বেৰহানে ৰাস-ৱৰ্ক

বেৰহানে ৰাস-ৱৰ্ক (Berhane Ras-Work) (জন্ম-১৯৪০) ইথিঅ'পিয়াৰ এজন মহিলাৰ যৌনাংগ বিকৃতকৰণৰ(FGM) বিৰোধী কৰ্মী। তেওঁ মহিলা আৰু শিশুৰ স্বাস্থ্যক প্ৰভাৱিত কৰা পৰম্পৰাগত পদ্ধতিসমূহৰ আন্তঃআফ্ৰিকান সমিতিৰ প্ৰতিষ্ঠাপক সভানেত্ৰী আছিল।[1]^১

জীৱন

খ্ৰীষ্টান ইথিঅ'পিয়ান পৰিয়ালত জন্মগ্ৰহণ কৰা বেৰহানে আছফাৱে ইউৰোপীয় পৰিচালিত প্ৰাথমিক বিদ্যালয়ত পঢ়িছিল আৰু পোন্ধৰ বছৰ বয়সত আদিছ আবাবাৰ বৰ্ডিং স্কুলত পঢ়িছিল। জেচুইট বিশ্ববিদ্যালয়ৰ পৰা শিক্ষাত তেওঁ বি এ ডিগ্ৰী লাভ কৰে।^২ আমেৰিকাত প্ৰশিক্ষিত অভিযন্তা টেৰেফে ৰাছ-ৱৰ্কক বিয়া কৰাই ১৯৭০ চনত স্বামীৰ সৈতে জেনেভালৈ যায়।^৩ জেনেভাৰ গ্ৰেজুৱেট ইনষ্টিটিউট অৱ ডেভেলপমেণ্ট ষ্টাডিজৰ পৰা আন্তঃৰাষ্ট্ৰীয় সম্পৰ্কত তেওঁ এম এ ডিগ্ৰী লাভ কৰে।^৪ টেলিভিছনৰ এটা অনুষ্ঠানে মহিলাৰ যৌনাংগ বিকৃতিৰ বিষয়ে "তেওঁৰ চিন্তাৰ প্ৰক্ৰিয়াটো আৰম্ভ কৰিছিল"৷ তেওঁ সচেতনতা বৃদ্ধিৰ হকে কাম কৰিবলৈ চিন্তা কৰিলে।^৩ ১৯৭৭ চনত জেনেভাত বাস কৰা কূটনীতিবিদ আৰু কৰ্মীসকলে মহিলা আৰু শিশুৰ স্বাস্থ্যক প্ৰভাৱিত কৰা পৰম্পৰাগত পদ্ধতিৰ ওপৰত এন জি অ’ ৱৰ্কিং গ্ৰুপ প্ৰতিষ্ঠা কৰে। এইটো ১৯৮৪ চনত প্ৰতিষ্ঠা হোৱা আই এ চিৰ পূৰ্বসূৰী আছিল। ডাকাৰত অনুষ্ঠিত হোৱা উদ্বোধনী সভাত ৰাস-ৱৰ্কক প্ৰথম আই এ চিৰ সভাপতি নিৰ্বাচিত কৰা হয়।^৫

১৯৯৫ চনত বেৰহানে ৰাস-ৱৰ্কে ৰাষ্ট্ৰসংঘৰ জনসংখ্যা বঁটা লাভ কৰে।^৪ ২০১০ চনত তেওঁক অষ্ট্ৰিয়া গণৰাজ্যৰ সেৱাৰ বাবে গ্ৰেণ্ড ডেকোৰেচন অৱ অনাৰ বঁটাৰে সন্মানিত কৰা হয়।^৬