শ্ববনাম মোগাদ্দামী

শ্ববনাম মোগাদ্দামী (জন্ম: ২৩ মাৰ্চ, ১৯৭২) হৈছে এগৰাকী ইৰানী অভিনেত্ৰী। তেওঁ দুটা ক্ৰিষ্টাল চিমৰ্গ বঁটা, তিনিটা হাফেজ বঁটা আৰু ইৰানৰ ফিল্ম ক্ৰিটিক্স এণ্ড ৰাইটাৰ্চ এছ’চিয়েচন বঁটা আদিকে ধৰি কেইবাটাও গুৰুত্বপূৰ্ণ সন্মান লাভ কৰিছে।^১২৩

প্ৰাৰম্ভিক জীৱন

শ্ববনাম মোগাদ্দামীৰ জন্ম ১৯৭২ চনৰ ২৩ মাৰ্চত তেহৰানৰ এক সাংস্কৃতিক, কলা আৰু সাহিত্যিক পটভূমি থকা পৰিয়ালত হৈছিল। তেওঁৰ পিতৃ এজন ইলেক্ট্ৰিকেল ইঞ্জিনিয়াৰ আছিল আৰু মাতৃ তেহৰান বিশ্ববিদ্যালয়ৰ এগৰাকী উচ্চ পদস্থ কৰ্মচাৰী আছিল। মোগাদ্দামীৰ বেহনাম নামৰ এজন অনুজ ভ্ৰাতৃও আছে। ২০০৪ চনত তেওঁ আলীৰিজা আৰাৰ সৈতে বিবাহপাশত আবদ্ধ হয়, যি বৰ্তমানলৈকে তেওঁৰ জীৱন-সংগী হৈ আছে।^৩

শৈশৱৰেপৰাই তেওঁ অভিনয়ৰ ক্লাছত নাম ভৰ্তি কৰিছিল আৰু হাইস্কুলত পঢ়ি থকাৰ সময়তে চিলড্ৰেনছ ৰেডিঅ’ গ্ৰুপৰ সৈতে পৰিচিত হৈছিল। সেই সময়ছোৱাত তেওঁ কিছুমান সৰু চৰিত্ৰত অভিনয়ো কৰিছিল। অৱশ্যে মোগাদ্দামীয়ে পৰীক্ষামূলক বিজ্ঞান বিষয়ত মাধ্যমিক শিক্ষা সমাপ্ত কৰে আৰু বিশ্ববিদ্যালয়ৰপৰা পাৰ্চী সাহিত্যত স্নাতক ডিগ্ৰী লাভ কৰে।^২

তথাপি অভিনয়ৰ প্ৰতি থকা তীব্ৰ হেঁপাহৰ বাবেই তেওঁ প্ৰখ্যাত প্ৰশিক্ষকসকলৰ তত্ত্বাৱধানত ইচলামিক ৰিপাব্লিকৰ আৰ্টিষ্টিক চেক্টৰ এখন চিত্ৰনাট্য লিখন বিদ্যালয়ত অংশগ্ৰহণ কৰিছিল। ইয়াৰ পিছত তেওঁ আমিন তাৰোখ এক্টিং স্কুলত অভিনয়ৰ পাঠ্যক্ৰম গ্ৰহণ কৰি জীৱনৰ এক নতুন অধ্যায়ৰ সূচনা কৰে।^৪

কৰ্মজীৱন

নাট্যশালা/থিয়েটাৰ

শ্ববনাম মোগাদ্দামীয়ে ১৯৯০-ৰ দশকৰ শেষৰফালে "শায়া থিয়েটাৰ গ্ৰুপ"ৰ সদস্য হৈ নিজৰ পেছাদাৰী নাট্য জীৱনৰ সূচনা কৰে। শ্বাহৰাম কাৰামীৰ পৰিচালনাত নিৰ্মিত দ্য পেপাৰ হাউচ নাটকত কৰা অভিনয়েৰে তেওঁৰ নাট্য যাত্ৰা আৰম্ভ হৈছিল।^৪

তেতিয়াৰেপৰা মোগাদ্দামীয়ে মুখ্য আৰু সহকাৰী দুয়ো ধৰণৰ চৰিত্ৰতে বিভিন্ন ধৰণৰ নাট্য প্ৰযোজনাত অংশগ্ৰহণ কৰিছে। তেওঁৰ অভিনয় তালিকাত ধ্ৰুপদী আৰু আধুনিক নাটকৰ লগতে ৰাষ্ট্ৰীয় তথা আন্তঃৰাষ্ট্ৰীয় সাহিত্যিক কৃতিৰ চৰিত্ৰসমূহ অন্তৰ্ভুক্ত হৈ আছে। তেওঁৰ অভিনয় ৰাষ্ট্ৰীয় আৰু আন্তঃৰাষ্ট্ৰীয় মহোৎসৱসমূহত প্ৰদৰ্শিত হৈছে, যাৰ ফলত এগৰাকী থিয়েটাৰ শিল্পী হিচাপে তেওঁৰ সুনাম সুপ্ৰতিষ্ঠিত হৈছে। নিজৰ কেৰিয়াৰত তেওঁ হামিদ আমজাদ, মহম্মদ ৰহমানিয়ান, মাছউদ ৰায়েগান আৰু কিয়ুমাৰ্চ মোৰাদীৰ দৰে বিখ্যাত পৰিচালকৰ সৈতে কাম কৰিছে।

থিয়েটাৰলৈ আগবঢ়োৱা অৱদানৰ বাবে তেওঁ বহুতো মনোনয়ন আৰু বঁটা লাভ কৰিছে, যাৰ পৰিপ্ৰেক্ষিতত ২০০৬ চনত ইৰান থিয়েটাৰ ফ’ৰামৰ তৃতীয় এক্টৰ চেলিব্ৰেশ্যনত শ্ৰেষ্ঠ অভিনেত্ৰী আৰু ইৰান থিয়েটাৰ ফ’ৰামৰ ষষ্ঠ এক্টৰ্চ চেলিব্ৰেশ্যনত অভিনেত্ৰী শাখাত শ্ৰেষ্ঠ অভিনেত্ৰী হিচাপে স্বীকৃতি লাভ কৰে। তেওঁৰ কিছুমান উল্লেখযোগ্য অভিনয়ৰ ভিতৰত পিলগ্ৰিম, দ্য ব্ৰিজ, উইদাউট মিল্ক এণ্ড চুগাৰ, চাইলেন্স ইজ মাই হেৰিটেজ, টাৰ্মিনেল, ডেথ গাৰ্ডেন, লেটাৰ্চ টু টেব^৫, মাৰ্চিলেচ কিলাৰ, হেচ কাৰ্লছন, ইষ্ট ইজ ইষ্ট!, টানেল আৰু মাই ছিগাল অন্যতম।

ৰেডিঅ’

মোগাদ্দামীয়ে থিয়েটাৰৰ সমান্তৰালভাৱে ৰেডিঅ’ৰ ক্ষেত্ৰখনৰ লগতো সক্ৰিয়ভাৱে জড়িত আছিল।^৪ তেওঁ বিভিন্ন ৰেডিঅ’ অনুষ্ঠানত উপস্থাপক আৰু অভিনেত্ৰী হিচাপে কাম কৰিছে। পাৰ্চী সাহিত্যৰ শৈক্ষিক পটভূমি থকাৰ বাবে তেওঁ বিশেষকৈ সাহিত্যিক অনুষ্ঠানসমূহৰ সফল আঁত ধৰিবলৈ সক্ষম হৈছিল।^৩ তেওঁ ৰেডিঅ’ জাভান, ৰেডিঅ’ ইৰান আৰু ৰেডিঅ’ ফাৰহাং আদি ৰেডিঅ’ ষ্টেচনত অৰিহণা যোগাইছে। তেওঁৰ কিছুমান পৰিচিত ৰেডিঅ’ কাৰ্যসূচীৰ ভিতৰত হাফ্ট শ্বানবে (ছেভেন চাটুৰ্ডে), চেচানবে খাত-খাতি (ক্ৰছৱৰ্ড টিউচডে), চেদায়ে ইব্ৰাত (ভইচ অৱ উইজডম) আৰু হাফ্ট তাৰানেহ (ছেভেন চংছ) অন্যতম, যিবোৰে ইৰানৰ ৰেডিঅ’ দৰ্শকৰ মাজত জনপ্ৰিয়তা লাভ কৰিছে।^৬ ইয়াৰ উপৰি মোগাদ্দামীয়ে ৰেডিঅ’ চেভিনা (দৃষ্টিহীনসকলৰ বাবে বিশেষ চিনেমা)ৰ সৈতেও সহযোগিতা কৰিছে।

চলচ্চিত্ৰ আৰু পৰ্দা

চলচ্চিত্ৰ জগতত শ্ববনাম মোগাদ্দামীৰ প্ৰৱেশ ঘটিছিল ১৯৯০-ৰ দশকৰ শেষৰফালে কামৰান কাদাকচিয়ানৰ জাখমি (আঘাতপ্ৰাপ্ত) ছবিৰ জৰিয়তে।^৩ অৱশ্যে ইব্ৰাহিম হাতামিকীয়াৰ বে নামে পেদৰ (ইন দ্য নেম অৱ দ্য ফাদাৰ) ছবিত কৰা অভিনয়েহে তেওঁলৈ গুৰুত্বপূৰ্ণ দৃষ্টি আকৰ্ষণ কৰে আৰু ই তেওঁৰ অভিনয় দক্ষতাক প্ৰদৰ্শন কৰি কেৰিয়াৰত অধিক প্ৰত্যাহ্বানমূলক চৰিত্ৰ লাভৰ পথ প্ৰশস্ত কৰে।^৭ নিজৰ কৰ্মজীৱনত তেওঁ আছগৰ ফাৰহাদী, ইৰাজ কাৰীমি, চাইৰাছ মোগাদ্দাম, ৰেজা মিৰকাৰীমি, মাজিয়াৰ মীৰি, হামিদ আমজাদ, জাফৰ পানাহী, ইব্ৰাহিম হাতামিকীয়া, কামাল তাব্ৰিজী, ছাইদ ৰৌষ্টায়ী আৰু আব্বাছ কিয়াৰোষ্টামীৰ দৰে প্ৰসিদ্ধ পৰিচালকৰ সৈতে কাম কৰিছে।

এগৰাকী বহুমুখী অভিনেত্ৰী হিচাপে মোগাদ্দামীয়ে সমালোচকৰ প্ৰশংসা লাভ কৰে। তেওঁ অতি সহজে বিভিন্ন ধৰণৰ ধাৰা যেনে ড্ৰামা, কমেডী, ঐতিহাসিক চৰিত্ৰ আদিৰ মাজত নিজৰ অভিনয় সলনি কৰিব পাৰে। তেওঁৰ নিপুণ অভিনয়ৰ ফলস্বৰূপে তেওঁ উদ্যোগটোৰ ভিতৰত বহুতো বঁটা আৰু স্বীকৃতি লাভ কৰিছে। তেওঁ চিনেমা জগতত লাভ কৰা সফলতাৰ বাবে দুটা মৰ্যাদাপূৰ্ণ ক্ৰিষ্টাল চিমৰ্গ বঁটা লাভ কৰিছে। ইয়াৰ উপৰি ইৰানিয়ান ফিল্ম ক্ৰিটিক্স এণ্ড ৰাইটাৰ্চ এছ’চিয়েচনৰপৰাও তেওঁ কেইবাটাও বঁটা আৰু প্ৰশংসা লাভ কৰিছে, যিয়ে এগৰাকী প্ৰতিভাশালী আৰু সফল অভিনেত্ৰী হিচাপে তেওঁৰ সুনাম বৃদ্ধি কৰিছে। তদুপৰি তেওঁ ইৰানিয়ান এলায়েন্স অৱ মোচন পিকচাৰ (হাউচ অৱ চিনেমা)ৰ ভিতৰত থকা এক্টৰ্চ এছ’চিয়েচনৰ এগৰাকী স্থায়ী সদস্য।^৮

তেওঁৰ কিছুমান উল্লেখযোগ্য ছবিৰ ভিতৰত ফাৰ্ছ-এ ইৰানী (ইৰানীয়ান কাৰ্পেট), গোজীৰেশ-এ য়েক জাশ্বন (এ ৰিপোৰ্ট অৱ এ ফিষ্ট), পাদাশ-এ চোকুট (দ্য ৰিৱাৰ্ড অৱ চাইলেন্স), ফাৰজান্দে খাক (চাইল্ড অৱ দ্য আৰ্থ), হামিশে পায়ে য়েক জান দাৰ মিয়ান আষ্ট (দেয়াৰ ইজ অলৱেজ এ ওমেন ইন বিটুইন), কুদাক ভা ফেৰেশতেহ (চাইল্ড এণ্ড এঞ্জেল), জিৰ-এ আব (দ্য হাউচ আণ্ডাৰ দ্য ৱাটাৰ), এমৰুজ (টুডে), নাফাচ (ব্ৰেথ), জাপাচ (স্পেয়াৰ), আবাদ ভা য়েক ৰুজ (লাইফ এণ্ড এ ডে), আবাজান, খেজালাত নাকেশ (ডণ্ট বি এম্বাৰেচড), শাবি কে মাহ কামেল চদ (হোৱেন দ্য মুন ৱাজ ফুল) আৰু শ্বিৰিন অন্যতম।

টেলিভিছন

চলচ্চিত্ৰ জগতত অভিজ্ঞতা লাভ কৰাৰ পাছত, শ্ববনাম মোগাদ্দামীয়ে ২০০০-ৰ দশকত পুনৰ টেলিভিছনলৈ প্ৰত্যাৱৰ্তন কৰে। ২০০৬ চনত তেওঁ জনপ্ৰিয় ধাৰাবাহিক জিৰ-এ টিঘ (আণ্ডাৰ দ্য ব্লেড)ত পাৰভিজ পাৰাস্তুই, ফাতেমেহ মতামেদ-আৰ্য আৰু আটিলা পেচিয়ানীৰ দৰে বিখ্যাত অভিনেতাৰ সৈতে অভিনয় কৰে। ইয়াৰ উপৰি তেওঁ ২০০৮ চনত পাচ আজ চালহা (আফটাৰ ইয়াৰ্চ) টেলিভিছন ধাৰাবাহিকত অভিনয় কৰিছিল।^২ ২০১৪ চনত তেওঁৰ প্ৰথম ক্ৰিষ্টাল চিমৰ্গ বঁটা লাভ কৰাৰ পাছত,^৯ মোগাদ্দামীয়ে টেলিভিছনৰ কামত অধিক গুৰুত্ব দিয়ে আৰু তিনিখন ধাৰাবাহিকত মুখ্য চৰিত্ৰত অভিনয় কৰে। তেওঁ ৰাষ্ট্ৰীয় টেলিভিছনৰ বাবে হাফ্ট চং আৰু মদিনা ধাৰাবাহিকৰ উপৰি হোম ভিডিঅ' ষ্ট্ৰীমিং নেটৱৰ্কৰ বাবে কামাল তাব্ৰিজীৰ পৰিচালনাত নিৰ্মিত আব্লাহ (দ্য ফুল) ধাৰাবাহিকত অভিনয় কৰে।^১০

মোগাদ্দামীয়ে টেলিভিছনত কমেডী আৰু ড্ৰামা দুয়োবিধ ধাৰাতে নিজৰ প্ৰতিভা আৰু বহুমুখী অভিনয় শৈলী প্ৰদৰ্শন কৰি একাধিক হাফেজ বঁটা লাভ কৰিবলৈ সক্ষম হয়। ইয়াৰ উপৰি সৰু পৰ্দালৈ আগবঢ়োৱা অনৱদ্য অৱদানৰ বাবে তেওঁক জাম-এ-জাম টেলিভিছন ফেষ্টিভেলৰ তৰফৰপৰাও বঁটাৰে সন্মানিত কৰা হয়। তেওঁ অভিনয় কৰা উল্লেখযোগ্য টিভি ধাৰাবাহিকসমূহৰ ভিতৰত হায়োলা (দ্য মনষ্টাৰ), খাতুন (ৱান্স আপোন এ টাইম ইন ইৰান), বিগোনাহ (ইনচেণ্ট), মৰ্দম-এ মামুলী (অৰ্ডিনাৰী পিপল) আৰু শাবাকেহ-এ মাখফি-য়ে জানান (ওমেনচ্ চক্ৰেট নেটৱৰ্ক) অন্যতম।

কণ্ঠ অভিনয়

ৰেডিঅ’ জগতত বহু বছৰৰ অভিজ্ঞতা আৰু ৰেডিঅ’ নাটকৰ পটভূমি থকাৰ বাবে শ্ববনাম মোগাদ্দামীয়ে কণ্ঠ অভিনয়ৰ ক্ষেত্ৰতো এক শক্তিশালী পৰিচয় গঢ়ি তুলিছে। ২০০৫ চনত ৰেজা ফায়াজীৰ পৰিচালনাত নিৰ্মিত য়েকি বুদ, য়েকি নাবুদ টেলিভিছন ধাৰাবাহিকত তেওঁ এটা পুটলা চৰিত্ৰৰ বাবে কণ্ঠদান কৰিছিল।^৪ ইয়াৰ উপৰি ৰেজা মীৰ-কাৰীমিৰ পৰিচালনাত নিৰ্মিত চাৰিটা খণ্ডৰ এনিমেটেড ধাৰাবাহিক নামহাৰ তৃতীয়টো খণ্ডত তেওঁ হাছান বাঘেৰীৰ পত্নী পাৰভিন দায়ীপুৰৰ চৰিত্ৰটোৰ বাবে কণ্ঠদান কৰিছিল।^১১

শেহতীয়া বছৰবোৰত মোগাদ্দামীয়ে এই ক্ষেত্ৰত নিজৰ কাৰ্যকলাপ অধিক সম্প্ৰসাৰিত কৰিছে। তেওঁ জয়া পিৰজাদৰ চেৰাঘঁহা ৰা মান খামোচ মিকনাম (আই টাৰ্ন অফ দ্য লাইটচ)।^১ আৰু মেহদী আজাৰ ইয়াজদীৰ ঘেচ্ছেহা-য়ে শ্বেখ আত্তাৰ (শ্বেখ আত্তাৰৰ গল্প— ভাল ল’ৰা-ছোৱালীৰ বাবে ভাল গল্প সংকলনৰ পৰা)।^১২ আদি কেইবাখনো বিশিষ্ট গ্ৰন্থৰ অডিঅ' সংস্কৰণৰ বাবে কণ্ঠ দিছে। তদুপৰি তেওঁ মাৰ্গাৰেট মিচেলৰ গ্ৰন্থৰ আধাৰত ভিক্টৰ ফ্লেমিঙৰ পৰিচালনাত নিৰ্মিত ক্লাছিক চলচ্চিত্ৰ গন উইথ দ্য উইণ্ড আৰু আলী হাতামীৰ পৰিচালনাত নিৰ্মিত দিলশোদাগান (লাভ-ষ্ট্ৰীকেন) ছবিত পাৰ্চী ভাষাৰ কণ্ঠ সংযোগ (voice-overs) কৰিছে।^১৩ এই কাম তেওঁ বিশেষভাৱে ৰেডিঅ’ চেভিনা (দৃষ্টিহীনসকলৰ বাবে বিশেষ চিনেমা)ৰ বাবে কৰিছিল, য’ত প্ৰতি মাহে শিল্পীসকলৰ ধাৰাভাষ্যৰ সৈতে দুখনকৈ স্মৰণীয় ক্লাছিক চলচ্চিত্ৰ প্ৰদৰ্শন কৰা হয়।

সফলতা আৰু খ্যাতি

২০০০-ৰ দশকজুৰি থিয়েটাৰৰ মঞ্চত ধাৰাবাহিক উপস্থিতি আৰু এই মাধ্যমত বঁটা লাভ কৰা সত্ত্বেও,^৪ ২০১০-ৰ দশকটোক শ্ববনাম মোগাদ্দামীৰ কেৰিয়াৰৰ সৰ্বোচ্চ শিখৰ বুলি গণ্য কৰিব পাৰি। ২০১৪ চনত ৩২সংখ্যক ফাজৰ চলচ্চিত্ৰ মহোৎসৱত এমৰুজ (টুডে) চলচ্চিত্ৰত আগবঢ়োৱা শ্ৰেষ্ঠ সহকাৰী অভিনেত্ৰীৰ চৰিত্ৰৰ বাবে জীৱনৰ প্ৰথমটো ক্ৰিষ্টাল চিমৰ্গ বঁটা লাভ কৰি তেওঁ বিশেষভাৱে চৰ্চালৈ আহে।^১৪ ই তেওঁৰ কেৰিয়াৰৰ এক গুৰুত্বপূৰ্ণ মোড় আছিল, যিয়ে সকলোৰে দৃষ্টি আকৰ্ষণ কৰাৰ লগতে চলচ্চিত্ৰ জগতত তেওঁক এগৰাকী প্ৰতিভাশালী অভিনেত্ৰী হিচাপে প্ৰতিষ্ঠা কৰে।

তেওঁৰ এই সফলতা ২০১৬ চনতো অব্যাহত থাকে, য’ত তেওঁ ৩৪সংখ্যক ফাজৰ চলচ্চিত্ৰ মহোৎসৱত নাফাচ (ব্ৰেথ) আৰু জাপাচ (স্পেয়াৰ) চলচ্চিত্ৰত কৰা অনৱদ্য অভিনয়ৰ বাবে দ্বিতীয়বাৰৰ বাবে শ্ৰেষ্ঠ সহকাৰী অভিনেত্ৰীৰ ক্ৰিষ্টাল চিমৰ্গ বঁটা লাভ কৰে।^১৫

পৰৱৰ্তী বছৰবোৰত চিনেমা জগতলৈ আগবঢ়োৱা অৱদানৰ বাবে মোগাদ্দামীয়ে ধাৰাবাহিকভাৱে মনোনয়ন আৰু বঁটা লাভ কৰি আহিছে। ২০১৭ চনত অনুষ্ঠিত ৩৫সংখ্যক ফাজৰ চলচ্চিত্ৰ মহোৎসৱত আবাজান ছবিত কৰা অভিনয়ৰ বাবে তেওঁ শ্ৰেষ্ঠ সহকাৰী অভিনেত্ৰীৰ ক্ৰিষ্টাল চিমৰ্গ মনোনয়ন লাভ কৰে।^১৬ ইয়াৰ উপৰি ২০১৮ চনত খেজালাত নাকেশ (ডণ্ট বি এম্বাৰেচড) চলচ্চিত্ৰত মুখ্য চৰিত্ৰত কৰা অভিনয়ৰ বাবে তেওঁ শ্ৰেষ্ঠ মুখ্য অভিনেত্ৰীৰ মনোনয়ন লাভ কৰে।^১৭

২০১০ আৰু ২০২০-ৰ দশকজুৰি এই "সহস্ৰ মুখৰ অভিনেত্ৰী" গৰাকীয়ে,^২ নিজৰ চৰিত্ৰ আৰু অভিনয়ৰ জৰিয়তে ধাৰাবাহিকভাৱে সমালোচকৰ উচ্চ প্ৰশংসা বুটলি আহিছে। ইৰানিয়ান ফিল্ম ক্ৰিটিক্স এণ্ড ৰাইটাৰ্চ এছ’চিয়েচন আদিকে ধৰি কেইবাটাও মৰ্যাদাপূৰ্ণ সংগঠনে তেওঁৰ প্ৰতিভা আৰু অৱদানক ব্যাপকভাৱে স্বীকৃতি দিছে। তেওঁ আবাদ ভা য়েক ৰুজ (লাইফ এণ্ড এ ডে), এমৰুজ (টুডে), খেজালাত নাকেশ (ডণ্ট বি এম্বাৰেচড), আবাজান আৰু শাবি কে মাহ কামেল চদ (হোৱেন দ্য মুন ৱাজ ফুল) আদি ছবিত আগবঢ়োৱা অভিনয়ৰ বাবে এই সংগঠনটোৰপৰা একাধিক মনোনয়ন আৰু বঁটা লাভ কৰিছে।^১৮

শ্ববনাম মোগাদ্দামী ইৰানীয় চলচ্চিত্ৰ জগতৰ এক বিশিষ্ট আৰু প্ৰভাৱশালী ব্যক্তিত্ব। তেওঁ অতি গভীৰতা আৰু সততাৰে চৰিত্ৰসমূহ ৰূপায়ণ কৰাত সিদ্ধহস্ত, যাৰ বাবে তেওঁ দেশখনৰ উদীয়মান অভিনয় শিল্পীসকলৰ বাবে এক অনুপ্ৰেৰণাৰ উৎস হৈ পৰিছে।

পৰোপকাৰী আৰু সামাজিক কাৰ্যকলাপ

অভিনয়ৰ উপৰি মোগাদ্দামীয়ে সামাজিক আৰু পৰোপকাৰী কাৰ্যকলাপৰ সৈতে সক্ৰিয়ভাৱে জড়িত হৈ আহিছে। তেওঁ হৈছে সেইসকল শিল্পীৰ ভিতৰত অন্যতম যিয়ে সুবিধাবঞ্চিত মহিলা, কৰ্কট ৰোগত আক্ৰান্ত শিশু আৰু ভূমিকম্পৰ কৱলত পৰা লোকসকলক সহায় কৰিবলৈ মঞ্চ পঠন (staged readings) মাধ্যমটোক ব্যৱহাৰ কৰিছে। বৰাকত চেৰিটি ফাউণ্ডেশ্যনৰ এগৰাকী সদস্য হিচাপে তেওঁ আৰ্তজনৰ বাবে মঞ্চ পঠনৰ আয়োজন কৰাত বিশেষ অৰিহণা যোগাইছে।^১৯

তেওঁ এটা টেড টক (TEDx) অনুষ্ঠানতো ভাষণ প্ৰদান কৰিছে, য’ত তেওঁ নিজৰ ব্যক্তিগত আৰু প্ৰত্যাহ্বানমূলক অভিজ্ঞতাৰ কথা মুকলিকৈ প্ৰকাশ কৰাৰ লগতে অনুৰূপ বাধা-বিঘিনিৰ সন্মুখীন হোৱা আন লোকসকলক দিক্‌দৰ্শন দিছে। তেওঁৰ এই ভাষণৰ উদ্দেশ্য হৈছে মানুহৰ মনত আশাৰ সঞ্চাৰ কৰা আৰু জীৱনত এটা অৰ্থপূৰ্ণ পথ বিচাৰি পোৱাত সহায় কৰা।^২০

তদুপৰি তেওঁ গুৰুত্বপূৰ্ণ সামাজিক বিষয়সমূহৰ ওপৰত সজাগতা সৃষ্টি কৰিবলৈ নিজৰ সামাজিক মঞ্চ ব্যৱহাৰ কৰি আহিছে আৰু জনসাধাৰণক অৱগত কৰিবলৈ নিজৰ কণ্ঠ উজাৰি দিছে। উদাহৰণস্বৰূপে, তেওঁ হৈছে ইউক্ৰেইনৰ এখন যাত্ৰীবাহী বিমান দুৰ্ঘটনাত পতিত হৈ প্ৰাণ হেৰুওৱা যাত্ৰীসকলৰ মৰ্মান্তিক মৃত্যুত সামাজিক মাধ্যমৰ পোষ্টযোগে সমবেদনা জ্ঞাপন কৰা ইৰানৰ অন্যতম সাংস্কৃতিক ব্যক্তিত্ব আৰু চলচ্চিত্ৰ কৰ্মী।^২১

বিতৰ্ক

মোগাদ্দামীয়ে তেওঁৰ সমগ্ৰ কেৰিয়াৰত কিছু বিতৰ্কৰো সন্মুখীন হৈছে। উদাহৰণস্বৰূপে, ২০২১ চনত হমৰফীগ নামৰ কাৰ্যসূচীত অংশগ্ৰহণ কৰাৰ সময়ত বোমৰানী সংগীত গোষ্ঠীৰ সৈতে একেলগে গান গোৱাৰ এক স্বতঃস্ফূৰ্ত প্ৰস্তাৱে তীব্ৰ প্ৰতিক্ৰিয়াৰ সৃষ্টি কৰিছিল। ইয়াৰ পৰিণতিত কোনো ধৰণৰ স্পষ্টীকৰণ নিদিয়াকৈয়ে নামাভা প্লেটফৰ্মৰপৰা তেওঁ অংশগ্ৰহণ কৰা খণ্ডটো হঠাতে আঁতৰাই দিয়া হৈছিল।^২২

তদুপৰি, ২০২২ চনত কম চহৰৰ ধৰ্মীয় বিদ্যালয়ৰ শিক্ষাৰ্থীসকলে শ্ববনাম মোগাদ্দামীকে ধৰি ১৫ গৰাকী ইৰানীয় অভিনেত্ৰীৰ বিৰুদ্ধে এক গোচৰ ৰুজু কৰিছিল। ৰাজহুৱা স্থান, বিভিন্ন সমাৱেশ আৰু তেওঁলোকৰ ব্যক্তিগত ইনষ্টাগ্ৰাম পেজত পৰিধান কৰা পোছাকৰ বাবে অভিনেত্ৰীসকলৰ বিৰুদ্ধে ৰাজহুৱা শালীনতা ভংগ কৰাৰ অভিযোগ উত্থাপন হৈছিল। এই গোচৰে ছচিয়েল মিডিয়া আৰু সংবাদ মাধ্যমত ব্যাপক চৰ্চাৰ সৃষ্টি কৰিছিল। অৱশ্যে অৱশেষত ন্যায়পালিকাই এই অভিযোগ ভিত্তিহীন বুলি ঘোষণা কৰে আৰু জড়িত অভিনেত্ৰীসকলৰ বিৰুদ্ধে গোচৰ বন্ধ কৰাৰ নিৰ্দেশ জাৰি কৰে।^২৩

বাহ্যিক সংযোগ

• Shabnam Moghaddami On SourehCinema (in Persian)