অঙ্কিতা চক্ৰৱৰ্তী

অঙ্কিতা চক্ৰৱৰ্তী এগৰাকী ভাৰতীয় অভিনেত্ৰী, যিয়ে মূলতঃ বঙালী চলচ্চিত্ৰ আৰু টেলিভিছনত কাম কৰে।^১২

প্ৰাৰম্ভিক জীৱন আৰু কৰ্মজীৱন

অঙ্কিতাই হাইস্কুলীয়া ছাত্ৰী হৈ থকা অৱস্থাতে থিয়েটাৰৰ জৰিয়তে অভিনয় জীৱনৰ পাতনি মেলিছিল।^৩ বঙালী টেলিভিছনত তেওঁৰ অভিষেক ঘটিছিল অগ্নিপৰীক্ষা (২০০৯) ধাৰাবাহিকৰ জৰিয়তে। ২০১১ চনৰ ধাৰাবাহিক ইষ্টি কুটুমত অৰ্থনীতিৰ অধ্যাপিকা কমলিকা মুখোপাধ্যায়ৰ চৰিত্ৰত কৰা অভিনয়ে তেওঁক জনপ্ৰিয়তা প্ৰদান কৰে।^৪

২০১৪ চনত ৰহস্যধৰ্মী থ্ৰিলাৰ ব্যোমকেশ ফিৰে এলোৰ জৰিয়তে তেওঁ বঙালী চলচ্চিত্ৰত আত্মপ্ৰকাশ কৰে।^৫৬ ইয়াৰ পিছত তেওঁ এই শৃংখলাটোৰ পৰৱৰ্তী ছবি ব্যোমকেশ বক্সী (২০১৫), ব্যোমকেশ ও চিৰিয়াখানা (২০১৬), আৰু ব্যোমকেশ ও অগ্নিবাণ (২০১৭) ত অভিনয় কৰে। তেওঁ কিৰিটি ৰয় (২০১৬), এবং কিৰিটি (২০১৭), আৰু শংকৰ মুদি (২০১৯) আদি ছবিতো ভূমুকি মাৰিছে।^৭

তেওঁ ৱেব চিৰিজৰ জগতখনতো খোজ পেলায় আৰু কলকাতা তথা মুম্বাইৰ মাজত অহা-যোৱা কৰি বঙালী আৰু হিন্দী ভাষাৰ ধাৰাবাহিকত অভিনয় কৰে।^৮ তেওঁ হইচৈৰ ধাৰাবাহিক চৰিত্ৰহীন (২০১৯), বউ কেন চাইকো (২০১৯), আৰু পৱিত্ৰ পাপিজ (২০২০) ত অভিনয় কৰিছিল।^৯ তেওঁ জি-ফাইভ (ZEE5) ধাৰাবাহিক মাফিয়া (২০২০)ত বিদুৱাৰ চৰিত্ৰত অভিনয় কৰিছিল।^১০ তেওঁৰ হিন্দী ভাষাৰ ধাৰাবাহিকসমূহৰ ভিতৰত আছে হাই তৌবা (২০২০), ক্ৰাইমছ এণ্ড কনফেশ্যনছ (২০২০), আৰু মল্লিকা শ্বেৰাৱত তথা ইশা গুপ্তাৰ সৈতে অভিনয় কৰা নকাব (২০২১)। ইয়াৰ পিছত তেওঁ অঞ্জন দত্তৰ পৰিচালনাত বঙালী ক্ৰাইম থ্ৰিলাৰ ধাৰাবাহিক ডেনী ডিটেক্টিভ ইনক (২০২২) আৰু চেভেন (২০২৩) ত অভিনয় কৰে।^১১

তেওঁ ভূমিকন্যা (২০১৮), ফাগুন বউ (২০১৮), মোহৰ (২০১৯), আৰু প্ৰথমা কাদম্বিনী (২০২০) আদি টেলিভিছন ধাৰাবাহিকতো অভিনয় অব্যাহত ৰাখে। ২০২১ চনত তেওঁ গল্পেৰ মায়াজাল আৰু দ্য ডালিং ৱাইফত অভিনয় কৰে।^১২

২০২২ চনত তেওঁ ইন্দ্ৰানী নামৰ টেলিভিছন ধাৰাবাহিকখনৰ নাম ভূমিকাত ইন্দ্ৰানী ৰয় হিচাপে অভিনয়ৰ বাবে নিৰ্বাচিত হয়।^১৩১৪ তেওঁ সাবিত্ৰী চেটাৰ্জীৰ সৈতে কাদম্বৰী আজিও (২০২২) ত অভিনয় কৰিছিল।^১৫১৬

ব্যক্তিগত জীৱন

২০২২ চনত অঙ্কিতাই তেওঁৰ দীৰ্ঘদিনীয়া বন্ধু তথা বঙালী অভিনেতা প্ৰান্তিক বেনাৰ্জীৰ সৈতে বিবাহপাশত আবদ্ধ হয়।^১৭