ৰহিমা অৰ্চিয়েণ্ট ইয়ায়াহ

ৰহিমা অৰ্চিয়েণ্ট ইয়ায়াহ (জন্ম: ১৯৭৪) এগৰাকী মালয়েছিয়ান ব্যৱসায়ী, প্ৰাক্তন মডেল আৰু সৌন্দৰ্য প্ৰতিযোগিতাৰ খিতাপ বিজয়ী, যিয়ে 'মিছ মালয়েছিয়া ৱৰ্ল্ড ১৯৯৪'ৰ মুকুট লাভ কৰিছিল।^১ তেওঁ দক্ষিণ আফ্ৰিকাৰ ছান চিটীত অনুষ্ঠিত 'মিছ ৱৰ্ল্ড ১৯৯৪' প্ৰতিযোগিতাত মালয়েছিয়াক প্ৰতিনিধিত্ব কৰিছিল আৰু তাত তেওঁ শীৰ্ষ ১০ গৰাকী ছেমি ফাইনেলিষ্টৰ ভিতৰত স্থান লাভ কৰিবলৈ সক্ষম হৈছিল।^২

ব্যক্তিগত জীৱন

ৰহিমাৰ জন্ম ১৯৭৪ চনত চাবাহৰ টাৱাউত হৈছিল। তেওঁ এজন মালয়েছিয়ান চীনা ব্যৱসায়ীৰ সৈতে বিবাহপাশত আবদ্ধ হৈছিল আৰু তেওঁলোকৰ দুটা পুত্ৰ সন্তান আছে। তেওঁ ১৯৯৩ চনত ইণ্টি ইণ্টাৰনেশ্যনেল ইউনিভাৰ্ছিটীৰপৰা ব্যৱসায় প্ৰশাসনৰ ডিপ্লমা আৰু ১৯৮৯ চনত চাবাহৰ কিনাবালু কমাৰ্চিয়েল কলেজৰপৰা সচিবালয়ৰ কামৰ বাবে পিটমেন ট্ৰেইনিং চাৰ্টিফিকেট লাভ কৰিছিল।^৩

কেৰিয়াৰ

মিছ ৱৰ্ল্ড ১৯৯৪-ত মালয়েছিয়াক প্ৰতিনিধিত্ব কৰি তেওঁ শীৰ্ষ ১০ গৰাকী ছেমি ফাইনেলিষ্টৰ তালিকাত স্থান পাইছিল। পৰৱৰ্তী পৰ্যায়ত তেওঁ ভাৰতৰ মডেল তথা অভিনেত্ৰী ঐশ্বৰ্য ৰায়ৰ হাতত পৰাস্ত হয়।^৪৫ ১৯৬৩ চনত মালয়েছিয়াই এই প্ৰতিযোগিতাত অভিষেক ঘটোৱাৰ পিছত ছেমি ফাইনেললৈ নিৰ্বাচিত হোৱা ৰহিমা আছিল তৃতীয়গৰাকী মালয়েছিয়ান প্ৰতিনিধি। ইয়াৰ পূৰ্বে ১৯৭৯ চনত শ্বাৰ্লি চিউৱে মালয়েছিয়াৰ হৈ ছেমি ফাইনেলত প্ৰৱেশ কৰিছিল।^৬ ১৯৯৬ চনত মুছলমান মহিলাক ৰাষ্ট্ৰীয় পৰ্যায়ৰ সৌন্দৰ্য প্ৰতিযোগিতাত অংশগ্ৰহণৰ ক্ষেত্ৰত জাৰি কৰা 'ফতোৱা'ৰ আগলৈকে মিছ ৱৰ্ল্ডত অংশ লোৱা ৰহিমা আছিল মালয়েছিয়াৰ শেষৰ গৰাকী মুছলমান মহিলা।^৭

তেওঁ প্ৰেষ্টন ইউনিভাৰ্ছিটীৰপৰা মাষ্টাৰ অফ বিজনেছ এডমিনিষ্ট্ৰেশ্যন (MBA) ডিগ্ৰী লাভ কৰিছে। ২৮ বছৰ বয়সতে তেওঁ নিজাকৈ এটা ফেশ্বন ডিজাইনিং কোম্পানী আৰম্ভ কৰি পৰিচালনা কৰিছিল। তেওঁৰ কোম্পানীক ফেশ্বন ডিজাইনিং আৰু পেটাৰ্নিং উদ্যোগৰ অন্যতম শীৰ্ষ প্ৰতিষ্ঠান হিচাপে গঢ়ি তোলাৰ লক্ষ্য তেওঁ লৈছিল।^৮ তেওঁ টাৱাউ আৰু কোটা কিনাবালুত দুখন বুটিকৰ শাখা স্থাপন কৰিছে।

বাহ্যিক সংযোগ

• আনুষ্ঠানিক ৱেবছাইট