মোৱানা ২

মোৱানা ২ (Moana 2) হ'ল ২০২৪ চনত মুক্তিপ্ৰাপ্ত এখন আমেৰিকান এনিমেটেড মিউজিকেল এডভেঞ্চাৰ চলচ্চিত্ৰ। ৱাল্ট ডিজনী এনিমেচন ষ্টুডিঅ'ৰদ্বাৰা নিৰ্মিত এই ছবিখন ২০১৬ চনৰ 'মোৱানা'ৰ পৰৱৰ্তী খণ্ড। ছবিখন ডেভিদ ডেৰিক জুনিয়ৰ, জেচন হেণ্ড আৰু ডানা লেডক্স মিলাৰৰদ্বাৰা পৰিচালিত আৰু মিলাৰ আৰু জাৰেড বুশৰদ্বাৰা লিখিত। ডুৱেইন জনচন, আউলি ক্ৰাভালিঅ', ৰাচেল হাউচ, টেমুৱেৰা মৰিছন আৰু নিকোল চাৰ্জিংগাৰকে ধৰি প্ৰথমখন ছবিৰ বেছিভাগ শিল্পীয়েই ইয়াত পুনৰ কণ্ঠদান কৰিছে। প্ৰথমখন ছবিৰ কাহিনীৰ তিনি বছৰৰ পিছৰপৰা ইয়াৰ কাহিনীভাগ আৰম্ভ হৈছে। ইয়াত মোৱানাই পুনৰ অৰ্ধদেৱতা মাউইৰ সৈতে মিলিত হৈ 'মটুফেটু' নামৰ হেৰুৱা দ্বীপটো বিচাৰি উলিয়াবলৈ আৰু সাগৰীয় লোকসকলক পুনৰ একত্ৰিত কৰিবলৈ এক দুঃসাহসিক যাত্ৰাত ওলাই পৰা দেখা যায়।

প্ৰথমতে 'মোৱানা'ৰ এই পৰৱৰ্তী খণ্ডটো ডিজনী প্লাছৰ বাবে এখন মিনি-ছিৰিজ হিচাপে নিৰ্মাণ কৰাৰ পৰিকল্পনা কৰা হৈছিল, কিন্তু ২০২৪ চনৰ ফেব্ৰুৱাৰী মাহত ইয়াক পূৰ্ণদৈৰ্ঘ্যৰ বোলছবি হিচাপে নিৰ্মাণ কৰাৰ সিদ্ধান্ত লোৱা হয়। প্ৰথমখন ছবিৰ সুৰকাৰ মাৰ্ক মানচিনা আৰু অপাটাইয়া ফুৱাই সংগীতৰ কামৰ বাবে পুনৰ ঘূৰি আহে।

২০২৪ চনৰ ২১ নৱেম্বৰত হাৱাইত 'মোৱানা ২'-ৰ প্ৰিমিয়াৰ অনুষ্ঠিত হয় আৰু ২৭ নৱেম্বৰত আমেৰিকাৰ ছবিগৃহত মুক্তি দিয়া হয়। ছবিখনে বিশ্বজুৰি ১০৫.৯ কোটি ডলাৰ উপাৰ্জন কৰি ব্যাৱসায়িকভাৱে বৃহৎ সফলতা লাভ কৰে। ই ২০২৪ চনৰ তৃতীয় সৰ্বাধিক উপাৰ্জনকাৰী ছবি হিচাপে পৰিগণিত হয়। ৮২ তম গ’ল্ডেন গ্ল’ব বঁটাত ছবিখনে 'শ্ৰেষ্ঠ এনিমেটেড ফিচাৰ ফিল্ম'ৰ মনোনয়ন লাভ কৰিছিল।

কাহিনী

প্ৰথমখন চলচ্চিত্ৰৰ ঘটনাৰ তিনি বছৰৰ পাছত, মোৱানাই মটুনিউইৰ ওচৰৰ দ্বীপসমূহ ভ্ৰমণ কৰি সাগৰৰ সৈতে জড়িত লোকসকলক বিচাৰি ফুৰে। তেনে এক যাত্ৰাৰপৰা উভতি অহাৰ পাছত মোৱানাক হাজাৰ বছৰৰ ভিতৰত মটুনিউইৰ প্ৰথম 'তাউটাই' (মাষ্টাৰ ৱেফাইণ্ডাৰ) হিচাপে ঘোষণা কৰা হয়।

এক দৰ্শনত মোৱানাৰ পূৰ্বপুৰুষ তাউটাই ভাছাই প্ৰকাশ কৰে যে কিয় মানুহবোৰ এতিয়া সাগৰৰ সৈতে বিচ্ছিন্ন হৈ পৰিছে: দুষ্ট ধুমুহাৰ দেৱতা নালোৱে মৰ্ত্যলোকৰ ওপৰত আধিপত্য বিস্তাৰ কৰিবলৈ 'মটুফেটু' নামৰ এক কিংবদন্তি দ্বীপ সাগৰৰ গভীৰতাত ডুবাই দিছিল, যিয়ে সকলো দ্বীপক একত্ৰিত কৰি ৰাখিছিল। ভাছাই মোৱানাক সতৰ্ক কৰি দিয়ে যে যদি তেওঁ মটুফেটু উদ্ধাৰ কৰিব নোৱাৰে, তেন্তে ভৱিষ্যতে মটুনিউইৰ লোকসকল বিলুপ্ত হৈ যাব। পূৰ্বপুৰুষৰ এই আহ্বানৰ সঁহাৰি জনাই মোৱানাই মটুনিউইৰ এটা দল গঠন কৰে — য’ত আছিল কাৰিকৰ লোটো, ইতিহাসবিদ মনি আৰু বৃদ্ধ কৃষক কেলে। তেওঁলোকৰ সৈতে পোহনীয়া গাহৰি পুৱা আৰু কুকুৰা হেইহেয়ো ওলাই পৰে।

ইফালে, মাউয়ে নিজেই নালোৰ সৈতে পুৰণি সংঘাতৰ বাবে মটুফেটু বিচাৰি আছিল, কিন্তু নালোৰ সহযোগী মাতঙ্গীয়ে তেওঁক বন্দী কৰে। মাউয়ে মোৱানাক সহায়ৰ বাবে মাতিবলৈ কুণ্ঠাবোধ কৰিছিল কাৰণ তেওঁ ভয় কৰিছিল যে মোৱানাই এই বিপদত প্ৰাণ হেৰুৱাব পাৰে। মোৱানা আৰু তেওঁৰ দলটোক নাৰিকল ডকাইত 'কাকামোৰা'ই বন্দী কৰে। কাকামোৰাৰ কোটু নামৰ এজন সদস্যই মোৱানাক মাতঙ্গীৰ গুহাৰপৰা মাউইক উদ্ধাৰ কৰাত সহায় কৰে। মাতঙ্গীয়ে মোৱানাক নালোৰ ওচৰলৈ যোৱাৰ পথ দেখুৱাই দিয়ে।

মাউয়ে সতৰ্ক কৰি দিয়ে যে নালোৰ ৰাজ্য মৰ্ত্যলোকতকৈ বহুত বেছি ভয়ানক। নালোৰ দানৱবোৰে তেওঁলোকক আক্ৰমণ কৰি নাওখন ধ্বংস কৰে আৰু তেওঁলোক এটা নিৰ্জন দ্বীপত আবদ্ধ হৈ পৰে। মোৱানাই আশা হেৰুৱাই পেলাইছিল যদিও মাউয়ে তেওঁক উৎসাহিত কৰে। তেওঁলোকে পৰিকল্পনা কৰে যে মাউয়ে সাগৰৰ তলৰপৰা মটুফেটু ওপৰলৈ তুলিব আৰু মোৱানাই তাক স্পৰ্শ কৰিব লাগিব, কাৰণ নালোৰ অভিশাপ ভাঙিবলৈ সেয়াই একমাত্ৰ উপায়।

যেতিয়া মাউয়ে নিজৰ বিশাল বৰশীটোৰে মটুফেটু টানিবলৈ আৰম্ভ কৰে, নালোৱে বিজুলীৰে মাউইৰ শক্তি কাঢ়ি লয়। মোৱানাই সাগৰত জঁপিয়াই পৰে আৰু মটুফেটু স্পৰ্শ কৰিবলৈ সক্ষম হয় যদিও নালোৰ বিজুলীৰ আঘাতত তেওঁৰ মৃত্যু হয়। মাউয়ে তেওঁৰ শৰীৰটো উদ্ধাৰ কৰি এক যাদু-মন্ত্ৰৰ জৰিয়তে পূৰ্বপুৰুষৰ আত্মা আৰু আইতাক টালাক আহ্বান কৰে। তেওঁলোকৰ সহায়ত মোৱানাই পুনৰ জীৱন লাভ কৰে আৰু এগৰাকী 'অৰ্ধদেৱী'ৰ মৰ্যাদা পায়। মাউয়েও নিজৰ শক্তি ঘূৰাই পায় আৰু অৱশেষত মটুফেটু দ্বীপটো ওপৰলৈ তুলি মানুহ আৰু সাগৰৰ মাজৰ হেৰুৱা সম্পৰ্ক পুনৰ স্থাপন কৰে।

মোৱানা আৰু তেওঁৰ দলটো মটুনিউইলৈ বিজয়ী হৈ ঘূৰি আহে আৰু এক বিশাল উৎসৱৰ আয়োজন কৰা হয়। চলচ্চিত্ৰখনৰ শেষৰ এক দৃশ্যত দেখা যায় যে নালোৱে প্ৰতিশোধৰ পৰিকল্পনা কৰিছে আৰু ঠিক সেই সময়তে বিশাল কেকোঁৰা টামা টোয়াও তাত উপস্থিত হয়।

কণ্ঠদান কৰা শিল্পীসকল

• আউলি ক্ৰাভালিঅ' — মোৱানাৰ চৰিত্ৰত। তেওঁ মটুনিউইৰ মুৰব্বী টুই আৰু চিনাৰ সাহসী কন্যা, যাক সাগৰে মটুফেটু দ্বীপৰ অভিশাপ ভাঙিবলৈ নিৰ্বাচিত কৰিছে।^১
• ডুৱেইন জনচন — মাউইৰ চৰিত্ৰত। এজন শক্তিশালী আৰু ৰূপ সলনি কৰিব পৰা অৰ্ধদেৱতা যিয়ে মোৱানাক যাত্ৰাপথত সহায় কৰে।^২
• হুৱালালাই চুং — মনিৰ চৰিত্ৰত। মোৱানাৰ যাত্ৰী দলৰ এজন সদস্য আৰু মাউইৰ অনুৰাগী।^৩
• ৰোজ মাটাফেও — লোটোৰ চৰিত্ৰত। মোৱানাৰ দলৰ এগৰাকী বুদ্ধিমান কাৰিকৰ।^৩
• ডেভিদ ফেন — কেলেৰ চৰিত্ৰত। এজন খঙাল বৃদ্ধ কৃষক আৰু মোৱানাৰ যাত্ৰী দলৰ সদস্য।^৩
• আৱিমান ফ্ৰেজাৰ — মাতঙ্গীৰ চৰিত্ৰত। নালোৰ সহযোগী এগৰাকী মহিলা যিয়ে বাদুলীক নিয়ন্ত্ৰণ কৰিব পাৰে।
• খালেছি লেম্বাৰ্ট-ছুডা — চিমিয়াৰ চৰিত্ৰত। মোৱানাৰ সৰু ভনীয়েক।^৩
• টেমুৱেৰা মৰিছন — টুইৰ চৰিত্ৰত। মোৱানাৰ পিতৃ আৰু মটুনিউই দ্বীপৰ মুৰব্বী।^৩
• নিকোল চাৰ্জিংগাৰ — চিনাৰ চৰিত্ৰত। মোৱানাৰ মাতৃ।^৩
• ৰাচেল হাউচ — টালাৰ চৰিত্ৰত। মোৱানাৰ প্ৰয়াত আইতাক, যি আত্মা হিচাপে আহে।^৩
• এলান টুডিক — হেইহেইৰ চৰিত্ৰত। মোৱানাৰ পোহনীয়া কুকুৰা।^৪

ইয়াৰ উপৰিও ডুৱেইন জনচনৰ পৰিয়ালৰ সদস্যসকলেও ছবিখনত কণ্ঠদান কৰিছে; তেওঁৰ দুই কন্যা জেচমিন আৰু টিয়ানা আৰু মাতৃ আটা মাইভিয়া জনচনক বিভিন্ন চৰিত্ৰত শুনা গৈছে।^৫ ছবিখনৰ শেষৰ ফালে থকা এটা বিশেষ দৃশ্যত টোফিগা ফেপুলেইয়ে মূল খলনায়ক নালোৰ চৰিত্ৰত কণ্ঠদান কৰিছে। প্ৰথমখন ছবিৰ পৰিচিত চৰিত্ৰ বিশাল কেকোঁৰা টামা টোয়া হিচাপে জেমেৰিন ক্লিমেণ্টে পুনৰ কণ্ঠদান কৰিছে।

বাহ্যিক সংযোগ

• Official screenplay