আনুবংশিক সম্পদৰ প্ৰৱেশাধিকাৰৰ ওপৰত নাগোয়া প্ৰট'কল আৰু জৈৱিক বৈচিত্ৰ্যৰ সন্মিলনলৈ তেওঁলোকৰ ব্যৱহাৰৰ পৰা উদ্ভৱ হোৱা লাভালাভৰ ন্যায্য আৰু ন্যায়সঙ্গত ভাগ-বতৰা চমুকৈ নাগোয়া প্ৰট'কল (Nagoya Protocol) ১৯৯২ চনত অনুষ্ঠিত জৈৱবৈচিত্ৰৰ সন্মিলনৰ পৰিপূৰক চুক্তি হিচাপে ২০১০ চনত স্বাক্ষৰিত এখন চুক্তি। ইয়াৰ লক্ষ্য হৈছে জৈৱবৈচিত্ৰৰ সন্মিলনৰ তিনিটা মুখ্য উদ্দেশ্যৰ অন্যতম উদেশ্য আনুবংশিক সম্পদৰ ব্যৱহাৰৰ ফলত উদ্ভৱ হোৱা লাভালাভৰ ন্যায্য আৰু ন্যায়সঙ্গত ভাগ-বতৰা কৰাক বিশ্বব্যাপী ৰূপায়ন কৰা। এই চুক্তিয়ে জৈৱ বৈচিত্ৰ্যৰ সংৰক্ষণ আৰু বহনক্ষম ব্যৱহাৰত অৰিহণা যোগায়। ই ইয়াৰ চুক্তিবদ্ধ পক্ষবোৰৰ বাবে আনুবংশিক সম্পদৰ প্ৰৱেশাধিকাৰ, লাভালাভ-ভাগ-বতৰা আৰু অনুপালনৰ সন্দৰ্ভত ব্যৱস্থা লোৱাৰ আইনী বাধ্যবাধকতা নিৰ্ধাৰণ কৰে। ইয়াক প্ৰৱেশাধিকাৰ আৰু লাভালাভ ভাগ বতৰাৰ ওপৰত নাগোয়া প্ৰট'কল বুলিও জনা যায়।
২০১০ চনৰ ২৯ অক্টোবৰ তাৰিখে জাপানৰ নাগোয়া চহৰত নাগোয়া প্ৰট'কল গৃহীত কৰা হৈছিল আৰু ২০১৪ চনৰ ১২ অক্টোবৰ তাৰিখে কাৰ্যকৰী হৈছিল। ২০২০ চনৰ অক্টোবৰ মাহলৈকে ইয়াক বিশ্বব্যাপী ১২৮টা দলে অনুমোদন জনাইছে। অনুমোদন জনোৱা দলৰ ভিতৰত ১২৭ খন ৰাষ্ট্ৰসংঘৰ সদস্য ৰাষ্ট্ৰ আৰু ইউৰোপীয় সংঘ। লগতে অতিৰিক্ত আমোলাতন্ত্ৰ আৰু আইনে জৈৱ বৈচিত্ৰ্যৰ নিৰীক্ষণ আৰু সংগ্ৰহ, সংৰক্ষণ, সংক্ৰামক ৰোগৰ প্ৰতি আন্তৰ্জাতিক সঁহাৰি আৰু গৱেষণাৰ বাবে ক্ষতিকাৰক হ'ব পাৰে বুলি উদ্বেগ প্ৰকাশ কৰা হৈছে।
উৎস আৰু অনুজ্ঞাপত্ৰ
উৎস: অসমীয়া ৱিকিপিডিয়া। এই প্ৰবন্ধটো অসমীয়া ৱিকিপিডিয়াৰ “নাগোয়া প্ৰট'কল” প্ৰবন্ধৰ সংশোধন ৩১৯৪০৬ (২৪ এপ্ৰিল ২০২২)ৰ পৰা আনি অসমীয়া বিশ্বকোষৰ গাঁথনিলৈ ৰূপান্তৰ কৰা হৈছে। মূল লেখকসকলৰ তালিকা সম্পাদনা-ইতিহাসত উপলব্ধ। পাঠ্য CC BY-SA 4.0।