আন্না ফাৰিছ

আন্না কে ফাৰিছ^১ (ইংৰাজী ভাষা: Anna Faris; জন্ম: ২৯ নৱেম্বৰ ১৯৭৬)^২ এগৰাকী আমেৰিকা যুক্তৰাষ্ট্ৰন অভিনেত্ৰী আৰু ধেমেলীয়া অভিনেতা। তেওঁ বিশেষকৈ স্কেয়াৰী মুভি চলচ্চিত্ৰ শৃংখলাত (২০০০–বৰ্তমান) চিণ্ডি কেম্পবেলৰ মুখ্য চৰিত্ৰত কৰা অভিনয়ৰ জৰিয়তে জনপ্ৰিয়তা অৰ্জন কৰে। এগৰাকী মুখ্য অভিনেত্ৰী হিচাপে তেওঁৰ ছবিসমূহে বিশ্বজুৰি ১.৫ বিলিয়ন ডলাৰতকৈও অধিক উপাৰ্জন কৰিছে।^৩

ফাৰিছৰ উল্লেখযোগ্য ছবিসমূহৰ ভিতৰত আছে মে, দ্য হট চিক (উভয় ২০০২), লষ্ট ইন ট্ৰেন্সলেচন (২০০৩), ব্ৰোকবেক মাউণ্টেইন, জাষ্ট ফ্ৰেণ্ডছ (উভয় ২০০৫), মাই ছুপাৰ এক্স-গাৰ্লফ্ৰেণ্ড (২০০৬), স্মাইলী ফেচ (২০০৭), দ্য হাউচ বানি (২০০৮), ৱাটছ ইয়ৰ নম্বৰ? (২০১১), দ্য ডিক্টেটৰ (২০১২), আৰু অভাৰবৰ্ড (২০১৮)। তেওঁ ক্লাউডী উইথ এ চান্স অৱ মিটবলছ (২০০৯–২০১৩) আৰু এলভিন এণ্ড দ্য চিপমাংকছ (২০০৯–২০১৫) চলচ্চিত্ৰ শৃংখলাত কণ্ঠদান (voice-over) কৰিছে।

টেলিভিছনত ফাৰিছে এনবিচিৰ চিটকম ফ্ৰেণ্ডছৰ (২০০৪) দশম তথা অন্তিম ঋতুত এৰিকাৰ চৰিত্ৰত অভিনয় কৰিছিল আৰু চিপিএছৰ চিটকম মমত (২০১৩–২০২০) ক্ৰীষ্টি প্লাংকেটৰ মুখ্য চৰিত্ৰত অভিনয় কৰিছিল। অভিনয়ৰ বাহিৰে তেওঁ আনকোৱালিফাইড (২০১৫–২০২৩) নামৰ এটা পৰামৰ্শমূলক পডকাষ্ট সৃষ্টি আৰু পৰিচালনা কৰিছিল। তেওঁ ২০১৭ চনত একে নামেৰে এখন স্মৃতিগ্ৰন্থ লিখিছিল, যিখন নিউয়ৰ্ক টাইমছৰ বেষ্ট চেলাৰ হিচাপে পৰিগণিত হৈছিল।

প্ৰাৰম্ভিক জীৱন

মেৰিলেণ্ডৰ বাল্টিমোৰত ফাৰিছৰ জন্ম হৈছিল। তেওঁ সমাজতত্ত্বৰ অধ্যাপক জেক ফাৰিছ আৰু বিশেষ শিক্ষাৰ শিক্ষয়িত্ৰী কাৰেন ফাৰিছৰ দ্বিতীয় সন্তান আছিল।^৪ ৱাশ্বিংটনৰ ছিয়েটলৰ নিবাসী তেওঁৰ পিতৃ-মাতৃয়ে বাল্টিমোৰত বসবাস কৰিছিল কাৰণ তেওঁৰ পিতৃয়ে টাওচন বিশ্ববিদ্যালয়ত অধ্যাপক পদ গ্ৰহণ কৰিছিল। ফাৰিছৰ ছয় বছৰ বয়সত তেওঁলোকৰ পৰিয়ালটো ৱাশ্বিংটনৰ এডমণ্ডচলৈ স্থানান্তৰিত হয়।^৫ তেওঁৰ পিতৃয়ে ৱাশ্বিংটন বিশ্ববিদ্যালয়ত অভ্যন্তৰীণ যোগাযোগ বিভাগৰ উপ-সভাপতি হিচাপে কাম কৰিছিল,^৪ আৰু পিছলৈ ৱাশ্বিংটন বায়’টেকন’লজী এণ্ড বায়’মেডিকেল এছ’চিয়েচনৰ নেতৃত্ব দিছিল।^৪৬ আনহাতে তেওঁৰ মাতৃয়ে এডমণ্ডচৰ চিভিউ এলিমেণ্টৰী স্কুলত শিক্ষকতা কৰিছিল।^৫

ফাৰিছৰ এজন জ্যেষ্ঠ ভাতৃ ৰবাৰ্ট আছে, যিগৰাকী কেলিফৰ্ণিয়া বিশ্ববিদ্যালয়, ডেভিছৰ সমাজতত্ত্বৰ অধ্যাপক।^৬৭ সাক্ষাৎকাৰত ফাৰিছে তেওঁৰ পিতৃ-মাতৃক "উগ্ৰ উদাৰবাদী" (ultra liberal) বুলি অভিহিত কৰিছে আৰু কৈছে যে তেওঁ আৰু তেওঁৰ ভাতৃক এটা অধৰ্মীয় কিন্তু "অতি ৰক্ষণশীল" আৰু পৰম্পৰাগত পৰিৱেশত ডাঙৰ-দীঘল কৰা হৈছিল।^৪ ছয় বছৰ বয়সত তেওঁৰ পিতৃ-মাতৃয়ে তেওঁক শিশুৰ বাবে এখন থিয়েটাৰ ক্লাছত ভৰ্তি কৰি দিছিল। তেওঁ নাটক চাই ভাল পাইছিল আৰু শোৱা কোঠাতে চুবুৰীয়া বন্ধুৰ সৈতে নাটকৰ আখৰা কৰিছিল। তেওঁ সাক্ষাৎকাৰত জনাইছে যে সৰু কালত তেওঁ প্ৰায়ে নিজৰ দাঁতৰ 'ৰি টেইনাৰটোৱে' (retainer) কথা কোৱা বুলি কল্পনা কৰিছিল আৰু আইনাৰ আগত থিয় হৈ বিভিন্ন টক-শ্ব’ত অংশ লোৱাৰ ভাও ধৰিছিল।^৪৮

ফাৰিছে এডমণ্ডচ উডৱে হাইস্কুলত অধ্যয়ন কৰিছিল। পঢ়ি থকা সময়ছোৱাতে তেওঁ ছিয়েটলৰ থিয়েটাৰ কোম্পানী আৰু ৰাষ্ট্ৰীয় ৰেডিঅ’ নাটকবোৰত অভিনয় কৰিছিল। তেওঁ ১৯৯৪ চনত স্কুলীয়া শিক্ষা সমাপ্ত কৰে।^৪ ইয়াৰ পিছত তেওঁ ৱাশ্বিংটন বিশ্ববিদ্যালয়ত ভৰ্তি হয় আৰু ১৯৯৯ চনত ইংৰাজী সাহিত্যত স্নাতক ডিগ্ৰী লাভ কৰে।^৫ অভিনয়ৰ প্ৰতি ভালপোৱা থকা সত্ত্বেও তেওঁ স্বীকাৰ কৰিছিল যে তেওঁ কেতিয়াও এগৰাকী চিনেমা তাৰকা হোৱাৰ কথা ভবা নাছিল আৰু কেৱল হাত খৰচৰ বাবেহে অভিনয় কৰিছিল। তেওঁৰ আচল সপোন আছিল এখন উপন্যাস লিখা।^৪৯ কলেজ শেষ কৰি তেওঁ লণ্ডনলৈ যোৱাৰ কথা আছিল য’ত এটা বিজ্ঞাপন এজেন্সীত তেওঁৰ বাবে কাম ঠিক হৈ আছিল। কিন্তু শেষ মুহূৰ্তত তেওঁ লছ এঞ্জেলছলৈ যোৱাৰ সিদ্ধান্ত লয় আৰু অভিনয়ক কেৰিয়াৰ হিচাপে লোৱাৰ কথা ভাবে। ইয়াৰ অলপ পাছতে তেওঁ স্কেয়াৰী মুভিত মুখ্য চৰিত্ৰত অভিনয়ৰ সুযোগ পায়।^৯

কৰ্মজীৱন

আৰম্ভণিৰ অভিনয় (১৯৮৬–১৯৯৯)

সৰুৰেপৰাই পিতৃ-মাতৃৰ উৎসাহত অভিনয়ৰ দিশত আগবঢ়া ফাৰিছে ন বছৰ বয়সত ছিয়েটল ৰিপাৰ্টৰী থিয়েটাৰত আৰ্থাৰ মিলাৰৰ নাটক ডেঞ্জাৰ: মেম’ৰী! ত তিনিমাহ ধৰি অভিনয় কৰি প্ৰথম পেছাদাৰী প্ৰদৰ্শন আগবঢ়াইছিল।^১০ সেই চৰিত্ৰটোৰ বাবে তেওঁ ২৫০ মাৰ্কিন ডলাৰ লাভ কৰিছিল। তাৰ পিছত তেওঁ ৱাশ্বিংটনৰ ভিলেজ থিয়েটাৰত টু কিল এ মকিংবাৰ্ড নাটকত স্কাউট, হেইডিত নামটোৰ চৰিত্ৰ আৰু আৱাৰ টাউনত ৰেবেকাৰ চৰিত্ৰত অভিনয় কৰিছিল। সেই সময়ছোৱাত তেওঁ ৰেইন, চাম ফিশ্ব, নো এলিফেণ্টছ আৰু লাইফ আণ্ডাৰ ৱাটাৰ আদি নাটকত অংশ লৈছিল।^১১

হাইস্কুলত পঢ়ি থকা সময়ত ফাৰিছে এটা ফ্ৰোজেন দৈৰ ব্ৰেণ্ডৰ টেলিভিছন বিজ্ঞাপনত আৰু ৰেড ৰবিনৰ বাবে এটা প্ৰশিক্ষণ ভিডিঅ’ত অভিনয় কৰিছিল। ১৯৯৬ চনত ৱাশ্বিংটন বিশ্ববিদ্যালয়ত পঢ়ি থকা সময়ত তেওঁ মাইক্ৰ’চফ্টৰ এমএছএন ২.০ অনলাইন সেৱাৰ বাবে নিৰ্মিত এক ইণ্টাৰেক্টিভ চিডি-ৰম প্ৰচাৰমূলক ভিডিঅ’ এমএছএন প্ৰিভিউত অংশ লৈছিল।^১২

ফাৰিছে টিভি ছবি ডিচেপচন: এ মাদাৰ্ছ চিক্ৰেট আৰু স্বতন্ত্ৰ ড্ৰামা ছবি এডেনত চুটি চৰিত্ৰত অভিনয় কৰিছিল। কলেজীয়া শিক্ষা শেষ কৰাৰ পাছত ১৯৯৯ চনত তেওঁৰ প্ৰথম ডাঙৰ ছবি আছিল স্বতন্ত্ৰ শ্লেচাৰ ছবি লাভৰ্ছ লেন, য’ত তেওঁ এগৰাকী চিয়াৰলিডাৰৰ চৰিত্ৰত অভিনয় কৰিছিল।^১৩ এই বি-মুভিখন প্ৰত্যক্ষভাৱে ডিভিডি যোগে মুক্তি পাইছিল। সমালোচকৰ সঁহাৰি মিশ্ৰিত আছিল যদিও ফাৰিছৰ অভিনয়ে প্ৰথমবাৰৰ বাবে লেখকসকলৰ মনোযোগ আকৰ্ষণ কৰিছিল।^১৪

স্কেয়াৰী মুভিৰ জৰিয়তে সফলতা (২০০০–২০০৬)

২০০০ চনত ফাৰিছে হৰৰ-কমেডী পেৰডী ছবি স্কেয়াৰী মুভিত চিণ্ডি কেম্পবেলৰ চৰিত্ৰত অভিনয় কৰি জনপ্ৰিয়তা লাভ কৰে।^১৫ পূৰ্বে থিয়েটাৰ আৰু কম বাজেটৰ ছবিত সৰু চৰিত্ৰত অভিনয় কৰা ফাৰিছৰ বাবে ই আছিল প্ৰথমখন মুখ্য চৰিত্ৰৰ ছবি। ২০০৯ চনত তেওঁ যুক্তৰাজ্যৰ দ্য গাৰ্ডিয়ানক জনাইছিল যে এই ছবিখন তেওঁৰ বাবে এক সুন্দৰ প্ৰশিক্ষণ স্থল আছিল।^১৬ স্কেয়াৰী মুভি ব্যাৱসায়িকভাৱে অতি সফল হয় আৰু বিশ্বজুৰি ২৭৮ নিযুত ডলাৰ উপাৰ্জন কৰে।^১৭ এই অভিনয়ৰ বাবে তেওঁ ২০০১ চনৰ এমটিভি মুভি এৱাৰ্ডছত দুটা মনোনয়ন লাভ কৰিছিল। ইয়াৰ পিছত ২০০১ চনৰ ৪ জুলাইত মুক্তি পোৱা স্কেয়াৰী মুভি ২তো তেওঁ পুনৰ অভিনয় কৰে।

তেওঁৰ পৰৱৰ্তী ছবি আছিল স্বতন্ত্ৰ ছাইক’লজিকেল থ্ৰিলাৰ মে (২০০২)।^১৮ সমালোচকসকলে ছবিখনত ফাৰিছৰ উৎসাহী অভিনয়ৰ প্ৰশংসা কৰে।^১৯ পাছলৈ ২০০২ চনত তেওঁ ৰব স্নাইডাৰ আৰু ৰেচেল মেকঅ্যাডামছৰ সৈতে কমেডী ছবি দ্য হট চিকত অভিনয় কৰে। এই ছবিখনে বিশ্বজুৰি ৫৪ নিযুত ডলাৰ উপাৰ্জন কৰিছিল।^২০

২০০৩ চনত ফাৰিছে চফিয়া কপালৰ ড্ৰামা ছবি লষ্ট ইন ট্ৰেন্সলেচনত বিল মাৰে আৰু স্কাৰলেট জোহানছনৰ বিপৰীতে এগৰাকী বহিৰ্মুখী অভিনেত্ৰীৰ চৰিত্ৰত অভিনয় কৰে।^২১ তেওঁ এই অভিজ্ঞতাক জীৱনৰ অন্যতম শ্ৰেষ্ঠ অভিজ্ঞতা বুলি অভিহিত কৰিছিল।^২২ ৪ নিযুত ডলাৰ বাজেটৰ ছবিখনে বিশ্বজুৰি ১১৯.৭ নিযুত ডলাৰ উপাৰ্জন কৰে।^২৩ ২০০৩ চনত তেওঁ তৃতীয়বাৰৰ বাবে স্কেয়াৰী মুভি ৩ত চিণ্ডি কেম্পবেলৰ চৰিত্ৰ ৰূপায়ণ কৰে।^২৪

২০০৪ চনত ফাৰিছে চিটকম ফ্ৰেণ্ডছৰ অন্তিম ঋতুত এৰিকাৰ আৱৰ্তক চৰিত্ৰত অভিনয় কৰে।^২৫ সেই বছৰৰে গ্ৰীষ্মকালত তেওঁ এং লীৰ ছবি ব্ৰোকবেক মাউণ্টেইনত (২০০৫) এটা সৰু চৰিত্ৰত অভিনয় কৰে। এই ছবিখনৰ বাবে তেওঁ সতীৰ্থসকলৰ সৈতে স্ক্ৰীণ এক্টৰ্ছ গিল্ড বঁটাৰ মনোনয়ন লাভ কৰিছিল।

২০০৫ চনত ফাৰিছে ৰিয়ান ৰেনল্ডছৰ সৈতে ৱেইটিং... আৰু জাষ্ট ফ্ৰেণ্ডছ নামৰ দুখন কমেডী ছবিত অভিনয় কৰে। ৱেইটিং... আছিল এখন স্বতন্ত্ৰ নিৰ্মাণ য’ত ৰেষ্টুৰেণ্টৰ কৰ্মচাৰীসকলে একঘেয়ামি আমনি আৰু প্ৰাপ্তবয়স্ক জীৱনৰপৰা হাত সাৰিবলৈ কৰা ধেমালিৰ ওপৰত আধাৰিত আছিল। ৩ নিযুত মাৰ্কিন ডলাৰ বাজেটৰ এই ছবিখনে ১৮.৬ নিযুত ডলাৰ উপাৰ্জন কৰিছিল,^২৬ কিন্তু এজন সমালোচকে অনুভৱ কৰিছিল যে পৰিচালকে ফাৰিছ আৰু ৰেনল্ডছৰ দৰে অভিনেতাৰ প্ৰতিভাক ইয়াত সঠিকভাৱে ব্যৱহাৰ কৰিব নোৱাৰিলে।^২৭ জাষ্ট ফ্ৰেণ্ডছত ফাৰিছে এগৰাকী উদীয়মান আৰু আত্মকেন্দ্ৰিক পপ গায়িকা সামান্থা জেমছৰ চৰিত্ৰ ৰূপায়ণ কৰিছিল।^২৮ এই ছবিখনে বিশ্বজুৰি ৫০.৯ নিযুত মাৰ্কিন ডলাৰ উপাৰ্জন কৰিছিল,^২৯ আৰু ইয়াৰ বাবে ফাৰিছে এটা এমটিভি মুভি এৱাৰ্ড আৰু দুটা টিন চয়েছ এৱাৰ্ডৰ মনোনয়ন লাভ কৰিছিল।^৩০

২০০৬ চনৰ ১৪ এপ্ৰিলত মুক্তি পোৱা স্কেয়াৰী মুভি ৪ত ফাৰিছে চতুৰ্থবাৰৰ বাবে চিণ্ডি কেম্পবেলৰ চৰিত্ৰত অভিনয় কৰে।^৩১ ২০০৬ চনত তেওঁ ইভান ৰেইটমেনৰ ৰোমাণ্টিক কমেডী ছবি মাই ছুপাৰ এক্স-গাৰ্লফ্ৰেণ্ডত উমা থাৰমেন আৰু লুক ৱিলছনৰ বিপৰীতে হান্নাহৰ চৰিত্ৰত অভিনয় কৰে। যদিও ছবিখনে মিশ্ৰিত সঁহাৰি পাইছিল,^৩২ ই বিশ্বজুৰি ৬১ নিযুত মাৰ্কিন ডলাৰ উপাৰ্জন কৰিছিল।^৩৩ এই ছবিখনৰ বাবে ফাৰিছ আৰু থাৰমেন দুয়োৱে 'শ্ৰেষ্ঠ যুঁজ' (Best Fight) শিতানত এমটিভি মুভি এৱাৰ্ডৰ মনোনয়ন লাভ কৰিছিল।^৩৪

ধাৰাবাহিক হাস্যৰসাত্মক চৰিত্ৰসমূহ (২০০৭–২০১২)

গ্ৰেগ আৰাকিৰ স্বতন্ত্ৰ কমেডী ছবি স্মাইলী ফেচত (২০০৭) ফাৰিছে জে'ন এফ নামৰ এগৰাকী যুৱতীৰ চৰিত্ৰত অভিনয় কৰিছিল।^৩৫ ছবিখন চানডেন্স ফিল্ম ফেষ্টিভেলত প্ৰদৰ্শিত হৈছিল।^৩৬ সমালোচকসকলে তেওঁৰ অভিনয়ৰ উচ্চ প্ৰশংসা কৰিছিল আৰু এই ছবিয়ে তেওঁক হাই টাইমছ আলোচনীৰফালৰপৰা "ষ্টনৰ এৱাৰ্ডছ"ত শ্ৰেষ্ঠ অভিনেত্ৰীৰ সন্মান প্ৰদান কৰিছিল।^৩৭ বেছিভাগ সমালোচকৰে মতে এয়া তেওঁৰ অন্যতম শ্ৰেষ্ঠ ছবি আছিল।^৩৮

ইয়াৰ পিছত তেওঁ ডায়েন কিটন আৰু জন হেডাৰৰ বিপৰীতে স্বতন্ত্ৰ ছবি মামাছ বয়ত এজনী উচ্চাকাংক্ষী গায়িকাৰ চৰিত্ৰত অভিনয় কৰে।^৩৯ ২০০৮ চনত ফাৰিছে দ্য হাউচ বানি ছবিখনৰ প্ৰযোজনা কৰাৰ লগতে ইয়াত শ্বেলী নামৰ এগৰাকী প্ৰাক্তন 'প্লেবয় বানি'ৰ চৰিত্ৰত অভিনয় কৰে।^৪০ যদিও ছবিখনে মিশ্ৰিত সঁহাৰি পাইছিল, তথাপি ফাৰিছৰ অভিনয় সকলোৱে পছন্দ কৰিছিল।^৪১ ছবিখনে বিশ্বজুৰি ৭০ নিযুত ডলাৰ উপাৰ্জন কৰিছিল।^৪২

২০০৯ চনত ফাৰিছৰ প্ৰথমখন ছবি আছিল ব্ৰিটিছ বৈজ্ঞানিক কল্পকাহিনীমূলক কমেডী ফ্ৰিকুৱেণ্টলী আস্কড কুৱেশ্বনছ এবাউট টাইম ট্ৰেভেল। ইয়াত তেওঁ ভৱিষ্যতৰপৰা অহা কেছি নামৰ এগৰাকী যুৱতীৰ চৰিত্ৰত অভিনয় কৰিছিল। দ্যা গাৰ্ডিয়ান-এ তেওঁৰ এই উপস্থিতিৰ বিষয়ে এটা "বিমোৰত পেলোৱা কেমিঅ’" বুলি অভিহিত কৰিছিল।^৪৩ ছবিখন কেৱল যুক্তৰাজ্যৰ ছবিগৃহত মুক্তি দিয়া হৈছিল।

একে বছৰতে তেওঁ চেথ ৰোগেনৰ বিপৰীতে অবজাৰ্ভ এণ্ড ৰিপোৰ্ট (২০০৯) নামৰ ব্লেক কমেডীখনত অভিনয় কৰে। ইয়াত তেওঁ এজনী প্ৰসাধন কাউণ্টাৰৰ কৰ্মচাৰীৰ চৰিত্ৰ ৰূপায়ণ কৰিছিল। ১৮ নিযুত ডলাৰ বাজেটৰ ছবিখনে ২৬ নিযুত ডলাৰ উপাৰ্জন কৰে।^৪৪ ইয়াৰ উপৰি তেওঁ এনিমেটেড ছবি ক্লাউডী উইথ এ চান্স অৱ মিটবলছত এগৰাকী বতৰ বিজ্ঞানৰ ইণ্টাৰ্ণ হিচাপে আৰু এলভিন এণ্ড দ্য চিপমাংকছ: দ্য স্কুইকুৱেলত জেনেট মিলাৰ হিচাপে কণ্ঠদান কৰিছিল; যি দুয়োখনেই বক্স অফিচত সফল হৈছিল।^৪৫৪৬

ফাৰিছে এনিমেটেড লাইভ-একচন ছবি যোগী বিয়েৰত এজনী প্ৰকৃতি বিষয়ক তথ্যচিত্ৰ নিৰ্মাতাৰ চৰিত্ৰত অভিনয় কৰিছিল। ২০১০ চনৰ ১৭ ডিচেম্বৰত ৱাৰ্নাৰ ব্ৰাদাৰ্ছে মুক্তি দিয়া এই ছবিখনে নেতিবাচক সমালোচনা লাভ কৰিছিল। অৱশ্যে বিশ্বজুৰি ই ২০১ নিযুত ডলাৰ উপাৰ্জন কৰিবলৈ সক্ষম হয়।^৪৭

২০১১ চনত তেওঁৰ ৰেট্ৰ’ কমেডী ছবি টেক মি হোম টুনাইট মুক্তি পায়। ইয়াৰ বাবে তেওঁ টিন চয়েছ এৱাৰ্ডৰ মনোনয়ন লাভ কৰিছিল। ইয়াৰ পিছত তেওঁ ক্ৰিছ ইভানছৰ সৈতে ৱাটছ ইয়ৰ নম্বৰ? ছবিৰ মুখ্য চৰিত্ৰত অভিনয় কৰাৰ লগতে ইয়াৰ কাৰ্যবাহী প্ৰযোজক হিচাপেও দায়িত্ব পালন কৰে। ২০১১ চনৰ ৩০ ছেপ্টেম্বৰত মুক্তি পোৱা ছবিখনে বিশ্বজুৰি ৩০ নিযুত ডলাৰ উপাৰ্জন কৰে।^৪৮ সেই বছৰৰে ১৬ ডিচেম্বৰত মুক্তি পোৱা এলভিন এণ্ড দ্য চিপমাংকছ: চিপৰেকডত তেওঁ পুনৰ কণ্ঠদান কৰে।

মম আৰু আনকোৱালিফাইড (২০১৩–২০১৭)

২০১৩ চনত ফাৰিছে তদানীন্তন স্বামী ক্ৰিছ প্ৰাটৰ সৈতে তৃতীয়বাৰৰ বাবে মুভি ৪৩ নামৰ এখন স্বতন্ত্ৰ ব্লেক কমেডী ছবিত অভিনয় কৰে।^৪৯ ছবিখন সমালোচকৰদ্বাৰা অত্যন্ত সমালোচিত হৈছিল। একে বছৰতে ব্ৰিটিছ ৰোমাণ্টিক কমেডী ছবি আই গিভ ইট এ য়েৰ মুক্তি পায় যিখন যুক্তৰাজ্যত ব্যাৱসায়িকভাৱে সফল হৈছিল।^৫০

২০১৩ চনৰ ২৩ ছেপ্টেম্বৰত ফাৰিছে চিপিএছৰ চিটকম ধাৰাবাহিক মমত (Mom) খোপনি পোতে। ইয়াৰ জৰিয়তে তেওঁ কেৰিয়াৰৰ প্ৰথমটো পূৰ্ণকালীন টেলিভিছন চৰিত্ৰ লাভ কৰে।^৫১ এই ধাৰাবাহিকখন টেলিভিছনৰ অন্যতম জনপ্ৰিয় কমেডী শ্ব’ হিচাপে পৰিগণিত হয়। ফাৰিছে এই ধাৰাবাহিকৰ বাবে দুটাকৈ পিপলছ চয়েছ এৱাৰ্ডৰ মনোনয়ন লাভ কৰিছিল। সাতটা ছিজনত অভিনয় কৰাৰ পাছত ২০২০ চনত তেওঁ এই অনুষ্ঠানটো ত্যাগ কৰে।^৫২

২০১৩ চনত তেওঁ এনিমেটেড ছবি ক্লাউডী উইথ এ চান্স অৱ মিটবলছ ২তো কণ্ঠদান কৰে, যিখনে বিশ্বজুৰি ২৭৪.৩ নিযুত ডলাৰ উপাৰ্জন কৰে।^৫৩ ইয়াৰ পিছত তেওঁ ২০১৫ চনত ৪১তম পিপলছ চয়েছ এৱাৰ্ডছৰ আঁত ধৰিছিল। একে বছৰৰে নৱেম্বৰ মাহত তেওঁ আনকোৱালিফাইড (Unqualified) নামৰ এটা পৰামৰ্শমূলক পডকাষ্ট আৰম্ভ কৰে।^৫৪

চলচ্চিত্ৰলৈ প্ৰত্যাৱৰ্তন আৰু শেহতীয়া কাম (২০১৮–বৰ্তমান)

১৯৮৭ চনৰ গোল্ডি হন আৰু কুৰ্ট ৰাছেল অভিনীত একে নামৰ ছবিখনৰ ৰিমেক অভাৰবৰ্ডত (২০১৮) ফাৰিছে এগৰাকী নিম্ন-মধ্যবিত্ত অকলশৰীয়া মাতৃৰ চৰিত্ৰত অভিনয় কৰিছিল। তেওঁ ছবিখনত স্মৃতিশক্তি হেৰুওৱা এজন অৰ্ধব্যয়ী ধনী যুৱকক (ইউজেনিঅ' ডেৰবেজ) তেওঁলোক বিবাহিত বুলি পতিয়ন নিয়ায়।^৫৫ যদিও একাংশই ডেৰবেজ আৰু ফাৰিছৰ মাজৰ ৰসায়নক প্ৰশংসা কৰিছিল,^৫৬ তথাপি বেছিভাগ সমালোচকে অনুভৱ কৰিছিল যে ছবিখনত ফাৰিছৰ প্ৰতিভাক সঠিকভাৱে ব্যৱহাৰ কৰা হোৱা নাছিল। ২০১১ চনৰ ৱাটছ ইয়ৰ নম্বৰৰ পিছত তেওঁৰ এইখন আছিল প্ৰথমখন মুখ্য চৰিত্ৰৰ ছবি।^৫৭ অভাৰবৰ্ড ব্যাৱসায়িকভাৱে সফল হয় আৰু বিশ্বজুৰি ৯১.২ নিযুত ডলাৰৰ অধিক উপাৰ্জন কৰে।^৫৮

২০২২ চনত ফাৰিছে টনি কলেটৰ সৈতে দ্য এষ্টেট নামৰ এখন ব্লেক কমেডীত অভিনয় কৰে।^৫৯ ইয়াৰ পিছত তেওঁ ডেভ বাটিষ্টা অভিনীত ছবি মাই স্পাই: দ্য ইটাৰনেল চিটিত (২০২৪) এটা সহযোগী চৰিত্ৰত অভিনয় কৰে।^৬০

২০২৫ চনৰ আগষ্টত ঘোষণা কৰা হয় যে ফাৰিছে পুনৰবাৰ স্কেয়াৰী মুভি চলচ্চিত্ৰ শৃংখলাৰ ষষ্ঠটো খণ্ডত চিণ্ডি কেম্পবেলৰ চৰিত্ৰলৈ উভতি আহিব।^৬১ ছবিখনৰ দৃশ্যগ্ৰহণ ২০২৫ চনৰ অক্টোবৰৰপৰা আৰম্ভ হৈছে আৰু ই ২০২৬ চনৰ ১২ জুনত মুক্তি লাভ কৰিব।^৬২

ফাৰিছে পৰৱৰ্তী সময়ত টয় ষ্ট’ৰী ৫ (২০২৬) ছবিত অভিনয় কৰিব।^৬৩ তেওঁৰ অন্যান্য আগন্তুক প্ৰকল্পসমূহৰ ভিতৰত আছে এণ্ড্ৰিউ নিকোলৰ ছবি আই, অবজেক্ট আৰু জন লুকাছ তথা স্কট মূৰৰ কমেডী ছবি স্পা উইকেণ্ড।^৬৪৬৫

মাধ্যমৰ ছবি

নিজৰ কৰ্মজীৱনত ফাৰিছক কেইবাখনো সংবাদ পত্ৰই তেওঁৰ প্ৰজন্মৰ এগৰাকী "আটাইতকৈ প্ৰতিভাশালী ধেমেলীয়া অভিনেত্ৰী" বুলি অভিহিত কৰিছে।^৬৬ ২০১০ চনত কচমোপলিটান আলোচনীয়ে তেওঁক "বছৰটোৰ ধেমেলীয়া নিৰ্ভীক মহিলা" হিচাপে নিৰ্বাচিত কৰিছিল আৰু টেড ফ্ৰেণ্ডৰ দৰে লেখকে তেওঁক "হলিউডৰ আটাইতকৈ মৌলিক ধেমেলীয়া অভিনেত্ৰী" বুলি বৰ্ণনা কৰিছিল।^১০ তেওঁক প্ৰায়ে ধেমেলীয়া অভিনেতা লুচিল বলৰ সৈতে তুলনা কৰা হয়। দ্যা ৰেপ আলোচনীৰ মতে বলৰ দৰেই এই অভিনেত্ৰীগৰাকীয়ে এহাল হাঁহিৰ খোৰাক যোগাবলৈ নিজৰ মৰ্যাদা বিসৰ্জন দিবলৈও কুণ্ঠাবোধ নকৰে।^৬৭

যদিও তেওঁৰ কিছুমান চিনেমা সমালোচকৰদ্বাৰা সমালোচিত হৈছে বা বক্স অফিচত বিফল হৈছে, তথাপি ফাৰিছে বেছিভাগ চিনামাতে নিজৰ চৰিত্ৰৰ বাবে উচ্চ প্ৰশংসিত হৈছে। দ্য এ.ভি. ক্লাব-এ এবাৰ কৈছিল যে ফাৰিছক পৰ্দাত দেখাটো এক "আনন্দৰ কথা" আৰু তেওঁক এগৰাকী প্ৰতিভাশালী অভিনেতা বুলি বৰ্ণনা কৰিছিল যিয়ে বেয়া চিনেমা একোখনৰো শ্ৰেষ্ঠ উপাদান হৈ পৰে।^৬৮ লছ এঞ্জেলছ টাইমছে মন্তব্য কৰিছিল যে স্মাইলী ফেচ ছবিখন অভিনেত্ৰীগৰাকীৰ বাবে তেওঁৰ অভিনয় ক্ষমতা প্ৰদৰ্শনৰ এক ডাঙৰ সুযোগ আছিল।

ফাৰিছে নিজৰ কৰ্মজীৱনত কেইবাখনো আলোচনীৰ বেটুপাতত স্থান পাইছে; যাৰ ভিতৰত আছে ৰেগান মেগাজিন, প্লেবয়, ছেলফ, ৰেডবুক, গুড হাউচপিং, কচমোপলিটান আদি। তেওঁক ২০০৪, ২০০৯, ২০১০ আৰু ২০১১ চনত ক্ৰমে মেক্সিম আলোচনীৰ "হট ১০০" তালিকাত ৫৭, ৩৯, ৪২ আৰু ৪৪ নম্বৰ স্থানত অন্তৰ্ভুক্ত কৰা হৈছিল।^৬৯৭০

ব্যক্তিগত জীৱন

১৯৯৯ চনৰ স্বতন্ত্ৰ শ্লেচাৰ ছবি লাভৰ্ছ লেনৰ চেটত হোৱা চিনাকিৰ পাছতে ফাৰিছে অভিনেতা বেন ইন্দ্ৰাৰ সৈতে প্ৰেমৰ সম্পৰ্ক আৰম্ভ কৰিছিল।^৭১ ২০০৪ চনৰ জুন মাহত তেওঁলোকে বিবাহপাশত আবদ্ধ হয়।^৭২ ২০০৭ চনৰ এপ্ৰিল মাহত ফাৰিছে অপৰিহাৰ্য পাৰ্থক্যৰ দোহাই দি বিবাহ বিচ্ছেদৰ আৱেদন কৰে।^৭৩ ২০০৮ চনৰ ফেব্ৰুৱাৰী মাহত হোৱা তেওঁলোকৰ বিবাহ বিচ্ছেদৰ চুক্তি অনুসৰি, তেওঁ ইন্দ্ৰাক ৯,০০,০০০ মাৰ্কিন ডলাৰৰ লগতে অন্যান্য সম্পত্তি আৰু অভিনয়ৰ ৰয়েল্টি দিবলৈ সন্মত হয়।^৭৪

ইন্দ্ৰাৰপৰা বিবাহ বিচ্ছেদৰ সময়ছোৱাত আৰু দ্য হাউচ বানিৰ দৃশ্যগ্ৰহণৰ পিছত ফাৰিছে বক্ষ সংৰোপণ (breast implants) কৰিছিল, যি কথা তেওঁ ২০১১ চনৰ এপ্ৰিলত দ্য নিউয়ৰ্কীয়ক দিয়া এক সাক্ষাৎকাৰত প্ৰথমবাৰৰ বাবে প্ৰকাশ কৰিছিল।^৭৫ তেওঁ কয় যে এয়া "কেৰিয়াৰৰ বাবে নাছিল—বিবাহ বিচ্ছেদৰ সৈতে জড়িত আছিল", আৰু তেওঁৰ স্মৃতিগ্ৰন্থ আনকোৱালিফাইডত উল্লেখ কৰিছে যে তেওঁ পূৰ্বে নিজৰ বক্ষস্থলক লৈ হীনমন্যতাত ভুগিছিল।^৭৬৭৭

২০০৭ চনৰ আৰম্ভণিতে টেক মি হোম টুনাইট ছবিৰ বাবে হোৱা এক আলোচনাত ফাৰিছে অভিনেতা ক্ৰিছ প্ৰাটক লগ পাইছিল।^১০ তেওঁলোকে সোনকালেই প্ৰেমৰ সম্পৰ্ক আৰম্ভ কৰে, ২০০৮ চনৰ শেষৰফালে তেওঁলোকৰ আঙঠি পিন্ধোৱা পৰ্ব সম্পন্ন হয়^৭৮ আৰু ২০০৯ চনৰ ৯ জুলাইত ইণ্ডোনেছিয়াৰ বালিত এক সৰু অনুষ্ঠানত বিবাহপাশত আবদ্ধ হয়।^৭৯৮০ তেওঁলোকৰ জেক নামৰ এজন পুত্ৰ সন্তান আছে যি ২০১২ চনত ৯ সপ্তাহ পূৰ্বেই অকালতে জন্ম হৈছিল আৰু ঘৰলৈ যোৱাৰ আগতে এমাহ নিবিড় পৰিচৰ্যা কেন্দ্ৰত (NICU) কটাব লগা হৈছিল।^৮১৮২ পৰিয়ালটো লছ এঞ্জেলছৰ হলিউড হিলছত বাস কৰিছিল। ২০১৭ চনৰ ৬ আগষ্টত দম্পতীহালে তেওঁলোকৰ বিচ্ছেদৰ কথা ঘোষণা কৰে^৮৩৮৪ আৰু ১ ডিচেম্বৰ ২০১৭ত বিবাহ বিচ্ছেদৰ আবেদন দাখিল কৰে।^৮৫ ২০১৮ চনৰ ১৬ অক্টোবৰত তেওঁলোকৰ বিবাহ বিচ্ছেদ চৰকাৰীভাৱে সম্পন্ন হয়।^৮৬

২০১৭ চনৰ ছেপ্টেম্বৰ মাহত ফাৰিছে চিনেমেটোগ্ৰাফাৰ মাইকেল বেৰেটৰ সৈতে প্ৰেমৰ সম্পৰ্ক আৰম্ভ কৰা বুলি খবৰ ওলাইছিল, যাক তেওঁ অভাৰবৰ্ড ছবিখনত কাম কৰি থকাৰ সময়তে লগ পাইছিল।^৮৭ ২০২০ চনৰ ফেব্ৰুৱাৰী মাহত দ্য লেট লেট শ্ব’ উইথ জেমছ ক’ৰ্ডেনত অংশগ্ৰহণ কৰি তেওঁ তেওঁলোকৰ আঙঠি পিন্ধোৱা পৰ্বৰ বাতৰিটো নিশ্চিত কৰে।^৮৮ ২০২১ চনত তেওঁ নিশ্চিত কৰে যে তেওঁলোকে ৱাশ্বিংটন ষ্টেটৰ এখন আদালতত এক অনুষ্ঠানৰ জৰিয়তে বিবাহপাশত আবদ্ধ হৈছে।^৮৯

২০১৯ চনৰ থেংকছগিভিং ডিনাৰৰ সময়ত ফাৰিছ আৰু তেওঁৰ অতিথিসকলে লেক টাহোৰ এটা ভাড়াঘৰত ৰহস্যজনক স্বাস্থ্যজনিত সমস্যাৰ সন্মুখীন হৈছিল। স্থানীয় উদ্ধাৰকাৰী দলে তাত কাৰ্বন মনোক্সাইডৰ মাত্ৰা নিৰ্ধাৰিত সৰ্বাধিক সীমাৰ তুলনাত ছয়গুণ বেছি পাইছিল।^৯০

২০২৫ চনৰ ৮ জানুৱাৰীত লছ এঞ্জেলছৰ পেচিফিক পেলিছেডছত হোৱা পেলিছেডছ অগ্নিকাণ্ডৰ বাবে ফাৰিছে নিজৰ ঘৰখন হেৰুৱাবলগীয়া হয়।^৯১

জনহিতকৰ কাম

২০১৫ চনত ফাৰিছ আৰু তেওঁৰ তদানীন্তন স্বামীয়ে সুবিধাবঞ্চিত শিশুসকলক চছমা প্ৰদান কৰা এটা দাতব্য সংস্থাক ১ নিযুত ডলাৰ দান কৰিছিল। এই দানৰ বাবে ফাৰিছৰ পুত্ৰই অনুপ্ৰাণিত কৰিছিল বুলি ধৰা হয়, যিহেতু তেওঁ অকালতে জন্মগ্ৰহণ কৰিছিল আৰু দৃষ্টিশক্তিৰ সমস্যাত ভুগিছিল। ইয়াৰ উপৰি তেওঁ লছ এঞ্জেলছৰ চিনা-চাই মেডিকেল চেণ্টাৰৰ নৱজাতক নিবিড় পৰিচৰ্যা কেন্দ্ৰলৈও দান আগবঢ়াইছিল আৰু মাৰ্চ অৱ ডাইমছক (March of Dimes) সমৰ্থন কৰিছিল, যিটো সংস্থাই অকাল জন্ম, জন্মগত আসোঁৱাহ আৰু শিশু মৃত্যুৰ হাৰ ৰোধ কৰাৰ বাবে কাম কৰে।^৯২

২০১৭ চনত আন্না ফাৰিছ, এলিছন জেনী আৰু চাক লৰে একত্ৰিত হৈ প্লেণ্ড পেৰেণ্টহুড লছ এঞ্জেলছক ২,৫০,০০০ ডলাৰ দান কৰিছিল। তেওঁলোকে এমি বঁটাৰ প্ৰচাৰ অভিযান চলোৱাৰ পৰিৱৰ্তে এই ধনখিনি দান কৰাৰ সিদ্ধান্ত লৈছিল।^৯৩

২০২১ চনৰপৰা ফাৰিছে গ্ল’বেল এলায়েন্স টু প্ৰিভেণ্ট প্ৰিমেচিউৰিটি এণ্ড ষ্টিলবাৰ্থক (GAPPS) সমৰ্থন জনাই আহিছে আৰু নিজৰ ছচিয়েল মিডিয়া একাউণ্ট তথা পডকাষ্টৰ জৰিয়তে পুঁজি সংগ্ৰহৰ অভিযানৰ প্ৰসাৰ ঘটাইছে।^৯৪

চলচ্চিত্ৰপঞ্জী

চলচ্চিত্ৰ

টেলিভিছন

পডকাষ্ট

গ্ৰন্থপঞ্জী

• ফাৰিছ, আন্না; ক্ৰিছ প্ৰাটৰ পাতনিৰে. (2017). আনকোৱালিফাইড (Unqualified). হাৰপাৰ কলিন্স. ISBN 9780008239220 (নিউয়ৰ্ক টাইমছ বেষ্ট চেলাৰ; হাস্যৰসৰ বাবে গুডৰীডছ চয়েছ এৱাৰ্ডৰ মনোনীত)^{৯৫৯৬৯৭}

চাউণ্ডট্ৰেকত কণ্ঠদান

বঁটা আৰু মনোনয়ন

বাহ্যিক সংযোগ

• Anna Faris credits at the American Film Institute