এছ্‌ক্লেপিআছ

প্ৰাচীন গ্ৰীক ধৰ্ম আৰু কিংবদন্তি অনুসৰি এছ্‌ক্লেপিআছ (; Ἀσκληπιός, Asklēpiós; Aesculapius) এজন নায়ক আৰু চিকিৎসা-বিজ্ঞানৰ দেৱতা। ৰোমান দেৱতা ভেজ'ভিছ আৰু ইজিপ্টীয় ইম্‌হ'টেপৰ সৈতে তেওঁক যুক্ত কৰা হয়। ^১ তেওঁ এপ'ল' আৰু জলকুঁৱৰী ক'ৰ'নিছৰ সন্তান। এপ'ল'ৰ লগতে তেওঁক Paean ("বৈদ্য")ৰ সন্মান দিয়া হয়।^২ নৰঅশ্ব চিৰ'নৰ পৰা এছ্‌ক্লেপিআছে নিৰাময়ৰ কৌশল শিকে। এছ্‌ক্লেপিআছে মানুহক অমৰ কৰি তুলিব বুলি ভয় কৰি জ্যুচে তেওঁক বজ্ৰৰে প্ৰাণনাশ কৰে।^৩ ৰোগীক তেওঁ সপোনত আহি সুস্থ কৰি তোলা বিশ্বাস অনুসৰি ৰোগীয়ে তেওঁৰ মন্দিৰত শোৱাৰ নিয়ম গঢ় লৈ উঠে। এছ্‌ক্লেপিআছৰ দণ্ডিকা বৰ্তমান চিকিৎসা বিজ্ঞানৰ প্ৰতীক।