ভেৰোনা পুথ

ভেৰোনা পুথ (ইংৰাজী ভাষা: Verona Pooth; জন্ম: ৩০ এপ্ৰিল ১৯৬৮) এগৰাকী জাৰ্মান অভিনেত্ৰী, টেলিভিছন সূত্ৰধাৰ, মডেল আৰু সৌন্দৰ্য প্ৰতিযোগিতাৰ খিতাপ বিজয়ী। তেওঁ ১৯৯৩ চনৰ মিছ জাৰ্মানী আৰু মিছ ইণ্টাৰকণ্টিনেণ্টেলৰ খিতাপ জয় কৰিছিল আৰু মিছ ইউনিভাৰ্ছ ১৯৯৩ প্ৰতিযোগিতাত জাৰ্মানীক প্ৰতিনিধিত্ব কৰিছিল।^১

প্ৰাৰম্ভিক জীৱন

পুথৰ জন্ম বলিভিয়াৰ লা পাজত ভেৰোনা ফেল্ডবাচ নামেৰে হৈছিল। তেওঁৰ পিতৃ এজন জাৰ্মান অভিযন্তা আৰ্নষ্ট ফেল্ডবাচ আৰু মাতৃ বলিভিয়ান কেশসজ্জাশিল্পী লুইচা ফেল্ডবাচ (১৯৩৫–২০১৫)।^২ ১৯৭৮ চনত তেওঁৰ পিতৃ-মাতৃৰ বিবাহ বিচ্ছেদ হয়। পুথ তেওঁৰ মাতৃৰ সৈতে পিতৃৰ জন্ম চহৰ হামবাৰ্গত ডাঙৰ-দীঘল হৈছিল।

কেৰিয়াৰ

সৌন্দৰ্য প্ৰতিযোগিতা

পুথে নব্বৈৰ দশকত কেইবাখনো সৌন্দৰ্য প্ৰতিযোগিতাত অংশগ্ৰহণ কৰিছিল। তেওঁ নিম্নলিখিত সৌন্দৰ্য প্ৰতিযোগিতাসমূহৰ চূড়ান্ত পৰ্যায়ত বিজয়ী হৈছিল: মিছ হামবাৰ্গ (১৯৯২), মিছ জাৰ্মানী (১৯৯৩), মিছ ইণ্টাৰকণ্টিনেণ্টেল (১৯৯৩), আৰু মিছ আমেৰিকান ড্ৰিম (১৯৯৫)।

চলচ্চিত্ৰ আৰু টেলিভিছন

পুথে ১৯৯৬ চনৰপৰা ১৯৯৯ চনলৈ কামোদ্দীপক টিভি অনুষ্ঠান পিপ পৰিচালনা কৰিছিল^৩ আৰু ১৯৯৮ চনৰপৰা ২০০০ চনলৈ তেওঁৰ নিজাকৈ লেট-নাইট কমেডী টকশ্ব’ ভেৰোনাছ ৱৰ্ল্ড চলাইছিল।^৪ ১৯৯৮ চনত তেওঁ আমেৰিকান ধাৰাবাহিক কোনান দ্য এডভেন্সাৰৰ এটা খণ্ডত অভিনয় কৰিছিল। ১৯৯৯ চনত অন দ্য উইংছ অফ লাভ ছবিৰ জৰিয়তে পুথে চলচ্চিত্ৰ জগতত খোজ পেলায় আৰু নব্বৈ তথা ২০০০ৰ দশকত আন কেইবাখনো ছবিত অভিনয় কৰে। ২০০৫ চনৰপৰা তেওঁ কিছুমান কাৰ্টুন চৰিত্ৰৰ বাবে কণ্ঠদান কৰিছে, যাৰ আৰম্ভণি হৈছিল চিকেন লিটল ছবিৰ জৰিয়তে।^৫

পুথে স্ক্ৰিপ্টেড ৰিয়েলিটী টিভি শ্ব’ দ্য স্বান – এনডলিচ স্কন! (২০০৪)^৬ আৰু এঞ্জেল ইম ইনছাটজ – মিট ভেৰোনা পুথ (২০০৮) উপস্থাপন কৰিছিল।^৭ তেওঁ টিভি শ্ব’ পুল চেম্পিয়নছ – প্ৰমিছ এণ্টাৰ ৱাছাৰৰ (২০১৩) বিচাৰকৰ আসনত আছিল^৮ আৰু ৬ মাটাৰ (২০১৭) অনুষ্ঠানত নিজৰ পৰিয়ালৰ জীৱন আৰু শিক্ষাৰ বিষয়ে ব্যক্তিগত ধাৰণা আগবঢ়াইছিল।^৯

পুথে ২০০৪ আৰু ২০০৬ চনত জাৰ্মান বাম্বি বঁটা লাভ কৰিছিল।^১০

অন্যান্য প্ৰচেষ্টা

১৯৯০ চনত পুথক সংগীত গোষ্ঠী চকলেটত যোগদান কৰিবলৈ কোৱা হৈছিল আৰু তেওঁ "ৰিটোম ডি লা নোচে" শীৰ্ষক একক গীত পৰিৱেশন কৰিছিল।

তেওঁ টেলিভিছনৰ কেইবাটাও বিজ্ঞাপন অভিযানৰ মুখপাত্ৰ হিচাপে কাম কৰিছে, যেনে— টেলিগেট,^১১ ইগলো,^১২ এক্সপো ২০০০^১৩ আৰু কিকৰ বাবে।^১৪

পুথে ১৯৯০ চনত হামবাৰ্গত ইমাৰচোন লেবেলৰ অধীনত নিজাকৈ ফেশ্বন সংগ্ৰহ প্ৰস্তুত কৰিছিল। ২০০২ চনৰপৰা ২০০৪ চনলৈ তেওঁ ভেৰোনাছ ড্ৰিমছ লেবেলৰ অধীনত অলংকাৰ আৰু অন্তৰ্বাসৰ ব্যৱসায় কৰিছিল।^১৫ ২০০৭ চনৰপৰা তেওঁ ছো... পাৰফেক্ট নামৰ এক প্ৰসাধন সামগ্ৰী ব্ৰেণ্ডৰ স্বত্বাধিকাৰী।^১৬

ব্যক্তিগত জীৱন

১৯৯৬ চনৰ আগষ্ট মাহত পুথে জাৰ্মান মনোৰঞ্জনকাৰী তথা সংগীতজ্ঞ ডিটৰ বোহলেনৰ সৈতে বিবাহপাশত আবদ্ধ হয়। ১৯৯৭ চনৰ মে' মাহত এই বিবাহ বিচ্ছেদ হয়।^১৭ ২০০৪ চনত তেওঁ জাৰ্মান উদ্যোগী ফ্ৰাঞ্জো পুথৰ সৈতে বিবাহপাশত আবদ্ধ হয়।^১৮ তেওঁলোকৰ ছান ডিয়েগো আৰু ৰক্কো আৰ্নষ্টো নামৰ দুটা পুত্ৰ সন্তান আছে।^১৯

চলচ্চিত্ৰপঞ্জী