শ্বাকিৰা কেইন

শ্বাকিৰা, লেডী কেইন (ইংৰাজী ভাষা: Shakira, Lady Caine; জন্ম: ২৩ ফেব্ৰুৱাৰী ১৯৪৭) এগৰাকী গায়ানা মূলৰ ব্ৰিটিছ প্ৰাক্তন অভিনেত্ৰী, ফেশ্বন মডেল আৰু সৌন্দৰ্য প্ৰতিযোগিতাৰ খিতাপ বিজয়ী। তেওঁ ১৯৬৭ চনৰ মিছ ৱৰ্ল্ড প্ৰতিযোগিতাত অংশগ্ৰহণ কৰি দ্বিতীয় ৰানাৰ্ছ-আপ হৈছিল। তেওঁ ইংৰাজ অভিনেতা মাইকেল কেইনৰ পত্নী।

প্ৰাৰম্ভিক জীৱন

বকচৰ জন্ম ১৯৪৭ চনৰ ২৩ ফেব্ৰুৱাৰীত ব্ৰিটিছ গায়ানাত (বৰ্তমানৰ গায়ানা) এক মুছলমান ভাৰতীয়-গায়ানী পৰিয়ালত হৈছিল।^১ তেওঁৰ মাতৃ এগৰাকী দৰ্জী আছিল আৰু তেওঁ মাতৃৰ পদানুসৰণ কৰি এগৰাকী ফেশ্বন ডিজাইনাৰ হোৱাৰ আশা কৰিছিল।

মডেলিং আৰু অভিনয় জীৱন

১৯ বছৰ বয়সত ব্ৰিটিছ দূতাবাসত এগৰাকী সচিব হিচাপে কাম কৰি থকাৰ সময়তে তেওঁক নিয়োগকৰ্তাই ১৯৬৭ চনৰ মিছ গায়ানা প্ৰতিযোগিতাত অংশ ল’বলৈ উৎসাহিত কৰিছিল আৰু তেওঁ সেই খিতাপ জয় কৰিছিল।^২ পৰৱৰ্তী সময়ত লণ্ডনত অনুষ্ঠিত ১৯৬৭ চনৰ মিছ ৱৰ্ল্ড প্ৰতিযোগিতাত তেওঁ তৃতীয় স্থান লাভ কৰে আৰু মডেলিং কেৰিয়াৰ গঢ়াৰ উদ্দেশ্যে তেওঁ তাতে থকাৰ সিদ্ধান্ত লয়।

বকচে কেইবাখনো চলচ্চিত্ৰত অভিনয় কৰিছিল, যাৰ ভিতৰত আছে চাম গাৰ্লছ ডু (১৯৬৯), কেৰী অন এগেইন ডক্টৰ (১৯৬৯), টুমাৰো (১৯৭০), চন অফ ড্ৰাকুলা (১৯৭৪) আৰু তেওঁৰ স্বামীৰ সৈতে অভিনয় কৰা দ্য মেন হু উড বি কিং (১৯৭৫)। ইয়াৰ উপৰি তেওঁ কল্পবিজ্ঞান ধাৰাবাহিক ইউএফঅ'ৰ চাৰিটা খণ্ডত অভিনয় কৰিছিল।^৩ ১৯৭০ চনৰ জুন মাহত তেওঁ তৃতীয় ডক্টৰ জন পাৰ্টৱীৰ বিপৰীতে ডক্টৰ হুৰ সহচৰী জো গ্ৰাণ্ট চৰিত্ৰৰ বাবেও অডিচন দিছিল।

ব্যক্তিগত জীৱন

১৯৭১ চনত বিবিচি টিভিৰ কুইজ শ্ব’ "হোৱেৰ ইন দ্য ৱৰ্ল্ড"^৪ আৰু মেক্সৱেল হাউচ কফিৰ এখন ব্ৰাজিলিয়ান টেলিভিছন বিজ্ঞাপনত বকচক দেখাৰ পিছত মাইকেল কেইন তেওঁৰ প্ৰতি আকৰ্ষিত হৈছিল। কেইনে তেওঁক "দেখা আটাইতকৈ ধুনীয়া মহিলা" বুলি গণ্য কৰিছিল আৰু তেওঁক বিচাৰি উলিয়াবলৈ ব্যাকুল হৈ পৰিছিল। বিজ্ঞাপন জগতৰ এজন বন্ধুৰ জৰিয়তে তেওঁ জানিব পাৰিলে যে বকচ লণ্ডনত তেওঁৰপৰা মাত্ৰ কেইমাইলমান দূৰতহে বাস কৰে। ১৯৭৩ চনৰ ৮ জানুৱাৰীত লাছ ভেগাছৰ আলজিয়াৰ্ছ হোটেলত তেওঁলোক বিবাহপাশত আবদ্ধ হয়।^৫৬ তেওঁলোকৰ নাতাশা নামৰ এগৰাকী কন্যা সন্তান আছে, যাৰ জন্ম ১৯৭৩ চনত হৈছিল।

বকচ এগৰাকী মুছলমান, আনহাতে তেওঁৰ স্বামী এজন খ্ৰীষ্টান। ২০০৯ চনত দ্য গাৰ্ডিয়ান কাকতৰ আগত তেওঁ কৈছিল: "মোৰ পত্নী এগৰাকী মুছলমান আৰু তেওঁ মুছলমান ধৰ্মীয় পৰম্পৰা পালন কৰে; মই এজন খ্ৰীষ্টান আৰু মই খ্ৰীষ্টান ধৰ্মীয় পৰম্পৰা পালন কৰোঁ, আমাৰ মাজত কেতিয়াও কোনো প্ৰশ্ন উত্থাপন নহয়। মুছলমানসকলৰ প্ৰতি সংবাদ মাধ্যমৰ দৃষ্টিভংগী মোৰতকৈ পৃথক, কাৰণ মোৰ বাবে এয়া অতি সৌম্য আৰু শান্তিপূৰ্ণ।" ^৭