এনী মাৰ্ফী

এন ফ্ৰান্সেছ মাৰ্ফী (ইংৰাজী ভাষা: Annie Murphy; জন্ম: ১৯ ডিচেম্বৰ, ১৯৮৬) এগৰাকী কানাডিয়ান অভিনেত্ৰী। তেওঁ ধাৰাবাহিক ছিটছ ক্ৰীক (২০১৫–২০২০) ত এলেক্সিস ৰোজৰ চৰিত্ৰত অভিনয় কৰি বিশেষ জনপ্ৰিয়তা অৰ্জন কৰে। এই অভিনয়ৰ বাবে তেওঁ এটা প্ৰাইমটাইম এমি বঁটা লাভ কৰাৰ লগতে এটা গোল্ডেন গ্ল’ব বঁটা আৰু দুটা ক্ৰিটিকছ চয়ছ টেলিভিছন বঁটাৰ মনোনয়ন লাভ কৰে।

মাৰ্ফীয়ে পৰৱৰ্তী সময়ত কমেডী-ড্ৰামা ধাৰাবাহিক কেভিন কেন এফ**ক হিমচেলফ (২০২১–২০২২), ৰাছিয়ান ডল (২০২২) আৰু এনথ’লজী ধাৰাবাহিক ব্লেক মিৰৰ (২০২৩) ৰ খণ্ড "জোন ইজ অফুল"ত অভিনয় কৰিছে। শেষৰটো অভিনয়ৰ বাবে তেওঁ ক্ৰিটিকছ চয়ছ ছুপাৰ বঁটা লাভ কৰে। তেওঁ এনিমেটেড ছবি ৰুবী গিলমেন, টিনেজ ক্ৰাকেন (২০২৩) ত কণ্ঠদান কৰিছিল।

প্ৰাৰম্ভিক জীৱন

মাৰ্ফীৰ জন্ম হৈছিল ১৯৮৬ চনৰ ১৯ ডিচেম্বৰত অণ্টাৰিঅ’ৰ অ’টাৱাত।^১২৩ তেওঁৰ পিতৃ-মাতৃ দুয়ো শিক্ষক আছিল।^২ তেওঁ অ’টাৱাৰ এলমউড স্কুলত হাইস্কুলীয়া শিক্ষা লাভ কৰিছিল আৰু তাত তেওঁ মঞ্চ নাটকত অভিনয় কৰিছিল।^৪

মাৰ্ফীয়ে কুইন্স ইউনিভাৰ্চিটীত এবছৰ অধ্যয়ন কৰাৰ পাছত কনকৰ্ডিয়া ইউনিভাৰ্চিটীলৈ বদলি হয় আৰু তাৰপৰা থিয়েটাৰ পাৰফৰমেন্সত ডিগ্ৰী লাভ কৰে।^২ ইয়াৰ পিছত তেওঁ কানাডিয়ান ফিল্ম চেণ্টাৰ এক্টৰ্ছ কনজাৰ্ভেটৰীত প্ৰশিক্ষণ লৈছিল।^৪

অভিনয় জীৱন গঢ়িবলৈ ২২ বছৰ বয়সত তেওঁ লছ এঞ্জেলছলৈ গুচি যায়।^৫

কৰ্মজীৱন

মাৰ্ফীয়ে ক্ৰাইম-থ্ৰিলাৰ টেলিভিছন ছবি লেথাল অবচেচন (২০০৭) যোগে অভিনয়ৰ পাতনি মেলে। তেওঁ বিভিন্ন কানাডিয়ান চলচ্চিত্ৰ যেনে ষ্টৰী অৱ জেন (২০০৮),^৬ লিক (২০১০),^৭ আৰু এ ৱিণ্ডিগো টেল (২০১০)ত সৰু আৰু অতিৰিক্ত চৰিত্ৰত অভিনয় অব্যাহত ৰাখিছিল।^৮ ইয়াৰ উপৰি তেওঁ কেইবাখনো কানাডিয়ান টেলিভিছন ধাৰাবাহিকত অভিনয় কৰিছিল, যিবোৰৰ ভিতৰত গুড গড (২০১২) আৰু ৰুকী ব্লু (২০১২) অন্যতম।^৯ তেওঁ উল্লেখ কৰিছে যে সেই সময়ত তেওঁ এগৰাকী "সংগ্ৰামী অভিনেত্ৰী" আছিল যিয়ে কমেডী ছবিত অভিনয়ৰ সুযোগ বিচাৰিছিল যদিও তেওঁৰ অভিজ্ঞতাত কেৱল ড্ৰামাহে আছিল।^৮

তেওঁ কেইবাখনো আমেৰিকান টেলিভিছন ধাৰাবাহিকত অভিনয় কৰিছিল, যিবোৰৰ ভিতৰত দ্য বিউটিফুল লাইফ: টিবিএল (২০০৯), ব্লু মাউণ্টেইন ষ্টেট (২০১০), এগেইনষ্ট দ্য ৱাল (২০১১), আৰু বিউটি এণ্ড দ্য বিষ্ট (২০১২) অন্তৰ্ভুক্ত।^৯১০

মাৰ্ফীয়ে অভিনয়ক কেৰিয়াৰ হিচাপে ত্যাগ কৰাৰ কথা ভাবিছিল,^১১ যেতিয়া ২০১৩ চনত তেওঁ চিবিচি চিটকম ছিটছ ক্ৰীকত এলেক্সিস ৰোজৰ চৰিত্ৰটোৰ বাবে নিৰ্বাচিত হয়।^৫ ২০২০ চনত তেওঁ পুৰণি স্মৃতি সুঁৱৰি কৈছিল, "মোৰ ঘৰখন তেতিয়াই জ্বলি ছাই হৈছিল, মোৰ বেংক একাউণ্টত মাত্ৰ ৩ ডলাৰ আছিল আৰু প্ৰায় দুবছৰ ধৰি মই কোনো কাম পোৱা নাছিলোঁ। মই মোৰ প্ৰথম স্ক্ৰীণ টেষ্টটোও অতি বেয়াকৈ বিফল কৰিছিলোঁ... মই প্ৰশান্ত মহাসাগৰৰ পাৰত বহি কান্দি আছিলোঁ আৰু বিশ্বব্ৰহ্মাণ্ডখনে যেন কৈছিল, 'এইটো আৰু নকৰিবা। এইটো তোমাৰ বাবে নহয়! ' কিন্তু তাৰ দুদিন পাছতেই মই ছিটছ ক্ৰীকৰ বাবে অডিচনৰ নিমন্ত্ৰণ পাওঁ।" ^১২ তেওঁ ধাৰাবাহিকখনৰ ছটা ছিজনত, ২০১৫ চনৰ জানুৱাৰীৰপৰা ২০২০ চনৰ এপ্ৰিললৈকে এই চৰিত্ৰটোত অভিনয় কৰিছিল।^{১৩১৪১৫১৬}

মণ্ট্ৰিয়েলত ছবছৰ থকাৰ পিছত মাৰ্ফী টৰণ্টোলৈ গুচি যায় আৰু তাত চাৰিজন আমনিদায়ক সংগীতজ্ঞৰ জীৱনক লৈ নিৰ্মিত ২০১৫ চনৰ ৱেব ধাৰাবাহিক দ্য প্লেট'ছৰ সহ-সৃজন আৰু অভিনয় কৰে।^২১৭ এই ধাৰাবাহিকত কৰা অভিনয়ৰ বাবে তেওঁ ২০১৬ চনৰ কানাডিয়ান স্ক্ৰীণ এৱাৰ্ডত শ্ৰেষ্ঠ অভিনয়ৰ মনোনয়ন লাভ কৰে। সেই একেটা অনুষ্ঠানতে তেওঁ ছিটছ ক্ৰীকত কৰা অভিনয়ৰ বাবেও কমেডী ধাৰাবাহিকৰ শ্ৰেষ্ঠ অভিনেত্ৰীৰ মনোনয়ন লাভ কৰিছিল।

সক্ৰিয়তা

মাৰ্ফী বিশ্বজনীন সাহায্য সংস্থা কেয়াৰ কানাডাৰ এগৰাকী ৰাষ্ট্ৰদূত। ২০১৯ চনত তেওঁ সেই অঞ্চলৰ মহিলা আৰু ছোৱালীসকলক সবলীকৰণ কৰাৰ বাবে কেয়াৰে চলোৱা প্ৰচেষ্টাৰ বিষয়ে জানিবলৈ জৰ্ডান ভ্ৰমণ কৰিছিল।^১৮ ২০২১ চনৰ জানুৱাৰী মাহত তেওঁ নিজৰ প্ৰথমটো ৰেড কাৰ্পেট পোছাক নিলাম কৰি পোৱা ধন এনকেম্পমেণ্ট ছাপ’ৰ্ট নেটৱৰ্ক নামৰ এটা অলাভজনক সংস্থালৈ দান কৰে, যি সংস্থাই টৰণ্টোৰ গৃহহীন লোকসকলক সহায় কৰে।^১৯

ব্যক্তিগত জীৱন

মাৰ্ফীয়ে ২০১১ চনৰ আগষ্ট মাহত গায়ক তথা সংগীতজ্ঞ মেনো ভাৰ্ষ্টিগৰ সৈতে বিবাহপাশত আবদ্ধ হয়। মেনো 'হলাৰাডু' আৰু 'এনিৱে গেং' বেণ্ডৰ মুখ্য গায়ক।^{২০২১২২} ২০১৩ চনত তেওঁলোকৰ ঘৰত অগ্নিকাণ্ডৰ ঘটনা সংঘটিত হৈছিল; এই ঘটনাত দুয়োৰে কোনো ক্ষতি হোৱা নাছিল যদিও তেওঁলোকৰ বেছিভাগ সা-সম্পত্তি হেৰুৱাইছিল।^১

মাৰ্ফীৰ হাতৰ মণিবন্ধত জেমছ ষ্টিুৱাৰ্টৰ অৱয়বৰ (silhouette) এটা টাটু আছে। তেওঁ উল্লেখ কৰিছে যে হাৰ্ভি বোলছবিখনত ষ্টিুৱাৰ্টৰ "হৃদয়স্পৰ্শী, মধুৰ আৰু ধেমেলীয়া" অভিনয়ে তেওঁক গভীৰভাৱে প্ৰভাবিত কৰিছিল।^২৩