ইমাৰ মেকব্ৰাইড

ইমাৰ মেকব্ৰাইড (ইংৰাজী ভাষা: Eimear McBride; জন্ম ৬ অক্টোবৰ ১৯৭৬) এগৰাকী আইৰিছ ঔপন্যাসিক। তেওঁৰ প্ৰথম উপন্যাস, এ গাৰ্ল ইজ এ হাফ-ফৰ্মড থিং-এ ২০১৩ চনত প্ৰথম গ'ল্ডস্মিথ বঁটা আৰু ২০১৪ চনত বেইলিছ ৱমেনছ প্ৰাইজ ফৰ ফিকচন লাভ কৰিছিল।^১২ তেওঁ ২০১৮ চনত ৰয়েল ছচাইটি অৱ লিটাৰেচাৰৰ ফেলো নিৰ্বাচিত হয়।^৩

প্ৰকাশিত কৰ্মৰাজি

মেকব্ৰাইডে এ গাৰ্ল ইজ এ হাফ-ফৰ্মড থিং ছমাহৰ ভিতৰত লিখি উলিয়াইছিল, কিন্তু ২০১৩ চনত নৰউইচৰ গেলি বেগাৰ প্ৰেছে ইয়াক গ্ৰহণ নকৰালৈকে ন বছৰ সময় লাগিছিল।^৪ উপন্যাসখন চেতনাৰ প্ৰৱাহ (stream of consciousness) শৈলীত লিখা হৈছে আৰু ইয়াত এগৰাকী যুৱতীৰ নিজৰ পৰিয়ালৰ সৈতে থকা জটিল সম্পৰ্কৰ কাহিনী বৰ্ণনা কৰা হৈছে।^৫

মেকব্ৰাইডৰ দ্বিতীয়খন উপন্যাস দ্য লেচাৰ ব’হেমিয়ানছ ২০১৬ চনৰ ১ ছেপ্টেম্বৰত প্ৰকাশ পাইছিল।^৬ ১৯৯০ চনৰ কেমডেন টাউনৰ পটভূমিত ৰচিত এই উপন্যাসখনত এগৰাকী ১৮বছৰীয়া ড্ৰামা ষ্টুডেণ্ট আৰু এজন ৩৮বছৰীয়া অভিনেতাৰ মাজৰ অস্থিৰ সম্পৰ্কৰ কথা কোৱা হৈছে। মেকব্ৰাইডে ৮ ছেপ্টেম্বৰত ৱমেনছ আৱাৰত কিতাপখনৰ বিষয়ে আলোচনা কৰিছিল^৭ আৰু ১৭ ছেপ্টেম্বৰত বিবিচি ৰেডিঅ' ৪-ৰ কাৰ্যসূচী ছেটাৰডে ৰিভিউত ইয়াৰ পৰ্যালোচনা কৰা হৈছিল।^৮

তেওঁৰ তৃতীয়খন উপন্যাস ষ্ট্ৰেঞ্জ হোটেল ২০২০ চনৰ ফেব্ৰুৱাৰীত প্ৰকাশ পাইছিল।^৯ মেকব্ৰাইডৰ প্ৰথমখন অ-কল্পকাহিনীমূলক গ্ৰন্থ চামথিং আউট অৱ প্লেচ: ৱমেন এণ্ড ডিছগাষ্ট ২০২১ চনত প্ৰকাশ হয়।^১০

মেকব্ৰাইডৰ চতুৰ্থখন উপন্যাস দ্য চিটি চেঞ্জেস ইটছ ফেচ ২০২৫ চনৰ ফেব্ৰুৱাৰীত প্ৰকাশ পাইছিল।^১১

তেওঁ আন্না আখমাটোভাৰ নিৰ্বাচিত কবিতা (ফলিঅ' ছচাইটি), স্কট ৱাকাৰৰ গীতৰ কথা সম্বলিত গ্ৰন্থ ছানডগ (ফেবাৰ এণ্ড ফেবাৰ)^১২ আৰু এড্না অ'ব্ৰাইনৰ দ্য কাণ্ট্ৰী গাৰ্লছ ট্ৰিলজীৰ (ফেবাৰ/ এফ এছ জি) পাতনি লিখিছে।^১৩১৪ তেওঁৰ চুটিগল্পসমূহ দ্য গাৰ্ডিয়ান, প্ৰস্পেক্ট মেগাজিন, দ্য লং গেজ বেক, ডাবলিনাৰ্ছ ১০০, উইণ্টাৰ পেপাৰ্ছ আৰু বিবিচি ৰেডিঅ' ৪-ত প্ৰকাশ পাইছে।^{১৫১৬১৭}

অন্যান্য কৰ্ম

২০১৭ চনত মেকব্ৰাইডক ৰিডিং বিশ্ববিদ্যালয়ৰ বেকেট ৰিচাৰ্চ চেণ্টাৰৰ প্ৰথমটো ক্ৰিয়েটিভ ফেলোশ্বিপ প্ৰদান কৰা হয়।^১৮১৯ এই ফেলোশ্বিপৰ ফলশ্ৰুতিতে ২০২১ চনত প্ৰকাশিত তিনিটা অভিনয় পাঠৰ সংকলন মাউথপিচেছ (Mouthpieces) ৰচনা কৰা হয়।^২০২১

২০২২ চনত মেকব্ৰাইডে এ ভেৰী চৰ্ট ফিল্ম এবাউট লংগিং (A Very Short Film About Longing) নামৰ ছবিখনৰ কাহিনী লিখাৰ লগতে পৰিচালনাও কৰে।^২২ ছবিখন ২০২৩ চনৰ বিএফআই লণ্ডন ফিল্ম ফেষ্টিভেলত প্ৰদৰ্শিত হৈছিল। ছবিখনত জো এলউইন, নাটালিয়া ক’ষ্ট্ৰজেৱা আৰু লাশ্বেই এণ্ডাৰচনে অভিনয় কৰিছিল আৰু টিণ্ডাৰষ্টিকছে ইয়াৰ সংগীত পৰিচালনা কৰিছিল।^২৩

ব্যক্তিগত জীৱন

মেকব্ৰাইডৰ জন্ম ১৯৭৬ চনত লিভাৰপুলত হৈছিল। তেওঁৰ আইৰিছ পিতৃ-মাতৃ দুয়োজনেই পেছাত নাৰ্ছ আছিল। মেকব্ৰাইডৰ তিনি বছৰ বয়সত তেওঁলোকৰ পৰিয়ালটো আয়াৰলেণ্ডলে ঘূৰি আহে।^২৪২৫ তেওঁ শ্লাইগো কাউণ্টিৰ টাবাৰকাৰী আৰু মায়ো কাউণ্টিৰ কেচেলবাৰত শৈশৱ অতিবাহিত কৰিছিল। তেওঁ সাত বা আঠ বছৰ বয়সৰপৰাই লিখা-মেলা আৰম্ভ কৰাৰ কথা সোঁৱৰণ কৰে।^২৬ ১৭ বছৰ বয়সত মেকব্ৰাইডে ড্ৰামা চেণ্টাৰত অধ্যয়ন আৰম্ভ কৰিবলৈ লণ্ডনলৈ যায়, কিন্তু স্নাতক ডিগ্ৰী লাভ কৰাৰ পাছত তেওঁ উপলব্ধি কৰে যে অভিনেত্ৰী হোৱাৰ প্ৰতি তেওঁৰ কোনো আগ্ৰহ নাই।

মেকব্ৰাইডৰ ৰাছিয়ান সাহিত্যৰ প্ৰতি বিশেষ অনুৰাগ আছে আৰু তেওঁ ২০০০ চনত চাৰি মাহ ছেইণ্ট পিটাৰ্চবাৰ্গত অতিবাহিত কৰিছিল। ঘূৰি অহাৰ পাছত তেওঁ এজন অস্থায়ী কাৰ্যালয় সহায়ক হিচাপে কাম কৰিছিল আৰু ভ্ৰমণ কৰিছিল।^২৬ সেই সময়ছোৱাতে তেওঁ প্ৰথমখন উপন্যাস সম্পূৰ্ণ কৰে। ২০০৬ চনত তেওঁ কিছুসময়ৰ বাবে কৰ্কলৈ উভতি আহে আৰু দ্বিতীয়খন উপন্যাসৰ কাম আৰম্ভ কৰে। নৰউইচত কেইবাবছৰো ধৰি বাস কৰাৰ পাছত ২০১৭ চনত মেকব্ৰাইডে স্বামী আৰু কন্যাৰ সৈতে লণ্ডনলৈ স্থানান্তৰিত হয়।

নিৰ্বাচিত কৰ্মৰাজি

কল্পকাহিনী

• এ গাৰ্ল ইজ এ হাফ-ফৰ্মড থিং (গেলি বেগাৰ প্ৰেছ, ২০১৩)
• দ্য লেচাৰ ব’হেমিয়ানছ (ফেবাৰ এণ্ড ফেবাৰ, ২০১৬)
• ষ্ট্ৰেঞ্জ হোটেল (ফেবাৰ এণ্ড ফেবাৰ, ২০২০)
• মাউথপিচেছ (ফেবাৰ এণ্ড ফেবাৰ, ২০২১)
• দ্য চিটি চেঞ্জেস ইটছ ফেচ (ফেবাৰ এণ্ড ফেবাৰ, ২০২৫)

অ-কল্পকাহিনী

• চামথিং আউট অৱ প্লেচ: ৱমেন এণ্ড ডিছগাষ্ট (প্ৰফাইল / ৱেলকাম কালেকচন, ২০২১)

বঁটা আৰু সন্মান

• ২০১৭: দ্য লেচাৰ ব’হেমিয়ানছৰ বাবে জেমাছ টেইট ব্লেক মেমৰিয়েল প্ৰাইজ বিজয়ী^২৭
• ২০১৬: দ্য লেচাৰ ব’হেমিয়ানছৰ বাবে গ'ল্ডস্মিথ বঁটাৰ চুটি তালিকাভুক্ত^২৮২৯
• ২০১৪: এ গাৰ্ল ইজ এ হাফ-ফৰ্মড থিংৰ বাবে ডেচমণ্ড এলিয়ট প্ৰাইজ (প্ৰথমবাৰৰ বাবে উপন্যাস লিখা লেখকৰ বাবে) বিজয়ী^৩০
• ২০১৪: এ গাৰ্ল ইজ এ হাফ-ফৰ্মড থিংৰ বাবে কেৰী গ্ৰুপ আইৰিছ ফিকচন এৱাৰ্ড বিজয়ী^৩১
• ২০১৪: এ গাৰ্ল ইজ এ হাফ-ফৰ্মড থিংৰ বাবে বেইলিছ ৱমেনছ প্ৰাইজ ফৰ ফিকচন বিজয়ী^৩২৩৩
• ২০১৪: এ গাৰ্ল ইজ এ হাফ-ফৰ্মড থিংৰ বাবে ফলিঅ' প্ৰাইজৰ চুটি তালিকাভুক্ত^৩৪৩৫
• ২০১৩: এ গাৰ্ল ইজ এ হাফ-ফৰ্মড থিংৰ বাবে জিঅ'ফ্ৰে ফেবাৰ মেমৰিয়েল প্ৰাইজ বিজয়ী^৩৬
• ২০১৩: এ গাৰ্ল ইজ এ হাফ-ফৰ্মড থিংৰ বাবে গ'ল্ডস্মিথ বঁটা বিজয়ী^২

বাহ্যিক সংযোগ

• Eimear McBride's Official Wattpad Profile