অৰংগেত্ৰম (১৯৭৩ চলচ্চিত্ৰ)

অৰংগেত্ৰম ( Arangetram; উচ্চাৰণ: aɾaŋɡeːʈram; অনু: প্ৰথম প্ৰদৰ্শন) ১৯৭৩ চনৰ কে বালাচন্দৰ ৰচিত আৰু পৰিচালিত, ভাৰতীয় তামিল ভাষাৰ এখন নাট্যধৰ্মী ছবি। ছবিখনত মুখ্য ভূমিকাত অভিনয় কৰিছে প্ৰমীলাই।^১ সহযোগী চৰিত্ৰত আছে এছ ভি চুব্বায়া, শিৱকুমাৰ, শশীকুমাৰ, কমল হাছান, এম এন ৰাজম, সুন্দৰী বাই আৰু চেন্থামৰাই আদি।^২৩ ইয়াত এগৰাকী যুৱতীয়ে নিজৰ ৰক্ষণশীল কিন্তু দৰিদ্ৰ পৰিয়ালটোক পোহপাল দিবলৈ বেশ্যাবৃত্তিৰ কাম কৰে।^৪

কমল হাছানে অৰংগেত্ৰমত প্ৰথম প্ৰাপ্তবয়স্ক চৰিত্ৰত অভিনয় কৰে।^৫ আনহাতে প্ৰমীলা, জয়াচিত্ৰা আৰু জয়াসুধাই এই ছবিখনৰ জৰিয়তে তামিল ছবিত আত্মপ্ৰকাশ কৰে।^৬ ভি কুমাৰে এই ছবিখনৰ সংগীত ৰচনা কৰিছিল, যিখন ছবি আছিল তেওঁ কাম কৰা শেষ বালাচন্দৰৰ ছবি। চিনেমেট’গ্ৰাফী বি.এছ.লোকানাথৰ আৰু সম্পাদনাত আছিল এন.আৰ.কিট্টু।

১৯৭৩ চনৰ ৯ ফেব্ৰুৱাৰীত মুক্তি পোৱা অৰংগেত্ৰম ছবিখনত কঠোৰ বাৰ্তা আৰু অতি সাহসী দৃশ্য অন্তৰ্ভূক্ত হৈছিল আৰু মুক্তিৰ পিছত বিতৰ্কৰ সৃষ্টি কৰিছিল।^৭ তথাপিও ছবিখনে ব্যৱসায়িকভাৱে সফলতা লাভ কৰিছিল। ১৯৭৪ চনত ইয়াক তেলেগু ভাষাত জীৱিত ৰংগম (১৯৭৪) নামেৰে আৰু হিন্দী ভাষাত আইনা হিচাপে পুনৰ নিৰ্মাণ কৰা হয়। হিন্দী সংস্কৰণৰ পৰিচালক বালাচন্দৰ নিজেই আছিল।