈকে তেওঁ মাৰ্ভেলৰ ধাৰাবাহিক ৰাণৱেজ-ত লেছলী ডিনৰ চৰিত্ৰত অভিনয় কৰিছিল। ২০১৯ চনৰপৰা ২০২২ চনৰ ভিতৰত তেওঁ দ্য ৰুকী-ত ৰোজালিণ্ড ডায়াৰ হিচাপে এটা চৰিত্ৰত অভিনয় কৰিছিল।^৯

ব্যক্তিগত জীৱন, বেমাৰ আৰু মৃত্যু

২০০৯ চনৰ ছেপ্টেম্বৰ মাহত ৱাৰ্শ্বিঙে তেওঁলোকৰ লছ এঞ্জেলছৰ বাসগৃহত অভিনেতা তথা কৌতুক অভিনেতা ষ্টিফেন ফুলৰ সৈতে বিবাহপাশত আবদ্ধ হয়।^১০ তেওঁলোকৰ তিনিজন পুত্ৰ সন্তান আছিল।^{১১১২১৩}

২০২০ চনৰ মাজভাগত ৱাৰ্শ্বিঙৰ দেহত কৰ্কট ৰোগ ধৰা পৰিছিল। অৱশ্যে তেওঁ এই কথাটো গোপনে ৰাখিছিল আৰু তাৰ পিছতো অভিনয় অব্যাহত ৰাখিছিল।^{১৪১৫১৬} ২০২৩ চনৰ ২৯ জানুৱাৰীত ৪৫ বছৰ বয়সত কেলিফৰ্ণিয়াৰ লছ এঞ্জেলছত এডেনইড চিষ্টিক কাৰ্চিনোমাৰ বাবে তেওঁৰ মৃত্যু হয়।^১৭১৮