অনজৌ জিলা

অনজৌ জিলা (Anjaw District, Pron:/ˈændʒɔ:/) উত্তৰ-পূব ভাৰতৰ অৰুণাচল প্ৰদেশ ৰাজ্যৰ এখন জিলা৷ ২০০৪ চনৰ ১৬ ফেব্ৰুৱাৰীত লোহিত জিলাৰ এটা অংশ পৃথক কৰি অনজৌ জিলা গঠন কৰা হয়৷ ^১ এই জিলাখন ভাৰতৰ আটাইতকৈ পূব প্ৰান্তত অৱস্থিত জিলা৷^২ এই জিলাখনৰো আটাইতকৈ পূব সীমান্তত থকা গাওঁখনৰ নাম দং (Dong)৷^৩ অনজৌ ভাৰতৰ মুঠ ৬৪০ খন জিলাৰ ভিতৰত দ্বিতীয় সৰ্বনিম্ন জনসংখ্যাৰ জিলা৷^৪

ভৌগোলিক অৱস্থান

অনজৌ জিলাৰ উত্তৰে চীন৷ জিলাখনৰ সদৰ ঠাই হাৱাই (Hawai)৷ এই নগৰখন সাগৰ পৃষ্ঠৰ পৰা ১২৯৬ মিটাৰ উচ্চতাত লোহিত নদীৰ পাৰত অৱস্থিত৷ জিলাখনৰ অন্যন্য মূল নদীবোৰ হৈছে: লাম (Lam), টিদিং (Tidding), দালাই (Dalai), ক্ৰটি (Krowti), ডিচ্চু (Dichu), লাটি (Lati), ক্লুং (Klung), দাভ (Dav), তেলুৱা (Telua), আম্পানী (Ampani), চৰতি (Sarti) ইত্যাদি৷^২

যাতায়াত

শেহতীয়াকৈ প্ৰস্তাৱিত মেকমোহন লাইনেৰে মাগ’ (Mago)- থিংবু (Thingbu) ৰ পৰা বিজয়নগৰ অৰুণাচল প্ৰদেশ ফ্ৰন্টিয়াৰ ঘাইপথ (Vijaynagar Arunachal Pradesh Frontier Highway) এই জিলাৰ মাজেৰে অতিক্ৰম কৰিব৷^৫৬৭৮

অৰ্থনীতি

জিলাখনৰ অৰ্থনীতি কৃষিৰ ওপৰত নিৰ্ভৰশীল৷ ইয়াত উৎপাদিত মূল শস্যবোৰ হৈছে গোমধান, কুনীধান (millet), ধান, মাহ, ইলাচী, কমলা, আপেল ইত্যাদি৷^৯

প্ৰশাসনিক বিভাগ

এই জিলাখনত অৰুণাচল প্ৰদেশৰ বিধানসভাৰ এটা সমষ্টি আছে: হায়ুলি্যাং (Hayuliang)৷ জিলাখন পূব অৰুণাচল লোক সভা সমষ্টিৰ অন্তৰ্গত৷^১০

জিলাখনৰ মহকুমাসমূহ হৈছে:

• হায়ুলিয়াং (Hayuliang)
• হাৱাই (Hawai)
• মাঞ্চাল (Manchal)
• গৈলিয়াং (Goiliang)
• ৱালং (Walong)
• কিবিথ’ (Kibithoo)
• চগ্লোগাম (Chaglogam)

জনসংখ্যা

২০১১ চনৰ লোকপিয়ল অনুসৰি অনজৌ জিলাৰ মুঠ জনসংখ্যা ২১,০৮৯ জন৷^১১ ভাৰতৰ ৬৪০ খন জিলাৰ ভিতৰত জনসংখ্যাৰ ফালৰ পৰা এই জিলাৰ স্থান ৬৩৯ তম৷^১১ জিলাখনত জনবসতিৰ ঘনত্ব প্ৰতি বৰ্গ কিলোমিটাৰত মাথোঁ তিনিজন৷^১১ এই জিলাৰ জনসংখ্যা বৃদ্ধিৰ হাৰ ২০০১-২০১১ দশকত ১৩.৭৭% আছিল৷ অনজৌৰ প্ৰতি ১০০০ গৰাকী পুৰুষৰ বিপৰীতে মহিলাৰ সংখ্যা ৮০৫ জন^১১ আৰু সাক্ষৰতাৰ হাৰ ৫৯.৪%৷^১১

অনজৌ জিলাৰ অধিবাসীসকল মূলতঃ মিছমি আৰু জাখৰিং (Zakhring) জনজাতিৰ লোক৷^১২

জৈৱবৈচিত্ৰ্য

অনজৌ জিলা জৈৱবৈচিত্ৰ্য অত্যন্ত সমৃদ্ধ৷ এই জিলাৰ বহুতো আপুৰুগীয়া জীৱজন্তু যেনে মিচমি টাকিন (Mishmi takin), Red goral, Gongshan muntjac, Leaf muntjac আৰু চৰাই যেনে Sclater's Monal আদি দেখা পোৱা যায়৷ ইয়াত পোৱা পাইন প্ৰজাতি Pinus merkusii উত্তৰ-পূব ভাৰততে বিৰল৷^১৩ তাৰোপৰি ইয়াত flying squirrel-ৰ এবিধ নতুন প্ৰজাতিও আৱিষ্কাৰ হৈছে যাৰ নাম Mishmi Hills Giant Flying Squirrel, Petaurista mishmiensis.^১৪