অভয়াপুৰী

অভয়াপুৰী (IPA: ˌəbɑːjəˈpʊərɪ or ˌəbeɪjəˈpʊərɪ) (Abhayapuri) অসমৰ বঙাইগাঁও জিলাত অৱস্থিত এখন ঠাই৷ এই অঞ্চলটো গুৱাহাটীৰ পশ্চিমে ২০০ কিমি পশ্চিমে অৱস্থিত৷

ইতিহাস

ঐতিহাসিক বিজনী ৰাজ্যৰ ৰাজধানী অভয়াপুৰী নগৰৰ পূবদিশত ডুমুৰীয়া নামৰ ঠাইখন আছিল বুলি জনা যায়৷ ৰজা বিজিত নাৰায়ণে ১৬৭১ চনত এই ৰাজধানী প্ৰতিষ্ঠা কৰিছিল৷ কিন্তু ১৮৯৭ চনৰ ভূমিকম্পত ই ধ্বংসপ্ৰাপ্ত হয় আৰু দেওঁহাটীলৈ ইয়াক স্থানান্তৰ কৰা হয়৷ ৰাজবংশৰ ৰাণী অভেয়াশ্বৰীৰ নামেৰে নগৰখনৰ নাম অভয়াপুৰী ৰখা হৈছিল৷

ঐতিহাসিক বিজনী ৰাজ্যৰ ৰজাসকল

• বিজিত নাৰায়ণ (চন্দ্ৰ নাৰায়ন)
• জয় নাৰায়ণ
• শিৱ নাৰায়ণ
• বিজয় নাৰায়ণ
• মুকুন্দ নাৰায়ণ
• হৰিদেৱ নাৰায়ণ
• ইন্দ্ৰ নাৰায়ণ
• অমৃত নাৰায়ণ
• কুমুদ নাৰায়ণ
• যোগেন্দ্ৰ নাৰায়ণ
• ভৈৰবেন্দ্ৰ নাৰায়ণ

ভৌগোলিক বিৱৰণ

অভয়াপুৰী গুৱাহাটীৰ পৰা ২০০ কি: মি: আৰু জিলা সদৰ বঙাইগাঁৱৰ পৰা ২১ কি: মি: দূৰত্বত অৱস্থিত ৷ দেৱদাৰু গছেৰে পৰিবেষ্টিত বাবে ই দেৱদাৰু নগৰী বুলিও জনাজাত ৷

আন্ত:গাঁথনি

২০১১ চনৰ লোকপিয়ল অনুসৰি, অভয়াপুৰীৰ মুঠ জনসংখ্যা ১৪,৬৭১ জন৷^১ ইয়াৰে ৫২% পুৰুষ আৰু ৪৮% মহিলা৷ অভয়াপুৰীৰ জনসংখ্যাৰ ১০% ছয় বছৰ বয়সৰ অনুৰ্ধৰ৷

যাতায়ত ব্যৱস্থা

অভয়াপুৰী নগৰৰ পৰা ৭ কি: মি: দূৰত্বত ৩১ নং ৰাষ্ট্ৰীয় ঘাইপথ আৰু ৩১ (খ) নং ৰাষ্ট্ৰীয় ঘাইপথৰ সংযোগস্থল ৷ উত্তৰ পূব সীমান্ত ৰেলপথৰ নিউবঙাইগাওঁ কামাখ্যা শাখা ৰেলপথে (গোৱালপাৰা হৈ) অভয়াপুৰীক চুই গৈছে ৷ ২ নং ৰাজ্যিক ঘাইপথ নগৰখনৰ সোঁমাজেদি পাৰ হৈ গৈছে৷

শিক্ষা

অভয়াপুৰীত ভালেসংখ্যক শিক্ষা প্ৰতিষ্ঠান আছে৷ ইয়াৰে ভিতৰত উল্লেখযোগ্য হ'ল- বিদ্যালয়-

• অভয়েশ্বৰী উচ্চতৰ মাধ্যমিক আৰু বহুমুখী বিদ্যালয়

• যোগেন্দ্ৰ নাৰায়ণ সোৱৰণী ছোৱালী উচ্চতৰ মাধ্যমিক বিদ্যালয়

মহাবিদ্যালয়-

• অভয়াপুৰী মহাবিদ্যালয়

ৰাজনীতি

অভয়াপুৰী বৰপেটা লোকসভা সমষ্টিৰ অন্তৰ্ভুক্ত৷^২

উল্লেখযোগ্য ঠাই

• ৰাম ৰজাৰ ঘৰ- মোগল ৰাজত্বৰ সৈতে আহোমৰ শৰাইঘাটৰ যুদ্ধৰ সময়ত ৰাজস্থানৰ অম্বাৰ ৰাজত্বৰ ৰামসিংহই খন্দোৱা পুখুৰী
• লালমাটি-দুৰামাৰি গণেশ মন্দিৰ- ঐতিহাসিক মন্দিৰ
• লুঙাই পাহাৰ শিৱমন্দিৰ

উল্লেখযোগ্য ব্যক্তি

• ৰাণী অভয়েশ্বৰী