সুকন্যা সমৃদ্ধি যোজনা

সুকন্যা সমৃদ্ধি ভাৰত চৰকাৰৰ দ্বাৰা প্ৰস্তাৱিত এক যোজনা। এই যোজনাত ছোৱালী সন্তানৰ পিতৃ-মাতৃক লক্ষ্য কৰা হৈছে। ভৱিষ্যতে ছোৱালী সন্তানটিৰ শিক্ষা আৰু বিবাহৰ খৰছৰ বাবে এক পুঁজি নিৰ্মাণ কৰাই এই যোজনাৰ উদ্দেশ্য।^১২

২০১৫ চনৰ ২২ জানুৱাৰীত প্ৰধান মন্ত্ৰী নৰেন্দ্ৰ মোদীয়ে বেটি বচাও, বেটি পঢ়াওৰ প্ৰচাৰ-অভিযানৰ অংশ হিচাপে এই যোজনাৰ সূত্ৰপাত কৰে। এই যোজনাত বৰ্তমান ৮.৪% সুতৰ হাৰ^৩ (২০১৯ চনৰ জুলাই-ছেপ্টেম্বৰ) আৰু কৰ লাভৰ সুবিধা আছে। যিকোনো ভাৰতীয় ডাকঘৰ বা অনুমোদিত বেংকৰ শাখাত এই একাউণ্ট মুকলি কৰিব পাৰি।

২০১৬ চনৰ সুকন্যা সমৃদ্ধি একাউণ্ট নিয়মসমূহ ১২.১২.২০১৯-ত বাতিল কৰি নতুন "সুকন্যা সমৃদ্ধি একাউণ্ট যোজনা, ২০১৯" আৰম্ভ কৰা হৈছে।

সাৰাংশ

২০১৫ চনৰ ২২ জানুৱাৰীত প্ৰধান মন্ত্ৰী নৰেন্দ্ৰ মোদীয়ে হাৰিয়ানাৰ পানিপটত এই যোজনাৰ ঘোষণা কৰে।^৪৫ যিকোনো ভাৰতীয় ডাকঘৰ বা অনুমোদিত বেংকৰ শাখাত এই একাউণ্ট মুকলি কৰিব পাৰি।^৬ আৰম্ভণিতে সুতৰ হাৰ ৯.১% আছিল কিন্তু পাছত ২০১৫-১৬ অৰ্থনৈতিক বৰ্ষৰ বাবে ২০১৫ চনৰ মাৰ্চত ৯.২% কৰা হৈছিল।^৭ পাছত ২০১৬-১৭ অৰ্থনৈতিক বৰ্ষৰ বাবে এই হাৰ ৮.৬% ধাৰ্য কৰা হয়।^৮৯

ছোৱালী সন্তান জন্ম হোৱাৰে পৰা ১০ বছৰ বয়স হোৱালৈকে মাক-দেউতাকে এই একাউণ্ট খুলিব পাৰে। এটা সন্তানৰ বাবে এটা একাউণ্টহে খুলিব পাৰি। সৰ্বোচ্চ দুটা সন্তানৰ প্ৰতিটোৰে বাবে এটাকৈ মুঠ দুটা একাউণ্ট খুলিব পাৰি (যমজ বা একেলগে ওপজা তিনি সন্তান ব্যতিক্ৰম)। ভাৰতৰ যিকোনো ঠাইলৈ এই একাউণ্ট স্থানান্তৰ কৰিব পাৰি।^১০

আৰম্ভণিতে নূন্যতম ২৫০ টকা একাউণ্টত জমা দিব লাগে। ইয়াৰ পাছত ১০০ টকাৰ গুণক যিকোনো পৰিমাণ জমা কৰিব পাৰি। কিন্তু এবছৰত জমা দিব পৰা সৰ্বোচ্চ টকাৰ পৰিমাণ ₹১,৫০,০০০। এবছৰত নূন্যতম ২৫০ টকা জমা নকৰিলে ৫০ টকা জৰিমনা কৰ্তন কৰা হয়।^১০

ছোৱালীজনীৰ ১০ বছৰ হোৱাৰ পাছত তাই এই একাউণ্ট চোৱা-চিতা কৰিব পাৰে। ১৮ বছৰ হওঁতে উচ্চ শিক্ষাৰ বাবে একাউণ্টৰ ৫০% উলিয়াব পাৰি। একাউণ্ট খোলাৰ পৰা ২১ বছৰ হ'লে একাউণ্ট পূৰঠ হয়। একাউণ্ট খোলাৰ পৰা ১৫ বছৰলৈকে ইয়াত ধন জমা কৰিব পাৰি। ইয়াৰ পাছত একাউণ্টত কেৱল সুতৰ পৰিমাণ জমা হ'ব। নিৰ্দিষ্ট সময়ৰ পাছত একাউণ্ট বন্ধ নকৰিলে সুত লাভ নহ'ব।^১০ ছোৱালীজনীৰ ১৮ বছৰ হ'লে আৰু বিয়া হ'লে একাউণ্ট বন্ধ কৰিব পাৰি।^১১

সুতৰ হাৰৰ সংশোধন

মুকলি কৰাৰ সময়ত কেৱল জমা কৰা ধনৰাশিহে আয়কৰ অভিনিয়মৰ ৮০চি অনুচ্ছেদৰ আধাৰত মুঠ আয়ৰ পৰা বাদ পৰিছিল। কিন্তু ২০১৫ চনৰ বাজেটত বিত্তমন্ত্ৰী অৰুণ জেটলীয়ে ঘোষণা কৰে যে একাউণ্টত জমা হোৱা সুত আৰু একাউণ্ট পূৰঠ হোৱাৰ পাছত উলিওৱা টকাও আয়কৰৰ আওতাত নপৰে। ২০১৫ চনৰ ১ এপ্ৰিলৰ পৰা এই নিয়ম কাৰ্যকৰী কৰা হয়। বছৰি এই নিয়মাৱলীৰ পুনৰী‌ক্ষণ কৰা হ'ব।^{১১০১৩}

গ্ৰহণ

ঘোষণা কৰা দুমাহৰ ভিতৰত ২০১৫ চনৰ মাৰ্চৰ মাজভাগলৈকে এই যোজনাৰ অধীনত প্ৰায় ১,৮০,০০০ একাউণ্ট মুকলি হয়। কৰ্ণাটক, তামিলনাডু আৰু অন্ধ্ৰ প্ৰদেশত সৰ্বোচ্চ একাউণ্ট মুকলি হয়। ২০১৫ চনৰ অক্টোবৰলৈকে দেশজুৰি সুকন্যা সমৃদ্ধি একাউণ্টৰ সংখ্যা ৭৬,১৯,৬৬৮। ইমানগৰাকী ছোৱালী সন্তানৰ নামত তেওঁলোকৰ একাউণ্টত মুঠ ২৮৩৮ কোটি টকা জমা হৈছে।^১৪

একাউণ্ট পূৰঠ হ'লে বন্ধৰ নিয়ম

1. একাউণ্ট খোলাৰ দিনৰ পৰা ২১ বছৰ হ'লে ই পূৰঠ হয় আৰু ধনৰাশি উলিয়াব পাৰি। কোনো ক্ষেত্ৰত আগতেই একাউণ্ট বন্ধ অনুমোদন কৰে। ইয়াৰ বাবে নিৰ্দিষ্ট মহিলাগৰাকীয়ে নিজৰ ১৮ বছৰ হৈছে বুলি প্ৰমাণপত্ৰ দেখুৱাই বিবাহৰ বাবে একাউণ্ট বন্ধৰ আবেদন কৰিব পাৰে। বিবাহৰ দিনৰ এমাহৰ আগতে বা তিনিমাহৰ পাছত একাউণ্ট বন্ধৰ অনুমতি দিয়া নহয়।
2. পূৰঠ হ'লে একাউণ্টত জমা টকা সুতৰ সৈতে একাউণ্টৰ গৰাকীক প্ৰদান কৰা হয়। ইয়ৰ বাবে নিজৰ পৰিচয়, বাসস্থান আৰু নাগৰিকত্বৰ প্ৰমাণ জমা কৰিব লাগে।
3. মুকলি কৰাৰ ২১ বছৰ হোৱাৰ পাছত জমা টকাত কোনো সুত দিয়া নহয়।^১৫

একাউণ্টৰ স্থানান্তৰ

1. ভাৰতৰ ভিতৰত যিকোনো স্থানলৈ বা ডাকঘৰৰ পৰা বেংকলৈ আৰু বেংকৰ পৰা ডাকঘৰলৈ এই একাউণ্ট স্থানান্তৰ কৰিব পাৰি।
2. নিৰ্দিষ্ট বেংক বা ডাকঘৰৰ CBS সুবিধা থাকিলে একাউণ্ট স্থানান্তৰ বৈদ্যুতীনভাৱে কৰা হয়। ^১৬

লগতে চাওক

• বেটি বচাও, বেটি পঢ়াও