ইউথেলিয়া জুবিনগাৰ্গী

ইউথেলিয়া জুবিনগাৰ্গী (Euthalia zubeengargi), যাক সাধাৰণতে বাচাৰ ডিউক (Basar duke) বুলি জনা যায়, হৈছে Nymphalidae পৰিয়ালৰ আৰু Limenitidinae উপ-পৰিয়ালৰ অন্তৰ্গত এক প্ৰজাতিৰ পখিলা। অৰুণাচল প্ৰদেশৰ পূব হিমালয় অঞ্চলত ৰোচন উপাধ্যায় আৰু কালেশ সদাশিৱনে এই নতুন প্ৰজাতিটো আৱিষ্কাৰ কৰিছিল। অসমৰ জনপ্ৰিয় কণ্ঠশিল্পী তথা সাংস্কৃতিক আইকন জুবিন গাৰ্গৰ সন্মানত এই প্ৰজাতিটোৰ নামকৰণ কৰা হৈছে।^১

প্ৰজাতিটোক সাময়িকভাৱে Limbusa উপ-গণৰ অধীনত Euthalia (Limbusa) zubeengargi হিচাপে শ্ৰেণীভুক্ত কৰা হৈছে।

প্ৰণালীবদ্ধ শ্ৰেণীবিন্যাস

ইউথেলিয়া জুবিনগাৰ্গী পখিলাবিধ Euthalia গণৰ অন্তৰ্গত। এই গণৰ পখিলাবোৰক সাধাৰণতে 'বেৰন' (barons) বুলি জনা যায় আৰু ইহঁত সমগ্ৰ ইণ্ডো-মালয়ান অঞ্চলত বিস্তৃত হৈ আছে। এই গণটো Limenitidinae উপ-পৰিয়ালৰ ভিতৰৰ Adoliadini জনজাতিৰ অন্তৰ্গত।

আৱিষ্কাৰ

২০২৫ চনত চলোৱা এক ক্ষেত্ৰভিত্তিক অধ্যয়নৰ (field survey) সময়ত অৰুণাচল প্ৰদেশৰ লেপা ৰাডা জিলাৰ বাচৰ অঞ্চলত এই প্ৰজাতিটো আৱিষ্কাৰ কৰা হৈছিল।^২৩

প্ৰকৃতিপ্ৰেমী ৰোচন উপাধ্যায়ে ত্ৰিৱান্দ্ৰম প্ৰকৃতি ইতিহাস ছচাইটিৰ গৱেষক কালেশ সদাশিৱনৰ সহযোগত এই পখিলাবিধ চিনাক্ত কৰিছিল।^৪৫

এতিয়ালৈকে কেৱল দুটা মতা পখিলাৰ আধাৰতহে এই প্ৰজাতিটোৰ বৰ্ণনা কৰা হৈছে, যাৰ বাবে ইয়াক অত্যন্ত থলুৱা বা স্থানীয় বুলি ধাৰণা কৰা হৈছে।^১

শাৰীৰিক বৰ্ণনা

ইউথেলিয়া জুবিনগাৰ্গী মধ্যম আকাৰৰ অৰণ্যৰ পখিলা। ইয়াৰ ডেউকা দুখনৰ ৰং জলফাই-মুগা আৰু তাত স্পষ্ট বগা দাগ থকাৰ লগতে এটা সূক্ষ্ম উজ্জ্বলতা দেখা যায়।^৬৭ এই প্ৰজাতিৰ মাইকী পখিলাটোৰ বিষয়ে বৰ্তমানলৈকে কোনো তথ্য পোৱা হোৱা নাই।

বিতৰণ আৰু বাসস্থান

এই প্ৰজাতিটো বৰ্তমানলৈকে কেৱল ভাৰতৰ অৰুণাচল প্ৰদেশৰ লেপা ৰাডা জিলাৰ বাচাৰ অঞ্চলত পোৱা গৈছে।^৩

ই প্ৰায় ৬००–৭০০ মিটাৰ উচ্চতাত অৱস্থিত অৰ্ধ-চিৰসেউজ অৰণ্যত বাস কৰে আৰু ঠাণ্ডা, ছাঁ থকা ঠাই পছন্দ কৰে।^২

ক্ষেত্ৰভিত্তিক পৰ্যবেক্ষণ অনুসৰি এই পখিলাই গছৰ ৰস আৰু সেমেকা ঠাইৰ পৰা খনিজ পদাৰ্থ শোষণ কৰে।^৮

আচৰণ আৰু পৰিস্থিতিতন্ত্ৰ

এই পখিলাবোৰ সাধাৰণতে পলমকৈ পুৱা আৰু দুপৰীয়াৰ ভাগত সক্ৰিয় হয়। ইহঁতে লাহে লাহে আৰু চুটি দূৰত্বলৈ উৰাৰ প্ৰৱণতা দেখুৱায়।^৮ ইহঁতৰ জীৱন চক্ৰ, পলুৰ খাদ্য হিচাপে ব্যৱহাৰ কৰা উদ্ভিদ আৰু প্ৰজনন আচৰণ এতিয়াও নথিভুক্ত কৰা হোৱা নাই।

নামকৰণ

অসমৰ সাংস্কৃতিক জগত আৰু পৰিচয়লৈ আগবঢ়োৱা অনবদ্য অৱদানৰ স্বীকৃতিস্বৰূপে অসমীয়া কণ্ঠশিল্পী জুবিন গাৰ্গৰ নামেৰে এই প্ৰজাতিটোৰ নামাকৰণ কৰা হৈছে।^৪

সংৰক্ষণ

প্ৰকৃতি সংৰক্ষণৰ আন্তঃৰাষ্ট্ৰীয় সংঘৰ (আইইউচিএন) ৰঙা তালিকাত Euthalia zubeengargi-ৰ সংৰক্ষণৰ স্থিতি এতিয়ালৈকে মূল্যায়ন কৰা হোৱা নাই।

পৰ্যবেক্ষণ কৰা পখিলাৰ সংখ্যা অতি কম হোৱাৰ বাবে ইয়াৰ বিৰলতা আৰু সম্ভাৱ্য বিপদক লৈ উদ্বেগ প্ৰকাশ পাইছে। ইয়াৰ বাবে অধিক গৱেষণা আৰু সংৰক্ষণৰ প্ৰয়োজনীয়তা আছে।^৬