তাৰাছ পাহাৰ

তাৰাছ পাহাৰ (ইউক্ৰেইনীয়: Тарасова гора) বা চেৰনেচা হোৰা (Чернеча гора, অৰ্থাৎ "সন্ন্যাসীৰ পাহাৰ") হৈছে ইউক্ৰেইনৰ কানিভ চহৰৰ সমীপত দ্নীপাৰ নদীৰ পাৰত অৱস্থিত এখন পাহাৰ। ই শ্বেভচেংক’ ৰাষ্ট্ৰীয় সংৰক্ষিত অঞ্চলৰ এক গুৰুত্বপূৰ্ণ ঐতিহাসিক আৰু সাংস্কৃতিক স্থান। এই পাহাৰত বিখ্যাত ইউক্ৰেইনীয় কবি আৰু শিল্পী তাৰাছ শ্বেভচেংক’ৰ সমাধি অৱস্থিত। ১৮৬১ চনৰ ২২ মে'ত তেওঁৰ নশ্বৰ দেহ চেৰনেচা পাহাৰত পুনৰ সমাধিস্থ কৰা হৈছিল।^১

প্ৰথমাৱস্থাত ১৮৬১ চনৰ ১০ মাৰ্চত ছেইণ্ট পিটাৰ্ছবাৰ্গত মৃত্যু হোৱা শ্বেভচেংক’ক তাত থকা স্মলেনস্কি কবৰস্থানত সমাধিস্থ কৰা হৈছিল। কিন্তু তেওঁৰ ইচ্ছা অনুসৰি আৰু তেওঁৰ বন্ধুসকলৰ প্ৰচেষ্টাত নশ্বৰ দেহ ইউক্ৰেইনলৈ স্থানান্তৰ কৰা হয়। ২২ মে'ত তেওঁক কানিভৰ ওচৰৰ চেৰনেচা পাহাৰত পুনৰ সমাধিস্থ কৰা হয়। এই সমাধিৰ পিছতেই পাহাৰখন তাৰাছ পাহাৰ নামেৰে অধিক পৰিচিত হৈ পৰে।^২

এই পাহাৰখন পূৰ্বে কানিভৰ পবিত্ৰ ডৰমিচিয়ন মঠৰ অন্তৰ্গত আছিল। মঠটো একাদশ শতিকাৰ পৰাই এই অঞ্চলত অস্তিত্বশীল আছিল বুলি উল্লেখ কৰা হয়। মঠখন ইউক্ৰেইনৰ কেইবাজনো হেটমেনৰ সমাধিস্থল হিচাপেও পৰিচিত আছিল।

১৮৮৪ চনত তাৰাছ শ্বেভচেংকৰ সমাধিৰ ওচৰত তাৰাছোভা স্বিত্লিত্সিয়া নামেৰে এখন লোকসংগ্ৰহালয় স্থাপন কৰা হৈছিল আৰু সমাধিৰ ওপৰত এটা স্মাৰক ক্ৰছ স্থাপন কৰা হৈছিল।^৩

১৯১৪ চনত শ্বেভচেংক’ৰ জন্মৰ শতবাৰ্ষিকী উপলক্ষে ৰাছিয়া চৰকাৰে তেওঁৰ সমাধিস্থললৈ জনসাধাৰণৰ তীৰ্থযাত্ৰা নিয়ন্ত্ৰণ কৰিবলৈ জেণ্ডাৰ্মছ আৰু কচাক সৈন্য মোতায়েন কৰিছিল।

১৯২৫ চনৰ ২০ আগষ্টত ইউক্ৰেইনৰ চৰকাৰে তাৰাছ শ্বেভচেংকৰ সমাধিৰ অঞ্চলক এখন ৰাজ্যিক সংৰক্ষিত অঞ্চল হিচাপে ঘোষণা কৰে। এই সংৰক্ষণৰ উদ্দেশ্য আছিল শ্বেভচেংকৰ সমাধি আৰু ইয়াৰ সৈতে জড়িত ঐতিহাসিক-সাংস্কৃতিক ঐতিহ্য সংৰক্ষণ কৰা।^৪

১৯৩০ৰ দশকত শ্বেভচেংকৰ সমাধিস্থলক কেন্দ্ৰ কৰি এটা বৃহৎ স্মাৰক-সমষ্টি গঢ়ি তোলাৰ কাম আৰম্ভ হয়। নতুন সংগ্ৰহালয় ভৱনৰ নক্সা ইউক্ৰেইনীয় স্থপতিবিদ ভাছিল ক্ৰিচেভস্কি আৰু পেট্ৰ’ কষ্টীৰকোই প্ৰস্তুত কৰিছিল। ১৯৩৯ চনত ভাস্কৰ মেটভে মেনিগাৰ আৰু স্থপতিবিদ ইয়েভগেনি লেভিনছনৰ নক্সা অনুসৰি শ্বেভচেংকৰ সমাধিৰ ওপৰত বৃহৎ ব্ৰঞ্জৰ স্মাৰক মূৰ্তি স্থাপন কৰা হয়। একে বছৰতে শ্বেভচেংকৰ সাহিত্য-স্মাৰক সংগ্ৰহালয়ো আনুষ্ঠানিকভাৱে মুকলি কৰা হয়।^৫

দ্বিতীয় বিশ্বযুদ্ধৰ সময়ত সংগ্ৰহালয় আৰু স্মাৰক-সমষ্টি ক্ষতিগ্ৰস্ত হৈছিল যদিও পিছত ইয়াক পুনৰ নিৰ্মাণ কৰা হয়। ১৯৮৯ চনত এই সংৰক্ষিত অঞ্চলটোৱে ৰাষ্ট্ৰীয় মৰ্যাদা লাভ কৰে আৰু পিছলৈ ইয়াৰ নাম শ্বেভচেংক’ ৰাষ্ট্ৰীয় সংৰক্ষিত অঞ্চল ৰখা হয়।

১৯৭৮ চনত ইউক্ৰেইনীয় ভাষা, সংস্কৃতি আৰু ইতিহাসৰ ওপৰত ছোভিয়েট দমন-পীড়নৰ প্ৰতিবাদত ওলেক্সা হিৰ্নিক নামৰ এজন ব্যক্তিয়ে তাৰাছ পাহাৰত আত্মাহুতি দিছিল। তেওঁৰ এই কাৰ্য ইউক্ৰেইনীয় জাতীয় আৰু সাংস্কৃতিক অধিকাৰৰ বাবে কৰা এক প্ৰতিবাদ হিচাপে স্মৰণ কৰা হয়।

বৰ্তমান তাৰাছ পাহাৰ শ্বেভচেংক’ ৰাষ্ট্ৰীয় সংৰক্ষিত অঞ্চলৰ কেন্দ্ৰীয় অংশ আৰু ইউক্ৰেইনৰ এক গুৰুত্বপূৰ্ণ ঐতিহাসিক-সাংস্কৃতিক স্থান। পাহাৰখনত তাৰাছ শ্বেভচেংকৰ সমাধি, তেওঁৰ স্মাৰক আৰু সাহিত্য-স্মাৰক সংগ্ৰহালয় অৱস্থিত। দেশ-বিদেশৰ বহু দৰ্শনাৰ্থীয়ে প্ৰতি বছৰে এই স্থান পৰিদৰ্শন কৰে।

চেৰনেচা হোৰা বা তাৰাছ পাহাৰক ইউক্ৰেইনৰ জাতীয় গুৰুত্বসম্পন্ন ঐতিহাসিক, প্ৰাকৃতিক আৰু সাংস্কৃতিক ঐতিহ্যস্থল হিচাপে গণ্য কৰা হয়।