কিম কাৰ্ডাশ্বিয়ান

কিম্বাৰ্লি নোয়েল কাৰ্ডাশ্বিয়ান (জন্ম অক্টোবৰ ২১, ১৯৮০) এগৰাকী আমেৰিকান মিডিয়া ব্যক্তিত্ব, সোচিয়েলাইট আৰু ব্যৱসায়িনী। ২০০৭ চনত আমেৰিকান গায়ক ৰে জে'ৰ সৈতে তেওঁৰ এটা যৌন ভিডিঅ' অননুমোদিতভাৱে প্ৰকাশ পোৱাৰ পিছত তেওঁ প্ৰথমে গণমাধ্যমৰ দৃষ্টি আকৰ্ষণ কৰে। তাৰ পিছত তেওঁ আৰু তেওঁৰ পৰিয়াল ই! চেনেলৰ ৰিয়েলিটি টেলিভিছন ধাৰাবাহিক কিপিং আপ উইথ দ্য কাৰ্ডাশ্বিয়ানছত অভিনয় আৰম্ভ কৰে। অনুষ্ঠানটো ২০২১ চনলৈ প্ৰচাৰিত হৈছিল আৰু ইয়াৰ সফলতাৰ ফলত কেইবাটাও স্পিন-অফ আৰু উত্তৰসূৰী অনুষ্ঠান হুলুৰ দ্য কাৰ্ডাশ্বিয়ানছ (২০২২–বৰ্তমান) নিৰ্মাণ হয়।

কাৰ্ডাশ্বিয়ানে ২০১৭ চনত কেকেডব্লিউ বিউটি আৰু কেকেডব্লিউ ফ্ৰেগ্ৰেন্স প্ৰতিষ্ঠা কৰে, যিবোৰ ২০২২ চনলৈ চলিছিল; ২০২১ চনত কেকেডব্লিউ বিউটিৰ মূল্যায়ন ১ বিলিয়ন আমেৰিকান ডলাৰৰ অধিক হৈছিল।^১২ তেওঁ ২০১৯ চনত শেপিং অন্তৰ্বাস আৰু ফাউণ্ডেশন গাৰ্মেণ্ট কোম্পানী স্কিমছ প্ৰতিষ্ঠা কৰে, যাৰ মূল্যায়ন ২০২৩ চনলৈ ৪ বিলিয়ন আমেৰিকান ডলাৰৰ অধিক। তেওঁ ২০২২ চনত নিজৰ স্কিনকেয়াৰ শৃংখলা ‘এসকেকেএন বাই কিম’ আৰম্ভ কৰে।^৩ তেওঁৰ নামৰ সৈতে সম্পৰ্কিত বিভিন্ন সামগ্ৰী প্ৰকাশ পায়, ইয়াৰ ভিতৰত আছে ২০১৪ চনৰ মোবাইল গেম কিম কাৰ্ডাশ্বিয়ান: হলিউড, ২০১৫ চনৰ ফটো গ্ৰন্থ ছেলফিশ, আৰু ২০১৫ চনৰ ইমোজি এপ ‘কিমোজি’। তেওঁৰ অভিনয় কৰ্মৰ ভিতৰত আছে চলচ্চিত্ৰ ডিজাষ্টাৰ মুভি (২০০৮), টেম্পটেচন: কনফেছনছ অৱ এ মেৰেজ কাউন্সেলৰ (২০১৩), দুটা প' পেট্ৰ’ল চলচ্চিত্ৰ (২০২১ আৰু ২০২৩), সংকলনভিত্তিক ভৌতিক ধাৰাবাহিক আমেৰিকান হৰ’ৰ ষ্ট’ৰিৰ দ্বাদশ ছিজন (২০২৩–২০২৪), আৰু আইনী নাট্য ধাৰাবাহিক অল’ছ ফেয়াৰ (২০২৫–বৰ্তমান)।

টাইম আলোচনীত ২০১৫ চনত তেওঁক পৃথিৱীৰ ১০০ জন প্ৰভাৱশালী ব্যক্তিৰ তালিকাত অন্তৰ্ভুক্ত কৰা হয়।^৪ ২০২৩ চনত ফৰ্চুন আলোচনীয়ে তেওঁক বিশ্বৰ আটাইতকৈ শক্তিশালী মহিলাসকলৰ ভিতৰত এজনী হিচাপে স্বীকৃতি দিয়ে।^৫ অনলাইনত গুৰুত্বপূৰ্ণ উপস্থিতি আৰু সামাজিক মাধ্যমসমূহত বৃহৎ অনুসৰণকাৰী থকাৰ বাবে তেওঁ ইনষ্টাগ্ৰামত অষ্টম-সৰ্বাধিক অনুসৰণকাৰী ব্যক্তি আৰু টুইটাৰত ত্ৰয়োদশ-সৰ্বাধিক অনুসৰণকাৰী ব্যক্তি হিচাপে পৰিগণিত।^৬৭৮ সমালোচক আৰু সমৰ্থক দুয়োপক্ষই তেওঁক ‘কেৱল বিখ্যাত হোৱাৰ বাবেই বিখ্যাত’ ধাৰণাৰ উদাহৰণ হিচাপে বৰ্ণনা কৰিছে।^৯ ২০২১ চনত তেওঁ কোটিপতিৰ মৰ্যাদা লাভ কৰে,^১০ আৰু ২০২৫ চনৰ মে' মাহলৈ ফৰ্বছৰ মতে তেওঁৰ সম্পত্তিৰ মূল্য প্ৰায় ১.৭ বিলিয়ন আমেৰিকান ডলাৰ। কাৰ্ডাশ্বিয়ানে কাৰাগাৰ সংস্কাৰ আৰু দণ্ডমুক্তিৰ পক্ষে ল’বিং কৰি ৰাজনৈতিকভাৱে অধিক সক্ৰিয় ভূমিকা গ্ৰহণ কৰিছে,^১১ আৰু ২০২৫ চনত তেওঁ চাৰিবছৰীয়া আইন শিক্ষানবিছ কাৰ্যসূচী সম্পূৰ্ণ কৰে, যাৰ জৰিয়তে তেওঁ কেলিফৰ্ণিয়া বাৰ পৰীক্ষাত বহিবলৈ যোগ্য হয়, যদিও তেওঁ সেই পৰীক্ষাত উত্তীৰ্ণ নহ’ল।^১২

প্ৰাৰম্ভিক জীৱন আৰু পৰিয়াল

কিম্বাৰ্লি নোৱেল কাৰ্ডাশ্বিয়ান জন্মগ্ৰহণ কৰে ২১ অক্টোবৰ, ১৯৮০ চনত, আমেৰিকাৰ লছ এঞ্জেলিছ, কেলিফৰ্ণিয়াত, ৰবাৰ্ট কাৰ্ডাশ্বিয়ান আৰু ক্ৰিছ কাৰ্ডাশ্বিয়ান (জন্ম-সূত্ৰে হটন)ৰ ঘৰত।^১৩

তেওঁৰ ডাঙৰ ভনী কোৰ্টনি কাৰ্ডাশ্বিয়ান, সৰু ভনী খ্লোৱে কাৰ্ডাশ্বিয়ান আৰু সৰু ভাতৃ ৰব কাৰ্ডাশ্বিয়ান।^১৪

তেওঁৰ মাতৃ স্কটিছ আৰু ডাচ বংশোদ্ভূত,^১৫১৬ আনহাতে পিতৃ আৰ্মেনিয়ান বংশোদ্ভূত আছিল।^১৭

১৯৯১ চনত তেওঁৰ পিতৃ-মাতৃয়ে বিবাহ বিচ্ছেদ কৰে আৰু পাছত তেওঁৰ মাতৃয়ে ১৯৭৬ চনৰ অলিম্পিক ডেকাথলন স্বৰ্ণজয়ী কেটলিন জেনাৰ (তেতিয়া ব্ৰুচ জেনাৰ নামে জনাজাত)ক বিবাহ কৰে।^১৮ ২০১৫ চনত জেনাৰে লিংগ পৰিৱৰ্তনৰ পিছত নিজৰ নাম সলনি কৰে।^১৯

এই পুনৰ্বিবাহৰ ফলত কিমে সৎ ভাতৃ বাৰ্ট জেনাৰ, ব্ৰেণ্ডন জেনাৰ আৰু ব্ৰোডি জেনাৰ; সৎ ভনী কেচী; লগতে অৰ্ধ-ভনী কেণ্ডাল জেনাৰ আৰু কাইলি জেনাৰ লাভ কৰে।^২০

কাৰ্ডাশ্বিয়ানে লছ এঞ্জেলিছৰ মেৰিমাউণ্ট হাই স্কুল নামৰ এখন কেথলিক ছোৱালী বিদ্যালয়ত অধ্যয়ন কৰে।^২১

১৯৯৪ চনত তেওঁৰ পিতৃয়ে ফুটবল খেলুৱৈ অ’ জে সিম্পছনৰ হত্যাকাণ্ডৰ গোচৰত আইনজীৱী হিচাপে প্ৰতিনিধিত্ব কৰে।^২২ সিম্পছন কিমৰ গডফাদাৰ আছিল।

২০০৩ চনত তেওঁৰ পিতৃ কেঞ্চাৰত আক্ৰান্ত হৈ মৃত্যুবৰণ কৰে।^২৩

কিশোৰী অৱস্থাত কিমে নিকোল ৰিচি আৰু পেৰিছ হিল্টনৰ সৈতে ঘনিষ্ঠ বন্ধুত্ব গঢ়ে।^৬২৪

১৬ বছৰ বয়সত গাড়ী দুৰ্ঘটনাৰ পিছত তেওঁ নিজৰ খৰচ নিজে বহন কৰাৰ চৰ্তে নতুন গাড়ী লাভ কৰে।^২৫

তাৰ পিছত তেওঁ এনচিনো অঞ্চলৰ “বডি” নামৰ এখন কাপোৰৰ দোকানত কাম আৰম্ভ কৰে আৰু প্ৰায় চাৰি বছৰ ধৰি কাম কৰে। পাছত তেওঁ কেলাবাছাছ শাখা মুকলি কৰাত সহায় কৰে। ২০০০ চনত প্ৰথম বিবাহৰ পিছত তেওঁ সেই চাকৰি এৰি দিয়ে।^২৬