অৰণ্য জোহৰ

অৰণ্য জোহৰ (জন্ম ৭ ছেপ্টেম্বৰ, ১৯৯৮) এগৰাকী ভাৰতীয় কবি। লিংগ সমতা, মানসিক স্বাস্থ্য আৰু শৰীৰৰ ইতিবাচকতা আদি বিষয়সমূহক লৈ সজাগতা সৃষ্টিৰ বাবে তেওঁ ছ’চিয়েল মিডিয়া ব্যৱহাৰ কৰে।^১ সৌন্দৰ্য্যৰ প্ৰচলিত মানদণ্ডক প্ৰত্যাহ্বান জনাবলৈ তেওঁ স্লেম কবিতা ব্যৱহাৰ কৰে।^২ অৰণ্যৰ প্ৰথম প্ৰকাশিত ৰচনা “এ ব্ৰাউন গাৰ্লছ গাইড টু জেণ্ডাৰ” ভাইৰেল হৈ পৰে আৰু আপলোড কৰাৰ দুদিনৰ ভিতৰতে ১০ লাখ দৰ্শন অতিক্ৰম কৰে।^৩ অক্ষয় কুমাৰৰ সৈতে সহযোগিতাৰ জৰিয়তে তেওঁ প্ৰথমবাৰৰ বাবে বলীউডত কথিত শব্দ সংযোজন কৰে পেডমেন চলচ্চিত্ৰখনৰ বাবে।^৪ ২০১৭ চনৰ এপ্ৰিল মাহত তেওঁ TEDxICTMumbai অনুষ্ঠানত বক্তা হিচাপে অংশগ্ৰহণ কৰে।^৫ বিভিন্ন কবি আৰু সাহিত্যিক প্ৰতিষ্ঠানে তেওঁক আমন্ত্ৰণ জনোৱাৰ লগতে তেওঁৰ কৰ্মৰ প্ৰশংসা কৰিছে।^৬

প্ৰাৰম্ভিক জীৱন আৰু শিক্ষা

অৰণ্যৰ জন্ম ৭ ছেপ্টেম্বৰ, ১৯৯৮ তাৰিখে হৈছিল আৰু তেওঁ মুম্বাই চহৰত ডাঙৰ-দীঘল হয়। তেওঁ লীলাবতীবাই পোদাৰ উচ্চ মাধ্যমিক বিদ্যালয়ত শিক্ষালাভ কৰে।^৭ তেওঁ নিজৰ ধাৰণা আৰু অনুভৱ প্ৰকাশ কৰিবলৈ স্লেম কবিতা ব্যৱহাৰ কৰে। স্লেম কবিসকলে কথিত শব্দৰ জৰিয়তে মঞ্চত পৰিৱেশন কৰি নিজৰ পৰিচয় প্ৰকাশ কৰে আৰু দৰ্শকৰ সৈতে সংযোগ স্থাপন কৰে।^৮

কেৰিয়াৰ

অৰণ্যই কৈশোৰ অৱস্থাৰপৰাই নাৰীবিদ্বেষ বিষয়ক কবিতা লিখিবলৈ আৰম্ভ কৰে।^৯ মাত্ৰ ১২ বছৰ বয়সতে তেওঁ প্ৰথমবাৰৰ বাবে দৰ্শকৰ সন্মুখত পৰিৱেশন কৰে। এখন স্থানীয় ৰেষ্টুৰেণ্ট-বাৰত এটা দলে নিয়মিতভাৱে ওপেন-মাইক অনুষ্ঠান আয়োজন কৰিছিল, য’ত পৰিৱেশনকাৰীয়ে অনুষ্ঠানৰ পিছত এটা ককটেল শ্বট লাভ কৰিছিল। তেওঁ স্বীকাৰ কৰিছে যে অংশগ্ৰহণ কৰিবলৈ তেওঁ নিজৰ বয়স সম্পৰ্কে মিছা কৈছিল আৰু তেওঁৰ মাক তেওঁক সংগ দিছিল। সপ্তম শ্ৰেণীত অধ্যয়নকালীন সময়ত তেওঁ এডিডি (মনোযোগ ঘাটতি বিকাৰ) ৰোগত আক্ৰান্ত বুলি চিনাক্ত হয়।^১০ সেয়ে তেওঁ মানসিক স্বাস্থ্য সম্পৰ্কে সজাগতা সৃষ্টিৰ বাবে কবিতাক মাধ্যম হিচাপে ব্যৱহাৰ কৰে আৰু এই বিষয়ত অধ্যয়ন কৰি লিখে।^১১ কৈশোৰ কালৰ এটা পৰিৱেশনত তেওঁৰ কবিতাৰ কেইটামান শাৰী শুনি ৪৭বছৰীয়া এজন ব্যক্তিয়ে চকুপানী ধৰে বুলি তেওঁ স্মৰণ কৰে।^১২

১৭বছৰীয়া বান্ধৱী প্ৰাচী মাশ্ৰুৰ সৈতে মিলি তেওঁ ‘ম’ৰ দ্যান মাইকছ’ নামৰ এটা সৃষ্টিশীল মঞ্চ গঢ়ি তোলে, যাৰ লক্ষ্য কবিতা, সংগীত, হাস্যকৌতুক আদি পৰিৱেশন কলাৰ বাবে সৃজনশীল প্লেটফৰ্ম প্ৰদান কৰা।^১৩ তেওঁলোকে অনলাইনত পৰিচিত হয় আৰু কানাডীয় ৰেপাৰ ড্ৰেকৰ সংগীতৰ প্ৰতি অভীৰুচিৰ জৰিয়তে ঘনিষ্ঠতা বৃদ্ধি পায়।^১৪

অৰণ্য ‘ব্লাইণ্ড পয়েট্ৰি ছেচনছ’ নামৰ কবিতা অনুষ্ঠানৰো কিউৰেটৰ, য’ত অন্ধকাৰ কোঠাত অজ্ঞাত পৰিচয়ত কবিসকলে পৰিৱেশন কৰে।^১৫ তেওঁ ‘থ্ৰ’বেক থাৰ্ছডে’ নামৰ আন এটা অনুষ্ঠানৰ সহ-কিউৰেটৰ, য’ত কবিসকলক নিজৰ প্ৰথম আৰু শেহতীয়া ৰচনা পাঠ কৰিবলৈ অনুৰোধ কৰা হয়।^১৬ তেওঁ ভিভেলৰ সৈতে যৌথভাৱে লিংগ সমতা বিষয়ক অভিযানতো কবিতা পৰিৱেশন কৰে।^১৭ ‘টু ব্লিড উইদাউট ভায়োলেন্স’ শীৰ্ষক তেওঁৰ ভিডিঅ’ই আপলোডৰ প্ৰথম সপ্তাহান্ততেই ৭ মিলিয়ন দৰ্শন লাভ কৰে।^১৮

২০১৭ চনত তেওঁ হাৰ্ভাৰ্ড মডেল ইউনাইটেড নেচনছ ভাৰত অধিৱেশনতো কবিতা আবৃত্তি কৰে।^১৯ ২০১৭ চনত তেওঁ ৰোলিং ষ্ট’ন আৰু হাৰ্পাৰ’ছ বজাৰ আলোচনীতো স্থান লাভ কৰে।^২০ এছ আৰ চি চি ইউথ কনফাৰেন্সতো তেওঁ পৰিৱেশন কৰে আৰু টিন ভ’গৰ মে’ সংখ্যাতো তেওঁ প্ৰকাশ পায়।^২১

২০১৮ চনত তেওঁ নিউয়ৰ্ক চহৰত অনুষ্ঠিত ‘গ’লকিপাৰ্ছ’ অনুষ্ঠানত অংশগ্ৰহণ কৰে, যি অনুষ্ঠান বিল এণ্ড মেলিণ্ডা গেট্‌ছ ফাউণ্ডেচনে আয়োজন কৰিছিল।^২২ সেই অনুষ্ঠানত তেওঁ এড সিৰান, মেলিণ্ডা গেট্‌ছ, বিল গেট্‌ছ, ষ্টিফেন ফ্ৰাই আদি বিশিষ্ট ব্যক্তিসকলৰ সৈতে একে মঞ্চ ভাগ কৰে।^২৩ তেওঁ শিৰ’ছ ছামিট ২০১৮তো অংশগ্ৰহণ কৰে।^২৪

ৰচনা

• “এ ব্ৰাউন গাৰ্ল’ছ গাইড টু জেণ্ডাৰ” (প্ৰথম পৰিৱেশন: ৬ মাৰ্চ ২০১৭)^২৫
• “এ ব্ৰাউন গাৰ্ল’ছ গাইড টু বিউটি” (প্ৰকাশ: ৭ জুলাই ২০১৭)^২৬
• “এ ব্ৰাউন গাৰ্ল’ছ গাইড – এ বেটাৰ টুম’ৰো” (প্ৰকাশ: ১ জানুৱাৰী ২০১৮)^২৭
• “টু ব্লিড উইদাউট ভায়োলেন্স” (প্ৰকাশ: ২৮ জুন ২০১৭)^২৮
• “ব্লিডিংৰাণী” – অক্ষয় কুমাৰৰ সৈতে (প্ৰকাশ: ১ ফেব্ৰুৱাৰী ২০১৮)^২৯
• “টু ইণ্ডিয়া: উইথ লাভ” (প্ৰকাশ: ২৯ ছেপ্টেম্বৰ ২০১৭)
• “উইমেন উইল” (প্ৰকাশ: ২৯ মাৰ্চ ২০১৮)
• “বাই নাউ অৰ পেনিক লেটাৰ” (প্ৰকাশ: ৯ এপ্ৰিল ২০১৭)^৩০

স্বীকৃতি

২০১৯ চনত তেওঁ বিবিচিৰ “১০০ উইমেন” তালিকাত স্থান লাভ কৰে।^৩১