গোলাব আদিনেহ

গোলাব মোস্তায়েন (ফাৰ্চী ভাষা: گلاب مستعان; ১৩ নৱেম্বৰ ১৯৫৩) এগৰাকী ইৰানী অভিনেত্ৰী, যাক পেচাগতভাৱে গোলাব আদিনেহ নামেৰে জনা যায়। তেওঁ ঔপন্যাসিক হোছেইনঘোলী মোস্তায়েনৰ কন্যা আৰু ১৯৭০ৰ দশকত নিজৰ কেৰিয়াৰ আৰম্ভ কৰিছিল। আদিনেহে ১৯৯৫ চনত ব্লু স্কাৰ্ফ চলচ্চিত্ৰত কৰা অভিনয়ৰ বাবে ফাজৰ চলচ্চিত্ৰ মহোৎসৱত শ্ৰেষ্ঠ সহ-অভিনেত্ৰীৰ ক্ৰিষ্টেল চিমৰ্গ বঁটা লাভ কৰিছিল। ইয়াৰ উপৰি তেওঁ কেনেৰী য়েল্ল (১৯৮৯), মমছ গেষ্ট (২০০৪), ৱেন ৱী ৱেৰ অল আচলিপ (২০০৬) আৰু আই এম ডিয়েগো মাৰাডোনা (২০১৫) চলচ্চিত্ৰত কৰা উৎকৃষ্ট অভিনয়ৰ বাবে শ্ৰেষ্ঠ অভিনেত্ৰীৰ ক্ৰিষ্টেল চিমৰ্গ বঁটাৰ মনোনয়ন লাভ কৰিছিল।

প্ৰাৰম্ভিক জীৱন আৰু শিক্ষা

গোলাব আদিনেহৰ জন্ম ১৯৫৩ চনৰ ১৩ নৱেম্বৰত ইৰানৰ তেহৰাণত হৈছিল।^১ তেওঁ ইৰানৰ ৰাষ্ট্ৰীয় বিশ্ববিদ্যালয়ৰ (বৰ্তমান শ্বাহিদ বেহেষ্টী বিশ্ববিদ্যালয়) পৰা ৰাজনৈতিক অৰ্থনীতি বিষয়ত স্নাতক ডিগ্ৰী লাভ কৰিছিল।

কৰ্মজীৱন

আদিনেহে ১৯৭৫ চনত মেহদী হাশেমী আৰু দৰিয়ুছ ফাৰহাঙৰ নেতৃত্বত গঠিত ছাত্ৰ নাট্য গোষ্ঠী "পিয়াদেহ"ৰ সৈতে নিজৰ কলাত্মক কেৰিয়াৰ আৰম্ভ কৰিছিল। তেওঁ কেইবাখনো নাটকত অভিনয় কৰিছিল, যাৰ ভিতৰত এন আনটোল্ড ষ্টৰী, ফেল’ চিটিজেন, মেমৰিজ এণ্ড নাইটমেয়াৰ্ছ অৱ এ ৱাৰ্ডৰোব কিপাৰ ফ্ৰম দ্য লাইফ এণ্ড ডেথ অৱ আমিৰ কাবিৰ, দ্য গ্ৰেট ৱাল অৱ চাইনা, দ্য ককেচিয়ান চক চাৰ্কল, পুফ!! , মেডাম পী পী আৰু ইট ডাজ নট স্নো ইন ইজিপ্ত অন্যতম। ইয়াৰ উপৰি তেওঁ চুলতান স্নেক, ডেথ অৱ য়াজদগৰ্ড, এ নাইট ইন তেহৰাণ আৰু দ্য ভেইল হাউচৰ দৰে প্ৰযোজনাসমূহ পৰিচালনা কৰিছিল।

তেওঁৰ টেলিভিছনৰ কামসমূহৰ পৰিধিৰ ভিতৰত দ্য লেজেণ্ড অৱ দ্য চুলতান এণ্ড দ্য শ্বেপাৰ্ড ধাৰাবাহিকত কৰা অভিনয় আৰু ৫০টা খণ্ডৰ ধাৰাবাহিক চুইটৰ্ছৰ পৰিচালনা অন্যতম। আদিনেহে বিভিন্ন টেলিভিছন প্ৰকল্পৰ বাবে কাষ্টিং ডাইৰেক্টৰ আৰু এক্টিং কচ হিচাপেও কাম কৰিছে। দৰিয়ুছ ফাৰহাং পৰিচালিত ৰাছুল, চন অৱ আবুলঘাছেম নামৰ চুটি ছবিখনত অভিনয় কৰা আৰু স্ক্ৰিপ্ট ছুপাৰভাইজাৰ হিচাপে কাম কৰাটোৱেই আছিল তেওঁৰ প্ৰথম চিনেমাৰ অভিজ্ঞতা।^২

১৯৮৯ চনৰপৰা ১৯৯৮ চনৰ ভিতৰত আদিনেহে আইআৰআইবি (IRIB)ৰ সৈতে জড়িত চিলড্ৰেনছ এণ্ড এডোলেচেণ্টছ আৰ্ট এণ্ড লিটাৰেচাৰ স্কুলকে ধৰি বিভিন্ন বিদ্যালয় আৰু প্ৰতিষ্ঠানত বিভিন্ন বয়সৰ গোটক অভিনয়ৰ শিক্ষা প্ৰদান কৰিছিল। এই সময়ছোৱাত তেওঁ ফ্ৰেণ্ডশ্বিপ ফ্লাৱাৰ, এ বিউটিফুল ডে, মেমৰি আৰু গুড নিউজৰ দৰে নাটক মঞ্চস্থ কৰিছিল।

আদিনেহে বেহৰাম বেইজাইৰ কেইবাখনো নাটক পৰিচালনা কৰিছে, যাৰ ভিতৰত ডেথ অৱ য়াজদগৰ্ড, চুলতান স্নেক আৰু দ্য ভেইল হাউচ অন্তৰ্ভুক্ত।^৩ ১৯৯২ চনত তেওঁ দশম ফাজৰ আন্তৰ্জাতিক থিয়েটাৰ মহোৎসৱৰ বাবে ডেথ অৱ য়াজদগৰ্ড পৰিচালনা কৰিছিল, য’ত ই মুন শ্বেডো (অনুপম আৰ্জমাণ্ডৰদ্বাৰা পৰিচালিত), বিলাভড (হুছেইন নুৰীৰদ্বাৰা ৰচিত আৰু পৰিচালিত), দ্য টেল অৱ দ্য মেজিক ডাউৰী (মহম্মদ চাৰ্মশ্বিৰৰদ্বাৰা ৰচিত আৰু অতিলা পেচিয়ানীৰদ্বাৰা পৰিচালিত) আৰু মাল-কোনুন (মৰিয়ম মোতাৰেফ আৰু ইজ্জৎিল্লাহ মেহৰাভাৰানৰদ্বাৰা ৰচিত আৰু পৰিচালিত) আদি কৰ্মৰাজিৰ সৈতে একেলগে প্ৰদৰ্শিত হৈছিল।^৪৫

২০২২ চনৰ প্ৰতিবাদ

২০২২ চনৰ ৬ ডিচেম্বৰত তেওঁৰদ্বাৰা পৰিচালিত দ্য ভেইল হাউচ নাটকৰ এটা প্ৰদৰ্শনৰ পিছত আদিনেহে বাধ্যতামূলক হিজাব অবিহনে মঞ্চত উপস্থিত হৈছিল আৰু প্ৰেক্ষাগৃহৰ বাহিৰত দৰ্শকৰ সৈতে ফটো তুলিছিল।^৬

বাহ্যিক সংযোগ

• Golab Adineh on Iran Teater
• Golab Adineh on Soure Cinema