হৰমনপ্ৰীত সিং

হৰমনপ্ৰীত সিং (জন্ম ৬ জানুৱাৰী ১৯৯৬) এজন ভাৰতীয় হকী খেলুৱৈ আৰু ভাৰতীয় ৰাষ্ট্ৰীয় হকী দলৰ অধিনায়ক।^১ তেওঁ এজন ডিফেণ্ডাৰ আৰু পেণাল্টি কৰ্ণাৰ বিশেষজ্ঞ। তেওঁক বিশ্বৰ শ্ৰেষ্ঠ ড্ৰেগ ফ্লিকাৰসকলৰ অন্যতম বুলি গণ্য কৰা হয়।^২ তেওঁ বৰ্তমানলৈকে আধুনিক হকীত ভাৰতৰ হৈ আটাইতকৈ বেছি আন্তঃৰাষ্ট্ৰীয় গ’ল কৰিছে। তেওঁৰ নেতৃত্বতে ভাৰতীয় হকী দলে ২০২৪ পেৰিছ অলিম্পিকত ব্ৰঞ্জ পদক জয় কৰিছিল।^৩ এয়া আছিল তেওঁৰ অলিম্পিকত তৃতীয়বাৰৰ অংশগ্ৰহণত দ্বিতীয়টো ব্ৰঞ্জ পদক।^৪ সিঙে দলটোক নেতৃত্ব দি ২০২২ এছিয়ান গেমছত সোণৰ পদকো জয় কৰোৱাইছিল। তেওঁ এফ.আই.এইচ. বঁটাত তিনিবাৰকৈ বছৰৰ শ্ৰেষ্ঠ খেলুৱৈৰ খিতাপ লাভ কৰিছে।^৫ দলৰ সন্মুখত থাকি দলটোক জয়ৰ দিশে আগবঢ়াই নিয়াৰ বাবে তেওঁক “সৰপাঞ্চ ছাব” নামেৰেও জনা যায়।^৬