গিলিয়ান এণ্ডাৰছন

গিলিয়ান লেই এণ্ডাৰছন (ইংৰাজী ভাষা: Gillian Leigh Anderson; জন্ম: ৯ আগষ্ট, ১৯৬৮)^১ এগৰাকী আমেৰিকান অভিনেত্ৰী। তেওঁৰ উল্লেখযোগ্য কামসমূহৰ ভিতৰত আছে দ্য এক্স-ফাইলছ ধাৰাবাহিকত এফবিআইৰ বিশেষ এজেণ্ট ডানা স্কুলী, টেৰেন্স ডাভিছৰ ছবি দ্য হাউচ অৱ মিৰ্থ (২০০০)-ত লিলি বাৰ্ট, বিবিচি/আৰটিই অপৰাধমূলক ড্ৰামা টেলিভিছন ধাৰাবাহিক দ্য ফল-ত ডিএচইউ ষ্টেলা গিবচন, নেটফ্লিক্সৰ কমেডী-ড্ৰামা ছেক্স এডুকেচন-ত যৌন থেৰাপিষ্ট জিন মিলবাৰ্ন আৰু নেটফ্লিক্সৰ ড্ৰামা ধাৰাবাহিক দ্য ক্ৰাউন-ৰ চতুৰ্থ ছিজনত ব্ৰিটিছ প্ৰধানমন্ত্ৰী মাৰ্গাৰেট থেচাৰৰ চৰিত্ৰ। অন্যান্য সন্মানৰ লগতে তেওঁ দুটাকৈ প্ৰাইমটাইম এমি বঁটা, দুটা গোল্ডেন গ্ল’ব বঁটা আৰু চাৰিটা স্ক্ৰীণ এক্টৰ্ছ গিল্ড বঁটা লাভ কৰিছে। যুক্তৰাজ্য আৰু আমেৰিকা যুক্তৰাষ্ট্ৰৰ মাজত বিভাজিত হৈ থকাৰ পিছত ২০০২ চনৰপৰা তেওঁ লণ্ডনত বসবাস কৰি আহিছে।

চিকাগোত জন্মগ্ৰহণ কৰা এণ্ডাৰছন যুক্তৰাজ্যৰ লণ্ডন আৰু মিছিগানৰ গ্ৰেণ্ড ৰেপিডছত ডাঙৰ-দীঘল হয়। তেওঁ চিকাগোৰ দ্য থিয়েটাৰ স্কুল এট ডিপিঅ’ ইউনিভাৰ্ছিটিৰপৰা স্নাতক ডিগ্ৰী লাভ কৰে আৰু তাৰ পিছত অভিনয় জীৱন আগবঢ়াই নিবলৈ নিউয়ৰ্ক চহৰলৈ যায়। মঞ্চত নিজৰ কেৰিয়াৰ আৰম্ভ কৰাৰ পাছত আমেৰিকান বিজ্ঞান কল্পকাহিনী ধাৰাবাহিক দ্য এক্স-ফাইলছ-ত এফবিআইৰ বিশেষ এজেণ্ট ডানা স্কুলী হিচাপে তেওঁ আন্তঃৰাষ্ট্ৰীয় স্বীকৃতি লাভ কৰে। তেওঁৰ চলচ্চিত্ৰসমূহৰ ভিতৰত আছে ড্ৰামা ছবি দ্য মাইটি চেল্ট (২০০৫), দ্য লাষ্ট কিং অৱ স্কটলেণ্ড (২০০৬), শ্বেড’ ডান্সাৰ (২০১২), ভাইচৰয়ছ হাউচ (২০১৭) আৰু দুখন এক্স-ফাইলছ চলচ্চিত্ৰ: দ্য এক্স-ফাইলছ: ফাইট দ্য ফিউচাৰ (১৯৯৮) আৰু দ্য এক্স-ফাইলছ: আই ৱাণ্ট টু বিলিভ (২০০৮)। অন্যান্য উল্লেখযোগ্য টেলিভিছন ধাৰাবাহিকসমূহৰ ভিতৰত আছে: ব্লীক হাউচ (২০০৫)-ত লেডী ডেডলক, এনি হিউমেন হাৰ্ট (২০১০)-ত ৱালিচ চিম্পছন, গ্ৰেট এক্সপেক্টেচনছ (২০১১)-ত মিছ হাভিছাম, হানিবল (২০১৩–২০১৫)-ত ড° বেডেলিয়া ডু মৰিয়াৰ আৰু আমেৰিকান গডছ (২০১৭)-ত মিডিয়া।

চলচ্চিত্ৰ আৰু টেলিভিছনৰ উপৰি এণ্ডাৰছনে মঞ্চতো অভিনয় কৰিছে আৰু বঁটা তথা সমালোচকৰ প্ৰশংসা লাভ কৰিছে। তেওঁৰ মঞ্চ কাৰ্যৰ ভিতৰত আছে এবচেণ্ট ফ্ৰেণ্ডছ (১৯৯১), যাৰ বাবে তেওঁ শ্ৰেষ্ঠ নবাগতৰ থিয়েটাৰ ৱৰ্ল্ড বঁটা লাভ কৰিছিল; এ ডলছ হাউচ (২০০৯), যাৰ বাবে তেওঁ লৰেন্স অলিভিয়াৰ বঁটাৰ বাবে মনোনীত হৈছিল আৰু এ ষ্ট্ৰীটকাৰ নেমড ডিজায়াৰ (২০১৪, ২০১৬)-ত ব্ল্যাঞ্চ ডুবয়ছৰ চৰিত্ৰত অভিনয় কৰি শ্ৰেষ্ঠ অভিনেত্ৰীৰ ইভিনিং ষ্টেণ্ডাৰ্ড থিয়েটাৰ বঁটা লাভ কৰাৰ লগতে দ্বিতীয়বাৰৰ বাবে লৰেন্স অলিভিয়াৰ বঁটাৰ মনোনয়ন লাভ কৰিছিল। ২০১৯ চনত তেওঁ অল এবাউট ইভ-ৰ মঞ্চ প্ৰযোজনাত মাৰ্গো চেনিঙৰ চৰিত্ৰত অভিনয় কৰি তৃতীয়টো লৰেন্স অলিভিয়াৰ বঁটাৰ মনোনয়ন লাভ কৰে।

এণ্ডাৰছনে অসংখ্য দাতব্য আৰু মানৱতাবাদী সংগঠনক সহায় কৰি আহিছে। তেওঁ নিউৰ’ফাইব্ৰ’মেটোছিছ নেটৱৰ্কৰ এজন সন্মানীয় মুখপাত্ৰ আৰু চাউথ আফ্ৰিকান ইয়ুথ এডুকেচন ফৰ চাষ্টেইনেবিলিটি (SAYes) ৰ সহ-প্ৰতিষ্ঠাপক। অভিনয় জগতলৈ আগবঢ়োৱা অৱদানৰ বাবে তেওঁক ২০১৬ চনত ব্ৰিটিছ সাম্ৰাজ্যৰ এজন সন্মানীয় বিষয়া (OBE) হিচাপে নিযুক্ত কৰা হৈছিল।

প্ৰাৰম্ভিক জীৱন

এণ্ডাৰছনৰ জন্ম হৈছিল ইলিনয়ৰ চিকাগোত। তেওঁৰ মাতৃ ৰোজমেৰী "পোজী" এলিচ (পূৰ্বৰ উপাধি লেন) আছিল এগৰাকী কম্পিউটাৰ এনালিষ্ট^২৩৪ আৰু পৰৱৰ্তী সময়ত পশ্চিম মিছিগানৰ এনএফ সহায়ক গোট 'নিউৰ’ফাইব্ৰ’মেটোছিছ ইনকৰ্পৰেটেড'ৰ উপ-সভাপতি আছিল। তেওঁৰ পিতৃ হোমাৰ এডৱাৰ্ড "এড" এণ্ডাৰছন তৃতীয় এজন চলচ্চিত্ৰ প’ষ্ট-প্ৰডাকচন কোম্পানীৰ গৰাকী আছিল।^৫ তেওঁৰ লালন-পালন বৌদ্ধ ধৰ্মৰদ্বাৰা প্ৰভাবিত বুলি তেওঁ বৰ্ণনা কৰিছে।^৬ তেওঁ ইংৰাজ, জাৰ্মান আৰু আইৰিছ বংশোদ্ভূত।^৭ জন্মৰ কিছুসময়ৰ পাছতেই তেওঁৰ পিতৃ-মাতৃ ১৫ মাহৰ বাবে পুৱেৰ্টো ৰিকলৈ আৰু তাৰ পিছত লণ্ডনলৈ স্থানান্তৰিত হয়। তেওঁৰ পিতৃয়ে লণ্ডন ফিল্ম স্কুলত অধ্যয়ন কৰিব পৰাকৈ পৰিয়ালটো তালৈ উঠি গৈছিল।^৮ পিতৃ-মাতৃৰ সৈতে তেওঁ উত্তৰ লণ্ডনৰ ক্ৰাউচ এণ্ড আৰু হেৰিংগীত বাস কৰিছিল।^৯ তেওঁ কলেৰিজ প্ৰাইমেৰী স্কুলৰ ছাত্ৰী আছিল।^১০ এণ্ডাৰছনৰ ১১ বছৰ বয়সত তেওঁৰ পৰিয়ালটো আমেৰিকা যুক্তৰাষ্ট্ৰলৈ উভতি আহে আৰু মিছিগানৰ গ্ৰেণ্ড ৰেপিডছত বসতি স্থাপন কৰে।^১১ তেওঁলোকে লণ্ডনত এটা ফ্লেট ৰাখিছিল আৰু গ্ৰীষ্মকালবোৰ তাতে অতিবাহিত কৰিছিল।^১২ এণ্ডাৰছনে পিছলৈ কৈছিল যে তেওঁ সদায় ইংলেণ্ডলৈ উভতি যোৱাৰ ইচ্ছা কৰিছিল।^১৩ গ্ৰেণ্ড ৰেপিডছত তেওঁ ফাউণ্টেন এলিমেণ্টৰী আৰু চিটি হাই-মিডল স্কুলত অধ্যয়ন কৰিছিল, যিটো আছিল মেধাৱী শিক্ষাৰ্থীৰ বাবে মানৱীয়তাৰ ওপৰত গুৰুত্ব দিয়া এক বিশেষ কাৰ্যসূচী।^১৪

আমি এখন সৰু ৰিপাব্লিকান চহৰত আছিলোঁ। তাত মাত্ৰ ছজনমানহে পাংক (punks) আছিল। আমি অদ্ভুত আছিলোঁ। ই লণ্ডনৰ দৰে নাছিল।
— —গ্ৰেণ্ড ৰেপিডছত কটোৱা কিশোৰী কালৰ বিষয়ে এণ্ডাৰছন^৬

গ্ৰেণ্ড ৰেপিডছলৈ স্থানান্তৰিত হোৱাৰ পিছত এণ্ডাৰছন এক বিদ্ৰোহী পৰ্যায়ৰ মাজেৰে পাৰ হৈছিল; ড্ৰাগছ লোৱা, নিজতকৈ বহুত ডাঙৰ ল’ৰাৰ সৈতে ডেটিং কৰা আৰু এক পাংক ৰূপ ধাৰণ কৰা (চুলিৰ ৰং সলনি কৰা, মূৰৰ কাষৰ চুলি খুৰাই পেলোৱা, নাকত বিন্ধা কৰা আৰু সম্পূৰ্ণ ক’লা সাজ-পাৰ পিন্ধা)।^{১২১৪১৫} ১৪ বছৰ বয়সত তেওঁক মনোচিকিৎসাৰ (psychotherapy) সহায় ল'বলৈ দিয়া হৈছিল।^৬ এণ্ডাৰছনে 'ডেড কেনেডিজ' আৰু 'স্কিনি পাপি'ৰ দৰে বেণ্ডৰ গান শুনিছিল। সহপাঠীসকলে তেওঁক "ক্লাছ ক্লাউন", "সবাতোকৈ আচৰিত ছোৱালী" আৰু "গ্ৰেপ্তাৰ হোৱাৰ সৰ্বাধিক সম্ভাৱনা থকা" বুলি নিৰ্বাচিত কৰিছিল। স্নাতক নিশা তেওঁৰ উচ্চতৰ মাধ্যমিক বিদ্যালয়ৰ দুৱাৰৰ তলাবোৰ আঠা লগাই দিবলৈ বিদ্যালয়ৰ ভিতৰত সোমোৱাৰ অপৰাধত তেওঁক গ্ৰেপ্তাৰ কৰা হৈছিল।^১৬ পিছলৈ তেওঁ এই অভিযোগবোৰ হ্ৰাস কৰি কেৱল আনৰ ভূমিত অনধিকাৰ প্ৰৱেশৰ (trespassing) অভিযোগলৈ সলনি কৰিবলৈ সক্ষম হয়।^১৭

সৰু কালত এণ্ডাৰছন সাগৰীয় জীৱবিজ্ঞানৰ প্ৰতি আগ্ৰহী আছিল, কিন্তু কিশোৰ অৱস্থাত থিয়েটাৰৰ প্ৰতি আগ্ৰহী হোৱাৰ পিছত তেওঁ উচ্চতৰ মাধ্যমিকৰ প্ৰথম বৰ্ষৰপৰাই অভিনয় আৰম্ভ কৰে আৰু পিছলৈ কমিউনিটি থিয়েটাৰত অংশ লয়।^১৪ তেওঁ গ্ৰেণ্ড ৰেপিডছ চিভিক থিয়েটাৰ এণ্ড স্কুল অৱ থিয়েটাৰ আৰ্টছত ছাত্ৰী ইনটাৰ্ণ হিচাপেও কাম কৰিছিল।^১৮

বাহ্যিক সংযোগ

• Gillian Anderson at Emmys.com