লুচিয়া অলডানা

কাৰমেন লুচিয়া অলডানা ৰোলডান (জন্ম: ৯ মাৰ্চ ১৯৯২) এগৰাকী কলম্বিয়ান মডেল আৰু সৌন্দৰ্য প্ৰতিযোগিতাৰ খিতাপ বিজয়ী, যিয়ে মিছ কলম্বিয়া ২০১২ খিতাপ জয় কৰিছিল। অলডানাই মিছ ইউনিভাৰ্ছ ২০১৩ ত কলম্বিয়াক প্ৰতিনিধিত্ব কৰিছিল। তেওঁৰ পৰৱৰ্তী মিছ কলম্বিয়া পউলিনা ভেগাই মিছ ইউনিভাৰ্ছ ২০১৪ জয় কৰাৰ পূৰ্বে অলডানা আছিল কলম্বিয়াৰ খিতাপবিহীন ধাৰাৰ অন্তিমগৰাকী প্ৰতিনিধি।^১

প্ৰাৰম্ভিক জীৱন

অলডানা কলম্বিয়াৰ কেলিৰ এক নিম্ন মধ্যবিত্ত পৰিয়ালত ডাঙৰ-দীঘল হৈছিল। তেওঁ গৃহিণী মাৰিয়া কন্সৱেলো ৰোলডান আৰু অধিবক্তা হেক্টৰ অলডানাৰ পাঁচটা সন্তানৰ ভিতৰত আটাইতকৈ সৰু।^২ অলডানাই চৰকাৰী বিদ্যালয় ইনষ্টিটিউট' টেকনিক' ইণ্ডাষ্ট্ৰিয়েলৰ পৰা শিক্ষা সমাপ্ত কৰিছিল।^৩ তেওঁ শৈশৱত কেথলিক হিচাপে ডাঙৰ-দীঘল হৈছিল যদিও ২০০৩ চনত ১১ বছৰ বয়সৰ পৰা তেওঁৰ পৰিয়াল কেলিৰ 'আভিভাণ্ডো লা ফে' নামৰ এখন প্ৰটেষ্টাণ্ট গীৰ্জাৰ সদস্য হয়। অলডানাই নিজকে প্ৰটেষ্টাণ্ট হিচাপে চিনাকি দিয়ে।^৪

শিক্ষা

সৌন্দৰ্য প্ৰতিযোগিতাত বিজয়ী হোৱাৰ সময়লৈকে তেওঁ 'ইউনিভাৰ্চিডাড অটোনোমা ডি অক্সিডেণ্ট'ত সাংবাদিকতা বিষয়ত স্নাতক বৰ্ষৰ অধ্যয়ন কৰি আছিল।^৫ তেওঁৰ এটা ডাঙৰ সপোন হৈছে এটা টেলিভিছন অনুষ্ঠানৰ প্ৰযোজক আৰু পৰিচালক হোৱা।^৬

মিছ কলম্বিয়া

২০১২ চনৰ ১২ নৱেম্বৰ, সোমবাৰে নিশা কাৰ্টাজেনা ডি ইণ্ডিয়াছৰ কনভেনচন চেন্টাৰ জুলিঅ' চিজাৰ টুৰ্বে আয়ালাৰ গেথচেমেন প্ৰেক্ষাগৃহত অনুষ্ঠিত মিছ কলম্বিয়া সৌন্দৰ্য প্ৰতিযোগিতাৰ ৭৮ সংখ্যক সংস্কৰণত মিছ ভাল্লে লুচিয়া অলডানাক মিছ কলম্বিয়া ২০১১-ৰ বিজয়ী ডেনিয়েলা আলভাৰেজে মিছ কলম্বিয়া ২০১২-ৰ মুকুট পিন্ধায়। ইয়াৰ পিছত তেওঁ ৰাছিয়াৰ মস্কোত অনুষ্ঠিত মিছ ইউনিভাৰ্ছ ২০১৩-ত অংশগ্ৰহণ কৰিছিল, কিন্তু ছেমি ফাইনেলত স্থান লাভ কৰিবলৈ সক্ষম নহ’ল।

বাহ্যিক সংযোগ

• মিছ কলম্বিয়াৰ আনুষ্ঠানিক ৱেবছাইট