ঝেং মিন

ঝেং মিন (ইংৰাজী ভাষা: Zheng Min; জন্ম: ১৮ জুলাই ১৯২০ – ৩ জানুৱাৰী ২০২২) এগৰাকী চীনৰ বিদগ্ধ পণ্ডিত আৰু আধুনিকতাবাদী কবি আছিল।^১

প্ৰাৰম্ভিক জীৱন আৰু কেৰিয়াৰ

ঝেং মিনৰ জন্ম ১৯২০ চনৰ ১৮ জুলাইত চীনৰ মিনহাউ জিলাত হৈছিল।^২ তেওঁ কুনমিঙৰ দক্ষিণ-পশ্চিম বিশ্ববিদ্যালয়ত অধ্যয়ন কৰিছিল আৰু ১৯৪৩ চনত দৰ্শন বিষয়ত স্নাতক ডিগ্ৰী লাভ কৰিছিল।^৩ দ্বিতীয় চীন-জাপান যুদ্ধৰ সময়ত তেওঁ প্ৰথমবাৰৰ বাবে নিজৰ ৰচনা প্ৰকাশ কৰিবলৈ আৰম্ভ কৰিছিল। সেই সময়ত আধুনিকতাবাদী কবিতা লিখা অতি কম সংখ্যক মহিলা কবিৰ ভিতৰত তেওঁ আছিল অন্যতম।^৩ পৰৱৰ্তী সময়ত ঝেঙে আমেৰিকা যুক্তৰাষ্ট্ৰৰ ব্ৰাউন বিশ্ববিদ্যালয়ত অধ্যয়ন কৰে আৰু ১৯৫১ চনত সাহিত্যত স্নাতকোত্তৰ ডিগ্ৰী লাভ কৰে। ১৯৫৫ চনত তেওঁ পুনৰ চীনলৈ ঘূৰি আহে।^৩ তেওঁক সেই সময়ৰ "নয়টা পাত" (Nine Leaves) কাব্য ধাৰাৰ অন্যতম প্ৰতিভাশালী কবি হিচাপে গণ্য কৰা হয়। যদিও ঝেঙৰ ৰচনাসমূহক সাধাৰণতে নাৰীবাদী বুলি গণ্য কৰা নহয়, তথাপিও পুৰুষ প্ৰধান সাহিত্য জগতত এগৰাকী মহিলা কবি হিচাপে তেওঁৰ অৱস্থান, পৰম্পৰাগত লিখন শৈলীৰ পৰা বিচ্যুতি আৰু বিশেষকৈ নাৰীৰ মনস্তত্ত্বৰ অন্বেষণে তেওঁক চীনা কবিতাৰ এগৰাকী গুৰুত্বপূৰ্ণ ব্যক্তি হিচাপে প্ৰতিষ্ঠা কৰিছে।^৪৫

শৈলী

ঝেং মিনৰ প্ৰাৰম্ভিক ৰচনাসমূহৰ বৈশিষ্ট্য হ’ল গীতিময়তা, দৰ্শন আৰু সামাজিক বাস্তৱবাদ।^৩ এই তিনিওটাৰে সুন্দৰ সংমিশ্ৰণ ঘটোৱাৰ বাবে তেওঁক উচ্চ প্ৰশংসা কৰা হয়। তেওঁৰ কবিতাত আবেগিক গভীৰতা বিচাৰি পোৱা যায়। ঝেঙে পৰম্পৰাগতভাৱে পুৰুষসুলভ আৰু নাৰীসুলভ কাব্যশৈলীৰ সংমিশ্ৰণ ঘটাইছিল। তেওঁৰ লিখন শৈলী চিত্ৰকল্প আৰু ৰূপকৰে ভৰপূৰ। তেওঁৰ মতে তেওঁৰ কবিতা "সংবেদনশীলতাত গভীৰভাৱে শিপাই আছে।"^৩ তেওঁৰ কবিতাবোৰ প্ৰায়ে অন্তৰ্মুখী আৰু গভীৰ চিন্তাশীল। অৱশ্যে, তেওঁৰ শৈলীৰ বাবে তেওঁ কিছু সমালোচিতও হৈছিল, কাৰণ তেওঁৰ কিছুমান দীঘলীয়া কবিতাত একতাৰ অভাৱ থকা যেন অনুভৱ হয়।^৩৫

এগৰাকী আধুনিকতাবাদী কবি হোৱাৰ উপৰিও ঝেঙে তেওঁৰ ৰচনাত আধুনিক আৰু পৰম্পৰাগত দুয়োটা কৌশলৰ ব্যৱহাৰ কৰিছিল।^৪ বিশেষকৈ প্ৰেমৰ কবিতাবোৰত তেওঁৰ যি আকুলতা আৰু আক্ষেপ দেখা যায়, সেয়া অধিক পৰম্পৰাগত সাহিত্যিক ৰচনাৰ ইংগিত দিয়ে।^৪ পৰৱৰ্তী সময়ৰ বহু মহিলা কবিৰ দৰে তেওঁৰ ৰচনাক বিশেষভাৱে নাৰীবাদী বুলি গণ্য কৰা নহয়। বৰঞ্চ কনিষ্ঠ প্ৰজন্মৰ একাংশ সমালোচকৰ মতে তেওঁৰ লিখনিত পিতৃতান্ত্ৰিক সাঁচৰ প্ৰতিফলনহে দেখা যায়।^৪

ব্যক্তিগত জীৱন আৰু মৃত্যু

২০২২ চনৰ ৩ জানুৱাৰীত ১০১ বছৰ বয়সত বেইজিঙত ঝেং মিনৰ মৃত্যু হয়।^২

নিৰ্বাচিত ৰচনাৱলী

• ঝেং মিন শ্বিজি ১৯৪২-১৯৪৭ [ঝেং মিনৰ কবিতা সংগ্ৰহ ১৯৪২-১৯৪৭]
• জিউয়ে জি [নটা পাতৰ কবিতা সংগ্ৰহ]