ভিদুবীচি মঠ ( Vydubychi Monastery) ইউক্ৰেইনৰ ৰাজধানী কিয়েভত অৱস্থিত এটা ঐতিহাসিক মঠ। ছোভিয়েট যুগত এই মঠত ইউক্ৰেইনৰ ৰাষ্ট্ৰীয় বিজ্ঞান একাডেমীৰ প্ৰত্নতত্ত্ব প্ৰতিষ্ঠান আছিল।
ইতিহাস
১০৭০ চনৰপৰা ১০৭৭ চনৰ ভিতৰত য়াৰোস্লাভ দ্য ৱাইজৰ পুত্ৰ ভ্চেভলদে এই মঠ প্ৰতিষ্ঠা কৰিছিল। এইটো ভ্চেভলদৰ পুত্ৰ ভ্লাদিমিৰ মোনোমাখ আৰু তেওঁৰ বংশধৰসকলৰ পাৰিবাৰিক মঠ আছিল। ১
মঠটোৰ নাম আৰু কিয়েভৰ বৰ্তমানৰ সেই অঞ্চলটোৰ নাম এটা পুৰণি স্লাভিক কিংবদন্তিৰ সৈতে জড়িত। এই কিংবদন্তিত পৌত্তলিক দেৱতা পেৰুন আৰু কিয়েভৰ মহান ৰাজকুমাৰ ভ্লাদিমিৰ দ্য গ্ৰেটৰ কথা উল্লেখ আছে। "ভিদুবীচি" নামটো Vydobychi → Vydobych → Vydobech (Видобичі → Видобич → Видобеч) শব্দৰপৰা আহিছে। ইয়াৰ অৰ্থ হৈছে "পানীৰপৰা ওপৰলৈ উঠি অহা" বা "পানীৰপৰা ওলাই অহা।"
কিংবদন্তি অনুসৰি ভ্লাদিমিৰে কিয়েভৰ খ্ৰীষ্টধৰ্মত গণশৰণৰ সময়ত পেৰুন আৰু আন পৌত্তলিক দেৱতাসকলৰ কাঠৰ মূৰ্তি দনিপ্ৰ নদীত পেলাই দিবলৈ নিৰ্দেশ দিছিল। কিয়েভৰ লোকসকলে শৰণ গ্ৰহণ কৰিলেও পুৰণি দেৱতাসকলৰ প্ৰতি থকা বিশ্বাসৰ বাবে দনিপ্ৰ নদীৰ কাষেৰে দৌৰি গৈ পানীৰপৰা ওলাই আহিবলৈ পুৰণি দেৱতাসকলক আহ্বান কৰিছিল। তেওঁলোকে ‘পেৰুণে, ভিদুবি! ’ (Перуне выдуби! ) বুলি চিঞৰিছিল। সেই অনুসৰি নদীৰ সোঁতত যি ঠাইত পেৰুন পানীৰপৰা ওলাই আহিছিল, সেই ঠাইৰ নাম আধুনিক ইউক্ৰেইনীয় ভাষাত ভিদুবিচু বা ভিদুবীচি হয়। ২
মঠটোৱে দনিপ্ৰ নদীৰ ওপৰত পাৰাপাৰৰ নাও সেৱা চলাইছিল। সেই সময়ৰ বহুতো বিশিষ্ট পণ্ডিতে ইয়াত বাস কৰি কাম কৰিছিল। তেওঁলোকৰ ভিতৰত কিয়েভৰ বৃত্তান্তকাৰী কিয়েভৰ ছিলভেষ্টাৰ আৰু মোইছেই আছিল। তেওঁলোকে অতীত কালৰ কাহিনী লিখাত গুৰুত্বপূৰ্ণ অৱদান আগবঢ়াইছিল।
১৫৯৬ চনৰ ব্ৰেষ্টৰ সংঘৰ পিছত এই মঠটো ইউক্ৰেইনৰ গ্ৰীক কেথলিক গীৰ্জাৰ প্ৰথম তিনিজন মহানগৰপালৰ চৰকাৰী আসন হৈছিল। তেওঁলোক আছিল মিখাইলো ৰোহোজা, ইপাটিয়ি পোটিয় আৰু যোছিফ ভেলিয়ামিন ৰুটস্কি। ১৬৩৫ চনত মঠটো ইউক্ৰেইনীয় পূৰ্বপন্থী গীৰ্জালৈ ঘূৰাই দিয়া হয়।৩
মঠটো ইউক্ৰেইনৰ হেটমেন আৰু অভিজাত পৰিয়ালসমূহে নিৰন্তৰভাৱে সুৰক্ষা দিছিল। ১৬৯৫ চনত হেটমেন ইভান মাজেপাই ভিদুবীচি মঠৰ ওচৰ-চুবুৰীয়াসকলক "মঠটোৰ প্ৰতি অন্যায় নকৰিবলৈ" নিৰ্দেশ দিছিল আৰু ষ্টাৰোদুব ৰেজিমেণ্টৰ কৰ্ণেল মিখাইলো মিক্লাশেভস্কিৰ তত্ত্বাৱধানত মঠটো দিছিল। মিক্লাশেভস্কিয়ে বেৰোক শৈলীৰ ছেইণ্ট জৰ্জ গীৰ্জা আৰু নতুন ৰূপান্তৰণ ভোজনালয় নিৰ্মাণ কৰিছিল। হেটমেন দানিলো আপোষ্টলে মঠটোৰ ঘণ্টাঘৰ নিৰ্মাণৰ বাবে ধন আগবঢ়াইছিল। ১৮শ শতিকাত হেটমেন কিৰিলো ৰজুমোভস্কিৰ সহায়ত ভিদুবীচি মঠে নতুন সম্পত্তি লাভ কৰিছিল।৩
১৯৯০-ৰ দশকৰ শেষৰপৰা মঠটো ইউক্ৰেইনীয় পূৰ্বপন্থী গীৰ্জা—কিয়েভ পেট্ৰিয়াৰ্কেটৰদ্বাৰা পৰিচালিত হৈ আহিছে। ভিদুবীচি গীৰ্জাৰ গায়নদলটো নৱস্বাধীন ইউক্ৰেইনৰ প্ৰথম কেইটামান গায়নদলৰ ভিতৰত আছিল, যিয়ে ইউক্ৰেইনীয় ভাষাত দৈৱ উপাসনাৰ গীত পুনৰ আৰম্ভ কৰিছিল।
ভৱন আৰু গাঁথনি
এই মঠৰ মাত্ৰ কেইখনমান গীৰ্জাহে কেইবা শতিকাৰ পিছতো সংৰক্ষিত হৈ আছে। ইয়াৰে এখন হৈছে ছেইণ্ট মাইকেলৰ মঠগীৰ্জা। এই গীৰ্জা ভ্চেভলদ প্ৰথমৰ নিৰ্দেশত নিৰ্মাণ কৰা হৈছিল। ১৭৬৬ চনৰপৰা ১৭৬৯ চনৰ ভিতৰত ৰুছ স্থপতি এম. আই. ইউৰাছভে ইয়াৰ আংশিক পুনৰ্নিৰ্মাণ কৰিছিল। ইউক্ৰেইনীয় বেৰোক শৈলীৰ ভৱনসমূহৰ ভিতৰত পাঁচটা গম্বুজযুক্ত ছেইণ্ট জৰ্জ কেথেড্ৰেল, ত্ৰাণকৰ্তাৰ ৰূপান্তৰণ গীৰ্জা আৰু ভোজনালয় উল্লেখযোগ্য। এইবোৰ ১৬৯৬ চনৰপৰা ১৭০১ চনৰ ভিতৰত নিৰ্মাণ কৰা হৈছিল। ইউক্ৰেইনীয় কছাকসকলৰ হেটমেন দানিলো আপোষ্টলৰ নিৰ্দেশত এটা ঘণ্টাঘৰ নিৰ্মাণ কৰা হৈছিল। ইয়াৰ নিৰ্মাণ ১৭২৭ চনৰপৰা ১৭৩৩ চনৰ ভিতৰত হৈছিল আৰু ১৮২৭ চনৰপৰা ১৮৩১ চনৰ ভিতৰত ইয়াৰ পৰিৱৰ্ধন কৰা হয়। ৪
- ছেইণ্ট মাইকেল গীৰ্জা
- ছেইণ্ট জৰ্জ কেথেড্ৰেল
- ত্ৰাণকৰ্তা-ৰূপান্তৰণ গীৰ্জাসহ ভোজনালয়
- ছেইণ্ট মাইকেল গীৰ্জাৰ প্ৰাৰ্থনাগৃহ
- ভ্ৰাতৃত্ব ভৱন
- মঠাধ্যক্ষৰ ভৱন
- সমাধিক্ষেত্ৰ
সমাধিক্ষেত্ৰ
ইয়াত বহুতো বিশিষ্ট ব্যক্তিক সমাধিস্থ কৰা হৈছে। তেওঁলোকৰ ভিতৰত আছে—
- ৱাই. হান্দজিউক — ১৯১৮ চনত প্ৰথম ইউক্ৰেইনীয় বাহিনীৰ সেনাপতি। তেওঁক বলছেভিকসকলে মৃত্যুদণ্ড দিছিল।
- বোহদান খানেংকো (১৮৪৮–১৯১৭) — শিল্প সংগ্ৰাহক আৰু শিল্পকলাৰ পৃষ্ঠপোষক। তেওঁৰ মৃত্যুৰ পাছত তেওঁৰ সংগ্ৰহ কিয়েভ শিল্প আৰু উদ্যোগ সংগ্ৰহালয়লৈ স্থানান্তৰ কৰা হৈছিল।
- কনষ্টাণ্টিন উশিনস্কি (১৮২৩–১৮৭১) — শিক্ষাবিদ আৰু ইউক্ৰেইনীয় ভাষাত শিক্ষাদানৰ সমৰ্থক। ১৯শ শতিকাৰ দ্বিতীয়াৰ্ধত ৰুছ সাম্ৰাজ্যত এমছ আদেশৰ অধীনত ইউক্ৰেইনীয় ভাষাত শিক্ষাদান নিষিদ্ধ আছিল। ৫৬৭৮
- ভ্লাদিমিৰ আলেক্সেয়েভিচ বেটছ (১৮৩৪–১৮৯৬) — শৰীৰতত্ত্ববিদ। তেওঁ বৃহৎ পিৰামিডীয় স্নায়ুকোষ আৱিষ্কাৰৰ বাবে বিখ্যাত। এইবোৰক বৰ্তমান বেটছ কোষ বুলি কোৱা হয়। ৯
- লেভ মিখাইলোভিচ ইয়াশভিল (১৭৬৮–১৮৩৬) — নেপোলিয়নীয় যুদ্ধৰ সময়ৰ এজন টোপধাৰী সেনাপতি।
শিল্প আৰু সাহিত্যত ভিদুবীচি মঠ
- তাৰাছ শ্বেভচেংকোৰ ১৮৪৪ চনত অংকিত কিয়েভৰ ভিদুবীচি মঠ নামৰ চিত্ৰ। এই শিল্পকৰ্ম ইউক্ৰেইনৰ ৰাষ্ট্ৰীয় শিল্প সংগ্ৰহালয়ত সংৰক্ষিত।
- মিখাইলো সাজিনৰ ১৮৪০-ৰ দশকত অংকিত ভিদুবীচি মঠ নামৰ চিত্ৰ। এই শিল্পকৰ্ম ইউক্ৰেইনৰ ৰাষ্ট্ৰীয় শিল্প সংগ্ৰহালয়ত সংৰক্ষিত।
তথ্যসূত্ৰ
বাহ্যিক সংযোগ
তথ্যসূত্ৰ
- ↑ Morby, John E. (2002). Dynasties of the world: a chronological and genealogical handbook. Oxford University Press. পৃ. 167. ISBN 9780198604730
- ↑ Zhukovsky, A. (2001). Povist' vremennykh lit – The Tale of Bygone Years. Internet Encyclopedia of Ukraine. Canadian Institute of Ukrainian Studies
- ↑ The Vydubytskyi Monastery: A Kyiv landmark worthy of attention, Ukraine Weekly
- ↑ (2026-05-18). Як українська медієвістика пережила ХХ століття: колоніальна травма й інтелектуальна відвага
- ↑ L.G. Guseva, "Konstantin Dmitrievich Ushinsky: The Founder of Scientific Pedagogy in the 19th Century Russia", History of Education & Children’s Literature, XIII, 1 (2018), pp. 479-491 (in English)
- ↑ Ushinsky article in Brockhaus and Efron Encyclopedic Dictionary
- ↑ by Eduard Dneprov in Great Soviet Encyclopedia
- ↑ (1993). Ushinsky, Konstantin. Internet Encyclopedia of Ukraine
- ↑ Kushchayev, Sergiy V.; Moskalenko, Vitaliy F.; Wiener, Philip C. (January 2012). The discovery of the pyramidal neurons: Vladimir Betz and a new era of neuroscience. Brain. পৃ. 285–300
উৎস আৰু অনুজ্ঞাপত্ৰ
উৎস: অসমীয়া ৱিকিপিডিয়া। এই প্ৰবন্ধটো অসমীয়া ৱিকিপিডিয়াৰ “ভিদুবীচি মঠ” প্ৰবন্ধৰ সংশোধন ৬৩৪৪০৩ (৬ ছেপ্তেম্বৰ ২০২৬)ৰ পৰা আনি অসমীয়া বিশ্বকোষৰ গাঁথনিলৈ ৰূপান্তৰ কৰা হৈছে। মূল লেখকসকলৰ তালিকা সম্পাদনা-ইতিহাসত উপলব্ধ। পাঠ্য CC BY-SA 4.0।