নাটালি ডৰমাৰ

নাটালি ডৰমাৰ (জন্ম: ১১ ফেব্ৰুৱাৰী ১৯৮২) এগৰাকী ব্ৰিটিছ অভিনেত্ৰী। ঐতিহাসিক নাটক, ব্লকবাষ্টাৰ ছবি, স্বতন্ত্ৰ চলচ্চিত্ৰৰ লগতে কেইবাখনো উল্লেখনীয় টেলিভিছন ধাৰাবাহিকত কৰা অভিনয়ৰ বাবে তেওঁ পৰিচিত। তেওঁ এম্পায়াৰ বঁটা লাভ কৰাৰ লগতে ক্ৰিটিকছ চইচ বঁটা, দুটাকৈ জেমিনি বঁটা আৰু দুটাকৈ স্ক্ৰীন এক্টৰ্ছ গিল্ড বঁটাৰ মনোনয়ন লাভ কৰিছে।

শ্ব’টাইমৰ ধাৰাবাহিক দ্য টিউডৰছ (২০০৭–০৮)-ত এন বোলিনৰ চৰিত্ৰত অভিনয় কৰি ডৰমাৰে বিশেষ সফলতা লাভ কৰে আৰু ইয়াৰ বাবে তেওঁ ব্যাপক প্ৰশংসা বুটলে। তেওঁ চুইট নাথিংছ (২০১০) নাটকৰ জৰিয়তে মঞ্চত আত্মপ্ৰকাশ কৰে। ইয়াৰ পিছত তেওঁ মেডোনাৰ ছবি ডব্লিউ.ই. (২০১১)-ত ডাচেছ অৱ ইয়ৰ্ক আৰু কেপ্টেইন আমেৰিকা: দ্য ফাৰ্ষ্ট এভেঞ্জাৰ (২০১১)-ত প্ৰাইভেট লৰেইনৰ চৰিত্ৰত অভিনয় কৰে। ডৰমাৰে এইচবিঅ’ৰ ধাৰাবাহিক গেম অৱ থ্ৰোনছ (২০১২–২০১৬)-ত মাৰ্গেৰী টাইৰেল আৰু দ্য হাংগাৰ গেমছ চলচ্চিত্ৰ শৃংখলাৰ (২০১৪–২০১৫) শেষৰ দুটা খণ্ডত ক্ৰেছিডাৰ চৰিত্ৰত অভিনয় কৰি আন্তঃৰাষ্ট্ৰীয় পৰ্যায়ত চৰ্চালৈ আহে। তেওঁৰ সৰ্বাধিক উপাৰ্জন কৰা ছবিসমূহৰ ভিতৰত এইকেইখনেই অন্যতম। তেওঁ চিবিএছৰ ধাৰাবাহিক এলিমেণ্টৰী (২০১৩–১৫)-ত আইৰিন এডলাৰ আৰু দ্য ফৰেষ্ট (২০১৬)-ত ছাৰা প্ৰাইচ/জেছ প্ৰাইচৰ চৰিত্ৰত অভিনয় কৰাৰ উপৰি দ্য ডাৰ্ক ক্ৰিষ্টাল: এজ অৱ ৰেজিষ্টেন্স (২০১৯) ধাৰাবাহিকত অনিকাৰ চৰিত্ৰত কণ্ঠদান কৰিছে। মিনি ধাৰাবাহিক পেনী ড্ৰেডফুল: চিটি অৱ এঞ্জেলছ (২০২০)-ত কৰা অভিনয়ৰ বাবেও তেওঁ প্ৰশংসা লাভ কৰিছে।

প্ৰাৰম্ভিক জীৱন আৰু শিক্ষা

১৯৮২ চনৰ ১১ ফেব্ৰুৱাৰীত বাৰ্কশ্বায়াৰৰ ৰিডিঙত নাটালি ডৰমাৰৰ জন্ম হৈছিল।^১ তেওঁ গেৰী ডৰমাৰ আৰু ক্লেয়াৰ ৰিচাৰ্ডছৰ কন্যা তথা মাৰ্ক আৰু ছামান্থাৰ ভগ্নী।^২৩৪ তেওঁ ইংৰাজ, নৰৱেজিয়ান^৫ আৰু ৱেলছ মূলৰ।^৬৭

ৰিডিং ব্লু ক’ট স্কুলত 'চিক্সথ ফৰ্ম'ত ভৰ্তি হোৱাৰ আগতে তেওঁ চিল্টাৰ্ণ এজ ছেকেণ্ডাৰী স্কুলত অধ্যয়ন কৰিছিল। তেওঁ উল্লেখ কৰা মতে বিদ্যালয়ত তেওঁক বহুত জোকোৱা (bully) হৈছিল, কিন্তু তেওঁ "আজিও তাৰ কাৰণ বিচাৰি নাপায়।" ^৮

বিদ্যালয়ত পঢ়ি থকাৰ সময়তে ডৰমাৰে আলেনোভা স্কুল অৱ ডান্সিংত নৃত্যৰ প্ৰশিক্ষণ লৈছিল।^৯ তেওঁ ষ্টাৰমেকাৰ থিয়েটাৰ কোম্পানীৰ সৈতে দুবছৰ কটাইছিল আৰু কেইবাখনো নাটকত অভিনয় কৰাৰ লগতে তেওঁলোকৰ এটা অনুষ্ঠানত কৰিঅ’গ্ৰাফাৰ হিচাপেও কাম কৰিছিল। তেওঁ পৰিয়ালৰ ভিতৰত "মেধাৱী শিক্ষাৰ্থী" আছিল আৰু কেম্ব্ৰিজ বিশ্ববিদ্যালয়ত ইতিহাস অধ্যয়নৰ বাবে সাময়িকভাৱে সুযোগ লাভ কৰিছিল। কিন্তু তেওঁৰ এ-লেভেল পৰীক্ষাত এটা প্ৰশ্ন ভুলকৈ বুজি পোৱাৰ বাবে প্ৰয়োজনীয় 'এ' গ্ৰেড লাভ কৰিবলৈ সক্ষম নহ’ল।^৮ ইয়াৰ পিছত ডৰমাৰে ড্ৰামা স্কুলবোৰৰ বাবে অডিচন দিয়াৰ সিদ্ধান্ত লয় আৰু লণ্ডনৰ ৱেবৰ ডগলাছ একাডেমী অৱ ড্ৰামাটিক আৰ্টত প্ৰশিক্ষণ গ্ৰহণ কৰে।^১০

ব্যক্তিগত জীৱন

২০০৭ চনত দ্য টিউডৰছ-ৰ ছেটত চিনাকি হোৱাৰ পিছত ডৰমাৰে পৰিচালক এন্থনী বাৰ্নৰ সৈতে সম্পৰ্ক আৰম্ভ কৰে। ২০১১ চনত তেওঁলোকৰ বাগদান সম্পন্ন হয়।^১১ এই দম্পতীহালে একেলগে ইন ডাৰ্কনেছ (২০১৮) ছবিত কাম কৰিছিল। ২০১৮ চনত তেওঁলোকৰ সম্পৰ্কৰ অন্ত পৰে।

২০১৮ চনৰপৰা ডৰমাৰ ইংৰাজ অভিনেতা ডেনিড অ’কছৰ সৈতে সম্পৰ্কত আছে, যাৰ সৈতে তেওঁৰ পৰিচয় ভিনাছ ইন ফাৰ নাটকত অভিনয় কৰি থকাৰ সময়ত হৈছিল।^১২ ২০২১ চনৰ জানুৱাৰী মাহত তেওঁ তেওঁলোকৰ প্ৰথম কন্যা সন্তানক জন্ম দিয়ে।^১৩ ২০২৩ চনৰ ফেব্ৰুৱাৰী মাহত সমাৰচেটৰ বাথত এই দম্পতীহালে চিভিল পাৰ্টনাৰশ্বিপত আবদ্ধ হয়।^১৪ ডৰমাৰ আৰু অ’কছৰ দুগৰাকী কন্যা সন্তান আছে।^১৫

সংবাদ মাধ্যমত

ডৰমাৰে ২০১৪ চনত 'বাৰ্নাৰ্ডোছ' (Barnardo's) নামৰ সংস্থাটোৰ সমৰ্থনত লণ্ডন মাৰাথনত দৌৰিছিল।^১৬ ২০১৬ চনত তেওঁ এন এছ পি চি চি (NSPCC) আৰু 'চাইল্ডলাইন'ৰ সমৰ্থনত আন ৯০০ গৰাকী দৌৰবিদৰ সৈতে পুনৰ এই মাৰাথনত অংশ লয়।^১৭ মাৰাথনত দৌৰাৰ পিছৰেপৰা তেওঁ এন এছ পি চি চি আৰু বিশেষকৈ চাইল্ডলাইনৰ কাম-কাজৰ সৈতে গভীৰভাৱে জড়িত হৈ পৰিছে।^১৮

২০১৬ চনৰ বিশ্ব মানৱীয় দিৱসত ডৰমাৰে ৰাষ্ট্ৰসংঘৰ সদৰত শৰণাৰ্থীসকলৰ দুৰ্দশাৰ বিষয়ে আলোকপাত কৰি ভাষণ দিছিল। তেওঁ মহিলা আৰু ছোৱালীসকলে সন্মুখীন হোৱা হিংসাৰ কথা উল্লেখ কৰাৰ লগতে এই আলোচনাত পুৰুষ আৰু ল’ৰাসকলকো সক্ৰিয়ভাৱে জড়িত কৰিবলৈ আহ্বান জনায়।^১৯ ২০১৭ চনত তেওঁ 'প্লেন ইণ্টাৰনেশ্যনেল' নামৰ মানৱীয় সংস্থাটোৰ সৈতে তানজানিয়ালৈ গৈ বাল্যবিবাহ ৰোধ কৰাৰ অভিযানত অংশ লৈছিল।^২০

২০১৮ চনৰ এটা সাক্ষাৎকাৰত ডৰমাৰে কৈছিল যে তেওঁৰ কথাৰ ভুল ব্যাখ্যা হোৱাৰ আশংকাত তেওঁ ছচিয়েল মিডিয়া ব্যৱহাৰ নকৰে। চলচ্চিত্ৰ আৰু টেলিভিছনত তেওঁ কৰা নগ্ন দৃশ্যৰ অভিনয় সম্পৰ্কে তেওঁ কয়, "মই স্পষ্ট কৰি ক’ব বিচাৰোঁ যে যৌন বা নগ্ন দৃশ্যত অভিনয় কৰিবলৈ মই কেতিয়াও সহজ অনুভৱ কৰা নাই। মোৰ কাম হ’ল চিত্ৰনাট্যৰ চৰিত্ৰটো বুজি অভিনয় কৰা। মই কেৱল ভুলকৈ উপস্থাপন হোৱাৰ ভয়তে বহুতো যৌন দৃশ্য থকা চৰিত্ৰ প্ৰত্যাখ্যান কৰিছোঁ।" ^২১

২০১৯ চনত ডৰমাৰক চাইল্ডলাইনৰ বাবে এন এছ পি চি চি-ৰ ৰাষ্ট্ৰদূত হিচাপে নিযুক্তি দিয়া হয়।^২২ তেওঁ এন এছ পি চি চি-ৰ কেৰল চাৰ্ভিচৰ লগতেও জড়িত হৈ আছিল আৰু ২০২১ চনত সংস্থাটোৰদ্বাৰা প্ৰকাশিত শিশু গ্ৰন্থ পাণ্ট’ছ’ৰাছ এণ্ড দ্য পাৱাৰ অৱ পাণ্টছ-ৰ অডিঅ’ বুক ৰেকৰ্ডিং কৰাৰ কথা ঘোষণা কৰা হৈছিল।^২৩

২০২৪ চনত তেওঁক এন এছ পি চি চি কাউন্সিলৰ সন্মানীয় সদস্য হিচাপে নিযুক্তি দিয়া হয়।^২৪