শক্তি অৰুলানন্দম

অৰুলমোলি (জন্ম: ১৯৬২) এগৰাকী ভাৰতীয় পৰিৱেশ-নাৰীবাদী কবি, লেখিকা আৰু শিল্পী। তেওঁ তামিলনাডু ৰাজ্যৰ বাসিন্দা আৰু শক্তি অৰুলানন্দম ছদ্ম নামেৰে পৰিচিত।^১ তেওঁৰ কবিতাৰ বাবে তেওঁ তাঞ্জাই প্ৰকাশ বঁটা, শিখৰম বঁটা আৰু তিৰুপুৰ অৰিমা শক্তি বঁটা লাভ কৰিছে।^২ অৰুলানন্দম এগৰাকী সফল চিত্ৰশিল্পী হিচাপেও পৰিচিত আৰু তেওঁৰ চিত্ৰসমূহ কেইবাখনো ক্ষুদ্ৰ আলোচনীত প্ৰকাশ পাইছে।^১ দ্য হিন্দুৰ মতে, তেওঁৰ শ্ৰমিক শ্ৰেণীৰ পটভূমি, শ্ৰমৰ প্ৰতি থকা মৰ্যাদা আৰু শিল্প তথা ধাৰণাৰ জগতখনৰ প্ৰতি থকা আগ্ৰহে তামিল সাহিত্যলৈ আগবঢ়োৱা অৱদানত এক প্ৰভাৱশালী সাঁচ বহুৱাইছে।^৩

জীৱনী

তামিলনাডুৰ চালেম জিলাৰ সেভাপ্পেট্টাই গাঁৱত তেওঁৰ জন্ম হৈছিল। তেওঁ অবিবাহিত হৈ থকাৰ সিদ্ধান্ত লৈছিল আৰু জীৱিকাৰ বাবে বৈদ্যুতিক মেৰামতিৰ কাম কৰিছিল।^১২ তেওঁৰ ভাষ্য অনুসৰি, নৱম শ্ৰেণীত পঢ়ি থকাৰ সময়তে মাতৃৰ মৃত্যু হোৱাত তেওঁ ঘৰুৱা কামত সহায় কৰিবলৈ স্কুল এৰিবলগীয়া হৈছিল। এজন পুৰুষৰ সেৱা কৰি থকা সেই পুৰণি পৰম্পৰাগত পথটো অনুসৰণ কৰিব নিবিচাৰি তেওঁ অবিবাহিত হৈ থকাৰ সিদ্ধান্ত লয়। তেওঁ জয়কান্তন আৰু অখিলনৰ দৰে তামিল লেখকৰ ৰচনা পঢ়ি গৈছিল আৰু পৰৱৰ্তী সময়ত টাইপ ৰাইটিং কামৰ বাবে দশম শ্ৰেণীৰ পৰীক্ষাত উত্তীৰ্ণ হৈছিল। একে সময়তে তেওঁ এখন বৈদ্যুতিক মেৰামতিৰ দোকানত সহায়ক হিচাপে কাম কৰিবলৈ আৰম্ভ কৰে আৰু লাহে লাহে নিজেই মেৰামতিৰ কাম শিকি লয়। এনে দোকানত কামৰ কোনো নিৰ্দিষ্ট সময় নথকাৰ বাবে তেওঁ ইয়াত কাম কৰাৰ সিদ্ধান্ত লয়, যাতে পঢ়া-শুনা, লিখা আৰু ছবি অঁকাৰ বাবে কিছু সময় উলিয়াব পাৰে। প্ৰায় ১৭–১৮ বছৰ বয়সত তেওঁৰ প্ৰথম কবিতা মালাই মালৰত প্ৰকাশ পাইছিল।^১ ২০১৯ চনৰ জানুৱাৰী মাহলৈকে অৰুলানন্দমৰ তিনিখন কাব্য সংকলন আৰু ২৫টা চুটি গল্প প্ৰকাশ পাইছে।^১

নিৰ্বাচিত ৰচনা

• Irunmaiyilirunthu (আন্ধাৰৰ পৰা)
• Paravaikal Purakkanitha Nagaram (চৰায়ে পৰিত্যাগ কৰা চহৰ)
• Thoduvanamattra Kadal (দিগন্তহীন সাগৰ)