য়নমি পাৰ্ক

য়নমি পাৰ্ক (কোৰিয়ান: 박연미; জন্ম ৪ অক্টোবৰ ১৯৯৩) হৈছে এগৰাকী উত্তৰ কোৰিয়াৰ পলাতক, ইউটিউবাৰ, লেখিকা আৰু আমেৰিকান ৰক্ষণশীল সক্ৰিয়বাদী, যাক "বিশ্বৰ আটাইতকৈ প্ৰসিদ্ধ উত্তৰ কোৰিয়াৰ পলাতকসকলৰ অন্যতম" বুলি বৰ্ণনা কৰা হৈছে।^১ তেওঁ ২০০৭ চনত ১৩ বছৰ বয়সত উত্তৰ কোৰিয়াৰ পৰা চীনলৈ পলাই যায়, তাৰ পিছত দক্ষিণ কোৰিয়া আৰু পাছত আমেৰিকালৈ যায়। পাৰ্কে ২০১১ চনত 'নাও অন মাই ৱে টু মিট ইউ' অনুষ্ঠানত তেওঁৰ মিডিয়া অভিষেক কৰে, য'ত তেওঁক তেওঁৰ পৰিয়ালৰ ধনী জীৱনশৈলীৰ কাহিনীৰ বাবে "পেৰিছ হিলটন" বুলি উপাধি দিয়া হৈছিল।^১ তেওঁ ২০১৪ চনত ডাবলিন, আয়াৰলেণ্ডত অনুষ্ঠিত 'ৱান ইয়াং ৱৰ্ল্ড চামিট'ত তেওঁৰ ভাষণৰ পিছত বিশ্বব্যাপী প্ৰশংসা লাভ কৰে।^২৩ পাৰ্কৰ আত্মজীৱনী 'ইন অ'ৰ্ডাৰ টু লিভ: এ নৰ্থ কোৰিয়ান গাৰ্ল'ছ জাৰ্নি টু ফ্ৰীডম' ২০১৫ চনত প্ৰকাশিত হয়, আৰু ২০২৩ চন পৰ্যন্ত ১০০,০০০ ৰো অধিক প্ৰতিলিপি বিক্ৰী হৈছে।^{৪ ১} ২০২০ দশকৰ সময়ছোৱাত, তেওঁ বক্তৃতা, পডকাষ্ট আৰু ২০২৩ চনত তেওঁৰ দ্বিতীয়খন কিতাপ 'হুৱাইল টাইম ৰিমেইনছ: এ নৰ্থ কোৰিয়ান ডিফেক্টৰ'ছ চাৰ্চ ফৰ ফ্ৰীডম ইন আমেৰিকা'ৰ প্ৰকাশৰ জৰিয়তে আমেৰিকান মিডিয়াত এগৰাকী ৰক্ষণশীল ৰাজনৈতিক মন্তব্যকাৰীৰূপে পৰিচিত হয়।^১

উত্তৰ কোৰিয়াৰ জীৱনৰ বিষয়ে তেওঁ কৰা দাবীসমূহৰ প্ৰামাণিকতা ব্যাপক সন্দেহৰ বিষয় হৈ পৰিছে- কাৰণ তেওঁৰ পূৰ্বৰ ভাষ্যৰ সৈতে আৰু তেওঁৰ মাতৃ আৰু অন্যান্য উত্তৰ কোৰিয়াৰ পলাতকসকলৰ কাহিনীৰ সৈতে বহুতো কথাৰ অমিল দেখা গৈছে। ৰাজনৈতিক মন্তব্যকাৰী, সাংবাদিক আৰু কোৰিয়ান অধ্যয়নৰ অধ্যাপকে পাৰ্কৰ উত্তৰ কোৰিয়াৰ জীৱনৰ বিৱৰণসমূহৰ অসংগতি, বিৰোধিতামূলক দাবী আৰু অতিশয়োক্তিৰ বাবে সমালোচনা কৰিছে।^{৫৬৭৮৯} উত্তৰ কোৰিয়াৰ অন্যান্য ঠাই আৰু পাৰ্কৰ চহৰখনৰ পৰা অহা আন আন পলাতক লোকে উদ্বেগ প্ৰকাশ কৰিছে যে "প্ৰসিদ্ধ পলাতকসকলে" উত্তৰ কোৰিয়াৰ জীৱন সম্পৰ্কে অতিশয়োক্তি কৰাৰ প্ৰৱণতাই তেওঁলোকৰ কাহিনীৰ প্ৰতি সন্দেহ সৃষ্টি কৰিব। ^১০ ২০১৪ চনত, 'দ্য ডিপ্লমেট'ত সাংবাদিক মেৰী এ্যান জোলিয়ে (পাৰ্কৰ পূৰ্বৰ সহকৰ্মী) পাৰ্কৰ স্মৃতি আৰু কোৰিয়াৰ জীৱনৰ বিৱৰণত থকা বহুতো অসংগতিৰ তথ্য প্ৰকাশ কৰে।^১০ জুলাই ২০২৩ চনত, 'ৱাশ্বিংটন প'ষ্ট'ৰ এটা অনুসন্ধানে পাৰ্কৰ উত্তৰ কোৰিয়াৰ জীৱনৰ দাবীসমূহৰ সামান্য সত্যতা পায়। পাৰ্কে এই অসংগতিৰ কাৰণ তেওঁৰ অসম্পূৰ্ণ স্মৃতি আৰু ভাষা দক্ষতাক দায়ী কৰিছে। তেওঁৰ আত্মজীৱনীৰ সহলেখিকা মেৰিয়েন ভ'লাৰ্ছৰ মতে, পাৰ্ক উত্তৰ কোৰিয়াৰ কুৎসা ৰটনাৰ চিকাৰ।^{১ ১১০১১}

পাৰ্কে 'ভয়চ অফ নৰ্থ কোৰিয়া বাই ইয়নমি পাৰ্ক' নামৰ ইউটিউব চেনেল চলায়, যাৰ এক মিলিয়নৰো অধিক গ্ৰাহক আছে ( ২০২৩ চনৰ জুলাই মাহ পৰ্যন্ত )।^১২১ তেওঁৰ ৰাজনৈতিক দৃষ্টিভংগী "আমেৰিকান ৰক্ষণশীল" বুলি জনা যায়। তেওঁ আমেৰিকাত ৰাজনৈতিক শুদ্ধতাৰ সৈতে উত্তৰ কোৰিয়াৰ তুলনা কৰি ইয়াৰ সমালোচনা কৰিছে। 'ৱাক' সংস্কৃতিৰো তেওঁ সমালোচনা কৰিছে।^১<ref name="Sommer2023" ^১১৩

প্ৰাৰম্ভিক জীৱন

উত্তৰ কোৰিয়া (১৯৯৩–২০০৭) পাৰ্কৰ জন্ম ১৯৯৩ চনৰ ৪ অক্টোবৰ তাৰিখে উত্তৰ কোৰিয়াৰ ৰিয়াংগাং প্ৰদেশৰ হ্যেছানত (গণতান্ত্ৰিক প্ৰজাতন্ত্ৰ উত্তৰ কোৰিয়া – DPRK) হৈছিল।^১৪ তেওঁৰ পিতৃ আছিল পাৰ্ক জিন-চিক আৰু মাতৃ আছিল বিয়ন কুম-চুক।^১৫ তেওঁৰ বায়েক ঊনমিৰ জন্ম ১৯৯১ চনত হৈছিল।^১৪ পাৰ্কৰ শৈশৱ কালত উত্তৰ কোৰিয়াত আছিল দুৰ্ভিক্ষৰ সময়।^১০ পাৰ্কৰ পিতৃ এজন চৰকাৰী কৰ্মচাৰী আছিল। তেওঁ হ্যেছান টাউন হলত উত্তৰ কোৰিয়াৰ শাসক দল, ৱাৰ্কাৰ্ছ' পাৰ্টি অফ কোৰিয়াৰ সদস্য হিচাপে কাম কৰিছিল আৰু চীনৰ পৰা চোৰাংকৈ সামগ্ৰী আমদানি কৰি তেওঁৰ উপাৰ্জন বৃদ্ধি কৰিছিল।^১৬

সাংবাদিকসকলে কৈছে যে পাৰ্কৰ শৈশৱৰ স্মৃতি আৰু বৰ্ণনাসমূহ প্ৰায়েই বিপৰীতধৰ্মী আৰু তেওঁৰ মাতৃ তথা আন আন পলায়নকাৰীসকলে দিয়া উত্তৰ কোৰিয়াৰ জীৱনৰ বৰ্ণনাৰ সৈতে মিল নাখায়। লগতে, তেওঁ তেওঁৰ কাহিনীবোৰ শ্ৰোতাভেদে সলনি কৰি আছে বুলি অভিযোগ কৰা হৈছে।^{১৭১১০}

২০১৪ চনত, অ'ছলো ফ্ৰিডম ফোৰামত দিয়া এক বক্তৃতাত, পাৰ্কে কিশোৰী অৱস্থাত ১৯৯৭ চনৰ টাইটেনিক চিনেমাখন চোৱাৰ অভিজ্ঞতাৰ বিষয়ে কৈছিল ‌। তেওঁ পূৰ্বে বিশ্বাস কৰিছিল যে "শাসক কিম পৰিয়ালৰ বাবে মৰাটো" - যিকোনো ব্যক্তিৰ বাবে "সৰ্বাধিক গৌৰৱময় কাম।" কিন্তু চিনেমাখনৰ ৰোমাণ্টিক প্ৰেম আৰু ত্যাগৰ বিষয়বস্তুৱে তেওঁৰ চিন্তাধাৰাৰ পৰিবৰ্তন ঘটাইছিল আৰু তেওঁ জাতীয় ত্যাগৰ চিন্তাৰ পৰা ব্যক্তিগত ভালপোৱাৰ বাবে ত্যাগ কৰিবলৈ উৎসাহিত হৈছিল।^১৮

উত্তৰ কোৰিয়াৰ পৰা চীনলৈ পলায়ন (২০০৭)

২০০৭ চনত, ১৩ বছৰ বয়সত য়নমি পাৰ্কে উত্তৰ কোৰিয়া এৰি যায়।^১৪ দি টেলিগ্ৰাফ কাকতত ২০১৪ চনত প্ৰকাশিত তেওঁৰ বৰ্ণনা অনুসৰি, তেওঁৰ পিতৃয়ে ঘোঁচ দি কাৰাগাৰৰ পৰা মুক্তি লোৱাৰ পিছত, পৰিয়ালটোৱে চীনলৈ পলায়নৰ পৰিকল্পনা আৰম্ভ কৰিছিল। কিন্তু তেওঁৰ বায়েক ঊনমিয়ে পৰিয়ালক নজনোৱাকৈ আগতেই চীনলৈ পলাই যায়।^১৬ পৰিয়ালটোৱে ভয় কৰিছিল যে ঊনমিৰ পলায়নৰ বাবে তেওঁলোকক শাস্তি দিয়া হ'ব, সেইবাবে য়নমি আৰু তেওঁৰ মাতৃয়ে উত্তৰ কোৰিয়া এৰি চীনলৈ গ'ল। উত্তৰ কোৰিয়াৰ লোকক চীনলৈ চোৰাংকৈ নিয়া দালালৰ সহায় লৈ তেওঁলোকে সীমান্ত পাৰ হয়।^১৬

তেওঁলোকে ৩০ মাৰ্চ, ২০০৭ তাৰিখে সীমান্ত পাৰ হৈ চীনৰ জিলিন প্ৰদেশৰ চাংবাই কোৰিয়ান স্বায়ত্ত্বশাসিত জিলাত উপস্থিত হয়।^১৬ এই সময়তে, পাৰ্কে নিজৰ মাতৃক যৌন নিৰ্যাতিত হোৱাটো চাই থাকিবলগীয়া হৈছিল।^১৯

তেওঁ কৈছিল, "মই মোৰ মাতৃক ধৰ্ষিতা হোৱাটো দেখিছিলোঁ। ধৰ্ষণকাৰীজন এজন চীনা দালাল আছিল। মই তেওঁৰ মুখখন কেতিয়াও পাহৰিব নোৱাৰিম... তেতিয়া মই মাত্ৰ ১৩ বছৰ বয়সৰ আছিলোঁ।" ^২০২১ চীনৰ কিং ডাও চহৰত চীনা আৰু দক্ষিণ কোৰিয়াৰ খ্ৰীষ্টান মিছনাৰীসকলৰ দ্বাৰা পৰিচালিত এখন খ্ৰীষ্টান আশ্ৰয়কেন্দ্ৰত তেওঁলোকে থাকিবলৈ লয়। চহৰখনত বিশাল সংখ্যক জাতিগত কোৰিয়ান বসবাস কৰা বাবে, তেওঁলোকে চীন চৰকাৰৰ দৃষ্টি এৰাই চলিবলৈ সক্ষম হৈছিল। মিছনাৰীসকলৰ সহায়ত, তেওঁলোকে মঙ্গোলিয়াৰ মাজেৰে দক্ষিণ কোৰিয়ালৈ পলায়ন কৰে।^১৬

পাৰ্কৰ পিতৃ আৰু পৰিয়ালৰ পলায়ন

পাৰ্কে তেওঁৰ পিতৃ আৰু পৰিয়ালৰ উত্তৰ কোৰিয়াৰ পৰা পলায়নৰ বিষয়ে তিনিবাৰ পৃথক আৰু সম্পূৰ্ণৰূপে বেলেগ বেলেগ বৰ্ণনা কৰিছে। তেওঁ কেতিয়াবা কৈছে যে তেওঁৰ পিতৃয়ে নিজৰ অসুস্থতাৰ বাবে পৰিয়ালটোৰ গতি ধীৰ হ'ব বুলি ভাবি উত্তৰ কোৰিয়াত থাকি যোৱাৰ সিদ্ধান্ত লৈছিল। আনহাতে, তেওঁ আন এটা কাহিনীত কৈছে যে তেওঁ তেওঁৰ পিতৃৰ সৈতে একেলগে পলায়ন কৰিছিল আৰু পলায়নৰ সময়ত অসুস্থতাৰ ফলত তেওঁৰ পিতৃৰ মৃত্যু হোৱাৰ পিছত তেওঁৰ মৃতদেহ পুতিছিল। আন কেতিয়াবা, তেওঁ দাবী কৰিছে যে তেওঁলোকে নিজৰ পিতৃক কেতিয়াও জনোৱা নাছিল যে পৰিয়ালটোৱে পলোৱাৰ সিদ্ধান্ত লৈছে আৰু তেওঁলোকে তেওঁক পিছত এৰি থৈ আহিছিল।

২০১৪ চনৰ দি টেলিগ্ৰাফৰ বৰ্ণনা আৰু ২০১৫ চনত দি গাৰ্ডিয়ান ত প্ৰকাশিত এক প্ৰতিবেদন অনুসৰি,^১৬ পাৰ্কৰ পিতৃ অসুস্থ আছিল আৰু তেওঁ বিশ্বাস কৰিছিল যে তেওঁৰ ৰোগে পৰিয়ালটোৰ যাত্ৰাত বিঘিনি ঘটাব, গতিকে তেওঁ উত্তৰ কোৰিয়াত থাকি যোৱাৰ সিদ্ধান্ত লৈছিল।^১১কিন্তু, এই একে সময়ছোৱাত পাৰ্কে দিয়া আন কিছুমান বিবৃতিত তেওঁ কৈছিল যে তেওঁৰ পিতৃয়ে তেওঁলোকৰ সৈতে চীনলৈ পলাই গৈছিল।^২০১০

সীমান্ত পাৰ হোৱাৰ পিছত, পাৰ্ক আৰু তেওঁৰ মাতৃ জিলিনলৈ গৈছিল। তেওঁলোকে পাৰ্কৰ বায়েক ঊনমিক বিচাৰি ফুৰিছিল, কিন্তু মানুহ সৰবৰহকাৰীৰ পৰা কোনো সন্ধান লাভ কৰিবলৈ সক্ষম হোৱা নাছিল। তেওঁলোকে ভাবিছিল যে ঊনমি হয়তো ইতিমধ্যে মৃত্যুমুখত পৰিছে।^১৬ পাৰ্কৰ পিতৃৰ মৃত্যুৰ বিষয়ে পাৰ্ক আৰু তেওঁৰ মাতৃৰ বৰ্ণনা একে নহয়।^১৬১০

তৃতীয় এটা ভাষ্যত পাৰ্কে কৈছে যে তেওঁ আৰু তেওঁৰ পৰিয়ালে তেওঁৰ পিতৃক উত্তৰ কোৰিয়াত এৰি আহিছিল আৰু তেওঁলোক পলাই অহাৰ বিষয়ে কেতিয়াও জনোৱা হোৱা নাছিল।^২২

মঙ্গোলিয়াত আশ্ৰয় বিচাৰি

পাৰ্কৰ মতে, ২০০৯ চনৰ ফেব্ৰুৱাৰীত, কুইংডাওৰ এটা খ্ৰীষ্টান আশ্ৰয়স্থলত দুদিন থকাৰ পিছত, তেওঁ মাতৃৰ সৈতে মঙ্গোলিয়াস্থ দক্ষিণ কোৰিয়াৰ কূটনীতিজ্ঞৰ আশ্ৰয় বিচাৰি গবি মৰুভূমি পাৰ হৈ গৈছিল।^১৬ পাৰ্কৰ দাবী অনুসৰি, তেওঁলোকে মঙ্গোলিয়াৰ সীমান্তত উপস্থিত হোৱাৰ পিছত, সীমান্ত সুৰক্ষা কৰ্তৃপক্ষৰ ৰক্ষীসকলে তেওঁলোকক আটক কৰে আৰু চীনলৈ পুনৰ প্ৰেৰণ কৰাৰ ভয় দেখুৱায়। পাৰ্কৰ মনত আছে যে এই মুহূৰ্তত তেওঁ আৰু তেওঁৰ মাতৃয়ে নিজৰ ৰেজৰ ব্লেড ব্যৱহাৰ কৰি আত্মহত্যাৰ সংকল্প লৈছিল, তেওঁ কৈছিল: "মোৰ জীৱনৰ অন্তিম মুহূৰ্ত পালেহি বুলি ভাবিছিলোঁ। আমি এজনে আনজনক বিদায় দিছিলোঁ।"

তেওঁলোকৰ এই কাৰ্যত সীমান্ত ৰক্ষীসকলে দয়া কৰিবলৈ বাধ্য হৈছিল। কিন্তু পাৰ্কৰ মতে, তেওঁলোকক গ্ৰেপ্তাৰ কৰি মঙ্গোলিয়াৰ ৰাজধানী উলানবাটৰৰ এখন আটক কেন্দ্ৰত ৰখা হৈছিল। পাছত, জৰ্ডান পিটাৰচনক দিয়া এটা সাক্ষাৎকাৰত পাৰ্কে কৈছিল যে তেওঁ বিশ্বাস কৰিছিল সীমান্ত ৰক্ষীসকলে তেওঁলোকৰ সৈতে খেলা কৰি আছিল, যিহেতু মঙ্গোলিয়াৰ আনুষ্ঠানিক নীতি অনুসৰি উত্তৰ কোৰিয়াৰ শৰণাৰ্থীসকলক দক্ষিণ কোৰিয়ালৈ প্ৰেৰণ কৰা হয়।^২৩

২০০৯ চনৰ ১ এপ্ৰিলত, পাৰ্ক আৰু তেওঁৰ মাতৃক উলানবাটাৰৰ চিংগিছ খান বিমানবন্দৰলৈ লৈ যোৱা হৈছিল, যাৰ পৰা তেওঁলোকক ছিউল ইনচন আন্তঃৰাষ্ট্ৰীয় বিমানবন্দৰলৈ বিমানযোগে প্ৰেৰণ কৰা হৈছিল। পাছত দি টেলিগ্ৰাফ (The Telegraph) ত তেওঁ কৈছিল যে মঙ্গোলিয়াৰ কাষ্টম কৰ্তৃপক্ষই তেওঁক অনুমতি দিয়াৰ পিছত তেওঁ বহুতো পাতল অনুভৱ কৰিছিল।^১৬

বহু বছৰ পিছত, দক্ষিণ কোৰিয়াৰ ৰাষ্ট্ৰীয় চোৰাংচোৱা সংস্থাই পাৰ্কক জনায় যে তেওঁৰ বায়েক ঊনমি চীন আৰু থাইলেণ্ডৰ জৰিয়তে দক্ষিণ কোৰিয়ালৈ পলাই আহিছিল। পাৰ্ক আৰু তেওঁৰ মাতৃয়ে পিছত ঊনমিৰ সৈতে পুনৰ মিলিত হৈছিল।^১৬

দক্ষিণ কোৰিয়া (২০০৯–২০১৪)

২০০৯ চনত চিউলত উপস্থিত হোৱাৰ লগে লগেই পাৰ্কে স্বয়ংক্ৰিয়ভাৱে দক্ষিণ কোৰিয়াৰ নাগৰিকত্ব লাভ কৰিছিল।^২৪ দক্ষিণ কোৰিয়াৰ একত্ৰীকৰণ মন্ত্ৰণালয়ৰ হানাৱন পুনৰ্বসতি কেন্দ্ৰত প্ৰশিক্ষণ লাভ কৰাৰ পিছত, পাৰ্ক আৰু তেওঁৰ মাতৃয়ে এছানত বসবাস আৰম্ভ কৰে। তেওঁলোকে দক্ষিণ কোৰিয়াৰ জীৱনত খাপ খোৱাত অসুবিধা পাইছিল, কিন্তু শেষত দোকান সহায়ক আৰু ৰেষ্টুৰেণ্টত পৰিচাৰিকা হিচাপে কাম বিচাৰি পাইছিল। দ্বিতীয় শ্ৰেণীৰ শিক্ষাৰে দক্ষিণ কোৰিয়াত উপস্থিত হোৱা সত্ত্বেও, পাৰ্কে ১৮ মাহৰ ভিতৰত উচ্চতৰ মাধ্যমিকৰ সমতুল্য শিক্ষাগ্ৰহণ সম্পূৰ্ণ কৰিছিল।[^৪ পিছত তেওঁ চিউলৰ ডংগুক বিশ্ববিদ্যালয়ত ভৰ্তি হৈছিল।^১৬২৫

এতিয়া তোমাক লগ পাবলৈ গৈ আছোঁ (২০১১)

২০১১ চনত, য়নমি পাৰ্কে পাৰ্ক ইয়েজু নামেৰে দক্ষিণ কোৰিয়াৰ ৰিয়েলিটি টেলিভিছনৰ অনুষ্ঠান নাউ অন মাই ৱে টু মিট ইউ (Now On My Way to Meet You ) ত অংশগ্ৰহণ কৰিছিল।^১ এই অনুষ্ঠানটো চেনেল A ত সম্প্ৰচাৰিত হৈছিল আৰু তেওঁক ৰাজহুৱা ব্যক্তিত্ব হিচাপে আত্মপ্ৰকাশ কৰাত‌ এক মূল ভূমিকা লৈছিল বুলি বুলি জনা যায়।^১

শ্ৰুতি-প্ৰমাণমূলক ডকুমেণ্টাৰীৰ ৰূপত আৰম্ভ হোৱা অনুষ্ঠানটোত মূলত উত্তৰ কোৰিয়াৰ পলায়নকাৰীসকলে তেওঁলোকৰ পৰিয়ালৰ সৈতে পুনৰ মিলিত হোৱাৰ অভিজ্ঞতাৰ ভিত্তিত প্ৰস্তুত কৰা হৈছিল। পিছত, অনুষ্ঠানটো উত্তৰ কোৰিয়াৰ পলায়নবাদী যুৱতীসকলক লৈ এক বিনোদনমূলক শ্ব'ত পৰিণত হৈছিল, যাক পলাতকা ৰূপহী (Defector beauties)আখ্যা দিয়া হৈছিল।^১২৬

গৱেষক ৰিচাৰ্ড মৰেইৰ মতে, পাৰ্কৰ ইংৰাজী ভাষা কোৱাৰ দক্ষতা আৰু তেওঁৰ কম বয়স আৰু আকৰ্ষণীয় ব্যক্তিত। ঋঋ সাংবাদিকসকলৰ মাজত তেওঁৰ জনপ্ৰিয়তা বৃদ্ধি পোৱাৰ কাৰক হৈছিল।^১৭

তেওঁক "উত্তৰ কোৰিয়াৰ পেৰিছ হিল্টন"^{১১০২৭} বুলিও অভিহিত কৰা হৈছিল, কিয়নো তেওঁৰ অন্যান্য পলায়নকাৰী সহ-অভিনেত্ৰীসকলৰ তুলনাত তেওঁৰ শৈশৱ তুলনামূলকভাৱে বিলাসী আছিল।^১পাৰ্কৰ পৰিয়ালে বিলাসী সামগ্ৰীৰ সুবিধা লাভ কৰিছিল আৰু সেয়ে, তেওঁৰ মাতৃয়ে অনুষ্ঠানটোত কোৱা মতে পাৰ্কে নিজৰ সহ-অভিনেত্ৰীসকলৰ দুখ-দুৰ্দশা বুজি পোৱা নাছিল আৰু তেওঁলোক একে দেশৰ বুলি অনুভৱ কৰিব নোৱাৰিছিল।^১

মাৰ্কিন যুক্তৰাষ্ট্ৰত জীৱন (২০১৪–বৰ্তমান)

২০১৪ চনত, পাৰ্ক বিবিচি ১০০ মহিলা (BBC 100 Women) তালিকাত অন্তৰ্ভুক্ত হৈছিল।^২৮ তেওঁ নিউ ইয়ৰ্ক চহৰলৈ স্থানান্তৰিত হৈছিল আৰু নিজৰ স্মৃতিকথা সম্পূৰ্ণ কৰিবলৈ কাম কৰিছিল, লগতে এজন সক্ৰিয় কৰ্মী হিচাপে কাম কৰি গৈছিল^২৯

২০২১ চনত, তেওঁ প্ৰাকৃতিকভাৱে মাৰ্কিন নাগৰিক হৈছিল। পাৰ্ক ২০১৭-২০২০ চনৰ ভিতৰত এজন আমেৰিকান ব্যক্তি, ইজেকিয়েলৰ সৈতে বিবাহপাশত আবদ্ধ হৈছিল, আৰু তেওঁলোকৰ এজন পুত্ৰ আছিল।^২৪

২০১৫ চনত, পাৰ্কে তেওঁৰ স্মৃতিকথা In Order to Live প্ৰকাশ কৰিছিল, য'ত তেওঁ নিজৰ পলায়নৰ পথ আৰু উচ্চ শিক্ষালাভৰ যাত্ৰা বৰ্ণনা কৰিছে। পিছত, তেওঁ বাৰ্নাৰ্ড কলেজত পাঠ্যক্ৰম লৈছিল আৰু ২০১৬ চনত কলম্বিয়া ইউনিভাৰ্ছিটিৰ স্কুল অফ জেনেৰেল ষ্টাডিজ(School of General Studies)ত ভৰ্তি হৈছিল। পাৰ্ক ২০২০ চনত কলম্বিয়াৰ পৰা স্নাতক হয়।^২৯

২০২১ চনত, তেওঁ কলম্বিয়াত পঢ়াৰ অভিজ্ঞতাৰ বিষয়ে কৈছিল যে "তেওঁলোকে তেওঁলোকৰ নিচিনাকৈ ভাবিবলৈ আপোনাক বাধ্য কৰে।" এজন অধ্যাপকে তেওঁক জেন অষ্টেনৰ সাহিত্য উপভোগ কৰাৰ বাবে ধমক দিছিল বুলি তেওঁ কৈছিল।^{৩০১৩৩১} কলম্বিয়া ইউনিভাৰ্ছিটিয়ে এই বিষয়ে কোনো মন্তব্য প্ৰদান কৰা নাছিল।^১

তেওঁ কলম্বিয়াত ৰাজনৈতিক শুদ্ধতা ( political correctness) ৰ কঠোৰ সমালোচনা কৰিছিল আৰু কৈছিল: "মই ভাবিছিলোঁ আমেৰিকা ভিন্ন, কিন্তু যি দেখিলোঁ, আমেৰিকা মুক্ত নহয়,উত্তৰ কোৰিয়াৰ লগত একেই, সেই বাবে মই চিন্তিত হৈ পৰিছিলোঁ।" তেওঁ আৰু কৈছিল, "আমাৰ শিক্ষা প্ৰণালীয়ে আমাৰ শিশুসমূহৰ মগজু এনে ধৰণে প্ৰক্ষালন কৰিছে যাতে তেওঁলোকে বিশ্বাস কৰে যে এই দেশ বৰ্ণবাদী আৰু নিজকে সদায় শোষিত বুলি অনুভৱ কৰে।" ^৩২

তেওঁৰ দাবীসমূহৰ সত্যতা সন্দৰ্ভত প্ৰশ্ন

পাৰ্কৰ স্মৃতিকথা প্ৰকাশৰ পিছত, তেওঁ উত্তৰ কোৰিয়াৰ জীৱনক আগতকৈ অধিক বিভীষিকাময় ৰূপত উপস্থাপন কৰিবলৈ ধৰিলে, The Washington Post ৰ মতে।^৩২ উত্তৰ কোৰিয়াৰ বিশেষজ্ঞসকলে লক্ষ্য কৰিছিল যে ৰিয়েলিটি টিভিৰ পৰা মানৱ অধিকাৰ সন্মিলনত বক্তৃতা দিয়া পৰ্যন্ত পাৰ্কৰ উত্তৰ কোৰিয়া সম্পৰ্কিত বৰ্ণনাৰ ধৰণ সলনি হৈছিল।

আগতে তেওঁ বিলাসী জীৱন অতিবাহিত কৰাৰ কথা কৈছিল, কিন্তু পাছত "তেওঁ কোনোদিনো কণী (eggs) বা অভ্যন্তৰীণ শৌচাগাৰ (indoor toilets) দেখা নাই" বুলি দাবী কৰিছিল।^১