আনাহিতা দৰগাহী

আনাহিতা দৰগাহী (ফাৰ্চী ভাষা: آناهیتا درگاهی; জন্ম: ২৭ জানুৱাৰী ১৯৮৭) এগৰাকী ইৰানী অভিনেত্ৰী। তেওঁ ফৰ্বিডেন (২০১৮–২০১৯), আই ৱাণ্ট টু লাইভ (২০২১), আৰু দ্য নৰ্থ পোল (২০২৪) নামৰ ৱেব ধাৰাবাহিকসমূহত কৰা অভিনয়ৰ বাবে বিশেষভাৱে পৰিচিত। দ্য লুজাৰ মেন (২০২২) চলচ্চিত্ৰখনত আগবঢ়োৱা অনৱদ্য অভিনয়ৰ বাবে দৰগাহীয়ে এটা হাফেজ বঁটাৰ মনোনয়ন লাভ কৰিছিল।

প্ৰাৰম্ভিক জীৱন

আনাহিতা দৰগাহীৰ জন্ম ১৯৮৪ চনত তেহৰাণত হৈছিল। তেওঁ সাত বছৰ বয়সৰ পৰাই প্ৰখ্যাত চিত্ৰশিল্পী আব্বাছ কাটু জিয়ানৰ তত্ত্বাৱধানত চিত্ৰকলাৰ শিক্ষা গ্ৰহণ কৰিবলৈ আৰম্ভ কৰে। নিজৰ চিত্ৰকলাৰ কেৰিয়াৰত সফলতা অৰ্জন কৰাৰ পিছত দৰগাহীয়ে ইৰান আৰু বিদেশত কেইবাখনো একক প্ৰদৰ্শনী অনুষ্ঠিত কৰাৰ লগতে কেইবাটাও যৌথ প্ৰদৰ্শনীত সক্ৰিয়ভাৱে অংশগ্ৰহণ কৰিছে। তেওঁ বহুতো পোষ্টাৰৰ নক্সাও তৈয়াৰ কৰিছে। এগৰাকী চিত্ৰশিল্পী আৰু অভিনেত্ৰী হোৱাৰ সমান্তৰালভাৱে তেওঁ ৰেজা কিয়ানিয়ানৰ পৰ্দে-য়ে আখাৰ (দ্য লাষ্ট এক্ট) নামৰ মিউজিক ভিডিঅ’টোৰ লগতে আৰিয়ান কেশীষীৰ এটা সংগীত অনুষ্ঠানৰ প্ৰযোজকো আছিল।

দৰগাহী এগৰাকী মঞ্চ আৰু চলচ্চিত্ৰ অভিনেত্ৰী। তেওঁ অভিনয়ৰ প্ৰথম পাঠ লৈছিল ফাৰজাদ মোতামেনৰ পৰা, যিয়ে তেওঁক ২০১৫ চনত নিৰ্মিত নিজৰ আখাৰিন বাৰ কেই ছাহাৰ ৰা দিদি? (ৱেন ডিড ইউ মিট ছাহাৰ লাষ্ট?) চলচ্চিত্ৰখনত এটা চৰিত্ৰত অভিনয় কৰাৰ সুযোগ দিছিল।

দৰগাহীয়ে কলা শাখাত নিজৰ শৈক্ষিক শিক্ষা অব্যাহত ৰাখি তেহৰাণ ইউনিভাৰ্চিটি অৱ আৰ্টৰ পৰা গ্ৰাফিক্সত স্নাতক আৰু চিত্ৰকলাত স্নাতকোত্তৰ ডিগ্ৰী লাভ কৰে।

২০১৬ চনত তেওঁ অভিনেতা, গায়ক তথা পৰিচালক আশকান খাতিবীৰ সৈতে বিবাহপাশত আৱদ্ধ হয়।^১ তেওঁ ফুটবল খেলুৱৈ ডেনিছ একৰ্টৰ মাহীয়েক।^২

কৰ্মজীৱন

চিত্ৰকলা

দৰগাহীয়ে তেহৰাণৰ নিয়াবাৰান প্ৰসাদ চৌহদ, চেইহাউন গেলেৰী আৰু ফাৰমানিয়ে গেলেৰীত নিজৰ কৰ্মৰ তিনিখন একক প্ৰদৰ্শনী অনুষ্ঠিত কৰিছে। ইয়াৰ উপৰি তেওঁ ছাদাবাদ প্ৰসাদ চৌহদৰ মিউজিয়াম অৱ ফাইন আৰ্টছ, কামাল-অল-মোল্ক গেলেৰী আৰু ডুবাইৰ জাম আৰ্ট গেলেৰীত তিনিখন যৌথ প্ৰদৰ্শনীত অংশগ্ৰহণ কৰিছে। আৰিয়ানা গেলেৰীত তেওঁৰ শেহতীয়া চিত্ৰকলা প্ৰদৰ্শনী “ফাস্ল-ই মান কোজাস্ত?” (“হোৱেৰ ইজ মাই চিজন?”) অনুষ্ঠিত হৈছিল।

অভিনয়

২০১৫ চনত ফাৰজাদ মোতামেনৰ পৰিচালনাত নিৰ্মিত ডিটেক্টিভ চলচ্চিত্ৰ আখাৰিন বাৰ কেইছাহাৰ ৰা দিদি? (ৱেন ডিড ইউ মিট ছাহাৰ লাষ্ট?)-ৰ জৰিয়তে দৰগাহীয়ে অভিনয় জগতত খোজ পেলায়। ফাজৰ আন্তঃৰাষ্ট্ৰীয় চলচ্চিত্ৰ মহোৎসৱত পাঁচটা বিভাগত মনোনীত হোৱা এই চলচ্চিত্ৰখনে তেওঁক জনপ্ৰিয়তাৰ শীৰ্ষলৈ লৈ যায়।

ইয়াৰ পিছত দৰগাহীয়ে কেইবাখনো চলচ্চিত্ৰত অভিনয় কৰে, যাৰ ভিতৰত জাৰ্দ (য়েল্ল’, পৰিচালক: মোস্তফা তাঘিজাদেহ, ২০১৬), দাস্তানে চিয়াভাশ (দ্য ষ্ট’ৰী অৱ চিয়াভাশ, পৰিচালক: আমিৰ এস্কান্দাৰী, ২০১৭), ঘানুনে মৰ্ফি (মৰ্ফিজ ল’, পৰিচালক: ৰামবদ জাভান, ২০১৮), চেস্ম-অ-গৌচ-বাস্তহ (দ্য নাইভ ৱান, পৰিচালক: ফাৰজাদ মোতামেন, ২০১৮), সুদাবেহ (পৰিচালক: মহম্মদ আলী সাজ্জাদী, ২০১৯), দেৰাখ্তে বাণফছ (দ্য পাৰ্পল ট্ৰী, পৰিচালক: আমিন আচলানী, ২০১৯), আৰু নিলগৌণ (এজুৰে, পৰিচালক: হোছেইন ছোহেইলিজাদেহ, ২০১৯) অন্যতম।

তেওঁ আমিৰ পুৰকিয়ানৰ পৰিচালনাত নিৰ্মিত মামনুৱেহ (দ্য ফৰ্বিডেন, ২০১৭) নামৰ দূৰদৰ্শন ধাৰাবাহিকখনত "তালা দাভাল্লৌ" চৰিত্ৰত অভিনয় কৰিছিল।

মঞ্চ জগততো দৰগাহীয়ে কেইবাখনো নাটকত অংশ লৈছিল, যাৰ ভিতৰত দাৰ এন্তেজাৰে আদোল্ফ (ৱেইটিং ফৰ আদোল্ফ, পৰিচালক: আলিৰেজা কুষ্ক জালালী, ২০১৭), ছে খাহাৰ (দ্য থ্ৰী চিষ্টাৰ্ছ, পৰিচালক: মহম্মদ-হাছান মা'জুনী, ২০১৭), দহ ছাল তনহাৰী (টেন য়েৰ্ছ অৱ চলিটিউড, পৰিচালক: আশকান খাতিবী, ২০১৮), আৰু ঘাহতিজাদেগান (দ্য ফেমিন-ষ্ট্ৰিকেন, পৰিচালক: আশকান খাতিবী, ২০১৯) উল্লেখযোগ্য।^৩