হামামাত মণ্টিয়া

হামামাত মণ্টিয়া (ইংৰাজী ভাষা: Hamamat Montia; জন্ম: ২২ জুলাই, ১৯৮৮) এগৰাকী ঘানাৰ মডেল, উদ্যমী আৰু সাংস্কৃতিক অধিবক্তা। তেওঁ এগৰাকী প্ৰাক্তন মিছ মালাইকা ঘানা বিজয়ী আৰু মডেল অফ আফ্ৰিকা ইউনিভাৰ্ছ।^১২ মডেলিঙৰ বাহিৰেও তেওঁ ঘানাৰ চিয়া বাটাৰ উদ্যোগৰ প্ৰসাৰ, চিয়া বাটাৰ মিউজিয়াম প্ৰতিষ্ঠা কৰা আৰু উত্তৰ ঘানাৰ মহিলাৰ নেতৃত্বত পৰিচালিত উৎপাদন কাৰ্যত সমৰ্থন আগবঢ়োৱাৰ বাবে জনাজাত।^৩

প্ৰাৰম্ভিক জীৱন আৰু শিক্ষা

মণ্টিয়াৰ জন্ম ঘানাত হৈছিল আৰু তেওঁ উত্তৰ অঞ্চলৰ বাসিন্দা।^৪৫ তেওঁ তেওঁৰ প্ৰাৰম্ভিক জীৱনৰ কিছু অংশ গ্ৰাম্য সম্প্ৰদায়ত অতিবাহিত কৰিছিল, য'ত তেওঁ চিয়া বাটাৰ উৎপাদনকে ধৰি পৰম্পৰাগত পদ্ধতিসমূহৰ সৈতে পৰিচিত হৈছিল।^৬ এই অভিজ্ঞতাসমূহে তেওঁৰ উদ্যমী আৰু অধিবক্তামূলক কামত প্ৰভাৱ পেলাইছে। তেওঁ মাধ্যমিক শিক্ষাৰ বাবে আচিমোটা স্কুলত অধ্যয়ন কৰিছিল।^৭

কৰ্মজীৱন

মণ্টিয়াই এগৰাকী মডেল হিচাপে নিজৰ কেৰিয়াৰ আৰম্ভ কৰিছিল আৰু ২০০৬ চনত মিছ মালাইকা ঘানা আৰু ২০০৭ চনত মডেল অফ আফ্ৰিকা ইউনিভাৰ্ছৰ খিতাপ অৰ্জন কৰিছিল।^৮ মডেলিঙৰ কেৰিয়াৰৰ পিছত তেওঁ চিয়া বাটাৰ উদ্যোগত গুৰুত্ব দি ব্যাৱসায়িক ক্ষেত্ৰখনত প্ৰৱেশ কৰে। পৰৱৰ্তী সময়ত তেওঁ চিয়া বাটাৰ ভিলেজ আৰু চিয়া বাটাৰ মিউজিয়াম স্থাপন কৰে। এই পদক্ষেপসমূহে স্থানীয়ভাৱে উৎপাদিত সামগ্ৰী আৰু পৰম্পৰাগত উৎপাদন পদ্ধতিক প্ৰসাৰিত কৰাৰ লগতে শৈক্ষিক আৰু পৰ্যটন মঞ্চ হিচাপেও কাম কৰে।^{৯ ১০}

স্বীকৃতি আৰু ৰাষ্ট্ৰদূত হিচাপে নিযুক্তি

২০২৬ চনৰ ফেব্ৰুৱাৰী মাহত মণ্টিয়াক পৰ্যটন, সংস্কৃতি আৰু সৃষ্টিশীল কলা মন্ত্ৰ্যালয়ৰদ্বাৰা ঘানাৰ চিয়া বাটাৰৰ সাংস্কৃতিক ৰাষ্ট্ৰদূত হিচাপে নিযুক্তি দিয়া হয়।^১১ এই ভূমিকাই ঘানাৰ চিয়া বাটাৰক এক সাংস্কৃতিক ঐতিহ্য আৰু অৰ্থনৈতিক সম্পদ হিচাপে প্ৰসাৰিত কৰাৰ ক্ষেত্ৰত তেওঁৰ দীৰ্ঘদিনীয়া ওকালতি আৰু উদ্যমী কামৰ স্বীকৃতি প্ৰদান কৰে।^১২ এই নিযুক্তি মহিলাৰ নেতৃত্বত পৰিচালিত চিয়া বাটাৰ সমবায় আৰু বহনক্ষম উৎপাদন পদ্ধতিক সমৰ্থন কৰাৰ লগতে চিয়া বাটাৰ মিউজিয়ামৰ দৰে পদক্ষেপৰ সৈতে জড়িত থকাৰ বাবে প্ৰদান কৰা হৈছে। চিয়া বাটাৰ মিউজিয়ামৰ জৰিয়তে ঘানাৰ চিয়া বাটাৰ পৰম্পৰা সংৰক্ষণ আৰু প্ৰসাৰৰ চেষ্টা কৰা হয়। চৰকাৰে এই পদটোক থলুৱা জ্ঞানৰ ওপৰত আলোকপাত কৰা, স্থানীয় উৎপাদকসকলক সমৰ্থন কৰা আৰু আন্তঃৰাষ্ট্ৰীয় বজাৰত ঘানাৰ চিয়া বাটাৰ খণ্ডক প্ৰতিষ্ঠা কৰাৰ এক মাধ্যম হিচাপে অভিহিত কৰিছে।^১৩

ব্যক্তিগত জীৱন

তেওঁ দুই কন্যা আৰু এজন পুত্ৰ সন্তানৰ মাতৃ।^১৪

বাহ্যিক সংযোগ

• Hamamat.com