দ্য ৰিটাৰ্ণ অৱ চান্দু

দ্য ৰিটাৰ্ণ অৱ চান্দু (ইংৰাজী ভাষা: The Return of Chandu) হৈছে ১৯৩৪ চনত নিৰ্মিত আমেৰিকা যুক্তৰাষ্ট্ৰৰ ১২টা খণ্ডৰ এখন ফেণ্টাছী চলচ্চিত্ৰ ধাৰাবাহিক, যিখন চান্দু দ্য মেজিকিয়ান নামৰ ৰেডিঅ' ধাৰাবাহিকখনৰ ওপৰত আধাৰিত। ইয়াৰ প্ৰযোজনা কৰিছিল চ'ল লেচাৰে আৰু পৰিচালনা কৰিছিল ৰায় টেলৰে। ইয়াত বেলা লুগোছিয়ে ফ্ৰেংক চেণ্ডলাৰ (চান্দু দ্য মেজিকিয়ান নামেৰে পৰিচিত) চৰিত্ৰত অভিনয় কৰিছিল।

এই ধাৰাবাহিকখন ছবিঘৰসমূহৰ বাবে তিনিটা পদ্ধতিৰে মুক্তি দিয়া হৈছিল: প্ৰতি সপ্তাহত সমান দৈৰ্ঘ্যৰ বাৰটা অধ্যায়ৰ এক পৰম্পৰাগত ধাৰাবাহিক হিচাপে; প্ৰথম চাৰিটা খণ্ডৰে গঠিত এখন ৬০ মিনিটৰ পূৰ্ণদৈৰ্ঘ্যৰ ছবি হিচাপে (যাৰ পিছত বাকী থকা ৮টা খণ্ড সপ্তাহিক ধাৰাবাহিক ৰূপত দেখুওৱা হৈছিল); অথবা কেৱল প্ৰথম চাৰিটা অধ্যায়ৰ এখন স্বতন্ত্ৰ ছবি হিচাপে (য’ত কাহিনীটোৰ এক দৃশ্যমান সমাধান আছিল)। ১৯৩৫ চনত ধাৰাবাহিকখনৰ বাকী থকা ৮টা খণ্ড সম্পাদনা কৰি ৬৫ মিনিট দৈৰ্ঘ্যৰ দ্বিতীয়খন ছবি হিচাপে মুক্তি দিয়া হৈছিল, যাৰ নাম আছিল চান্দু অন দ্য মেজিক আইলেণ্ড।

এই ধাৰাবাহিকখনত লুগোছিয়ে খলনায়কৰ পৰিৱৰ্তে নায়ক হিচাপে অভিনয় কৰিছিল, যিটো তেওঁৰ কেৰিয়াৰৰ খুব কম সংখ্যক উদাহৰণৰ ভিতৰত এটা। উল্লেখযোগ্য যে, ১৯৩২ চনৰ ছবি চান্দু দ্য মেজিকিয়ানত লুগোছিয়ে মুখ্য খলনায়ক ৰক্সৰৰ চৰিত্ৰতহে অভিনয় কৰিছিল।^১

কাহিনীৰ সাৰাংশ

ফ্ৰেংক চেণ্ডলাৰ (এক বিৰল নায়কৰ চৰিত্ৰত বেলা লুগোছি): এজন শক্তিশালী কিন্তু দয়ালু ব্যক্তি যিয়ে নিজৰ জীৱনৰ বেছিভাগ সময় প্ৰাচ্যত অতিবাহিত কৰিছে। তাত তেওঁ "চান্দু দ্য মেজিকিয়ান" নামেৰে বিখ্যাত আৰু তেওঁৰ "শুভ্ৰ যাদু"ৰ (White Magic) অসাধাৰণ দক্ষতাৰ বাবে পৰিচিত। তেওঁ মিচৰৰ ৰাজকুমাৰী নাডজীৰ প্ৰেমত পৰে, যিয়ে শেহতীয়াকৈ আমেৰিকালৈ পলাই আহিছে আৰু বৰ্তমান কেলিফৰ্ণিয়াৰ বেভাৰ্লি হিলছত থকা চেণ্ডলাৰ পৰিয়ালৰ ঘৰত বাহৰ পাতিছে। ৰাজকুমাৰী নাডজীয়ে বিশ্বাস কৰে যে তেওঁ মিচৰত নিজৰ বিপদবোৰ এৰি থৈ আহিছে, কিন্তু যেতিয়া চেণ্ডলাৰ পৰিয়ালে তেওঁৰ সন্মানত এটা পাৰ্টিৰ আয়োজন কৰে, তেতিয়া তেওঁ গম পায় যে তেওঁৰ জীৱন এতিয়াও বিপন্ন হৈ আছে। মিচৰৰ পৰা ঘৰলৈ উভতি অহা চান্দুক বিমানবন্দৰত শত্ৰুৱে খেদি ফুৰে আৰু তেওঁ কেৱল নিজৰ যাদুকৰী আঙঠিটো ব্যৱহাৰ কৰিহে ৰক্ষা পৰে। পাৰ্টিত কিছুমান সন্দেহজনক অতিথিয়ে ৰাজকুমাৰী নাডজীক বিষ দি হত্যা কৰাৰ ষড়যন্ত্ৰ কৰে আৰু চান্দুৱে সঠিক সময়ত উপস্থিত হৈ তাইৰ হাতৰ পৰা বিষাক্ত মদৰ গিলাচটো থপিয়াই লয়।

চান্দুৱে নাডজীক কি ঘটিছে আৰু তেওঁ কিয় বিপদত আছে সেই কথা বুজাই দিয়ে। ক'লা যাদুৰ এদল তান্ত্ৰিকৰ গোট 'চেক্ট অৱ উবাষ্টি'য়ে শেহতীয়াকৈ তেওঁলোকৰ শেষ উচ্চ পুৰোহিতিনী ওচানাৰ সম্পূৰ্ণৰূপে সংৰক্ষিত মৃতদেহটো উদ্ধাৰ কৰিছে। কিংবদন্তি অনুসৰি ওচানা এদিন পুনৰ জীৱিত হ'ব আৰু "লুপ্ত মহাদেশ" লেমুৰিয়া পুনৰ শাসন কৰিব; অৱশ্যে তেওঁক পুনৰ জীৱিত কৰিবলৈ উবাষ্টিসকলে এজন মানুহ বলি দিব লাগিব আৰু সেই বলি ৰাজকীয় তেজৰ মিচৰীয় ৰাজকুমাৰী হ’ব লাগিব। চান্দুৱে কয়: "ৰাজকুমাৰী নাডজী একমাত্ৰ জীৱিত মিচৰীয় ৰাজকুমাৰী আৰু উবাষ্টিসকলে তেওঁক পাবলৈ যিকোনো পৰ্যায়লৈ যাব পাৰে"। তান্ত্ৰিকৰ দলটোৱে নাডজীক বন্দী কৰি তেওঁলোকৰ দেৱতাৰ ওচৰত বলি দিবলৈ বদ্ধপৰিকৰ।

দ্য ৰিটাৰ্ণ অৱ চান্দুৰ ১২টা অধ্যায়ত চান্দু আৰু তেওঁৰ পৰিয়ালৰ (ভনীয়েক, ভাগিন আৰু ভতিজা) বিভিন্ন দুঃসাহসিক অভিযানসমূহ দেখুওৱা হৈছে। তেওঁলোকে যাদুকৰী আৰু অন্যান্য উপায়েৰে নাডজীক উবাষ্টিসকলৰ পৰা ৰক্ষা কৰিবলৈ সংগ্ৰাম কৰে। তেওঁলোকৰ এই যাত্ৰাই শেষত তেওঁলোকক লেমুৰিয়া দেশলৈ লৈ যায়, য’ত চান্দুৱে নাডজীৰ জীৱন বচাবলৈ নিজৰ প্ৰেম ত্যাগ কৰিব পাৰিব নে নাই সেই বিষয়ে সিদ্ধান্ত ল’বলগীয়া হয়।

অভিনয় শিল্পী

• বেলা লুগোছি (ফ্ৰেংক চেণ্ডলাৰ ওৰফে চান্দু দ্য মেজিকিয়ান হিচাপে)
• মাৰিয়া আলবা (ৰাজকুমাৰী নাডজী হিচাপে)
• ক্লাৰা কিম্বল ইয়ং (ডৰোথী ৰিজেণ্ট হিচাপে)
• ডিন বেণ্টন (বব ৰিজেণ্ট হিচাপে)
• ফিলিস লুডৱিগ (বেটী ৰিজেণ্ট হিচাপে)
• লুচিয়ান পিৰাইভাল (বিন্ধিয়ান হিচাপে) [অধ্যায় ১-৪]
• চিৰিল আৰ্মব্ৰিষ্টাৰ (সহযোগী সূত্ৰ হিচাপে) [অধ্যায় ১-৪]
• মাৰডক মেকুৱেৰী (উবাষ্টিৰ "কণ্ঠ" হিচাপে) [অধ্যায় ৪-১২]
• উইলফ্ৰেড লুকাচ (কেপ্তেইন উইলছন হিচাপে) [অধ্যায় ৪-১২]
• জেক জে. ক্লাৰ্ক (বিত্ৰাছ, উবাষ্টিৰ উচ্চ পুৰোহিত হিচাপে) [অধ্যায় ৪-১২]
• জোচেফ চুইকাৰ্ড (টাইবা, শুভ্ৰ যাদুকৰ হিচাপে) [অধ্যায় ৮-১২]

অধ্যায়ৰ তালিকা

1. দ্য চুজেন ভিকটিম (The Chosen Victim)
2. দ্য হাউচ ইন দ্য হিলছ (The House in the Hills)
3. অন দ্য হাই চিচ (On the High Seas)
4. দ্য ইভিল আই (The Evil Eye)
5. দ্য ইনভিজিবল চাৰ্কল (The Invisible Circle)
6. চান্দুছ ফলছ ষ্টেপ (Chandu's False Step)
7. মিষ্টেৰিয়াছ মেজিক (Mysterious Magic)
8. দ্য এজ অৱ দ্য পিট (The Edge of the Pit)
9. দ্য টেৰৰ ইনভিজিবল (The Terror Invisible)
10. দ্য ক্ৰাছিং ৰক (The Crushing Rock)
11. দ্য আপলিফ্টেড নাইফ (The Uplifted Knife)
12. দ্য নাইফ ডিচেণ্ডছ (The Knife Descends)