লালেহ ওচমানী

লালেহ ওচমানী (Laleh Osmany, জন্ম-১৯৯২) আফগানিস্তানৰ এগৰাকী মহিলা অধিকাৰ কৰ্মী৷ তেওঁ আফগানিস্তানত মহিলাৰ নাম ৰাজহুৱাভাৱে ব্যৱহাৰ নকৰা পৰম্পৰাটোৰ বিৰোধিতা কৰি ছ’চিয়েল মিডিয়া অভিযান #WhereIsMyNameৰ আৰম্ভ কৰিছিল। তেওঁৰ কামৰ বাবে ২০২০ চনত বিবিচিৰ ১০০ গৰাকী মহিলাৰ ভিতৰত স্বীকৃতি লাভ কৰে।

জীৱনী

১৯৯২ চনত আফগানিস্তানত ওচমানীয়ে জন্মগ্ৰহণ কৰিছিল৷ পিছলৈ তেওঁ হেৰাট বিশ্ববিদ্যালয়ত ইছলামিক আইন অধ্যয়ন কৰে।^১ ২০১৭ চনত তেওঁ তাহমিনেহ ৰছিকৰ সৈতে #WhereIsMyName ছ'চিয়েল মিডিয়া অভিযানৰ তেওঁ সহ-প্ৰতিষ্ঠা কৰে।^২ আফগানিস্তানত পৰম্পৰাগতভাৱে মহিলাসকলৰ নাম ৰাজহুৱাভাৱে ব্যৱহাৰ কৰাৰ কোনো অধিকাৰ নাছিল, তাৰ প্ৰতিবাদত এই অভিযান আৰম্ভ কৰা হৈছিল।^৩এই প্ৰথাৰ অৰ্থ আছিল যে জন্ম বা মৃত্যুৰ প্ৰমাণ পত্ৰৰ দৰে চৰকাৰী নথি-পত্ৰত মহিলাৰ নাম নাথাকে, আনকি তেওঁৰ সমাধিশিলতো নাথাকে।^৪৫

আফগানিস্তানৰ মহিলা নেটৱৰ্কৰ অধ্যক্ষ মেৰী আক্ৰামীয়ে আইনখনৰ পৰিৱৰ্তনৰ খবৰটোক “মহিলাৰ পৰিচয় প্ৰতিষ্ঠা কৰাৰ দিশত এক ইতিবাচক পদক্ষেপ” বুলি অভিহিত কৰিছে।^১ আফগানিস্তানৰ এগৰাকী প্ৰাক্তন সাংসদ তথা মহিলা অধিকাৰ কৰ্মী ফাউজিয়া কুফীয়ে কয় যে এই পৰিৱৰ্তন “মহিলাৰ অধিকাৰৰ বিষয় নহয় – ই এক আইনী অধিকাৰ, এটা মানৱ অধিকাৰ”।^৬ ওচমানীৰ কামৰ আন সমৰ্থকসকলৰ ভিতৰত আছে ফাৰহাদ দৰিয়া, গায়ক-গীতিকাৰ আৰিয়ানা ছাইদ আৰু সাংসদ মৰিয়াম ছামা।^৬

কিন্তু আইনৰ পৰিৱৰ্তনক কিছুমানে আদৰণি জনোৱা নাছিল, যিয়ে ইয়াক আফগান মূল্যবোধৰ প্ৰতি অসন্মানজনক বা আমেৰিকাক সন্তুষ্ট কৰিবলৈ লোৱা ব্যৱস্থা বুলি ভাবে।^১ ২০২০ চনত আফগান চৰকাৰৰ সৈতে ক্ষমতা বিভাজনৰ বিষয়ে আলোচনাত মিলিত হৈ তালিবানে পৰিচয় পত্ৰত মহিলাৰ নাম অন্তৰ্ভুক্ত কৰাৰ বিৰোধিতা কৰে।^৩ ওচমানীয়ে এই অভিযানত ভূমিকা লোৱাৰ বাবে হিংসাত্মক ভাবুকি লাভ কৰিছে।^১

২০২০ চনত প্ৰকাশিত বিবিচিৰ ১০০ মহিলাৰ তালিকাত স্থান পোৱাৰ সময়ত আফগানিস্তানত মহিলাৰ অধিকাৰৰ ক্ষেত্ৰত ওচমানীৰ অৱদান স্বীকাৰ কৰা হৈছিল।^৭