মিণ্ডী কেলিং

ভেৰা মিণ্ডী চোকালিংগম^১ (জন্ম: ২৪ জুন, ১৯৭৯),^১২ পেছাদাৰীভাৱে মিণ্ডী কেলিং (ইংৰাজী ভাষা: Mindy Kaling; জন্ম: ২৪ জুন, ১৯৭৯) নামেৰে পৰিচিত এগৰাকী আমেৰিকা যুক্তৰাষ্ট্ৰন অভিনেত্ৰী, কৌতুক শিল্পী, চিত্ৰনাট্যকাৰ আৰু প্ৰযোজক।^৩ টেলিভিছনৰ কামৰ বাবে পৰিচিত কেলিঙে এটা টনী বঁটা আৰু প্ৰাইমটাইম এমি বঁটাত ছয়টাকৈ মনোনয়ন লাভ কৰিছে। অন্যান্য সন্মানৰ লগতে তেওঁ প্ৰডিউচাৰ্ছ গিল্ড অৱ আমেৰিকাৰ নৰ্মান লিয়াৰ এচিভমেণ্ট ইন টেলিভিছন এৱাৰ্ড আৰু নেচনেল মেডেল অৱ দ্য আৰ্টছ লাভ কৰিছে, যিটো আমেৰিকা চৰকাৰে শিল্পী আৰু শিল্প পৃষ্ঠপোষকসকলক প্ৰদান কৰা সৰ্বোচ্চ সন্মান। কেলিঙে ২০১২ চনত কেলিং ইণ্টাৰনেশ্যনেল নামৰ প্ৰযোজনা সংস্থাটো প্ৰতিষ্ঠা কৰে।^৪

কেলিঙে প্ৰথমে এনবিচি চিটকম দা অফিচত (২০০৫–২০১৩) কেলী কাপুৰৰ চৰিত্ৰত অভিনয় কৰি স্বীকৃতি লাভ কৰিছিল, য’ত তেওঁ লেখিকা হিচাপেও কাম কৰিছিল।^৫ চব্বিশটা খণ্ডৰ কৃতিত্বৰে কেলিং কৰ্মচাৰীসকলৰ ভিতৰত আটাইতকৈ ফলপ্ৰসূ লেখিকা আছিল।^৬ ইয়াৰ কামৰ বাবে তেওঁ কমেডী ধাৰাবাহিকৰ শ্ৰেষ্ঠ লেখনীৰ প্ৰাইমটাইম এমি বঁটাৰ বাবে মনোনীত হৈছিল। ফক্স/হুলু চিটকম দা মিণ্ডী প্ৰজেক্ট (২০১২–২০১৭) সৃষ্টি, প্ৰযোজনা আৰু নাম ভূমিকা পালন কৰি তেওঁ অধিক চৰ্চালৈ আহে। ইয়াৰ পিছত তেওঁ আন কেইবাখনো টেলিভিছন কমেডী সৃষ্টি কৰে, যাৰ ভিতৰত আছে নেভাৰ হেভ আই এভাৰ (২০২০–২০২৩), দা চেক্স লাইভছ অৱ কলেজ গাৰ্লছ (২০২১–২০২৫), আৰু ৰানিং পইণ্ট (২০২৫–বৰ্তমান)।

তেওঁৰ চলচ্চিত্ৰ কেৰিয়াৰৰ ভিতৰত আছে ডেচপিকেবল মি (২০১০), ৰেক-ইট ৰাল্ফ (২০১২), মিষ্টাৰ পীবডী এণ্ড শ্বাৰমেন (২০১৪), আৰু ইনচাইড আউট (২০১৫)ত কণ্ঠদান কৰাৰ লগতে নো ষ্ট্ৰিংছ এটেচড (২০১১), দা ফাইভ-য়েৰ এংগেজমেণ্ট (২০১২), এ ৰিংকল ইন টাইম (২০১৮), অ’চেনছ ৮ (২০১৮), আৰু লেট নাইট (২০১৯)ত অভিনয় কৰা। তেওঁ দুখনকৈ স্মৃতিকথা লিখিছে যিয়ে দ্য নিউয়ৰ্ক টাইমছৰ বেষ্ট চেলাৰ তালিকাত স্থান লাভ কৰিছে।^৭ তেওঁ সংগীত নাটক এ ষ্ট্ৰেঞ্জ লুপৰ প্ৰযোজক হিচাপে শ্ৰেষ্ঠ সংগীত নাটকৰ টনী বঁটাও লাভ কৰে।^৮

প্ৰাৰম্ভিক জীৱন

১৯৭৯ চনৰ ২৪ জুনত মাছাচুচেটছৰ কেম্ব্ৰিজত ভেৰা মিণ্ডী চোকালিংগমৰ জন্ম হৈছিল।^২১ তেওঁৰ পিতৃ আছিল এজন তামিল স্থপতি আবুডায়াপ্পন চোকালিংগম আৰু মাতৃ আছিল বঙালী মূলৰ স্ত্ৰীৰোগ বিশেষজ্ঞ স্বাতি ৰয়চিৰকাৰ।^৯ সেই সময়ত নাইজেৰিয়াত বাস কৰা তেওঁৰ পিতৃ-মাতৃয়ে ১৯৭৯ চনত মিণ্ডীৰ ককায়েক বিজয় চোকালিংগমৰ সৈতে আমেৰিকা যুক্তৰাষ্ট্ৰলৈ প্ৰব্ৰজন কৰিছিল।^{১০১১৫} তেওঁৰ মাতৃয়ে বষ্টনৰ চেইণ্ট এলিজাবেথ মেডিকেল চেণ্টাৰত কৰ্মৰত আছিল আৰু ২০১২ চনত অগ্ন্যাশয়ৰ কৰ্কট ৰোগত আক্ৰান্ত হৈ মৃত্যুবৰণ কৰে।^১২১৩

কেলিঙে জানিবলৈ দিয়া মতে তেওঁক কেতিয়াও প্ৰথম নাম ভেৰা বুলি মতা হোৱা নাছিল। তেওঁৰ পিতৃ-মাতৃ নাইজেৰিয়াত থকাৰ সময়তে তেওঁক মিণ্ডী বুলি মাতিবলৈ আৰম্ভ কৰিছিল। তেওঁলোকে আমেৰিকালৈ অহাৰ পৰিকল্পনা কৰিছিল আৰু জীয়েকৰ বাবে এটা ধুনীয়াকৈ আমেৰিকান নাম বিচাৰিছিল। সেই সময়ৰ টিভি অনুষ্ঠান মৰ্ক এণ্ড মিণ্ডীৰপৰা তেওঁলোকে 'মিণ্ডী' নামটো পছন্দ কৰিছিল।

কেলিঙে ১৯৯৭ চনত বাকিংহাম ব্ৰাউন এণ্ড নিকোলছ স্কুলৰপৰা স্নাতক ডিগ্ৰী লাভ কৰে। পিছৰ বছৰ তেওঁ ডাৰ্টমাউথ কলেজত ভৰ্তি হয়। তাত তেওঁ কমেডী গোট 'দ্য ডগ ডে প্লেয়াৰ্ছ' আৰু আ কাপেলা গোট 'দ্য ৰকাপেলাছ'ৰ সদস্য আছিল। লগতে তেওঁ কলেজৰ হাস্যৰস আলোচনী ডাৰ্টমাউথ জেক-অ’-লেণ্টাৰ্ণৰ বাবে লিখিছিল।^১৪ ২০০১ চনত তেওঁ নাট্যলেখন বিষয়ত স্নাতক ডিগ্ৰী লাভ কৰে।^১৫ তেওঁৰ কমেডীৰ ওপৰত প্ৰাৰম্ভিক প্ৰভাৱ পেলোৱা ধাৰাবাহিকসমূহৰ ভিতৰত আছিল ডা° কাটজ, ছেটাৰডে নাইট লাইভ, ফ্ৰেজিয়াৰ আৰু চিয়াৰ্ছ।^১৬

ব্যক্তিগত জীৱন

কেলিঙৰ তিনিটি সন্তান আছে: ২০১৭ চনৰ ডিচেম্বৰত জন্ম হোৱা কন্যা কেথেৰিন স্বাতি, ২০২০ চনৰ ছেপ্টেম্বৰত জন্ম হোৱা পুত্ৰ স্পেন্সৰ আৰু ২০২৪ চনৰ ফেব্ৰুৱাৰীত জন্ম হোৱা কন্যা এন।^১৭ তেওঁ নিজৰ সন্তানৰ পিতৃৰ পৰিচয় গোপন ৰাখিছে।^১৮ কেলিঙে তেওঁৰ সন্তানক হিন্দু পৰিৱেশত ডাঙৰ-দীঘল কৰাৰ ইচ্ছা প্ৰকাশ কৰিছে।^১৯২০

বি. জে. নোভাকৰ সৈতে কেলিঙৰ ঘনিষ্ঠ বন্ধুত্ব আছে। দা অফিচৰ বাবে লিখা-মেলা কৰোঁতে তেওঁলোকৰ চিনাকি হৈছিল। নোভাকে কেলিঙক নিজৰ জীৱনৰ "আটাইতকৈ গুৰুত্বপূৰ্ণ ব্যক্তি" বুলি অভিহিত কৰিছে। ধাৰাবাহিকখনত অভিনয় আৰু লিখা-মেলা কৰি থকাৰ সময়তে তেওঁলোকৰ মাজত প্ৰেমৰ সম্পৰ্ক গঢ়ি উঠিছিল।^২১ নোভাক কেলিঙৰ প্ৰথম দুটা সন্তানৰ ধৰ্মপিতা।^২২২৩

২০১২ চনত কেলিঙক টাইম ১০০ ৰ বিশ্বৰ আটাইতকৈ প্ৰভাৱশালী ব্যক্তিৰ তালিকাত অন্তৰ্ভুক্ত কৰা হৈছিল।^২৪ ২০১৪ চনত তেওঁক গ্লেমাৰ আলোচনীৰ বৰ্ষশ্ৰেষ্ঠ মহিলাৰ ভিতৰত অন্যতম হিচাপে নিৰ্বাচিত কৰা হয়।^২৫ ২০১৮ চনৰ ১০ জুনত তেওঁ নিউ হেম্পশায়াৰৰ ডাৰ্টমাউথ কলেজৰপৰা ডক্টৰ অৱ হিউমেন লেটাৰ্ছৰ সন্মানীয় ডিগ্ৰী লাভ কৰে।^২৬ ২০২৩ চনৰ অক্টোবৰ মাহত কেলিঙে সামাজিক মাধ্যমৰ জৰিয়তে ইজৰাইলৰ প্ৰতি সমৰ্থন আগবঢ়ায়।^২৭ ২০২৪ চনৰ জুন মাহত লছ এঞ্জেলছ টাইমছে তেওঁক লছ এঞ্জেলছৰ এজন প্ৰভাৱশালী সৃষ্টিকৰ্তা হিচাপে স্বীকৃতি দিয়ে।^২৮