এলি ফেনিং

মেৰী এলি ফেনিং (ইংৰাজী ভাষা: Mary Elle Fanning; জন্ম: ৯ এপ্ৰিল, ১৯৯৮) এগৰাকী আমেৰিকা যুক্তৰাষ্ট্ৰন অভিনেত্ৰী। তেওঁ লাভ কৰা সন্মানসমূহৰ ভিতৰত এটা একাডেমী বঁটা (অস্কাৰ), এটা প্ৰাইমটাইম এমি বঁটা আৰু চাৰিটা গোল্ডেন গ্ল’ব বঁটাৰ মনোনয়ন অন্যতম।

ফেনিংয়ে মাত্ৰ তিনি বছৰ বয়সতে আই এম ছেম (২০০১) ছবিত নিজৰ ভগ্নী ডাকোটা ফেনিংৰ চৰিত্ৰটোৰ সৰু কালৰ সংস্কৰণটো ৰূপায়ণ কৰি চলচ্চিত্ৰ জগতত আত্মপ্ৰকাশ কৰিছিল। এগৰাকী প্ৰতিভাশালী শিশু শিল্পী হিচাপে তেওঁ ডেডী ডে কেয়াৰ (২০০৩), বেবেল (২০০৬), দা কিউৰিয়াচ কেছ অৱ বেঞ্জামিন বুটাম আৰু ফীব ইন ৱাণ্ডাৰলেণ্ড (দুয়োখন ২০০৮ চনৰ) আদি ছবিত অভিনয় কৰিছিল। ছফিয়া কপ’লাৰ ড্ৰামা ছবি চামহুৱেৰ (২০১০), জে জে আব্ৰামছৰ বিজ্ঞানভিত্তিক ছবি ছুপাৰ ৮ (২০১১) আৰু চেলী পটাৰৰ জিংজাৰ এণ্ড ৰোজাত (২০১২) কৰা মূল চৰিত্ৰৰ অভিনয়ৰ বাবে তেওঁ বিশেষ স্বীকৃতি লাভ কৰে। ডিজনীৰ ফেণ্টাচী ছবি মেলেফিচেণ্টত (২০১৪) ৰাজকুমাৰী অৰোৰাৰ চৰিত্ৰত অভিনয় কৰি তেওঁ আন্তঃৰাষ্ট্ৰীয় পৰ্যায়ত চৰ্চালৈ আহে।

এগৰাকী প্ৰাপ্তবয়স্ক অভিনেত্ৰী হিচাপে ফেনিংৰ কেৰিয়াৰে নিকোলাছ ৱাইণ্ডিং ৰেফনৰ দা নিয়ন ডমন (২০১৬), মাইক মিলছৰ ২০ চেঞ্চুৰী উইমেন (২০১৬), ছফিয়া কপ’লাৰ দা বিগোাইল্ড (২০১৭) আৰু জোয়াচিম ট্ৰিয়াৰৰ চেণ্টিমেণ্টেল ভেলু (২০২৫) আদি প্ৰশংসিত স্বতন্ত্ৰ ছবিত কৰা অভিনয়ৰ জৰিয়তে উন্নতি লাভ কৰে; শেষৰখন ছবিৰ বাবে তেওঁ শ্ৰেষ্ঠ সহকাৰী অভিনেত্ৰীৰ একাডেমী বঁটাৰ মনোনয়ন লাভ কৰে। তেওঁ ইয়াৰ পিছত পুনৰ মূলসুঁতিৰ ছবি যেনে ইয়াৰ চিকুৱেল মেলেফিচেণ্ট: মিষ্ট্ৰেছ অৱ ইভিল (২০১৯), জেমছ মেনগোল্ডৰ এ কমপ্লিট আননোন (২০২৪) আৰু ডেন ট্ৰাকটেনবাৰ্গৰ প্ৰেডেটৰ: বেডলেণ্ডছলৈ (২০২৫) ঘূৰি আহে।

টেলিভিছনৰ ক্ষেত্ৰত তেওঁ ব্যংগাত্মক ঐতিহাসিক ধাৰাবাহিক দা গ্ৰেটত (২০২০–২০২৩) কেথেৰিন দা গ্ৰেটৰ চৰিত্ৰত আৰু মিনি ছিৰিজ দা গাৰ্ল ফ্ৰম প্লেইনভিলত (২০২২) মিচেল কাৰ্টাৰৰ চৰিত্ৰত অভিনয় কৰিছিল। দা গ্ৰেটত কৰা অভিনয়ৰ বাবে তেওঁ কমেডী ছিৰিজৰ শ্ৰেষ্ঠ মূল অভিনেত্ৰীৰ প্ৰাইমটাইম এমি বঁটাৰ মনোনয়ন লাভ কৰে। মঞ্চ জগতত তেওঁ ব্ৰেণ্ডেন জেকবছ-জেনকিন্সৰ নাটক এপ্ৰপ্ৰিয়েটৰ (২০২৪) জৰিয়তে ব্ৰডৱেত অভিষেক ঘটায়।

প্ৰাৰম্ভিক জীৱন

মেৰী এলি ফেনিংৰ জন্ম ১৯৯৮ চনৰ ৯ এপ্ৰিলত আটলাণ্টাৰ উপকণ্ঠ অঞ্চল জৰ্জিয়াৰ কনয়াৰ্ছত হৈছিল।^১ তেওঁৰ মাতৃৰ নাম হেদাৰ জয় (পূৰ্বৰ উপাধি এৰিংটন) আৰু পিতৃ ষ্টিভেন জে. ফেনিং, যিয়ে ছেইণ্ট লুইছ কাৰ্ডিনেলছৰ সৈতে জড়িত মাইনৰ লীগ বেছবল দলৰ হৈ খেলিছিল।^২৩

তেওঁৰ মাতামহ (ককাদেউতা) আছিল আমেৰিকান ফুটবলাৰ ৰিক এৰিংটন আৰু পেহী/মাহী আছিল ইএচপিএন (ESPN) ৰিপৰ্টাৰ জিল এৰিংটন।^৪ এৰিংটন পৰিয়ালৰ উল্লেখযোগ্য পূৰ্বপুৰুষসকলৰ ভিতৰত আছিল নীল খেতিয়ক উইলিয়াম ফাৰাৰ।^৫ তেওঁৰ পিতাকৰফালৰ আইতাক এগৰাকী জাৰ্মান প্ৰব্ৰজনকাৰী আছিল।^৬ ফেনিং অভিনেত্ৰী ডাকোটা ফেনিংৰ সৰু ভগ্নী।^৭৮ পৰিয়ালৰ পৰম্পৰা অনুসৰি এলি আৰু তেওঁৰ ভগ্নীয়ে তেওঁলোকৰ মাজৰ নামটো (Middle name) প্ৰথম নাম হিচাপে ব্যৱহাৰ কৰে।^৯ তেওঁলোক চাউদাৰ্ণ বেপ্টিষ্ট শাখাৰ বিশ্বাসৰ মাজত ডাঙৰ-দীঘল হৈছিল।^১০

ফেনিংয়ে ২০১৬ চনত কেম্পবেল হল স্কুলৰপৰা স্কুলীয়া শিক্ষা সমাপ্ত কৰে।^১১

কেৰিয়াৰ

২০০১–২০১৩: শিশু শিল্পী আৰু সফলতা

ফেনিংয়ে মাত্ৰ ৩ বছৰ বয়সতে তেওঁৰ ভগ্নী ডাকোটাৰ চৰিত্ৰবোৰৰ সৰু কালৰ সংস্কৰণ হিচাপে মিনি ছিৰিজ টেকেন আৰু চলচ্চিত্ৰ আই এম ছেমত অভিনয় কৰি নিজৰ অভিনয় জীৱন আৰম্ভ কৰিছিল।^১২ ২০০২ চনত ৪ বছৰ বয়সত তেওঁ ভগ্নীৰ সহায় নোহোৱাকৈয়ে স্বতন্ত্ৰভাৱে কমেডী ছবি ডেডী ডে কেয়াৰত অভিনয়ৰ সুযোগ পায়। ইয়াৰ পিছত তেওঁ জেফ ব্ৰিজেছ আৰু কিম বেছিংগাৰৰ বিপৰীতে দা ড’ৰ ইন দা ফ্ল’ৰ (২০০৪) ছবিত ৰুথ চৰিত্ৰটোৰ বাবে নিৰ্বাচিত হয়। ছবিখনৰ নিৰ্মাতাসকলে প্ৰথমে কামৰ ব্যস্ততাৰ বাবে যমজ সন্তান নিয়োগ কৰাৰ পৰিকল্পনা কৰিছিল, কিন্তু ফেনিংৰ অভিনয়ত ইমান মুগ্ধ হৈছিল যে কেৱল তেওঁকেই লৈছিল।^১৩ ২০০৩ চনৰ শেষৰফালে ফেনিংয়ে বিকজ অৱ উইন-ডিক্সি ছবিত চুইটী পাই থমাছ নামৰ এটা সৰু চৰিত্ৰত অভিনয় কৰে। ২০০৪ চনত হায়াও মিয়াজাকিৰ এনিমেটেড ছবি মাই নেইবাৰ টোটোৰোৰ ইংৰাজী সংস্কৰণত তেওঁ মেই চৰিত্ৰটোৰ বাবে কণ্ঠদান কৰিছিল।

২০০৫ চনৰ আৰম্ভণিতে ফেনিংয়ে চাৰ্লটছ ৱেবত ডাকোটাৰদ্বাৰা অভিনীত ফাৰ্ণ এৰাবলৰ "ভৱিষ্যতৰ নাতিনী" হিচাপে কিছু দৃশ্যত অভিনয় কৰিছিল। অৱশ্যে সেই দৃশ্যবোৰ মূল ছবিত ৰখা হোৱা নাছিল। ২০০৫ চনৰ মাজভাগত তেওঁ বেবেল ছবিত ব্ৰেড পিট আৰু কেট ব্লাঞ্চেটৰ চৰিত্ৰৰ জীয়ৰী ডেবিৰ ভূমিকাত অভিনয় কৰে। ২০০৬ চনৰ আৰম্ভণিতে তেওঁ দা নাইনছ আৰু ডেজা ভূত অভিনয় কৰে। সেই বছৰতে তেওঁ বিজ্ঞানভিত্তিক টিভি মিনি ছিৰিজ দা লষ্ট ৰুম আৰু জনপ্ৰিয় ধাৰাবাহিক হাউচৰ এটা খণ্ডত অভিনয় কৰে। ২০০৬ চনৰ শেষৰফালৰপৰা ফেনিংয়ে মূল চৰিত্ৰৰ বাবে আমন্ত্ৰণ লাভ কৰিবলৈ আৰম্ভ কৰে। ইয়াৰ ভিতৰত প্ৰথমখন আছিল ৰিজাৰ্ভেচন ৰোড, য’ত তেওঁ এমা লাৰ্নাৰ নামৰ চৰিত্ৰটো ৰূপায়ণ কৰিছিল।

২০০৭ চনত তেওঁ পুনৰ ব্ৰেড পিট আৰু কেট ব্লাঞ্চেটৰ সৈতে দা কিউৰিয়াচ কেছ অৱ বেঞ্জামিন বুটাম ছবিত ব্লাঞ্চেটৰ চৰিত্ৰটোৰ সৰু কালৰ ভূমিকাটোত অভিনয় কৰে। সেই বছৰতে তেওঁ ফীব ইন ৱাণ্ডাৰলেণ্ডত নাম ভূমিকাত অভিনয় কৰে, যিখন ২০০৯ চনত মুক্তি পাইছিল। ইয়াৰ পিছত তেওঁ দা নাটক্ৰেকাৰ ইন ৩ডিত মেৰীৰ চৰিত্ৰত অভিনয় কৰে।

২০০৯ চনৰ এপ্ৰিল মাহত ভেৰাইটিয়ে প্ৰকাশ কৰিছিল যে ফেনিংয়ে চিত্ৰনাট্যকাৰ ছফিয়া কপ’লাৰ ২০১০ চনৰ ছবি চামহুৱেৰত অভিনয় কৰিব। ছবিখনৰ কাহিনী এজন "বেয়া ল'ৰা" সুলভ অভিনেতাৰ জীৱনক কেন্দ্ৰ কৰি গঢ়ি উঠিছে, যিয়ে নিজৰ জীৱনক পুনৰ মূল্যায়ন কৰিবলৈ বাধ্য হয় যেতিয়া তেওঁৰ জীয়ৰী (ফেনিং) হঠাত তেওঁৰ ওচৰলৈ আহে।^১৪ ছবিখন ২০১০ চনৰ বঁটা বিতৰণী ছিজনৰ সময়ত মুক্তি দিয়া হৈছিল। ইয়াৰ প্ৰথম চলচ্চিত্ৰ মহোৎসৱ ৬৭ সংখ্যক ভেনিছ চলচ্চিত্ৰ মহোৎসৱত ছবিখনে 'গোল্ডেন লায়ন' বঁটা লাভ কৰে।^১৫ ২০১০ চনৰ শেষৰ ফালে ফেনিংয়ে ফ্ৰান্সিছ ফৰ্ড কপ’লাৰ ২০১১ চনৰ ছবি টুইক্সটত কাম আৰম্ভ কৰে। ইয়াত তেওঁ "ভি" নামৰ এজন কিশোৰী ভূতৰ চৰিত্ৰত অভিনয় কৰিছিল। ২০১১ চনত ফেনিংয়ে জে জে আব্ৰামছৰ বিজ্ঞানভিত্তিক ড্ৰামা ছবি ছুপাৰ ৮ত এলিচ ডেইনাৰ্ড হিচাপে অভিনয় কৰে। ২০১১ চনৰ ১০ জুনত মুক্তি পোৱা এই ছবিখন এটা সৰু চহৰত ঘটা কিছুমান অদ্ভুত ঘটনাক কেন্দ্ৰ কৰি নিৰ্মিত।^১৬ দা ডেইলি টেলিগ্ৰাফে ফেনিংক ছবিখনৰ অন্যতম শ্ৰেষ্ঠ দিশ বুলি উল্লেখ কৰিছিল আৰু তেওঁ হলিউড ফিল্ম ফেষ্টিভেলত 'স্পটলাইট বঁটা' লাভ কৰিছিল।^১৭১৮

২০১১ চনৰ ডিচেম্বৰত ফেনিংয়ে কেমেৰুন ক্ৰ'ৰ ছবি উই বট এ জুত অভিনয় কৰে।^১৯ ইয়াত তেওঁ লিলি নামৰ এগৰাকী ১৩ বছৰীয়া ছোৱালীৰ চৰিত্ৰত অভিনয় কৰিছিল। ২০১২ চনৰ ছেপ্টেম্বৰত ফেনিংয়ে এলিচ ইংগ্লাৰ্টৰ সৈতে লণ্ডনত ১৯৬২ চনৰ পটভূমিত নিৰ্মিত ড্ৰামা ছবি জিংজাৰ এণ্ড ৰোজাত জিংজাৰ হিচাপে অভিনয় কৰে। চেলী পটাৰৰ দ্বাৰা পৰিচালিত ছবিখন ২০১২ চনৰ ১৯ অক্টোবৰত মুক্তি পাইছিল।^২০ ফেনিংয়ে তেওঁৰ অভিনয়ৰ বাবে ব্যাপক প্ৰশংসা লাভ কৰিছিল; দা নিউয়ৰ্ক টাইমছৰ এ. অ'. স্কটে লিখিছিল যে তেওঁ ছবিখনত স্থিৰতা, গভীৰতা আৰু কাৰিকৰী নিখুঁততাৰ এক বিৰল মিশ্ৰণ দেখুৱাইছে।^২১ দা বষ্টন গ্ল'বৰ চলচ্চিত্ৰ সমালোচক টাই বাৰে তেওঁৰ অভিনয়ৰ মাজত থকা প্ৰাকৃতিকতাক প্ৰশংসা কৰি কয় যে ফেনিংয়ে জিংজাৰৰ আৱেগিক বাস্তৱতাক অতি সহজে ফুটাই তুলিছে।^২২

২০১৪–২০১৯: আন্তঃৰাষ্ট্ৰীয় স্বীকৃতি

ফেনিংয়ে ২০১৪ চনত ৰবাৰ্ট ষ্ট্ৰমবাৰ্গৰ পৰিচালনাত নিৰ্মিত ৱাল্ট ডিজনীৰ ছবি মেলেফিচেণ্টত এঞ্জেলিনা জোলিৰ সৈতে অভিনয় কৰিছিল। জোলিয়ে মেলেফিচেণ্টৰ চৰিত্ৰত অভিনয় কৰাৰ বিপৰীতে ফেনিংয়ে ৰাজকুমাৰী অৰোৰা (শ্লিপিং বিউটি) হিচাপে অভিনয় কৰিছিল।^২৩ একে বছৰতে তেওঁ স্বতন্ত্ৰ বিজ্ঞানভিত্তিক ছবি য়ং ৱানছত অভিনয় কৰাৰ লগতে জেজ পিয়ানোবাদক জো আলবানীৰ জীৱনীভিত্তিক ছবি লো ডাউনত আলবানীৰ জীয়ৰী এমি-জোৰ চৰিত্ৰত অভিনয় কৰে। ২০১৫ চনত ফেনিংয়ে জে ৰোচৰ ছবি ট্ৰাম্বোত ডাল্টন ট্ৰাম্বোৰ (ব্ৰায়ান ক্ৰেনষ্টন) জীয়ৰী নিকোলা হিচাপে আৰু ৩ জেনেৰেচনছ নামৰ ছবিখনত নাওমি ৱাটছ আৰু চুজান চেৰাণ্ডনৰ সৈতে অভিনয় কৰে, য’ত তেওঁ এজন যুৱ ট্ৰান্সজেণ্ডাৰ মানুহৰ চৰিত্ৰ ৰূপায়ণ কৰিছিল।

২০১৬ চনত তেওঁ নিকোলাছ ৱাইণ্ডিং ৰেফনৰ চাইক’লজিকেল থ্ৰিলাৰ ছবি দা নিয়ন ডমনত জেচিৰ চৰিত্ৰত অভিনয় কৰে।^২৪ ছবিখনৰ ২০১৬ চনৰ মে' মাহত কান চলচ্চিত্ৰ মহোৎসৱত প্ৰিমিয়াৰ হৈছিল।^২৫ সেই একে বছৰতে তেওঁ মাইক মিলছৰ ছবি ২০ চেঞ্চুৰী উইমেনত গ্ৰেটা গাৰউইগ আৰু এনেট বেনিংৰ বিপৰীতে অভিনয় কৰে।^২৬ ইয়াৰ পিছত তেওঁ বেন এফ্লেকৰ ড্ৰামা ছবি লাইভ বাই নাইটত অভিনয় কৰে, যিখন ২০১৬ চনৰ ২৫ ডিচেম্বৰত মুক্তি পাইছিল।^২৭

২০১৭ চনত ফেনিংয়ে শ্বন ক্ৰিষ্টেনচেনৰ ড্ৰামা ছবি দা ভেনিছিং অৱ চিডনী হলত অভিনয় কৰে, যাৰ প্ৰিমিয়াৰ ২৫ জানুৱাৰীত ২০১৭ চনৰ চানডেন্স চলচ্চিত্ৰ মহোৎসৱত হৈছিল।^২৮

২০২০–বৰ্তমান: কেৰিয়াৰৰ সম্প্ৰসাৰণ

২০২০ চনত ফেনিংয়ে জেনিফাৰ নিভেনৰ একে নামৰ উপন্যাসৰ আধাৰত নিৰ্মিত আৰু ব্ৰেট হেলিৰ দ্বাৰা পৰিচালিত ছবি অল দা ব্ৰাইট প্লেচেছত জাষ্টিচ স্মিথৰ বিপৰীতে অভিনয় কৰে।^২৯ সেই একে বছৰতে তেওঁ চেলী পটাৰৰ ড্ৰামা ছবি দা ৰোডছ নট টেকেনতো অভিনয় কৰিছিল। ২০২০ চনত তেওঁ ঐতিহাসিক কমেডী ধাৰাবাহিক দা গ্ৰেটত কেথেৰিন দা গ্ৰেটৰ চৰিত্ৰত অভিনয় কৰাৰ লগতে ইয়াৰ কাৰ্যবাহী প্ৰযোজকৰ দায়িত্বও পালন কৰে। এই ধাৰাবাহিকখন ২০২০ চনৰ মে' মাহত হুলুত মুক্তি পাইছিল।^৩০ এই চৰিত্ৰটোৰ বাবে তেওঁ সমালোচকৰ উচ্চ প্ৰশংসা লাভ কৰে আৰু ২০২১ চনৰ গোল্ডেন গ্ল’ব বঁটাৰ শ্ৰেষ্ঠ অভিনেত্ৰীৰ (টেলিভিছন ছিৰিজ) মনোনয়ন লাভ কৰে।^৩১ ইয়াৰ উপৰিও তেওঁ প্ৰথমবাৰৰ বাবে প্ৰাইমটাইম এমি বঁটাৰ মনোনয়নো লাভ কৰিবলৈ সক্ষম হয়।

২০২২ চনত তেওঁ হুলুৰ মিনি ছিৰিজ দা গাৰ্ল ফ্ৰম প্লেইনভিলত মিচেল কাৰ্টাৰৰ চৰিত্ৰত অভিনয় কৰে।^৩২ ২০২৩ চনৰ ডিচেম্বৰ মাহত তেওঁ ব্ৰেণ্ডেন জেকবছ-জেনকিন্সৰ নাটক এপ্ৰপ্ৰিয়েটৰ জৰিয়তে আনুষ্ঠানিকভাৱে ব্ৰডৱেত আত্মপ্ৰকাশ কৰে।^৩৩ ফেনিং আৰু তেওঁৰ ভগ্নী ডাকোটাই মিলি 'লিৱেলিন পিকচাৰ্ছ' নামৰ এটা প্ৰযোজনা সংস্থা আৰম্ভ কৰে।

ব্যক্তিগত জীৱন

২০১৮ চনৰপৰা ২০২৩ চনলৈকে ফেনিং অভিনেতা মেক্স মিংঘেলাৰ সৈতে সম্পৰ্কত আছিল।^৩৪

২০২৩ চনৰ শেষৰফালৰপৰা তেওঁ ৰোলিং ষ্টোনৰ মুখ্য কাৰ্যবাহী বিষয়া গ্ৰাছ ৱেনাৰৰ সৈতে সম্পৰ্কত আছে।^৩৫ ২০২৪ চনৰ জানুৱাৰী মাহত গোল্ডেন গ্ল’ব বঁটা প্ৰদান অনুষ্ঠানত তেওঁলোকে একেলগে প্ৰথমবাৰৰ বাবে ৰেড কাৰ্পেটত ভূমুকি মাৰিছিল। ইয়াৰ পিছত তেওঁলোকক মেট গালা আৰু বিভিন্ন ব্যক্তিগত অনুষ্ঠানত একেলগে দেখা গৈছে।^৩৬৩৭