জেহৰা ফিজী

জেহৰা ফিজি জন্ম: ১৮৬৬ চন–মৃত্যু: ১৯৪০ চন; বিংশ শতিকাৰ আৰম্ভণিতে ভাৰতত কাম কৰা উৰ্দু ভাষাৰ এগৰাকী লেখিকা, নাট্যকাৰ আৰু সম্পাদক।^১ সেই সময়ৰ উৰ্দু মহিলা আলোচনীসমূহৰ বাবে তেওঁ এগৰাকী আগশাৰীৰ অৱদানকাৰী আছিল।^২

পিতৃ হাছানালি ফেইঝাইডাৰ আৰু মাতৃ আমিৰুনিছা ফিজীৰ তিনিগৰাকী সন্তানৰ ভিতৰত জেহৰা ফিজী আছিল জ্যেষ্ঠ কন্যা।^৩ তেওঁৰ ভগ্নী আতিয়া ফিজী (১৮৭৭-১৯৬৭) আৰু নাজলী বেগম (১৮৭৪-১৯৬৮)ও লেখিকা আছিল। আটাইকেইজনী ভগ্নীয়েই মুম্বাইৰ মাজাগাঁৱত থকা বৰদেউতাক বদৰুদ্দিন ত্যবজীৰ প্ৰভাৱত থাকি ডাঙৰ-দীঘল হৈছিল। তেওঁ নাৰী শিক্ষাৰ এগৰাকী সমৰ্থক আৰু ভ্ৰমনপ্ৰিয় আছিল। ইউৰোপ, চীন জাপান আমেৰিকা আদি দেশ তেওঁ ভ্ৰমন কৰিছিল।^১

১৯০৫ চনত ফিজীয়ে মুহাম্মাদী শৈক্ষিক সন্মিলনৰ সৈতে জড়িত মহিলা সমাৱেশৰ সভাপতিত্ব কৰে। ১৯১৪ চনত তেওঁ সৰ্বভাৰতীয় মুছলিম মহিলা সন্মিলনৰ কাৰ্যকৰী সমিতিলৈ নিৰ্বাচিত হয়।

লেখা আৰু সম্পাদনাৰ কেৰিয়াৰ

ফিজীয়ে তেহজীব-ই-নিছান, খাটন আৰু ইছমাতকে ধৰি উৰ্দু মহিলা আলোচনীসমূহত নিয়মীয়া অৱদান আগবঢ়াইছিল।^৪২ ১৯২১ চনত জেহৰা ফিজীৰ প্ৰবন্ধসমূহ একত্ৰিত কৰি এখন কিতাপ প্ৰস্তুত কৰা হয়, যিখন কিতাপ মাজামিন (Significations) নামেৰে প্ৰকাশ কৰা হয়। তেওঁৰ নাটক মাল-ই-খাতুন (মহিলাৰ ধন) সেই বছৰতে প্ৰকাশ পাইছিল। ফিজীয়ে ১৯৩৪ চনত তন্দৰুস্তি হাজাৰ নাইমাত (Health is Wealth) নামেৰে মহিলাৰ স্বাস্থ্যৰ ওপৰত এখন গ্ৰন্থ লিখিছিল।^২ তেহজীব-ই-নিছানত প্ৰকাশৰ বাবে মুহাম্মাদী বেগমলৈ প্ৰেৰণ কৰাৰ আগতে ফিজীয়ে ভগ্নী আতিয়া ফিজীৰ চিঠি আৰু ডায়েৰী সম্পাদনা কৰিছিল। নাজলীৰ ভ্ৰমণ-কাহিনী ছাইৰ-ই-ইউৰোপ (ইউৰোপ ভ্ৰমণ) আৰু মাকৰ কবিতা পুথি: যাদগাৰী-আমিৰা আৰু আমিন আদিও সম্পাদনা কৰিছিল।

১৯৪০ চনৰ ২৩ ডিচেম্বৰত জেহৰা ফিজিৰ মৃত্যু হয়।