দানা দ্ৰাবোভা

দানা দ্ৰাবোভা (ইংৰাজী ভাষা: Dana Drábová; ৩ জুন ১৯৬১ – ৬ অক্টোবৰ ২০২৫) এগৰাকী চেক পদাৰ্থ বিজ্ঞানী আৰু ৰাজনীতিবিদ আছিল। তেওঁ ১৯৯৯ চনৰ পৰা ২০২৫ চনলৈকে ষ্টেট অফিচ ফৰ নিউক্লিয়েৰ চেফটিৰ অধ্যক্ষ আছিল আৰু ২০২৩ চনত কনভেনচন অন নিউক্লিয়েৰ চেফটিৰ সদস্য দেশসমূহৰ বৈঠকৰ সভাপতি হিচাপে কাৰ্যনিৰ্বাহ কৰিছিল।

জীৱন আৰু কৰ্মজীৱন

দ্ৰাবোভাৰ জন্ম ১৯৬১ চনৰ ৩ জুনত প্ৰাগ চহৰত হৈছিল।^১ প্ৰাগৰ চেক কাৰিকৰী বিশ্ববিদ্যালয়ত অধ্যয়ন কৰাৰ পূৰ্বে তেওঁ ৰিচানীত বিদ্যালয়ৰ শিক্ষা গ্ৰহণ কৰিছিল। তেওঁ এই বিশ্ববিদ্যালয়ৰ নিউক্লিয়েৰ চায়েঞ্চ এণ্ড ফিজিকেল ইঞ্জিনিয়াৰিং অনুষদত অধ্যয়ন কৰিছিল,^১ য’ত তেওঁ ডচিমেট্ৰী আৰু বিকিৰণৰ প্ৰয়োগত বিশেষজ্ঞতা অৰ্জন কৰিছিল। তেওঁ তেওঁৰ গৱেষণা পত্ৰ মেজাৰমেণ্ট অৱ নিউট্ৰন এণ্ড ডিটাৰমিনিং দ্য ড’জ ফ্ৰম নিউট্ৰন ইউজিং মাইক্ৰ’ডচিমেট্ৰী সম্পূৰ্ণ কৰাৰ পিছত "ইঞ্জিনিয়াৰিং" ডিগ্ৰী লাভ কৰিছিল।^২

তেওঁ ষ্টেট অফিচ ফৰ নিউক্লিয়েৰ চেফটিৰ অধ্যক্ষা আছিল।^৩

২০১৩ চনত দ্ৰাবোভাক (যাক "দ্য নিউক্লিয়েৰ লেডী" বুলিও জনা যায়) বিজ্ঞান জনপ্ৰিয়কৰণৰ কামৰ বাবে লিবেৰেক কাৰিকৰী বিশ্ববিদ্যালয়ৰ পৰা সন্মানীয় ডিগ্ৰী প্ৰদান কৰা হয়। তেওঁ বিভিন্ন টেলিভিছন অনুষ্ঠানত অংশ লৈছিল আৰু হাইস্কুল তথা বিশ্ববিদ্যালয়ৰ ছাত্ৰ-ছাত্ৰীৰ মাজত কাৰিকৰী বিজ্ঞানৰ এগৰাকী অধিবক্তা আছিল। দ্ৰাবোভাই লিবেৰেক বিশ্ববিদ্যালয়ত বক্তৃতাও প্ৰদান কৰিছিল।^৪

ব্যৱসায়ী মিচাল হোৰাচেক চেক প্ৰজাতন্ত্ৰৰ ৰাষ্ট্ৰপতি পদৰ বাবে থিয় হৈছিল। তেওঁ ২০১৭ চনৰ ফেব্ৰুৱাৰী মাহত শ্লভাকিয়াৰ প্ৰাক্তন ৰাষ্ট্ৰপতি পদৰ প্ৰাৰ্থী মেগডালেনা ভাছাৰিয়োভা, দানা দ্ৰাবোভা আৰু শল্য চিকিৎসক পাভেল পাফকোসহ তেওঁৰ উপদেষ্টা পৰিষদৰ নাম ঘোষণা কৰিছিল।^৫

২০১৮ চনত তেওঁ থিংক টেংক ইনষ্টিটিউট অৱ মডাৰ্ণ পলিটিক্স আইষ্টাৰ (iSTAR) ৰ বৰ্ডত আছিল।^৬

২০২৩ চনত তেওঁ ঘোষণা কৰিছিল যে ছয়টা চেক পাৰমাণৱিক ৰিয়েক্টৰ গোটৰ বাবে পাৰমাণৱিক ইন্ধনৰ বিকল্প যোগানকাৰীৰ সন্ধান কৰা হ'ব।^৩

২০২৩ চনৰ মাৰ্চ মাহত তেওঁ কনভেনচন অন নিউক্লিয়েৰ চেফটিৰ পক্ষসমূহৰ ৮ম আৰু ৯ম যুটীয়া বৈঠকৰ সভাপতি আছিল।

দ্ৰাবোভাৰ ২০২৫ চনৰ ৬ অক্টোবৰত ৬৪ বছৰ বয়সত এক গুৰুতৰ বেমাৰৰ পিছত মৃত্যু হয়।^৭৮

সন্মান

অৰ্ডাৰ অৱ দ্য হোৱাইট লায়ন, তৃতীয় শ্ৰেণী (২০২৫)^৯

অৰ্ডাৰ অৱ দ্য ৰাইজিং ছান, দ্বিতীয় শ্ৰেণী, গ'ল্ড এণ্ড ছিলভাৰ ষ্টাৰ (২০২৪)^১০

চেক গণৰাজ্যৰ প্ৰতিৰক্ষা মন্ত্ৰীৰ ক্ৰছ অৱ মেৰিট, তৃতীয় শ্ৰেণী (২০২২)^১১

মেডেল অৱ মেৰিট, প্ৰথম শ্ৰেণী (২০১৪)^১২