ছানায়া ইৰাণী

ছানায়া ইৰাণী (ইংৰাজী ভাষা: Sanaya Irani; জন্ম: ১৭ ছেপ্টেম্বৰ ১৯৮৩^১২) এগৰাকী ভাৰতীয় অভিনেত্ৰী যিয়ে মূলতঃ হিন্দী টেলিভিছনত কাম কৰে। ভাৰতৰ এগৰাকী আগশাৰীৰ আৰু জনপ্ৰিয় টেলিভিছন অভিনেত্ৰী হিচাপে পৰিগণিত^৩৪৫ ইৰাণীয়ে এটা আই টি এ বঁটা, এটা ইণ্ডিয়ান টেলি বঁটা আৰু তিনিটা গ’ল্ড বঁটা লাভ কৰিছে।

ইৰাণীয়ে ২০০৬ চনত হিন্দী ছবি ‘ফানা’ৰ জৰিয়তে অভিনয় জীৱনৰ পাতনি মেলে আৰু ২০০৭ চনত ‘লেফ্ট ৰাইট লেফ্ট’ৰ জৰিয়তে টেলিভিছনত আত্মপ্ৰকাশ কৰে। ‘মিলি যখন হাম তুম’ত গুঞ্জন ভূষণ শেৰগিল, ‘ইছ প্যাৰ কো ক্যা নাম দুন?’-ত খুছী গুপ্তা ৰায়জাদা আৰু ‘ৰংগৰাচীয়া’ত পাৰ্বতী চৌহান ৰানাৱাটৰ চৰিত্ৰ ৰূপায়ণৰ বাবে ইৰাণী আটাইতকৈ বেছি পৰিচিত। ২০১৫ চনত তেওঁ ‘ঝলক দিখলা যা’ত অংশগ্ৰহণ কৰি প্ৰথম ৰানাৰ্ছ আপ হয়। পৰৱৰ্তী সময়ত ২০১৭ চনত তেওঁ স্বামী মোহিত চেহগলৰ সৈতে ‘নাচ বলিয়ে’ত অংশ লৈ দ্বিতীয় ৰানাৰ্ছ আপ হিচাপে প্ৰতিযোগিতা শেষ কৰে।^৬৭

প্ৰাৰম্ভিক জীৱন আৰু শিক্ষা

ইৰাণীৰ জন্ম ১৯৮৩ চনৰ ১৭ ছেপ্টেম্বৰত মুম্বাইত এটা ইৰাণী (জাৰথুষ্ট্ৰীয়) পৰিয়ালত হৈছিল।^৮ ইৰাণীয়ে উটীৰ দ্য লৰেন্স স্কুল, লাভডেলত সাত বছৰ পঢ়া-শুনা কৰিছিল। তেওঁ মুম্বাইৰ চিডেনহাম কলেজ অৱ কমাৰ্চ এণ্ড ইক'নমিক্সৰপৰা স্নাতক ডিগ্ৰী লাভ কৰে আৰু মডেলিং আৰম্ভ কৰাৰ পূৰ্বে এম বি এ ডিগ্ৰীৰ বাবে অধ্যয়ন কৰি আছিল।^৯

ব্যক্তিগত জীৱন

‘মিলি যখন হাম তুম’ৰ ছেটত ইৰাণীয়ে অভিনেতা মোহিত চেহগলক লগ পায় আৰু পৰৱৰ্তী সময়ত তেওঁলোকৰ মাজত প্ৰেমৰ সম্পৰ্ক গঢ়ি উঠে। ধাৰাবাহিকখনৰ শ্বুটিং অন্ত পৰা অন্তিম দিনটোত অৰ্থাৎ ২০১০ চনৰ ১৯ নৱেম্বৰত তেওঁলোকে নিজৰ সম্পৰ্কৰ কথা ঘোষণা কৰিছিল।^১০ ২০১৫ চনৰ ডিচেম্বৰ মাহত তেওঁলোকৰ আঙঠি পিন্ধোৱা পৰ্ব (engagement) সম্পন্ন হয়।^১১ ২০১৬ চনৰ ২৫ জানুৱাৰীত গোৱাত এক পৰম্পৰাগত হিন্দু বিবাহ অনুষ্ঠানৰ জৰিয়তে ইৰাণীয়ে মোহিত চেহগলৰ সৈতে বিবাহপাশত আবদ্ধ হয়।^১২