এলিছ মান

এলিছ মান (জন্মনাম: বাৰ্নেট; ১৭৯১–১৮৬৫) লিডছত জন্মগ্ৰহণ কৰা এগৰাকী উগ্ৰপন্থী আৰু প্ৰকাশক আছিল।^১২ সশস্ত্ৰ বিদ্ৰোহত জড়িত থকাৰ সন্দেহত স্বামীক গ্ৰেপ্তাৰ কৰাৰ লগতে প্ৰয়োজনীয় কৰ নিদিয়াকৈ বাতৰি কাকত বিক্ৰী কৰাৰ অপৰাধত এসপ্তাহ আৰু ছমাহৰ কাৰাদণ্ড ভুগিছিল।

জীৱনী

১৭৯১ চনত লিডছৰ হান্সলেট লেনত জন্মগ্ৰহণ কৰিছিল এলিছ বাৰ্নেটে। ১৮০৭ চনত ১৬ বছৰ বয়সত, তেওঁ ৱেষ্ট ৰাইডিঙৰ এজন বিশিষ্ট ৰাজনৈতিক কৰ্মী আৰু কিতাপ বিক্ৰেতা জেমছ মানক বিয়া কৰায়। লিডছ ইনটেলিজেন্সাৰৰ মতে ব্ৰিগেটত থকা জেমছ আৰু এলিছৰ কিতাপৰ দোকানখন "এই চহৰখনৰ দেশদ্ৰোহৰ মুখ্য কাৰ্যালয়" যেন লাগিছিল।^৩ ১৮৩২ চনৰ ৪ আগষ্টত কলেৰা ৰোগত আক্ৰান্ত হৈ জেমছ মানৰ মৃত্যু হয় আৰু এলিছ বিধৱা হৈ পৰে আৰু ৯টা সন্তান থাকে। তেওঁ কিতাপ বিক্ৰী কৰি থাকিল আৰু ব্যৱসায়ত ছপাশালৰ সংযোজন কৰিলে।^২

১৮৩৩ চনত তেওঁ ছ'চাইটি ফৰ প্ৰমোটিং নেচনেল ৰিজেনেৰেচনৰ কেটেচিজমৰ এটা সংস্কৰণ প্ৰকাশ কৰে যিয়ে "... বৰ্তমান বিদ্যমান সামাজিক আৰু বাণিজ্যিক দুষ্টতাসমূহ আঁতৰোৱা" আকাংক্ষা কৰে।^৪ তেওঁ আন্দোলনকাৰী ৰিচাৰ্ড কাৰ্লাইলৰ ৰচনা, উগ্ৰপন্থী ৰিচাৰ্ড অষ্টলাৰ আৰু উইলিয়াম ৰাইডাৰৰ^২ প্ৰকাশক আৰু ৰাজনীতিবিদ এডৱাৰ্ড বেইনছৰ স্পুফ জীৱন-কাহিনীও প্ৰকাশ কৰে যাৰ নাম আছিল দ্য ডেমাগগ।^৫

১৮৪৮ চনত তেওঁ আৰু উইলিয়াম ষ্ট্ৰেঞ্জে মানৰ ব্লেক বুক অৱ দ্য ব্ৰিটিছ এৰিষ্ট'ক্ৰেচি প্ৰকাশ কৰি আছিল আৰু তেওঁ হয়তো ইয়াৰ সংকলনকাৰী আছিল।^২ কিতাপখনৰ লক্ষ্য আছিল "ৰাজ্য আৰু গীৰ্জাত অধিক দানৱীয় নিৰ্যাতন" উন্মোচন কৰা।^৬

ৰাজনীতি

১৮১৭ চনত মানৰ স্বামীক সশস্ত্ৰ পেণ্ট্ৰিচৰ উত্থানৰ সৈতে জড়িত বুলি অনুমান কৰাৰ বাবে গ্ৰেপ্তাৰ কৰা হয় যাৰ ফলত কেইবাজনো লোকক মৃত্যুদণ্ড দিয়া হয়। কোনো আনুষ্ঠানিক অভিযোগ নকৰাকৈয়ে তেওঁৰ স্বামীক মুকলি কৰি দিয়া হয়।^২

১৮৩৪ চনত ষ্টাম্পবিহীন বাতৰি কাকত বিক্ৰী কৰাৰ বাবে মানে ৱেকফিল্ড কাৰাগাৰত এসপ্তাহৰ কাৰাদণ্ড ভুগিছিল।^১ ১৮৩৬ চনৰ জানুৱাৰী মাহত চাৰ্টিষ্ট জোছুয়া হবছনৰ সৈতে একেটা অপৰাধৰ বাবে তেওঁক পুনৰ দোষী সাব্যস্ত কৰা হয় আৰু তেওঁক ১০০ পাউণ্ড জৰিমনা বিহা হয়। হবছনে ৮০ পাউণ্ডৰ কম জৰিমনা লাভ কৰে^৭ ধন পৰিশোধ নকৰাত তেওঁলোক দুয়োকে ইয়ৰ্ক দুৰ্গত ছমাহৰ বাবে কাৰাদণ্ডিত কৰা হয়।^৮ বিচাৰত মানে কিতাপ বিক্ৰী বন্ধ কৰিলে হ্ৰাস কৰা জৰিমনা দিবলৈ আৰু কাৰাগাৰৰপৰা পলায়ন কৰিবলৈ অস্বীকাৰ কৰে আৰু কয় যে তেওঁৰ "পৰিয়াল ৰক্ষণাবেক্ষণৰ আন কোনো উপায় নাই।"^১

মান ৰেডিকেল প্ৰিণ্টাৰ আৰু কিতাপ বিক্ৰেতাৰ নেটৱৰ্কৰ অন্তৰ্গত আছিল, বিশেষকৈ মানচেষ্টাৰৰ এবেল হেইউড আৰু লণ্ডনৰ উইলিয়াম ষ্ট্ৰেঞ্জ। এলিছ লুডাইট আৰু চাৰ্টিষ্ট আন্দোলনৰ সৈতে জড়িত আছিল,^১ আৰু চাৰ্টিষ্ট ষ্টাডিজ নামৰ কিতাপখনৰ 'চাৰ্টিষ্ট ইন লিডছ' অধ্যায়ত তেওঁক উল্লেখ কৰা হৈছে।^৯