চিলভিয়া আলোনছো

চিলভিয়া আলোনছো ক্ৰুজ (ইংৰাজী ভাষা: Silvia Alonso Cruz; জন্ম: ২৮ ডিচেম্বৰ ১৯৮৯) এগৰাকী স্পেনীছ ভাষা অভিনেত্ৰী। তেওঁৰ অভিনয় জীৱনৰ আৰম্ভণি হৈছিল টেলিচিনকো ধাৰাবাহিক টিয়েৰা ডি লবোচত আলমূডেনা লবো নামৰ মুখ্য চৰিত্ৰটোৰ জৰিয়তে। তেওঁ আমাৰ এচ পাৰা চিয়েম্প্ৰে, চিন আইডেনটিড্যাড আৰু টিম্পোচ ডি গুৱেৰাৰ দৰে বিভিন্ন স্পেনিছ ধাৰাবাহিকত অংশগ্ৰহণ কৰিছে।

জীৱনী

ক্ৰুজে আৰ্টে ৪ আৰু মেট্ৰ’পলিচ নামৰ অভিনয় বিদ্যালয়ত শিক্ষা গ্ৰহণ কৰিছিল। ইয়াৰ উপৰি তেওঁ কেমেৰাৰ সন্মুখত অভিনয় আৰু প্ৰাচ্য নৃত্যৰ পাঠ্যক্ৰম গ্ৰহণ কৰিছে।

২০১০ চনত টেলিচিনকো ধাৰাবাহিক টিয়েৰা ডি লবোচত আলমূডেনা লবোৰ চৰিত্ৰত অভিনয় কৰি তেওঁ খ্যাতি অৰ্জন কৰে। এই ধাৰাবাহিকখনৰ প্ৰথম ছিজন ২০১০ চনৰ ২৯ ছেপ্টেম্বৰত মুক্তি পাইছিল।^১ দৰ্শকৰ সঁহাৰি ভাল হোৱা বাবে ধাৰাবাহিকখন তৃতীয় ছিজনলৈকে সম্প্ৰসাৰিত কৰা হৈছিল আৰু আলোনছোৱে আটাইকেইটা ছিজনতে মুখ্য চৰিত্ৰত অভিনয় কৰিছিল।^২৩

২০১৩ চনত তেওঁ এনটেনা ৩-ত দৈনিক সম্প্ৰচাৰিত হোৱা আমাৰ এচ পাৰা চিয়েম্প্ৰে ধাৰাবাহিকৰ দ্বিতীয় ছিজনত যোগদান কৰে।^৪ ইয়াত আলোনছোৱে আলেকজান্দ্ৰা টৰিজোচ নামৰ এগৰাকী যুৱ গৱেষিকাৰ চৰিত্ৰত অভিনয় কৰিছিল যিয়ে তেওঁৰ শিক্ষক লুইচ আৰ্ডানজাৰ সৈতে এক সম্পৰ্কত জড়িত হৈ পৰে। দ্বিতীয় ছিজনৰ সমাপ্তিৰ পিছত তেওঁলোক দুয়োৱে ধাৰাবাহিকখন ত্যাগ কৰে।^৫

২০১৪ চনত তেওঁ মাকৰেনা গোমেজ আৰু নাদিয়া ডি ছাণ্টিয়াগোৰ সৈতে শ্ৰিউজ নেষ্ট ছবিৰ জৰিয়তে চলচ্চিত্ৰ জগতত প্ৰথম খোজ পেলায়।^৬ একে বছৰতে তেওঁ টেলিচিনকোৰ ধাৰাবাহিক লা কুৱে চে এভেচিনাত পেট্ৰিচিয়া নামৰ এগৰাকী সমাজকৰ্মীৰ চৰিত্ৰত অভিনয় কৰে।^৭

২০১৫ চনৰ এপ্ৰিল মাহত তেওঁ এনটেনা ৩ ধাৰাবাহিক চিন আইডেনটিড্যাডৰ দ্বিতীয় ছিজনত যোগদান কৰে আৰু ধাৰাবাহিকখন শেষ নোহোৱালৈকে হেলেনা লোপেজৰ চৰিত্ৰত অভিনয় কৰে।^৮ সেই বছৰতে তেওঁ ভেলভেট ধাৰাবাহিকত মিচেল নামৰ এটা অতিথি চৰিত্ৰত অভিনয় কৰিছিল।^৯

২০১৬ চনৰ ফেব্ৰুৱাৰী মাহত এনটেনা ৩-ত পাৰডিয়েণ্ডো এল নৰ্তে ধাৰাবাহিকখন প্ৰিমিয়াৰ হয়, য’ত আলোনছোৱে বাৰ্লিনত বাস কৰা এডেলা নামৰ এগৰাকী স্পেনিছ যুৱতীৰ চৰিত্ৰত অভিনয় কৰিছিল।^১০ ইয়াৰ উপৰি সেই বছৰতে লা কৰোনা পাৰ্টিডা নামৰ এখন ছবি মুক্তি পায়, য’ত তেওঁ আৰাগনৰ দ্বিতীয় ফাৰ্ডিনাণ্ডৰ দ্বিতীয় পত্নী জাৰ্মেইন অৱ ফক্সৰ চৰিত্ৰত অভিনয় কৰিছিল।^১১

২০১৭ চনত তেওঁ ইটছ ফৰ ইয়ৰ ওন গুড আৰু লৰ্ড, গিভ মি পেচেন্স নামৰ ছবি দুখনত অভিনয় কৰে।^১২১৩ একে বছৰতে তেওঁৰ ধাৰাবাহিক টিম্পোচ ডি গুৱেৰাও মুক্তি পাইছিল।^১৪