আউ পাক

আউ পাক (খ্মেৰ ভাষা: អាវប៉ាក់, উচ্চাৰণ: aao pak) হ’ল কম্বোডিয়াৰ মহিলাসকলে পৰিধান কৰা এক পৰম্পৰাগত ব্লাউজ সদৃশ পোছাক। ইয়াৰ আক্ষৰিক অৰ্থ হৈছে “কাঢ়ি কৰা চোলা” বা সূচীকৰ্মেৰে সজোৱা চোলা (embroidery shirt)। এই ব্লাউজটোত সাধাৰণতে সূক্ষ্ম সূচীকৰ্ম, ফুল বা জ্যামিতিক নক্সা, আৰু সোণালী বা ৰঙীন সূতাৰ কাৰুকাৰ্য দেখিবলৈ পোৱা যায়।

আউ পাক সাধাৰণতে পাট বা কপাহী কাপোৰেৰে তৈয়াৰ কৰা হয় আৰু ইয়াক প্ৰায়ে শৰীৰৰ তলৰ অংশত পিন্ধা পৰম্পৰাগত বস্ত্ৰ চামপট হলৰ সৈতে পৰিধান কৰা হয়। এই সাজ-পোছাকটো কম্বোডিয়াৰ সাংস্কৃতিক অনুষ্ঠান, উৎসৱ, বিবাহ অনুষ্ঠান আৰু আনুষ্ঠানিক সমাৰোহত বহুলভাৱে ব্যৱহৃত হয়।^১

ইয়াৰ নক্সা আৰু গঠন ইণ্ডোনেছিয়াৰ পৰম্পৰাগত পোছাক কেবায়াৰ সৈতে বহু পৰিমাণে সাদৃশ্যপূৰ্ণ। বিশেষকৈ গাৰ্মেণ্টটোত কৰা সূচীকৰ্ম আৰু কোমল কাপোৰৰ ব্যৱহাৰ কেবায়াৰ প্ৰভাৱক সূচায়। দক্ষিণ-পূব এছিয়াৰ বিভিন্ন দেশৰ মাজত হোৱা ঐতিহাসিক বাণিজ্য আৰু সাংস্কৃতিক বিনিময়ৰ ফলত এই ধৰণৰ পোছাকৰ শৈলী একে ধৰণে বিকাশ লাভ কৰিছিল।^২

কম্বোডিয়াৰ গ্ৰাম্য অঞ্চলত বাস কৰা চ্যাম আৰু জাভানীজ জনগোষ্ঠীৰ মাজত আউ পাকৰ সৈতে চাৰং ব্যৱহাৰ কৰা দেখা যায়। এই জনগোষ্ঠীবোৰে নিজৰ সাংস্কৃতিক পৰম্পৰা অনুসৰি বিভিন্ন ধৰণৰ কাপোৰৰ সংমিশ্ৰণে আউ পাক পিন্ধে।

খ্মেৰ ভাষা লোকসকলে আউ পাকক কম্বোডিয়াৰ পৰম্পৰাগত সূচীকৰ্ম ব্যৱহৃত এক ধ্ৰুপদী অথচ আধুনিক পোছাক বুলি গণ্য কৰে। একবিংশ শতিকাত এই ব্লাউজটোক কম্বোডিয়াৰ জাতীয় পৰম্পৰাগত পোছাক হিচাপে গণ্য কৰা হৈছে আৰু বহু সময়ত সাংস্কৃতিক পৰিচয়ৰ প্ৰতীক হিচাপেও ব্যৱহাৰ কৰা হয়।^৩

কম্বোডিয়াৰ মহিলাসকলৰ মাজত আন কিছু পৰম্পৰাগত উৰ্ধ-বস্ত্ৰৰ জনপ্ৰিয়তা ধীৰে ধীৰে হ্ৰাস পাইছে। উদাহৰণস্বৰূপে, আউ বপক নামৰ টিগ-চোলাটো সংখ্যালঘু চ্যাম জনগোষ্ঠীৰ সৈতে অতি ঘনিষ্ঠভাৱে জড়িত।^৪ তদুপৰি, খ্মেৰ সাম্ৰাজ্যৰ সময়ৰেপৰা চলি অহা কান্ধত মেৰিয়াই লোৱা চাদৰ সদৃশ ছবাই বৰ্তমান কম শালীন বুলি বিবেচিত হয়, কাৰণ ইয়াত ব্যৱহৃত কাপোৰ অতি পাতল আৰু ইয়াক পৰিধান কৰিলে এটা কান্ধ উন্মুক্ত হৈ থাকে।^৫

লগতে চাওক

• কেবায়া (Kebaya)
• কম্বোডিয়াৰ পৰম্পৰাগত সাজ-পাৰ
• কম্বোডিয়াৰ সংস্কৃতি

বাহ্যিক সংযোগ

• বিভিন্ন শৈলীৰ আউ পাকৰ সংগ্ৰহ