ধীৰাজ বোম্মাদেৱৰা

ধীৰাজ বোম্মাদেৱৰা (Dhiraj Bommadevara; জন্ম: ৪ ছেপ্টেম্বৰ ২০০১) এজন ভাৰতীয় ৰিকাৰ্ভ ধনুৰ্বিদ।^১ ২০২৪ চনৰ অলিম্পিকত ধীৰাজে অংশগ্ৰহণ কৰিছিল, তাত তেওঁ পদক অৰ্জন কৰাৰ পৰা অলপতে‍ বঞ্চিত হৈছিল আৰু ৰিকাৰ্ভ মিক্সড টিম ইভেণ্টত চতুৰ্থ স্থান দখল কৰিছিল।^২

ব্যক্তিগত জীৱন

ধীৰাজৰ ঘৰ অন্ধ্ৰ প্ৰদেশৰ বিজয়াৱাড়াত। তেওঁৰ পিতৃ বোম্মাদেৱা শ্ৰৱণ কুমাৰ আগতে আৰ্চাৰী এছ’চিয়েচন অৱ ইণ্ডিয়াৰ কাৰিকৰী বিষয়া আছিল। তেওঁ বিজয়াৱাড়াৰ এছ আৰ আৰ আৰু চি ভি আৰ চৰকাৰী ডিগ্ৰী কলেজত অধ্যয়ন কৰিছিল।^৩ ২০০৬ চনত বিজয়াৱাড়াৰ ভলগা আৰ্চাৰী একাডেমীত চেৰুকুৰি সত্যনাৰায়ণৰ নেতৃত্বত তেওঁৰ ধনুৰ্বিদৰ জীৱন আৰম্ভ হয়। পুনেৰ এ এছ আইত চাৰি বছৰ ধৰি প্ৰশিক্ষণ লোৱাৰ পাছত ২০২১ চনত হাৱালদাৰ হিচাপে ভাৰতীয় সেনাবাহিনীত যোগদান কৰে।^৩৪ তেওঁক অলিম্পিক গোল্ড কুৱেষ্ট (OGQ) দ্বাৰা সমৰ্থিত।^৪

কেৰিয়াৰ

প্ৰশংসা

পাৰ্থ ছালুনখে আৰু আদিত্য চৌধাৰীৰ সৈতে ধীৰাজে ২০২১ চনৰ বিশ্ব আৰ্চাৰী যুৱ চেম্পিয়নশ্বিপত ফাইনেলত স্পেইনক ৫-৩ পৰাস্ত কৰি স্বৰ্ণ পদক লাভ কৰিছিল।

২০২২ চনত চীনৰ হাংঝুত অনুষ্ঠিত এছিয়ান গেমছত ভাৰতক প্ৰতিনিধিত্ব কৰিবলৈ ধীৰাজ নিৰ্বাচিত হৈছিল৷ তেওঁ ১৩৮৬ স্ক’ৰ কৰি ব্ৰেডী এলিছনৰ ১৩৭৬ ৰেকৰ্ড অতিক্ৰম কৰি ১৪৪০ ৰ ৱৰ্ল্ড ৰেকৰ্ড (বিশ্ব ৰেকৰ্ড) ভংগ কৰিছিল৷^৫ তেওঁ পুৰুষৰ ৰিকাৰ্ভ দলীয় ইভেণ্টত (অতনু দাস আৰু তুষাৰ শ্বেলকেৰ সৈতে) অংশগ্ৰহণ কৰিছিল আৰু ২০২২ চনৰ এছিয়ান গেমছত ৰূপৰ পদক লাভ কৰিছিল।^৬৭৮

২০২৩ চনত তেওঁ জাৰ্মানীৰ বাৰ্লিনত অনুষ্ঠিত হোৱা বিশ্ব চেম্পিয়নশ্বিপত ভাৰতক প্ৰতিনিধিত্ব কৰিছিল য'ত তেওঁ ৰেংকিং পৰ্যায়ত ২য় স্থান দখল কৰিছিল যদিও ১৬ ৰাউণ্ডত অপ্ৰত্যাশিত প্ৰস্থান হৈছিল।^৯১০ একে বছৰতে তেওঁ তুৰস্কৰ আন্টালিয়াত অনুষ্ঠিত বিশ্বকাপত পুৰুষ দলৰ ৰূপ আৰু পুৰুষৰ ব্যক্তিগত ব্ৰঞ্জৰ পদক লাভ কৰে (১৬ ৰাউণ্ডত ব্ৰেডী এলিছনক পৰাস্ত কৰি)।^৯ ২০২৩ চনৰ ছেপ্টেম্বৰ মাহত তেওঁ মেক্সিকোৰ হাৰ্মোচিলোত অনুষ্ঠিত হোৱা আৰ্চাৰী বিশ্বকাপৰ ফাইনেলত অংশগ্ৰহণ কৰে^১১ আৰু ৫ বাৰৰ অলিম্পিক চেম্পিয়ন কিম ৱু-জিনৰ সৈতে যুঁজ দি‍ সামগ্ৰিকভাৱে ৪ৰ্থ স্থান দখল কৰে। অংকিতা ভকতৰ সৈতে ধীৰাজে ২০২৪ চনত চাংহাইত মিক্সড দলীয় ব্ৰঞ্জৰ পদক লাভ কৰিছিল।

২০২৪ চনৰ গ্ৰীষ্মকালীন অলিম্পিক

২০২৪ চনৰ গ্ৰীষ্মকালীন অলিম্পিকত ধীৰাজে প্ৰথমবাৰৰ বাবে অলিম্পিকত আত্মপ্ৰকাশ কৰিছিল৷ ৰেংকিং ৰাউণ্ডৰ পাছত ধীৰাজে ৪ৰ্থ স্থান (৬৮১ স্ক’ৰেৰে) কৰি অলিম্পিক গেমছত এজন ভাৰতীয় ধনুৰ্বিদৰ দ্বিতীয় শ্ৰেষ্ঠ ৰেংকিং স্ক’ৰাৰ হিচাপে পৰিগণিত হয়। কিন্তু পুৰুষৰ ব্যক্তিগত ১/১৬ এলিমিনেচন ৰাউণ্ডত বলি‍ষ্ঠ যুঁজত কানাডাৰ এৰিক পিটাৰ্ছৰ হাতত ৫-৬ (১০-১০+)ত পৰাস্ত হয়। প্ৰবীণ যাদৱ আৰু প্ৰবীণ তৰুণদীপ ৰায়ৰ সৈতে পুৰুষৰ দলত ধীৰাজে কোৱাৰ্টাৰ ফাইনেলত প্ৰৱেশ কৰে। অৱশ্যে দলটো তুৰস্কৰ বিৰুদ্ধে কোৱাৰ্টাৰত পৰাজয়ৰ সন্মুখীন হ’বলগীয়া হয়৷

ধীৰাজে ইতিহাস ৰচনা কৰি‍ অংকিতা ভকতৰ সৈতে‍ ধনুৰ্বিদ্যাত ভাৰতৰ প্ৰথমখন অলিম্পিক পদক মেচত মিক্সড দলীয় ব্ৰঞ্জৰ পদক মেচত অংশগ্ৰহণ কৰিছিল যদিও ব্ৰেডি এলিছন আৰু কেছি কফহল্ডৰ সৈতে আমেৰিকাৰ হাতত ২-৬ত পৰাস্ত হৈছিল।^{১২১৩১৪}

অলিম্পিকৰ পাছত

ফ্ল’ৰিডাত অনুষ্ঠিত আৰ্চাৰী বিশ্বকাপৰ প্ৰথম পৰ্যায়ত ধীৰাজে পুৰুষৰ দলীয় ৰূপৰ পদক (অতনু দাস আৰু তৰুনদীপ ৰায়ৰ সৈতে) আৰু ব্যক্তিগত ব্ৰঞ্জৰ পদক (অতি সোনকালে বিশ্ব চেম্পিয়ন হ’বলগীয়া আন্দ্ৰেছ টেমিনোক পৰাস্ত কৰি) লাভ কৰে। বিশ্বকাপ আৰু বিশ্ব চেম্পিয়নশ্বিপৰ আগন্তুক পৰ্যায়ত জায়মান খেলত পৰাস্ত হ’লে তেওঁ অৱশ্যে মন্দাৱস্থাৰ সন্মুখীন হ’ব৷ কিন্তু ২০২৫ চনৰ এছিয়ান আৰ্চাৰী চেম্পিয়নশ্বিপৰ সময়ত ধীৰাজে দেশৰে‍ ৰাহুল পাৱাৰিয়াক ৬-২ত পৰাস্ত কৰি ঐতিহাসিক সোণৰ পদক লাভ কৰি ভাৰতৰ হৈ‍ প্ৰথমবাৰৰ বাবে মেল ৰিকাৰ্ভ চেম্পিয়ন (কোনো দলীয় ইভেণ্টৰ বাবে যোগ্যতা অৰ্জন কৰিব নোৱাৰাৰ পাছতো) হিচাপে পৰিগণিত হয়।

২০২৬

বাছনি পৰীক্ষাত প্ৰথম স্থান দখল কৰি ধীৰাজে ২০২৬ চনৰ এছিয়ান গেমছত দেশক প্ৰতিনিধিত্ব কৰিবলৈ যোগ্যতা অৰ্জন কৰে।^১৫ তেওঁ ২০২৬ চনৰ জুন মাহত আন্টালিয়াত অনুষ্ঠিত হোৱা আৰ্চাৰী বিশ্বকাপৰ তৃতীয় পৰ্যায়ত মিক্সড দলীয় ইভেণ্টত ছিজনৰ প্ৰথমটো সোণৰ পদক লাভ কৰে।^১৬ পাছদিনা তেওঁ আৰ্চাৰী বিশ্বকাপত লি ৱু চেকক ৭-৩ত পৰাস্ত কৰি কেৰিয়াৰৰ প্ৰথম পুৰুষৰ ব্যক্তিগত বিশ্বকাপৰ খিতাপ দখল কৰে আৰু একে পৰ্যায়তে ব্যক্তিগত আৰু মিক্সড দলীয় দুয়োটা খিতাপ জয় কৰা প্ৰথমজন ভাৰতীয় পুৰুষ ধনুৰ্বিদ হিচাপে পৰিগণিত হয়।^১৭ পঞ্চম চি আই এছ এম বিশ্ব সামৰিক আৰ্চাৰী চেম্পিয়নশ্বিপত সংগীতাৰ সৈতে ৰিকাৰ্ভ মিক্সড দলীয় শাখাত স্বৰ্ণ পদক লাভ কৰে।