মুজি মেই

মুজি মেই (ইংৰাজী ভাষা: Muzi Mei; জন্ম: ১৯৭৮) চীনৰ গুৱাংঝৌৰ এগৰাকী সাংবাদিক আৰু ব্লগাৰ, যিগৰাকী ২০০৩ চনৰ শেষৰফালে এগৰাকী ইণ্টাৰনেট চেলিব্ৰিটি হিচাপে পৰিগণিত হৈছিল।^১ তেওঁৰ ব্লগত বিভিন্ন পুৰুষৰ সৈতে থকা যৌন সম্পৰ্কৰ স্পষ্ট বৰ্ণনা আছিল, যিটো সেই সময়ৰ চীনৰ বাবে প্ৰথম বুলি বিশ্বাস কৰা হয়।

জীৱন

তেওঁৰ আচল নাম হৈছে লি লি। "মুজি" (木子) শব্দটো উলম্বভাৱে সজালে "লি" (李) আখৰটো পোৱা যায়। আনহাতে "মেই" (美) আৰু "লি" (麗) দুয়োটা শব্দৰ অৰ্থ হৈছে "ধুনীয়া।" তেওঁ গুৱাংঝৌৰ ছান ইয়াত-ছেন বিশ্ববিদ্যালয়ৰ দৰ্শন বিভাগত অধ্যয়ন কৰিছিল আৰু ২০০১ চনত স্নাতক ডিগ্ৰী লাভ কৰিছিল।

তেওঁ পূৰ্বে এগৰাকী সাংবাদিক হিচাপে কাম কৰিছিল।^২

সংবাদ মাধ্যমৰ চৰ্চা

২০০৩ চনত তেওঁ চীনৰ ছপা মাধ্যম, বুলেটিন বৰ্ড আৰু ইণ্টাৰনেট চাটৰুমত তীব্ৰ বিতৰ্কৰ বিষয় হৈ পৰিছিল। আনকি দ্য নিউয়ৰ্ক টাইমছ, টাইম আৰু দ্য ৱাশ্বিংটন পষ্টৰ দৰে আন্তঃৰাষ্ট্ৰীয় সংবাদ মাধ্যমৰ বাতৰিতো তেওঁৰ নাম উল্লেখ কৰা হৈছিল। তেওঁৰ নাম প্ৰায়ে নৃত্যশিল্পী টাং জিয়ালীৰ সৈতে উচ্চাৰিত হৈছিল, যিগৰাকীয়ে চীনত প্ৰথমবাৰৰ বাবে নিজৰ নগ্ন শৈল্পিক ছবিৰ গ্ৰন্থ প্ৰকাশ কৰিছিল। এই ঘটনাসমূহে ২০০৩ চনৰপৰা চীনা প্ৰকাশনসমূহত যৌন সমল আৰু নগ্নতাৰ ওপৰত থকা বাধ্যবাধকতাৰ আংশিক উদাৰীকৰণক প্ৰতিফলিত কৰিছিল।

তেওঁৰ ব্লগৰ কিছু অংশ ফৰাচী ভাষালৈ অনুবাদ কৰা হৈছে আৰু Journal sexuel d'une jeune Chinoise sur le net (২০০৫) নামেৰে এখন কিতাপ হিচাপে প্ৰকাশ কৰা হৈছে। ইয়াৰ জাৰ্মান অনুবাদো Mein intimes Tagebuch (২০০৭) নামেৰে প্ৰকাশ পাইছে।

২০০৫ চনৰ ১২ ডিচেম্বৰৰ টাইম মেগাজিনৰ সংখ্যাত "Sex, Please—We're Young and Chinese" শীৰ্ষক এটা প্ৰবন্ধত মুজি মেইক প্ৰদৰ্শিত কৰা হৈছিল।^২

পৰৱৰ্তী সময়ত তেওঁ পডকাষ্টিঙৰ দিশলৈ ধাৱমান হয়। ছিডনী মৰ্নিং হেৰাল্ডৰ মতে, তেওঁৰ পডকাষ্টসমূহে দিনে প্ৰায় ১০,০০০ দৰ্শক লাভ কৰিছিল।^৩